Dear Brata and Sista wea Lovem Jehovah:

Jesus hem sei: “Iufala bae savve long samting wea tru, and datwan bae mekem iufala free.” (John 8:32) Datwan barava encouragem iumi! Tru nao, iumi savve lanem tru samting, nomata iumi stap long “olketa last day” wea staka pipol talem samting wea no tru. (2 Timothy 3:1) Waswe, iu tingim yet taem iu lanem truth? Datwan mekem iu barava hapi tumas!

Nomata hem barava important for garem stretfala savve abaotem Bible and evritaem storyim datwan long narawan, hem important tu for followim wanem Bible talem. For duim datwan, iumi mas gohed kasem gud samting from love bilong God. Hao nao iumi savve gohed kasem gud samting from love bilong God? Jesus ansarem datfala kwestin long naet bifor hem dae. Hem talem olketa faithful aposol: “Sapos iufala obeyim olketa law bilong mi, iufala bae gohed kasem gud samting from love bilong mi, olsem mi tu obeyim olketa law bilong Dadi long heven and gohed kasem gud samting from love bilong hem.”—John 15:10.

So Jesus gohed kasem gud samting from love bilong God bikos hem obeyim olketa law bilong Dadi bilong hem. Hem semsem tu for iumi. For gohed kasem gud samting from love bilong God, iumi mas followim wanem Bible talem long evri samting wea iumi duim. Long datfala sem naet Jesus sei tu: “From iufala savve long olketa samting hia, bae iufala hapi sapos iufala duim.”—John 13:17.

Mifala barava hope disfala buk bae helpem iu for followim wanem iu lanem long Bible mekem iu “gohed kasem gud samting from love bilong God, and garem hope for laef olowe.”—Jude 21.