Iumi savve sorre tumas taem relative or gudfala fren disfellowship bikos hem duim bigfala sin and no repent. For followim wanem Bible talem abaotem datwan bae showimaot iumi lovem God, faithful long hem, and obeyim disfala arrangement bilong hem. * Tingim samfala kwestin wea pipol askem taem man disfellowship.

Wanem nao iumi shud duim taem man disfellowship? Bible sei: “No fren witim eni brata wea hem durong or hem greedy or worshipim idol or tok spoelem nara pipol or savve drunk or demandim selen. Nomata for sidaon and kaikai witim man olsem, iufala mas no duim tu.” (1 Corinth 5:11) Bible story abaotem man wea “go difren from teaching bilong Christ.” Hem sei: “No welkamim hem for kam insaed haos bilong iufala and iufala mas no sei hello long hem. Man wea sei hello long hem, hem join insaed nogud samting wea datfala man duim.” (2 John 9-11) Iumi no storyim eni spiritual samting witim man wea disfellowship, no duim eni samting witim hem, and no story witim hem. Wastaoa long December 15, 2007, page 25, hem sei: “Wei for sei ‘Hello’ long samwan savve lead go long wei for story witim hem, wea maet gogo datwan savve mekem hem kamap fren bilong iumi. Waswe, iumi laek for duim samting wea savve lead go long wei for fren witim samwan wea disfellowship?”

Waswe, iumi mas no duim eni samting witim hem and no story witim hem tu? Ia. Why nao olsem? First samting: Wei for duim olsem showimaot iumi faithful long God and obeyim wanem Bible talem. Iumi obeyim Jehovah no long taem wea hem isi nomoa, bat long taem wea hard tu. From iumi lovem God, iumi obeyim evri law bilong hem bikos iumi luksavve hem duim stret samting evritaem, hem lovem iumi, and iumi kasem gud samting taem iumi obeyim law bilong hem. (Isaiah 48:17; 1 John 5:3) Mek-tu samting: Taem iumi no fren witim man wea  disfellowship, datwan bae protectim gudfala wei bilong iumi and olketa long kongregeson, and pipol bae no tok daonem kongregeson. (1 Corinth 5:6, 7) Mek-thri samting: Taem iumi strong for obeyim olketa Bible principle, iumi savve helpem man wea disfellowship. Olketa elder trae finis for helpem hem, bat hem no lusim nogud wei bilong hem. Bat sapos iumi followim wanem olketa elder disaedem, maet datwan helpem hem for kam bak long kongregeson. Taem hem no fren witim famili or fren bilong hem, maet hem bae “kasem bak gudfala tingting,” luksavve hem duim bigfala sin, and duim olketa samting for fren bak witim Jehovah.—Luke 15:17.

Waswe sapos relative disfellowship? From iumi lovem evriwan long famili, datwan savve testim sapos iumi bae faithful long Jehovah. Wanem nao iumi shud duim sapos relative disfellowship? Iumi no savve storyim evri samting wea savve happen and wanem iumi mas duim, bat tufala samting nomoa bae iumi storyim.

Samfala taem wanfala long famili olsem pikinini or dadi disfellowship and hem stap long sem haos witim famili. Nomata hem disfellowship, hem bilong datfala famili yet, so famili savve gohed duim wanem olketa savve duim evritaem. Bat from hem disfellowship, hem no wan mind witim famili for worshipim Jehovah. So olketa long famili wea lovem and faithful long Jehovah bae no duim eni spiritual samting witim hem. Sapos man wea disfellowship stap taem famili duim famili worship, hem bae no joinim olketa. Bat sapos hem young pikinini, dadi and mami garem waka for gohed teachim and stretem hem. So dadi and mami wea lovem pikinini bilong olketa savve studyim Bible witim hem. *—Proverbs 6:20-22; 29:17.

Samfala taem, maet dadi, mami, or pikinini wea disfellowship no stap long sem haos witim famili. Maet famili and man wea disfellowship mas story tugeta taem eni big samting kamap long famili or samting olsem, bat datwan bae samfala taem nomoa. Olketa long famili wea lovem God no mekem enikaen excuse for  story witim narawan long famili wea disfellowship wea no stap long sem haos witim olketa. Bat olketa faithful long Jehovah and organization bilong hem, dastawe olketa followim wanem Bible talem abaotem olketa wea disfellowship. Taem olketa faithful long Jehovah olsem, datwan showimaot olketa laek helpem man wea disfellowship, and datwan savve helpem hem for kasem gud samting from hem disfellowship. *—Hebrew 12:11.