1, 2. Why nao iu lovem Jehovah God?

WASWE, iu lovem God? Sapos iu dedicate finis long Jehovah God, iu bae sei, ia! Hem stret nomoa for iumi lovem Jehovah bikos hem lovem iumi. Dastawe Bible sei: “Iumi showimaot love bikos God hem lovem iumi firstaem.”—1 John 4:19.

² Jehovah duim samting firstaem for showimaot hem lovem iumi. Hem givim earth wea hem naesfala ples for iumi stap long hem. Hem givim wanem iumi needim. (Matthew 5:45) Bat important samting nao, hem helpem iumi fren witim hem. Hem givim kam Bible. Hem laekem iumi for prea long hem, and hem promis for herem prea bilong iumi and givim holy spirit for helpem iumi. (Psalm 65:2; Luke 11:13) Barava nambawan samting nao, hem givim spesol Son bilong hem for sevem iumi from sin and dae. Tru nao, Jehovah barava lovem iumi!—Readim John 3:16; Rome 5:8.

3. (a) Wanem nao iumi mas duim for gohed kasem gud samting from love bilong God? (b) Wanem important kwestin nao iumi mas ting raonem, and wanem scripture nao ansarem datfala kwestin?

³ Jehovah laekem iumi for kasem gud samting from love bilong hem for olowe. Hem saed bilong iumi sapos iumi laek kasem gud samting or nomoa. Bible talem iumi  for “gohed kasem gud samting from love bilong God, and garem hope for laef olowe.” (Jude 21) Datfala scripture showimaot iumi mas duim samting mekem iumi gohed kasem gud samting from love bilong God. Hem gud for iumi ting raonem important kwestin hia: ‘Wanem nao mi savve duim for showimaot mi lovem God?’ Aposol John talem ansa. Hem sei: “Samting wea showimaot iumi lovem God, hem taem iumi obeyim olketa law bilong hem, and olketa law bilong hem no hard tumas for obeyim.” (1 John 5:3) Iumi mas ting raonem gud datfala scripture bikos iumi laek for showimaot long God iumi barava lovem hem.

4, 5. Wanem nao mekem iu start for lovem Jehovah?

⁴ Taem aposol John sei “lovem God,” wanem nao hem minim? Hem storyim wei wea man lovem God. Waswe, iu tingim yet taem wea iu start for lovem Jehovah?

⁵ Taem iu lanem tru samting abaotem Jehovah and olketa plan bilong hem, iu start for showimaot faith long hem. Iu start for minim tu, nomata iu no perfect and no fren witim God, Jehovah givim Christ for mekem iu kasem perfect laef wea Adam lusim and for laef olowe. (Matthew 20:28; Rome 5:12, 18) Iu start for luksavve long barava big samting wea Jehovah duim taem hem sendem barava spesol Son bilong hem for dae for iu. Iu barava tinghae long datwan, and iu start for lovem God wea barava lovem iu.—Readim 1 John 4:9, 10.

6. (a) Sapos iu lovem samwan, wanem nao bae iu duim? (b) From iu lovem God, wanem nao iu duim?

⁶ Love hem no feeling wea man garem nomoa. Sapos iu barava lovem God, bae iu no talem nomoa, “Mi lovem Jehovah,” bikos love hem olsem faith. Long sem wei wea iumi mas duim samting for showimaot iumi garem faith, iumi mas duim samting tu for showimaot iumi lovem samwan. (James 2:26) Iumi bae duim olketa samting wea mekem hem hapi. Dastawe taem iu start for lovem Jehovah, iu laekem tumas for duim samting wea mekem Dadi bilong iu long heven hem hapi. Waswe, iu Witness wea baptaes finis? Sapos olsem, iu duim datfala important samting bikos iu lovem Jehovah and faithful long hem. Iuseleva dedicate long Jehovah for duim wanem hem laekem and showimaot datwan taem iu baptaes. (Readim Rome 14:7, 8.) Iumi duim wanem iumi promisim long Jehovah taem iumi duim nara samting wea aposol John talem.

7. Wanem nao samfala law bilong God, and hao nao iumi savve obeyim?

⁷ John storyim wanem iumi bae duim sapos iumi lovem God. Hem sei: “Iumi obeyim olketa law bilong hem.” Wanem nao olketa law bilong God? Jehovah talem samfala law hia long Bible. Hem tambuim wei for drunk, durong, worshipim idol, steal, and laea. (1 Corinth 5:11; 6:18; 10:14; Ephesus 4:28; Colossae 3:9) Iumi obeyim olketa law bilong God taem iumi duim wanem Bible talem.

8, 9. Sapos Bible no talem eni law abaotem wanfala samting, hao nao bae iumi luksavve wanem iumi mas duim? Storyim example.

