1, 2. (a) Wanem nao iumi savve tingim abaotem olketa wea just marit, and why nao olsem? (b) Olketa wanem kwestin nao bae iumi storyim long disfala chapter?

WASWE, iu laek go long olketa marit? Staka laekem tumas bikos hem taem wea evriwan savve barava hapi. Iu savve lukim tufala wea marit werem naes kaleko and tufala luk naes tumas. Long datfala day tufala barava hapi, and luk olsem future bilong tufala bae gud tumas.

² Bat iumi savve pipol no garem stret tingting abaotem marit distaem. Iumi laekem tufala wea marit for hapi, bat maet iumi ting olsem: ‘Waswe, tufala hia bae hapi? Waswe, marit bilong tufala bae stap olowe?’ Sapos hasband and waef trustim God and followim kaonsel bilong hem abaotem marit, tufala bae hapi and marit bilong tufala bae stap for olowe. (Readim Proverbs 3:5, 6.) Tufala mas duim olsem mekem tufala gohed kasem gud samting from love bilong God. Distaem bae iumi storyim wanem Bible talem abaotem fofala kwestin hia: Wanem nao olketa gudfala reason for marit? Sapos iu tingting for marit, hu nao iu savve chusim for kamap hasband or waef bilong iu? Wanem nao iu savve duim for prepare for gudfala marit? Wanem nao tufala wea marit savve duim for marit bilong tufala stap olowe?

3. Why nao hem no wise for man marit just bikos staka narawan marit?

³ Samfala tingse man mas marit mekem hem hapi. Olketa sei sapos man hem no faendem wanfala hasband or waef bae hem nating satisfae and hapi. Datwan hem no tru! Jesus,  wea hem singol man, storyim wei for stap singol olsem wanfala present and hem encouragem olketa wea savve duim olsem, for duim datwan. (Matthew 19:11, 12) Aposol Paul tu storyim samfala reason why hem gud for man stap singol. (1 Corinth 7:32-38) Jesus and Paul no mekem eni law for man stap singol. Bible sei wei for “stopem pipol for no marit” hem “teaching bilong olketa demon.” (1 Timothy 4:1-3) Nomata olsem, for olketa wea laek duim moa samting for worshipim Jehovah, wei for stap singol savve barava helpem olketa duim datwan. Sapos man laek marit bikos hem lukim staka narawan wea sem age olketa marit, datwan hem no gudfala reason for marit.

4. Taem tufala wea marit hapi, hao nao datwan savve helpem tufala for lukaftarem pikinini?

⁴ Bat waswe, samfala gud reason stap for man marit? Ia. Marit tu hem wanfala present wea God givim long iumi. (Readim Genesis 2:18.) Man savve kasem samfala gud samting from marit and hem savve mekem hem hapi tu. Sapos tufala wea marit hapi, datwan nao nambawan samting for strongim famili. Olketa pikinini need for stap gud. Olketa mas garem dadi and mami wea lukaftarem, lovem, stretem, and teachim olketa. (Psalm 127:3; Ephesus 6:1-4) So for garem and lukaftarem olketa pikinini hem wanfala reason for man marit. Bat samfala nara reason stap tu.

5, 6. (a) Taem tufala wea marit barava fren gud, wanem gud samting nao bae tufala kasem wea Ecclesiastes 4:9-12 storyim? (b) Wanem nao savve mekem marit for olsem rope wea garem thrifala string?

⁵ Ting raonem theme scripture bilong disfala chapter and tu-thri verse wea stap firstaem long hem, wea sei: “Tufala nao gud winim wanfala, bikos tufala bae kasem gud samting from hard waka bilong tufala. From sapos wanfala hem foldaon, narawan savve helpem hem for standap. Bat hao nao sapos wanfala hem foldaon and no eniwan stap for helpem hem standap? And tu, sapos tufala leidaon tugeta, tufala bae no cold, bat sapos wanfala hem leidaon seleva, bae hem cold. Taem wanfala enemy hem kam, wanfala man no savve  winim hem bat tufala man savve join tugeta and winim hem. And rope wea garem thrifala string no savve brek kwiktaem.”—Ecclesiastes 4:9-12.

⁶ Datfala scripture storyim gud samting wea man kasem taem hem fren gud witim narawan. Tufala wea marit savve barava fren gud. Disfala scripture showimaot taem tufala fren gud olsem, tufala bae sapotim, comfortim, and protectim each other. Wanfala samting moa savve barava mekem tufala wea marit for fren gud. Olsem datfala scripture talem, rope wea garem tufala string savve brek. Bat rope wea garem thrifala string bae hard for brek. So taem hasband and waef duim wanem Jehovah laekem evritaem, marit bilong tufala bae olsem datfala rope wea garem thrifala string. Wei wea tufala lovem and worshipim Jehovah hem barava important samting long marit, so datwan savve barava strongim marit bilong tufala.

