1, 2. Which wan long thrifala samting hia nao bae iumi chusim taem iumi laek duim hapitaem?

TINGIM sapos iu redi for kaikaim wanfala naes swit frut, bat then iu lukim lelebet part hem rotten. Wanem nao bae iu duim? Iu savve chus for kaikaim full wan, torowem, or iu savve katemaot lelebet part wea rotten and kaikaim part wea gud. Which wan long thrifala samting hia nao bae iu duim?

² Iumi savve sei hapitaem hem olsem datfala frut. Samfala taem, iu laek duim hapitaem, bat iu luksavve staka hapitaem distaem barava nogud olsem frut wea rotten. So wanem nao bae iu duim? Maet samfala acceptim nomoa hapitaem wea no fitim Christian. Maet olketa narawan no duim eni hapitaem mekem olketa no kasem eni nogud samting. Bat maet samfala narawan keakea for no duim eni nogud hapitaem bat long samfala taem olketa savve enjoyim hapitaem wea hem gud. Which wan long thrifala samting hia nao bae iu chusim mekem iu gohed kasem gud samting from love bilong God?

3. Wanem nao bae iumi story raonem?

³ Klosap iumi evriwan bae chusim mek-thri samting. Iumi luksavve iumi shud duim samfala hapitaem, bat iumi laek duim gudfala hapitaem nomoa. Dastawe iumi mas ting raonem wanem nao bae helpem iumi for luksavve wanem hapitaem nao hem gud and wanem hapitaem hem nogud. Firstaem iumi bae storyim hao hapitaem iumi chusim savve affectim worship bilong iumi.

4. From iumi dedicate long Jehovah, wanem kaen hapitaem nao iumi bae chusim?

⁴ Wanfala taem bifor wanfala olo Witness wea baptaes long 1946, hem sei: “Mi mas stap evritaem and lisin gud long evri baptism tok. Mi ting long datwan olsem mi tu bae baptaes.” Why nao hem duim datwan? Hem sei: “Taem mi gohed for tingim mi dedicate finis long Jehovah, datwan helpem mi gohed faithful long hem.” Maet iu tu garem datkaen tingting. For tingim evritaem hao iu promis long Jehovah for worshipim hem long full laef bilong iu, datwan bae helpem iu gohed faithful long hem. (Readim Ecclesiastes 5:4.) Taem iu evritaem tingim iu dedicate finis long Jehovah, iu bae tinghae long ministry wea iu duim. Iu bae duim tu olketa samting wea mekem Jehovah hapi and chusim gudfala hapitaem. Aposol Paul mekhae long datwan taem hem sei: “Nomata iufala kaikai or drink or duim eni nara samting, evri samting wea iufala duim mas givim praise long God.”—1 Corinth 10:31.

5. Wanem nao Leviticus 22:18-20 talem wea helpem iumi for minim warning long Rome 12:1?

⁵ From iu worshipim Jehovah, datwan bae affectim evri samting wea iu duim. Long leta wea Paul raetem for olketa long Rome, hem  talem toktok wea mekem olketa Christian for ting raonem gud datwan. Hem sei: “Givim body bilong iufala olsem wanfala sakrifaes wea laef and holy and wea God savve hapi long hem. Long wei olsem, bae iufala worshipim God witim gudfala tingting.” (Rome 12:1) Body savve minim tu, tingting, heart, and strong bilong iu. Iu savve iusim evri samting hia for worshipim God. (Mark 12:30) Paul sei wei for iusim full soul long waka bilong God, hem wanfala sakrifaes. Datfala toktok “sakrifaes” wea Paul iusim hem wanfala warning. Long Law bilong Moses, God no hapi long sakrifaes wea eni samting nogud long hem. (Leviticus 22:18-20) Long sem wei tu, sapos Christian duim samting wea no fitim, God bae no hapi long worship bilong hem. Wanem nao savve mekem sakrifaes bilong iumi hem nogud?

6, 7. Wanem nao savve mekem body bilong Christian for no klin, and worship bilong hem bae hao?

⁶ Paul sei olsem long olketa Christian long Rome: “No . . . letem sin bossim body bilong iufala.” (Rome 6:12-14) Long Rome 3:13-18, Paul storyim samfala nogud samting wea body wea sin savve duim. Bible story olsem abaotem olketa man wea sin. Hem sei: “Mouth bilong olketa fulap witim nogud toktok.” Christian wea iusim wanfala part bilong body for duim rabis samting olsem, hem olsem hem mekem full body for no klin. Olsem tu, Christian wea lukluk long rabis piksa or movie wea pipol killkill nogud hem ‘letem eye bilong hem for sin’ and long wei olsem, hem mekem full body for no klin. So eni samting wea hem duim for worshipim God hem sakrifaes wea no holy nao, and God no hapi long hem. (Deuteronomy 15:21; 1 Peter 1:14-16; 2 Peter 3:11) Hem kasem barava nogud samting bikos long nogud hapitaem wea hem chusim!

