1. Long naet bifor hem dae, wanem nao Jesus talem olketa disaepol?

LONG naet bifor Jesus dae, hem barava tingim olketa disaepol bikos hem bae lusim olketa. Hem prea for olketa and hem sei olsem long Dadi bilong hem: “Mi no askem iu for tekem olketa from disfala world, bat mi askem iu for lukaftarem olketa mekem Satan no spoelem olketa. Olketa no olsem pipol long world, olsem mi tu no olsem pipol long world.” (John 17:15, 16) Datfala prea showimaot Jesus barava lovem olketa disaepol. Hem showimaot tu hem important for olketa mas followim wanem hem talem olketa finis: “Iufala no olsem pipol long world.” (John 15:19) Tru tumas, Jesus barava laekem olketa disaepol for no olsem pipol long world!

2. Wanem nao “world” wea Jesus story abaotem?

² “World” wea Jesus storyim hem pipol wea no worshipim God. Satan nao rulim olketa, olketa tingim olketa seleva nomoa, and olketa praod tumas olsem Satan. (John 14:30; Ephesus 2:2; 1 John 5:19) Tru tumas, “man wea fren witim world hem enemy bilong God.” (James 4:4) Bat iumi evriwan laek gohed kasem gud samting from love bilong God. Wanem nao iumi savve duim for no olsem pipol long world nomata iumi stap long world? Iumi bae storyim faevfala samting. (1) Iumi mas sapotim Kingdom bilong God wea Christ nao King long hem and no joinim politik. (2) Iumi mas no followim tingting bilong pipol long world. (3) Iumi mas werem gudfala kaleko and lukluk bilong iumi mas gud. (4) Iumi mas garem simpol laef nomoa. (5) Iumi mas werem evri spiritual samting for faet.

3. (a) Why nao Jesus no joinim politik? (b) Wanem waka nao olketa anointed Christian duim? (Storyim footnote.)

³ Taem Jesus stap long earth, hem no joinim politik. Hem tingting strong for preach abaotem Kingdom bilong God, wea hem gavman long heven wea Jesus nao bae King long hem. (Daniel 7:13, 14; Luke 4:43; 17:20, 21) Dastawe Jesus sei olsem long bigman bilong Rome, Pontius Pilate: “Kingdom bilong mi hem no bilong disfala world.” (John 18:36) Olketa disaepol tu faithful for sapotim Kingdom bilong Christ, and talemaot gud nius abaotem Kingdom. (Matthew 24:14) Aposol Paul sei: “Iumi olketa pipol for talemaot toktok bilong Christ. . . . From iumi talemaot toktok bilong Christ, iumi talem pipol for ‘fren bak moa witim God.’” *—2 Corinth 5:20.

4. Hao nao evri trufala Christian showimaot olketa sapotim Kingdom bilong God? (Lukim box wea garem title “ Christian No Joinim Politik Or Faet.”)

⁴ Tingim Hae Commissioner long wanfala kantri. Hem no joinim politik long datfala kantri bikos hem sapotim gavman bilong hem. Nomata olsem, hem duim samting for mekhae long gavman bilong hem. Olketa anointed Christian olsem tu. ‘Hom bilong olketa hem long heven.’ (Philippi 3:20) From olketa strong for talemaot gud nius abaotem Kingdom, olketa helpem staka million “nara sheepsheep” bilong Christ for “fren bak moa witim God.” (John 10:16; Matthew 25:31-40) Olketa “nara sheepsheep” tu sapotim olketa anointed brata bilong Jesus for talemaot gud nius abaotem Kingdom. Tufala grup hia kamap wanfala sekson wea sapotim Kingdom wea Messiah rul long hem, and olketa no joinim politik.—Readim Isaiah 2:2-4.

5. Wanem nao nara reason why olketa tru Christian no joinim politik?

 ⁵ No wei for faithful long Christ nomoa reason why olketa trufala Christian no joinim politik. Olketa Israelite stap long kantri wea God givim long olketa. Bat olketa Christian  distaem stap long staka difren kantri. (Matthew 28:19; 1 Peter 2:9) So sapos iumi joinim politik long kantri bilong iumi, bae iumi no fit for storyim hao Kingdom bilong God nomoa bae stretem evri problem, and iumi bae no wan mind witim evri brata and sista long full world. (1 Corinth 1:10) Nara samting, sapos iumi faet taem kantri bilong iumi faetem nara kantri, iumi bae faetem olketa brata bilong iumi. Sapos olsem, iumi no followim nao wanem Jesus talem for lovem olketa brata and sista. (John 13:34, 35; 1 John 3:10-12) Dastawe Jesus talem olketa disaepol for no faet. Hem talem olketa tu for lovem enemy bilong olketa.—Matthew 5:44; 26:52; lukim box wea garem title “ Waswe, Mi Teksaed?”

6. From iu dedicate long God, bae iu ting hao long “King”?

⁶ Olketa tru Christian dedicate long God. Olketa no worshipim eni man or mekhae long eni organization bilong man. Olketa no mekhae long kantri tu. Long 1 Corinth 6:19, 20, hem sei: “Iufala bilong God nao, bikos hem peim iufala long price wea big tumas.” Olketa tru Christian mas givim long “King” samting wea hem bilong “King” taem olketa respectim hem, peim tax, and duim wanem “King” talem sapos datwan no againstim law bilong God. Bat olketa mas givim long “God samting wea hem bilong God.” (Mark 12:17; Rome 13:1-7) Hem nao taem olketa worshipim hem, lovem hem witim full heart, and obeyim hem. Sapos olketa mas dae bikos olketa faithful long God, olketa willing for dae.—Luke 4:8; 10:27; readim Acts 5:29; Rome 14:8.