7, 8. (a) Wanem kaonsel nao Paul talem for olketa Christian wea singol wea stragol for kontrolem feeling for duim sex? (b) Wanem nao trufala samting wea Bible talem abaotem marit?

⁷ Pipol wea marit nomoa fit for satisfaem feeling saed long sex. Bible sei hem samting wea savve mekem tufala wea marit for hapi. (Proverbs 5:18) Bible sei taem man “young tumas,” hem savve garem feeling for laekem tumas for duim sex. Nomata man hem singol and hem no young tumas, maet hem tu stragol for kontrolem feeling for laek duim sex. Sapos hem no kontrolem datfala feeling, datwan savve mekem hem duim samting wea no klin and wea no stret. Paul sei olsem abaotem olketa wea singol: “Sapos olketa no savve kontrolem olketa seleva, olketa shud marit. Hem moabeta for olketa marit winim wei for laekem tumas for sleep witim narawan.”—1 Corinth 7:9, 36; James 1:15.

⁸ Nomata wanem samting nao mekem man laek for marit, hem shud luksavve, bae hem mas kasem samfala problem tu. Paul sei olketa wea marit “bae kasem hard taem long laef bilong olketa.” (1 Corinth 7:28) Olketa wea marit savve kasem samfala problem wea olketa singol pipol no kasem. Bat sapos iu disaed for marit, wanem nao iu savve duim mekem iu barava  hapi and no kasem staka problem? Wanfala samting nao hem for chusim gudfala hasband or waef.

9, 10. (a) Wanem kaonsel nao Paul talem abaotem wei for join witim olketa wea no biliv? (b) Wanem nao savve kasem olketa wea no followim kaonsel bilong God for no maritim man wea no worshipim God?

⁹ Paul talem wanfala important Bible principle wea man mas followim taem hem laek chusim hasband or waef. Hem sei: “Iufala mas no join witim olketa wea no biliv.” (2 Corinth 6:14) Taem Paul talem toktok “join,” hem storyim wei bilong pipol bifor for joinim tufala animal tugeta for pullim samting. Sapos olketa joinim big animal wea strong tumas witim smol animal wea no strong, tufala evriwan bae safa. Long sem wei tu, sapos Christian maritim boy or gele wea no Christian, tufala evriwan bae kasem problem. Sapos wanfala laek gohed kasem gud samting from love bilong God, bat narawan no tinghae long datwan, tufala bae no garem sem tingting abaotem samting wea important, and tufala savve kasem staka problem. Dastawe, Paul encouragem olketa Christian for mas maritim “man wea worshipim God.”—1 Corinth 7:39.

¹⁰ Samfala singol Christian no hapi bikos olketa no faendem eniwan for maritim. Olketa tingse hem gud for maritim samwan wea no biliv winim wei for lonely. Olketa no followim kaonsel wea Bible talem and olketa maritim man wea no worshipim Jehovah. Bat staka taem olketa kasem nogud samting nomoa. Olketa no savve storyim long partner olketa barava important samting long laef. So olketa lonely tumas winim taem wea olketa no marit yet. Bat gud samting nao, staka thousand singol Christian trustim Jehovah and followim kaonsel wea hem talem abaotem diswan. (Readim Psalm 32:8.) Nomata olketa tingting for marit, olketa gohed for stap singol go kasem taem olketa savve maritim samwan wea worshipim Jehovah God.

11. Wanem nao savve helpem iu for chusim gudfala hasband or waef? (Lukim tu box wea garem title “ Wanem Kaen Boy Or Gele Nao Mi Laek Maritim?”)

¹¹ Hem tru, no evriwan wea worshipim Jehovah bae hem  fitim iu. Sapos iu tingting for marit, hem gud for iu lukluk for samwan wea interest long sem samting wea iu interest long hem and garem sem spiritual goal olsem iu. Hem mas samwan wea lovem God long sem wei wea iu lovem God. Wakaman wea faithful and wise talem kam staka kaonsel abaotem diswan. Hem gud sapos iu ting raonem olketa Bible kaonsel hia and prea abaotem mekem iu savve disaed gud long disfala important samting. *—Readim Psalm 119:105.

12. (a) Long staka kantri, wanem nao dadi and mami savve duim? (b) Wanem story long Bible nao savve helpem dadi and mami wea laek chusim samwan for pikinini bilong tufala maritim?

¹² Long staka kantri, dadi and mami nao savve chusim boy or gele for pikinini bilong tufala. Long tingting bilong olketa, from dadi and mami olo and garem moa savve winim pikinini, olketa nao fit for disaedem disfala important samting long gudfala wei. Staka wea maritim boy or gele wea dadi and mami chusim, marit bilong olketa hem gud, wea semsem olsem samfala marit bifor wea Bible storyim. Dadi and mami wea laek duim sem samting savve lane from wanem Abraham duim taem hem sendem wakaman bilong hem for go lukaotem waef for Isaac. Abraham no tingting for Isaac garem waef wea famili bilong hem rich or wea garem bignem. Bat hem barava traem best for mek sure Isaac hem maritim samwan wea worshipim Jehovah. *—Genesis 24:3, 67.