⁷ Tru tumas, nogud hapitaem savve barava spoelem Christian. Dastawe iumi laek chusim gudfala hapitaem mekem iumi givim gudfala sakrifaes long God. Distaem  bae iumi storyim hao iumi savve luksavve long gudfala hapitaem and nogud hapitaem.

8, 9. (a) Wanem tufala kaen hapitaem nao stap? (b) Wanem kaen hapitaem nao iumi mas no duim, and why nao olsem?

⁸ Iumi bae story abaotem tufala kaen hapitaem. Wanfala hem hapitaem wea Christian mas stap klia long hem and narawan hem hapitaem wea Christian maet duim or maet no duim. So waswe long kaen hapitaem wea Christian mas stap klia long hem?

⁹ Iumi lanem finis long Chapter 1, samfala hapitaem mekhae long samting wea Bible barava tok againstim. Samfala Web site, movie, and television program savve showim rabis piksa, pipol killkill nogud, pipol duim samting wea join witim devildevil, and pipol wea duim rabis samting. Olketa music tu savve mekhae long rabis samting olsem. Nomata pipol ting long olketa rabis samting hia olsem hem gud nomoa, olketa tru Christian mas no duim samting wea no followim Bible principle and wea brekem law bilong God. (Acts 15:28, 29; 1 Corinth 6:9, 10; Revelation 21:8) Sapos iu no duim nogud hapitaem olsem, iu showimaot long Jehovah, iu “barava heitim olketa rabis samting,” and iu gohed for “no duim olketa rabis samting.” Taem iu duim olsem, iu garem “faith wea hem tru.”—Rome 12:9; Psalm 34:14; 1 Timothy 1:5.

10. Wanem kaen tingting abaotem hapitaem nao iumi mas no garem, and why nao olsem?

¹⁰ Maet samfala tingse nomata olketa lukluk long movie or television program wea showimaot rabis wei saed long sex, datwan no savve spoelem olketa. Maet olketa ting olsem, ‘Mi lukluk nomoa ia, bae hard for mi duim samting hia.’ Man wea garem datkaen tingting laea long hemseleva nomoa and bae kasem barava nogud samting. (Readim Jeremiah 17:9.) Sapos iumi laek lukluk long samting  Jehovah heitim, waswe, iumi “barava heitim olketa rabis samting”? Taem iumi evritaem lukim, read abaotem, or herem rabis samting, gogo konsens bilong iumi bae no luksavve long samting wea stret. (Psalm 119:70; 1 Timothy 4:1, 2) Wei for olsem savve mekem iumi duim samting wea maet no fitim, and ting nating long nogud samting wea narawan duim.

11. Long wanem wei nao principle long Galatia 6:7 hem fitim samting wea iumi disaedem abaotem hapitaem?

¹¹ Diswan hem really happen. Samfala Christian duim nogud samting saed long sex bikos olketa lukluk olowe long olketa rabis samting. Bihaen olketa kasem nogud samting nao olketa just luksavve ‘eni samting wea olketa plantim, datwan nao bae olketa harvestim.’ (Galatia 6:7) Bat iumi savve misstim nogud samting olsem. Sapos iu plantim gud samting long tingting bilong iu, iu bae harvestim gud samting.—Lukim box wea garem title “ Mi Shud Chusim Wanem Kaen Hapitaem?”.

12. (a) Bible principle long Galatia 6:5 savve helpem iumi long wanem wei saed long hapitaem? (b) Wanem nao savve helpem iumi for chusim gudfala hapitaem?

¹² Distaem iumi bae storyim mek-tu kaen hapitaem, wea hem nao hapitaem wea Bible no talem stret sapos Christian savve duim or no duim. Taem Christian laek duim hapitaem olsem, hemseleva mas disaedem sapos hem fitim for duim or nomoa. (Readim Galatia 6:5.) Bat iumi garem samting for helpem iumi disaed. Bible garem olketa principle and talem olketa tru samting wea savve helpem iumi garem tingting bilong Jehovah. Taem iumi followim olketa principle hia, iumi bae luksavve long “samting wea Jehovah laekem” taem iumi disaedem eni samting and hapitaem tu.—Ephesus 5:17.

13. Wanem nao bae helpem iumi for no duim hapitaem wea Jehovah no hapi long hem?

 ¹³ Evri Christian no semsem long wei for luksavve long wanem hem stret and no stret. (Philippi 1:9) Olketa Christian luksavve tu, no evri Christian laekem semkaen hapitaem. Dastawe iumi shud no tingse evri Christian bae chusim sem hapitaem. Nomata olsem, taem iumi evritaem tingim olketa Bible principle and heart bilong iumi laekem tumas for followim olketa principle hia, iumi bae  no duim eni hapitaem wea Jehovah no hapi long hem.—Psalm 119:11, 129; 1 Peter 2:16.

