Wanem taem nao Christian sista mas kavarem hed and why nao olsem? Wanem nao Bible talem? Paul storyim samting wea savve helpem iumi for disaed gud long diswan for mekhae long God. (1 Corinth 11:3-16) Paul storyim tufala samting for ting raonem: (1) wanem taem nao Christian sista mas kavarem hed? (2) why nao hem willing for kavarem hed?

Wanem taem nao Christian sista mas kavarem hed? Paul storyim taem hem duim tufala samting: prea and wei for talemaot toktok bilong God. (Verse 4, 5) Prea hem wei for story long Jehovah for worshipim hem. Long distaem, for talemaot toktok bilong God hem minim for teachim narawan abaotem Bible. So waswe, Paul sei Christian sista mas kavarem hed evritaem wea hem prea or teachim narawan abaotem Bible? Nomoa. Bat long samfala taem hem mas kavarem hed.

Paul storyim olketa taem wea sista mas duim diswan long famili and kongregeson. Hem sei: “Man hem hed bilong woman . . . Woman wea no kavarem hed bilong hem taem hem prea or talemaot toktok bilong God hem mek shame long hed [hasband] bilong hem.” (Verse 3, 5) Long famili, Jehovah markem hasband for hed long waef. Waef bae mek shame long  hasband sapos hem duim eni waka wea Jehovah markem for hasband, and hem no showimaot hem luksavve hasband hem hed long famili. Sapos waef mas duim Bible study taem hasband stap, hem mas kavarem hed for showimaot hem luksavve hasband hem hed bilong hem. Hem mas duim datwan sapos hasband hem baptaes or nomoa bikos hasband hem hed long famili. * Sapos waef prea or teachim narawan taem young boy bilong hem wea baptaes finis hem stap, hem mas kavarem hed. Hem duim olsem bikos hem brata long kongregeson wea baptaes finis and no bikos hem hed long famili.

Nara samting wea Paul storyim hem abaotem kongregeson. Hem sei: “Maet eni man tingse hem no stret for woman kavarem hed bilong hem, bat datwan hem no wei bilong iumi and hem no wei bilong olketa kongregeson bilong God tu.” (Verse 16) Long kongregeson, olketa brata wea baptaes nao leadim kongregeson. (1 Timothy 2:11-14; Hebrew 13:17) Olketa brata nomoa savve kamap elder and ministerial servant. God givim waka long olketa for lukaftarem olketa sheepsheep bilong hem. (Acts 20:28) Bat samfala taem, samting happen wea mekem Christian sista mas duim waka wea Christian brata wea baptaes and wea fit nomoa savve duim. Maet sista leadim grup for preach bikos no eni Christian brata wea fit hem stap for duim datwan. Or maet hem duim Bible study and brata wea baptaes hem stap tu long datfala taem. * Taem sista duim samting hia, hem mas kavarem hed for showimaot hem luksavve hem duim waka wea fitim olketa brata for duim. Diswan hem bikos olketa waka hia hem waka bilong kongregeson.

Bat sista bae no kavarem hed taem hem duim samfala nara samting for worshipim Jehovah. Hem no kavarem hed taem hem ansa long meeting, waka witim hasband long preaching or witim brata wea baptaes, or taem hem study or prea witim pikinini bilong hem wea no baptaes. Maet sista garem samfala  kwestin abaotem sapos hem shud kavarem hed or nomoa. Long taem olsem, hem gud for hem duim research. * Sapos hem no sure yet and sapos konsens bilong hem sei hem mas kavarem hed, hem olraet nomoa for duim datwan olsem piksa showimaot.

Why sista hem willing for kavarem hed. Long verse 10, iumi lukim tufala reason why sista bae willing for kavarem hed. Hem sei: “Bikos long olketa angel, woman mas kavarem hed bilong hem for showimaot hem stap anda long hasband bilong hem.” First samting, tingim disfala toktok “showimaot hem stap anda.” Taem sista kavarem hed, hem showimaot hem luksavve Jehovah markem olketa brata wea baptaes for leadim evriwan long kongregeson. So hem showimaot hem lovem Jehovah God and faithful long hem. Mek-tu reason hem disfala toktok “bikos long olketa angel.” Wanem nao tingting bilong olketa angel taem olketa lukim woman kavarem hed bilong hem?

Olketa angel hapi for lukim evriwan long organization bilong Jehovah long heven and long earth stap anda long olketa hed wea Jehovah markem. Olketa angel kasem gud samting tu taem olketa lukim olketa man wea sin willing for stap anda. Long arrangement bilong Jehovah olketa angel tu mas stap anda, nomata staka angel no duim olsem long bifor. (Jude 6) Maet olketa angel lukim wanfala sista garem bigfala savve, savve tumas for duim samfala samting, and kleva tumas winim wanfala brata long kongregeson wea baptaes, bat olketa lukim sista hia stap anda long datfala brata. Maet sista hia hem anointed Christian wea bae rul witim Christ long heven and bae duim waka wea hae winim olketa angel. Datwan hem nambawan example for olketa angel lukim! Tru tumas, evri sista garem nambawan privilege for  staka million angel wea faithful lukim olketa hambol for obey taem olketa duim samting wea showimaot olketa faithful and stap anda!