13-15. (a) Hao nao Bible principle long Proverbs 24:27 savve helpem boy wea tingting for marit? (b) Wanem nao gele savve duim for prepare for marit?

¹³ Sapos iu tingting for marit, hem gud for tingim disfala  kwestin, ‘Waswe, mi fit for marit?’ Tingting bilong iu abaotem love, sex, wei for fren gud, and for garem and lukaftarem pikinini bae helpem iu for ansarem datwan. Bat iu shud ting raonem tu olketa samting wea hasband or waef mas duim long famili.

¹⁴ Boy wea lukaotem gele for hem maritim shud ting raonem gud disfala Bible principle: “Planim waka wea iu bae duim long aotsaed, and redyim garden bilong iu. Then bihaen iu mas wakem haos bilong iu.” (Proverbs 24:27) Wanem nao iumi lanem long datfala scripture? Long bifor, sapos man laek for marit and startim famili, hem mas ting raonem disfala kwestin, ‘Waswe, mi fit for sapotim and lukaftarem gud waef and eni pikinini wea mitufala maet garem?’ Hem mas waka hard for lukaftarem garden bilong hem firstaem. Datfala Bible principle hem fitim distaem tu. Man wea laek for marit mas redi firstaem for datfala responsibility. Sapos man no sik and no eni samting rong long body bilong hem, hem mas waka. Bible sei sapos man no provaedem wanem famili needim, wea insaed diswan tu hem for showimaot hem lovem olketa, and helpem olketa fren gud witim Jehovah, hem worse winim man wea no biliv!—Readim 1 Timothy 5:8.

¹⁵ Gele wea tingting for marit mas willing for duim olketa samting wea waef mas duim. Bible mekhae long samfala wei and savve wea maet waef needim taem hem helpem hasband and lukaftarem olketa pikinini. (Proverbs 31:10-31) Olketa boy and gele wea marit bat no tingting gud firstaem abaotem waka wea olketa bae duim insaed marit, olketa tingim olketa seleva nomoa. Olketa no tingim wanem olketa savve duim for helpem narawan wea bae olketa maritim. Bat barava important samting nao, olketa wea tingting for marit mas savve hao for followim olketa Bible principle long marit.

16, 17. Olketa wanem Bible principle nao olketa wea tingting for marit mas ting raonem?

¹⁶ Taem gele or boy tingting for marit, hem mas ting raonem  waka wea God markem for hasband or waef. Man mas savve long wanem nao waka bilong hem olsem hed insaed long Christian famili. Hem mas no raf nomata hem nao hed long famili. Bat hem mas followim example bilong Jesus long wei wea hem hed long kongregeson. (Ephesus 5:23) Woman mas savve tu wanem nao waka bilong hem olsem waef long famili. Waswe, hem bae willing for stap anda long “law bilong hasband bilong hem”? (Rome 7:2) Hem stap anda long law bilong Jehovah and Christ finis. (Galatia 6:2) From hasband hem hed long famili, waef mas willing for stap anda long law bilong hem tu. Waswe, hem savve sapotim and stap anda long man wea no perfect bat wea hem hed bilong hem? Sapos hem no willing for duim datwan, hem shud no marit.

¹⁷ Hasband mas willing for tingim wanem waef needim and waef tu mas duim olsem. (Readim Philippi 2:4.) Paul sei: “Evriwan long iufala mas lovem waef bilong hem olsem hem lovem hemseleva, and tu, waef mas barava respectim hasband bilong hem.” God mekem Paul for luksavve hasband mas feel savve waef hem barava respectim hem. Samting wea waef barava needim tu hem for feel savve hasband lovem hem.—Ephesus 5:21-33.

18. Why nao tufala wea plan for marit mas kontrolem tufala seleva?

¹⁸ So taem boy and gele tufala fren, hem no taem for hapihapi nomoa. Hem taem for tufala lane hao for tingim and respectim each other, and for savve sapos bae hem gud for tufala marit or nomoa. Hem taem wea tufala mas kontrolem tingting and feeling bilong tufala tu! From tufala barava laekem tufala, tufala bae garem strong feeling for laek duim samting wea pipol wea marit nomoa savve duim. Bat sapos tufala barava lovem each other, tufala bae no duim eni samting wea bae spoelem wei wea tufala fren witim God. (1 Thessalonica 4:6) So sapos iu frenim samwan, kontrolem feeling bilong iu. Wei for iu savve kontrolem iuseleva bae helpem iu long full laef bilong iu, nomata sapos iu marit or nomoa.