14. (a) Wanem nao iumi shud tingim taem iumi chusim hapitaem? (b) Hao nao iumi savve gohed for mekem worship hem first samting long laef bilong iumi?

¹⁴ Taem iu chusim hapitaem, iu mas tingim tu haomas hour iu bae iusim for duim datwan. Hapitaem wea iu chusim showimaot wanem kaen hapitaem nao iu acceptim, bat taem wea iu iusim for duim datfala hapitaem showimaot wanem nao hem important long iu. Important samting long olketa Christian nao hem for duim samting for worshipim God. (Readim Matthew 6:33.) So wanem nao iu savve duim mekem datwan hem gohed for first samting long laef bilong iu? Aposol Paul sei: “Lukluk gud long samting wea iufala duim, mekem iufala wise and no olsem pipol wea no wise. Iusim gud taem bilong iufala.” (Ephesus 5:15, 16) Tru tumas, taem iu no ova tumas for duim hapitaem, iu bae garem taem for duim “olketa samting wea barava important.” Olketa samting hia nao bae helpem iu for fren gud witim Jehovah.—Philippi 1:10.

15. Why nao hem gud for barava careful taem iumi chusim hapitaem?

¹⁵ Hem gud for barava careful taem iumi chusim hapitaem. Why nao olsem? Tingim datfala tokpiksa abaotem frut. Iu no laek kaikaim part wea rotten, so iu katemaot no long barava ples wea rotten, bat farawe lelebet from part wea rotten. Hem semsem tu long hapitaem. Iumi barava stap klia long nogud hapitaem, nomata hapitaem wea maet lelebet rotten samting nomoa insaed. Christian wea garem gudfala tingting bae no duim hapitaem wea no followim olketa Bible principle. Hem bae no duim tu hapitaem wea hem no barava sure sapos hem gud or nomoa, or hapitaem wea luk olsem maet hem savve spoelem wei wea hem fren witim Jehovah. (Proverbs 4:25-27) Taem iu duim wanem Bible talem evritaem, iu bae no duim nogud hapitaem.

16. (a) Wanem nao showimaot iumi garem tingting bilong Jehovah abaotem wanem hem stret? (b) Hao nao wei for followim olketa Bible principle savve kamap wei bilong iu?

¹⁶ Olketa tru Christian laek savve long tingting bilong Jehovah abaotem hapitaem wea olketa laek for duim bifor olketa duim datwan. Bible nao showimaot tingting bilong Jehovah, and wanem hem laekem iumi for duim. King Solomon talem samfala samting wea Jehovah heitim. Olketa samting hia nao “tongue wea talem laea samting, hand wea killim dae man wea no duim eni nogud samting, heart wea mekem plan for spoelem narawan, and leg wea ran kwiktaem for duim nogud samting.” (Proverbs 6:16-19) Hao nao datwan shud affectim tingting bilong iu? Man wea raetem psalm sei: “Iufala wea lovem Jehovah, heitim nogud samting.” (Psalm 97:10) Hapitaem wea iu chusim shud showimaot iu heitim samting wea Jehovah heitim. (Galatia 5:19-21) No forgetim tu, samting wea iu duim taem iu stap seleva showimaot wanem kaen man nao iu, no samting wea iu duim taem iu stap witim pipol. (Psalm 11:4; 16:8) So sapos iu laekem tumas for duim wanem Jehovah laekem long evri samting wea iu duim, iu bae evritaem disaedem samting followim olketa Bible principle. Datwan bae kamap olsem wei bilong iu.—2 Corinth 3:18.

17. Bifor iumi chusim hapitaem, olketa wanem kwestin nao iumi shud ting raonem?

 ¹⁷ Taem iu chusim hapitaem, wanem nao nara samting wea iu savve duim for mekem iu disaed followim tingting bilong Jehovah? Ting raonem kwestin hia: ‘Hao nao hapitaem wea mi chusim savve spoelem wei wea mi fren witim God?’ Bifor iu lukim movie, ting raonem kwestin hia: ‘Waswe, movie hia bae spoelem konsens bilong mi?’ Iumi bae storyim olketa Bible principle wea savve helpem iumi chusim gudfala hapitaem.

18, 19. (a) Hao nao Bible principle long Philippi 4:8 savve helpem iumi chusim gudfala hapitaem? (b) Wanem nao samfala nara Bible principle wea savve helpem iu chusim gudfala hapitaem? (Lukim footnote.)

