APPENDIX
Lusim Wei for Nanali
God no hapi long wei for nanali. Disfala wei savve mekem man tingim hemseleva nomoa and tingim rabis samting. * Gogo man wea nanali ting long nara pipol olsem samting wea man savve iusim for satisfaem feeling bilong hem for laek duim sex. Hem no tingim sex olsem samting wea man and woman duim for showimaot tufala lovem each other, bat hem samting for mekem man hapi and for satisfaem feeling nomoa. Bat datfala feeling for satisfae man savve garem for lelebet taem nomoa. Man wea nanali no killim dae feeling bilong hem “for laek durong, for duim samting wea no klin, [and] for ova tumas for laekem sex,” bat hem mekem olketa feeling hia for kamap strong tumas.—Colossae 3:5.
Aposol Paul sei: “Olketa fren bilong mi, . . . iumi mas klinim from body bilong iumiseleva eni samting wea savve mekem body or tingting bilong iumi for no klin, mekem iumi kamap holy from iumi fraet long God.” (2 Corinth 7:1) Sapos hem hard for iu followim datfala scripture, iu mas no tingse iu no wei nao. Evritaem Jehovah ‘redi for forgivim iu’ and helpem iu. (Psalm 86:5; Luke 11:9-13) From heart bilong iu mekem iu feel guilty and iu trae hard for lusim wei for nanali, datwan showimaot iu garem gudfala tingting, nomata iu duim moa samfala taem. No forgetim tu, “God hem savve gud long iumi winim iumiseleva and hem savve long evri samting.” (1 John 3:20) God no lukim nomoa sin wea iumi duim, bat hem savve gud long evri samting abaotem iumi. From hem savve gud long iumi olsem, hem savve sorre and herem iumi taem iumi barava askem hem for helpem iumi. So iumi mas hambol and no givap for prea strong long God. Iumi laek for olsem pikinini wea taem hem kasem trabol, hem go long dadi bilong hem. Jehovah bae givim iu gudfala konsens. (Psalm 51:1-12, 17; Isaiah 1:18) Bat iu mas duim samting followim prea bilong iu, olsem traem best for no lukluk long rabis piksa, and no fren witim nogud pipol. *
Sapos iu no lusim yet wei for nanali, plis storyim diswan witim Christian mami or dadi or storyim long mature Christian fren wea lovem iu. *—Proverbs 1:8, 9; 1 Thessalonica 5:14; Titus 2:3-5.
^ par. 3 Nanali (masturbation) minim man holehole long private part bilong hemseleva and plei witim for mekem hem garem sem feeling olsem man wea duim sex.
^ par. 4 For helpem evriwan kontrolem hao olketa iusim computer, plande famili putim computer long ples wea olketa kaikai and sidaon for story, no long rum. Samfala famili peim software wea savve stopem rabis piksa long Internet for kamap long screen. Nomata olsem, iu no savve barava depend long software hia, bikos samfala taem hem no waka gud.
^ par. 5 Lukim samfala samting wea savve helpem iu for lusim wei for nanali long “Young People Ask . . . How Can I Conquer This Habit?” long November 2006 Awake!, and page 205-211 long buk Questions Young People Ask—Answers That Work, Volume 1.