⁸ Iumi mas duim nara samting tu for mekem Jehovah hapi. Jehovah no givim olketa law for kontrolem evri samting wea iumi duim evriday. Maet samting savve happen wea Bible no talem eni law for datwan. Hao nao bae iumi luksavve wanem iumi mas duim for mekem Jehovah hapi? Bible storyim staka samting wea mekem iumi luksavve long tingting bilong God. Taem iumi studyim Bible, iumi luksavve long wanem Jehovah laekem and heitim. (Readim Psalm 97:10; Proverbs 6:16-19) Iumi luksavve tu long wanem iumi mas duim for mekem hem hapi. Taem iumi gohed for lane abaotem olketa wei bilong Jehovah, iumi bae savve gud long tingting bilong hem. Then samting wea iumi disaedem and duim bae followim wanem hem laekem. So nomata sapos eni samting happen wea Bible no talem eni law for datwan, iumi bae luksavve long ‘samting wea Jehovah laekem iumi for duim.’—Ephesus 5:17.

⁹ Tingim diswan. Bible no talem eni law wea sei iumi mas no lukim movie or television program wea showim pipol killkill nogud or durong. Nomata olsem, iumi  savve finis iumi mas no lukim olketa samting hia. Iumi savve long tingting bilong Jehovah abaotem olketa samting olsem. Bible talem stret olsem: “[Jehovah] heitim eniwan wea laekem raf wei.” (Psalm 11:5) Bible sei tu: “God bae judgem olketa wea durong.” (Hebrew 13:4) Taem iumi ting raonem olketa scripture hia, iumi luksavve long tingting bilong Jehovah. So iumi bae nating lukluk long rabis samting wea God heitim. Jehovah hapi taem iumi no lukluk long rabis samting wea pipol tingse hem gud nomoa. *

10, 11. (a) Why nao iumi obeyim Jehovah? (b) Long wanem wei nao iumi obeyim hem?

¹⁰ Why nao iumi obeyim olketa law bilong God? Why nao iumi laek for followim wanem God laekem evritaem? Iumi obeyim God no bikos iumi les for kasem panis or les for kasem nogud samting wea kasem pipol wea no followim God. (Galatia 6:7) Bat iumi obeyim Jehovah bikos iumi ting long diswan olsem wei for showimaot iumi lovem hem. Iumi laekem Jehovah for hapi long iumi olsem pikinini wea laekem dadi for hapi long hem. (Psalm 5:12) Hem Dadi bilong iumi and iumi lovem hem. Taem iumi savve iumi duim olketa samting wea ‘Jehovah bae hapi long hem,’ iumi tu barava hapi.—Proverbs 12:2.

¹¹ Iumi obeyim God no bikos samwan forcem iumi. * Iumi no chusim tu wanem law nao iumi bae obeyim or obeyim God long taem wea fitim iumi nomoa or long taem wea hem isi for iumi duim datwan. Bat iumi  obey bikos iumi “barava laek for obeyim God.” (Rome 6:17) Iumi garem sem tingting olsem man wea raetem psalm. Hem sei: “Mi hapi for followim olketa law bilong iu wea mi lovem.” (Psalm 119:47) Tru tumas, iumi laekem tumas for obeyim Jehovah. Iumi luksavve hem barava fitim for iumi obeyim Jehovah and hem nao wanem hem laekem iumi for duim. (Deuteronomy 12:32) Noah hem man wea faithful long God. Hem lovem God dastawe hem obeyim hem for staka year. Iumi laekem Jehovah for talem sem toktok abaotem iumi olsem Bible talem abaotem Noah. Bible sei: “Noah barava duim evri samting wea God talem hem for duim. Hem barava duim nao.”—Genesis 6:22.

12. Wanem kaen wei for obey nao Jehovah hapi long hem?

¹² Taem iumi laekem tumas for obeyim Jehovah, hao nao tingting bilong hem abaotem datwan? Bible sei iumi mekem “heart bilong [God] hapi.” (Proverbs 27:11) Waswe, Lord bilong evri samting hem hapi taem iumi obeyim hem? Ia. Jehovah barava hapi! Jehovah wakem iumi long wei for savve disaedem samting seleva. So iumi savve disaed for obeyim God or nomoa. (Deuteronomy 30:15, 16, 19, 20) Dadi bilong iumi long heven barava hapi taem iumi laekem tumas for obeyim hem and iumi obeyim hem bikos iumi barava lovem hem. (Proverbs 11:20) Taem iumi duim olsem, iumi bae garem gudfala laef.

13, 14. Why nao iumi savve sei “olketa law bilong [God] no hard tumas for obeyim”? Storyim tokpiksa.