¹⁸ Long Philippi 4:8, hem storyim wanfala important Bible principle. Hem sei: “Gohed for tingim evri samting wea tru, evri samting wea important, evri samting wea raeteous, evri samting wea klin, evri samting wea naes tumas, evri samting wea fit for kasem respect, evri samting wea hem gud, and evri samting wea fit for kasem praise.” Long datfala scripture, Paul no storyim hapitaem, bat hem storyim olketa samting wea stap long heart and mind, wea shud mekem God hapi. (Psalm 19:14) Nomata olsem, wanem Paul talem savve helpem iumi chusim gudfala hapitaem. Long wanem wei?

¹⁹ Tingim kwestin hia: ‘Waswe, movie, video game, music, and nara hapitaem wea mi chusim mekem mi tingim “evri samting wea klin”?’ Bihaen iu lukim movie, olketa wanem piksa nao iu gohed for tingim olowe? Sapos iu tingim samting wea gud, wea klin, and diswan hem strongim iu, iu savve iu chusim gudfala hapitaem. Bat sapos iu tingim samting wea no klin, hapitaem wea iu chusim hem nogud and savve spoelem iu  tu. (Matthew 12:33; Mark 7:20-23) Why nao olsem? Bikos taem iu gohed tingim rabis samting olsem, datwan bae mekem iu no hapi, bae spoelem konsens bilong iu wea savve finis long wanem Bible sei hem stret, and savve spoelem tu wei wea iu fren witim God. (Ephesus 5:5; 1 Timothy 1:5, 19) Disaed strong for no duim hapitaem wea savve spoelem iu. * (Rome 12:2) Hem gud for garem sem tingting olsem man wea prea long Jehovah: “No letem eye bilong mi lukim rabis samting.”—Psalm 119:37.

20, 21. Hao nao 1 Corinth 10:23, 24 helpem iumi for chusim gudfala hapitaem?

²⁰ Paul talem wanfala important Bible principle wea iumi mas tingim taem iumiseleva savve disaedem samting. Hem sei: “Man free for duim eni samting, bat no evri samting savve strongim hem or olketa narawan. Man mas no tingim hemseleva nomoa, bat hem mas tingim nara pipol tu.” (1 Corinth 10:23, 24) Hao nao datfala Bible principle helpem iumi for chusim gudfala hapitaem? Iu mas ting raonem kwestin hia: ‘Waswe, hapitaem wea mi chusim bae mekem olketa narawan hapi?’

²¹ Maet konsens letem iu for duim hapitaem wea long tingting bilong iu, hem olraet nomoa. Bat sapos iu luksavve konsens bilong olketa nara Christian no letem olketa for duim kaen hapitaem olsem, maet iu disaed for no gohed duim datfala hapitaem. Why nao olsem? Bikos olsem Paul talem, iu no laek for “sin againstim olketa brata” or maet “sin againstim Christ.” Iu bae sin againstim olketa sapos samting iu duim mekem hem no isi for  olketa gohed faithful long God. Tru tumas, iu barava followim warning for ‘no duim eni samting wea bae spoelem tingting bilong narawan.’ (1 Corinth 8:12; 10:32) Olketa tru Christian distaem followim wanem Paul talem wea helpem olketa for tingim narawan. Olketa no duim hapitaem wea maet olketa “free for duim,” bat wea no “strongim” narawan.—Rome 14:1; 15:1.

22. Why nao olketa Christian no forcem narawan for followim tingting bilong olketa?

²² Christian wea konsens bilong hem no letem hem for duim samfala samting shud tingim olketa narawan tu. Hem shud no forcem nara Christian long kongregeson for followim tingting bilong hem abaotem wanem kaen hapitaem nao hem gud. Sapos hem duim datwan, hem olsem man wea wakabaot long sem road witim staka pipol and hem laekem evriwan for mas wakabaot fast olsem hem. Man olsem no garem gudfala tingting. Bat Christian love bae helpem man wea garem konsens wea strict for respectim samting wea narawan disaedem abaotem hapitaem sapos samting hem chusim hem no againstim eni Bible principle. Taem hem duim olsem, hem ‘showimaot long evriwan, hem no ova tumas.’—Philippi 4:5; Ecclesiastes 7:16.

23. Hao nao iu savve chusim gudfala hapitaem?

²³ Hao nao iu savve chusim gudfala hapitaem? No lukluk long movie or television program wea showim rabis samting wea Bible sei hem no stret for duim. Followim olketa Bible principle wea helpem iu chusim hapitaem wea Bible no talem stret wanem for iu duim. No duim hapitaem wea bae spoelem konsens bilong iu and wea maet spoelem konsens bilong olketa Christian brata and sista. Taem iu gohed strong for duim olsem, iu bae mekhae long God, and iu and famili bilong iu bae gohed kasem gud samting from love bilong God.