19, 20. Long wanem wei nao tingting bilong Christian abaotem marit hem difren from tingting bilong staka pipol long world? Minim kam.

¹⁹ Sapos hasband and waef laekem marit bilong tufala for stap olowe, tufala mas garem stretfala tingting abaotem marit promis. Long end bilong samfala movie and love story, staka taem boy and gele marit nao. Pipol laekem tumas kaen story wea garem hapi ending olsem. Bat iumi savve, taem boy and gele marit, datwan hem no end bilong samting, bat hem start bilong wanfala samting wea Jehovah laekem for mas stap for olowe. (Genesis 2:24) Bat sorre samting nao, staka pipol long world no garem tingting olsem Jehovah. Long samfala kantri, pipol storyim hasband and waef olsem tufala string wea olketa taemapem tugeta. Maet olketa no luksavve datfala tokpiksa hem barava fitim rong tingting wea staka pipol distaem garem abaotem marit. Why nao olsem? Bikos man savve taengem strong tufala rope bat man savve isi for aotem tu.

²⁰ Staka pipol distaem ting long marit olsem hem for lelebet taem nomoa. Olketa willing for marit bikos olketa tingse olketa bae kasem gud samting for olketa seleva, bat long tingting bilong olketa, sapos hem start for hard lelebet, olketa savve finisim nomoa marit bilong olketa. Bat tingim datfala tokpiksa abaotem rope wea Bible storyim. Olketa rope long sailing boat, olketa wakem for stap longtaem and no savve brek nomata long taem bilong big wind and raf sea. Long sem wei tu, Jehovah mekem marit for stap olowe. Jesus sei: “No eni man mas aotem samting wea God joinim finis.” (Matthew 19:6) Sapos iu marit, iu mas garem semkaen tingting abaotem marit. Waswe, datwan hem mekem marit hem hard samting? Nomoa.

21. (a) Hasband and waef mas gohed for garem wanem kaen tingting abaotem each other? (b) Wanem nao bae helpem tufala for duim datwan?

²¹ Hasband and waef mas gohed for garem stretfala tingting abaotem each other. Sapos tufala evritaem tingim gudfala  wei bilong each other and gud samting wea wanfala trae hard for duim, bae tufala hapi and stap gud. Waswe, man savve garem gudfala tingting olsem abaotem marit partner wea no perfect? Jehovah savve iumi no perfect. Nomata olsem, iumi hapi from hem evritaem tingim gud saed bilong iumi. Man wea raetem psalm sei: “Jehovah, sapos sin wea mifala duim nao iu lukluk long hem, bae mifala guilty stret.” (Psalm 130:3) Hasband and waef tu mas tingim gud saed bilong tufala and forgivim each other.—Readim Colossae 3:13.

22, 23. Wanem nao Abraham and Sarah duim wea showimaot gudfala example for olketa hasband and waef distaem?

 ²² Marit wea gohed strong for staka year hem bigfala blessing for hasband and waef. Bible storyim marit bilong Abraham and Sarah taem tufala olo finis. Laef bilong tufala no isi and tufala kasem staka hard taem. Tingim hard samting wea kasem Sarah. Taem hem 60 year, hem mas lusim naes haos bilong hem long rich taon long Ur and hem go for stap long tent for full laef bilong hem. Nomata olsem, hem stap anda long hasband bilong hem. Sarah barava helpem Abraham. Hem respectim hem and sapotim wanem hem disaedem. Sarah savve kolem hasband bilong hem lord “insaed long heart bilong hem.” (Genesis 18:12; 1 Peter 3:6) Wei wea hem respectim Abraham hem kam from heart bilong hem.

²³ Bat datwan no minim Abraham and Sarah evritaem garem sem tingting abaotem samting. Wantaem Sarah talem samting wea mekem Abraham “no hapi.” Bat taem Jehovah talem hem for duim samting wea waef talem, hem hambol for duim datwan, wea mekem famili bilong hem kasem gud samting. (Genesis 21:9-13) Olketa hasband and waef distaem, nomata olketa wea marit for staka year finis, savve lanem gud samting from Abraham and Sarah wea lovem God.

24. Wanem kaen marit nao mekhae long Jehovah God, and why nao olsem?

²⁴ Staka hasband and waef wea hapi stap long Christian kongregeson. Waef barava respectim hasband, and hasband lovem and tinghae long waef bilong hem. Main important samting long laef bilong olketa hem for duim wanem Jehovah laekem. Sapos iu tingting for marit, prepare gud firstaem and chusim samwan wea fitim iu. Bihaen iutufala marit, waka hard for stap gud and lovem iutufala, wea datwan hem mekhae long Jehovah God. Sapos iu duim olsem, marit bilong iu bae helpem iu gohed kasem gud samting from love bilong God.