¹³ Aposol John talem gud samting abaotem olketa law bilong Jehovah. Hem sei: “Olketa law bilong hem no  hard tumas for obeyim.” Greek word wea iumi transleitim “hard tumas” long 1 John 5:3 hem really minim “hevi.” * Wanfala Bible transleison sei olsem: “Olketa law bilong [God] no savve spoelem iumi.” (New English Translation) Olketa law bilong Jehovah no ova tumas or no spoelem man. Olketa man wea no perfect fit for obeyim olketa law bilong hem.

¹⁴ Tingim disfala tokpiksa. Wanfala gud fren bilong iu bae muv long wanfala niu haos so hem askem iu for helpem hem karem olketa basket bilong hem. Staka basket nao for karem. Samfala basket no hevi tumas and wanfala man savve karem, bat samfala barava hevi and tufala man nao mas karem. Fren bilong iu chusim olketa basket wea hem laekem iu for karem. Waswe, bae hem talem iu for karem olketa basket wea hem savve hem hevi for iu karem? Nomoa. Hem bae no laekem iu for spoelem baksaed bilong iu. God bilong iumi hem olsem tu. Hem lovem iumi dastawe hem no talem iumi for obeyim olketa law wea hard tumas. (Deuteronomy 30:11-14) Hard tumas for hem talem iumi for duim samting wea bae spoelem iumi. Jehovah savve long wanem hem fitim for iumi duim “from hem nao wakem iumi, and hem savve iumi dust nomoa.”—Psalm 103:14.

15. Why nao iumi savve iumi bae kasem gud samting taem iumi obeyim olketa law bilong Jehovah?

¹⁵ Olketa law bilong Jehovah no hard tumas for obeyim, and taem iumi obeyim iumi bae kasem gud  samting. (Readim Isaiah 48:17.) Dastawe Moses talem olketa Israelite olsem: “Jehovah talem iumi for duim evri samting hia. Iumi mas fraet long God bilong iumi, Jehovah, mekem iumi kasem gud samting olowe, mekem iumi gohed for laef, olsem iumi laef kam kasem distaem.” (Deuteronomy 6:24) Jehovah givim iumi olketa law bikos hem tingim iumi and laekem iumi tu for kasem gud samting for olowe. Jehovah bae nating talem iumi for duim samting wea bae spoelem iumi! Wisdom bilong God hem barava big tumas. (Rome 11:33) Dastawe hem savve tumas long wanem nao hem gud for iumi. Hem showimaot bigfala love winim eni narawan. (1 John 4:8) From Bible sei Jehovah hem love, evri samting wea hem duim and talem showimaot love. Hem givim olketa law tu bikos hem lovem iumi.

16. Why nao iumi savve gohed obeyim God nomata iumi man wea sin and iumi stap long world wea barava nogud?

¹⁶ Hem tru, maet hem no isi for iumi obeyim God. Iumi mas traem best for no followim rabis wei bilong pipol wea “stap long paoa bilong Satan.” (1 John 5:19) From iumi man wea sin, maet iumi laek duim samting for no obeyim law bilong God. (Rome 7:21-25) Bat from iumi lovem God, datwan savve helpem iumi for obeyim olketa law bilong hem. Jehovah blessim olketa wea showimaot olketa lovem hem long wei for obeyim hem. Hem givim holy spirit “long olketa wea obeyim hem.” (Acts 5:32) Holy spirit helpem iumi for garem olketa nambawan wei wea savve mekem iumi for gohed obeyim God.—Galatia 5:22, 23.

17, 18. (a) Wanem nao bae iumi lanem long disfala buk, and taem iumi lanem datwan, wanem nao iumi shud tingim? (b) Wanem nao bae iumi storyim long Chapter 2?

¹⁷ Long disfala buk, iumi bae lane abaotem olketa  principle bilong Jehovah, olketa gudfala wei wea Jehovah laekem iumi for garem, and staka nara samting wea showimaot wanem hem laekem iumi for duim. * Taem iumi duim olsem, iumi mas tingim samfala important samting. Jehovah no forcem iumi for obeyim olketa law and principle bilong hem, bat hem laekem iumi for obeyim hem bikos iumi barava laek for duim datwan and iumi lovem hem. Iumi bae kasem staka blessing distaem and laef olowe long future sapos iumi obeyim Jehovah. Iumi savve showim Jehovah iumi lovem hem taem iumi obeyim hem.

¹⁸ Jehovah givim iumi wanfala samting for helpem iumi luksavve long wanem hem stret and no stret. Hem nao konsens. Sapos iumi laekem konsens for helpem iumi disaedem stret samting, iumi mas gohed lane abaotem tingting bilong Jehovah. Iumi bae storyim datwan long Chapter 2.