7, 8. Wanem nao datfala “air,” and hem “garem paoa” for mekem man wea no obey for duim wanem samting?

⁷ Nara wei wea olketa Christian no olsem pipol long world hem for no followim rabis wei and tingting bilong olketa. Paul sei: “Iumi no kasem tingting bilong pipol long disfala world, bat iumi kasem holy spirit bilong God.” (1 Corinth 2:12) Paul talem olketa long Ephesus: “Long bifor, iufala  savve followim wei bilong pipol long disfala world. Iufala followim man wea rulim datfala air wea kontrolem pipol. Datfala air nao hem tingting bilong pipol long world and hem garem paoa ovarem olketa wea no obey.”—Ephesus 2:2, 3.

⁸ Iumi no savve lukim datfala “air.” Hem strong for mekem man no obeyim God and laekem “nogud samting wea body and eye bilong hem laekem.” (1 John 2:16; 1 Timothy 6:9, 10) Olsem really air, datfala nogud tingting bilong pipol hem stap evriwea raonem iumi and hem evritaem switim man for duim samting wea body laekem. Nara samting tu, hem “garem paoa” for isisi mekem man garem rabis wei, olsem for tingim hemseleva, praod, laek garem bignem, hemseleva disaedem wanem nao hem stret and no stret, bighed, and no obeyim pipol wea leadim hem. Tingting bilong pipol long world hem isisi mekem rabis wei bilong Satan for stap insaed heart bilong olketa man.—John 8:44; Acts 13:10; 1 John 3:8, 10.

9. Wanem nao savve mekem iumi garem tingting bilong world?

⁹ Waswe, tingting bilong world savve affectim mind and heart bilong iu? Ia, sapos iu no keakea. (Readim Proverbs 4:23.) Staka taem datwan hem start for isisi spoelem man bat hem no luksavve, maet from hem fren witim pipol wea hem tingse olketa garem gudfala wei bat olketa no lovem Jehovah. (Proverbs 13:20; 1 Corinth 15:33) Sapos iu readim rabis buk, lukim rabis piksa, readim apostate toktok long Internet, duim hapitaem wea no fitim Christian, and lukluk long sports wea mekhae long wei for winim narawan, olketa samting hia savve mekem iu garem tingting bilong world. Eniwan or eni samting wea mekhae long tingting bilong Satan or world bilong hem savve mekem iumi garem tingting bilong world.

10. Wanem nao iumi savve duim for no followim tingting bilong world?

¹⁰ Wanem nao iumi savve duim for no followim tingting bilong world and gohed kasem gud samting from love bilong  God? Iumi mas mekius long samting Jehovah provaedem for helpem iumi fren gud witim hem and prea for holy spirit. Jehovah strong winim Satan and rabis world wea Satan rulim. (1 John 4:4) Dastawe iumi mas prea evritaem mekem iumi fren gud witim Jehovah!

11. Tingting bilong world mekem pipol werem wanem kaen kaleko?

¹¹ Kaleko man werem, lukluk bilong hem, and sapos body  bilong hem klin or nomoa savve showimaot hem followim tingting bilong God or nomoa. Long staka kantri, hao pipol werem kaleko hem nogud tumas. Wanfala man wea savve toktok long television sei staka gele werem kaleko olsem jury, so hem hard for luksavve hu nao hem jury. Nomata olketa smol gele wea no 13 year yet, olketa werem nogud kaleko. Wanfala niuspepa sei kaleko bilong samfala “showim body and no showimaot respect.” Samfala werem kaleko wea showimaot olketa bighed or olketa ting nating long olketa seleva.

12, 13. Olketa wanem Bible principle nao iumi mas tingim saed long lukluk and kaleko?

¹² From iumi pipol wea worshipim Jehovah, iumi laek for luk naes. Kaleko bilong iumi mas stret, klin, luk gud, and fitim wanem iumi duim. Hem mas evritaem “showimaot respect and gudfala tingting.” Kaen lukluk and kaleko olsem, and ‘gudfala samting wea iumi duim,’ hem fitim for ‘pipol wea sei olketa worshipim God.’ Hem tru, iumi laekem pipol for garem gudfala tingting abaotem iumi, bat samting wea barava important nao hem for “gohed kasem gud samting from love bilong God.” (1 Timothy 2:9, 10; Jude 21) Samting wea mas barava luk naes nao hem ‘samting wea stap long heart bilong iumi wea hem nao samting wea God hem tinghae tumas long hem.’—1 Peter 3:3, 4.

¹³ Kaleko and lukluk bilong iumi savve mekem pipol tinghae long tru worship or nomoa. Greek word wea iumi transleitim “showimaot respect,” minim man barava tingim feeling and tingting bilong narawan. So taem iumi chusim kaleko for werem, iumi mas tingim firstaem konsens bilong narawan, no wanem iumiseleva tingse hem fitim. Iumi laekem tumas for pipol tinghae long Jehovah and pipol bilong hem, and for luksavve iumi wakaman bilong God. Iumi traem best for ‘evri samting wea iumi duim mas givim praise long God.’—1 Corinth 4:9; 10:31; 2 Corinth 6:3, 4; 7:1.

14. Olketa wanem kwestin nao hem gud for tingim saed long kaleko and wei for klin?

 ¹⁴ Hem barava important for klin, werem gudfala kaleko, and lukluk bilong iumi mas gud taem iumi duim ministry or go long meeting. Tingim diswan: ‘Waswe, pipol lukluk strong bikos mi werem nogud kaleko and mi no klin? Waswe, datwan mekem narawan feel shame? Waswe, mi savve werem eni kaleko mi laekem nomata datwan mekem mi no kasem privilege long kongregeson?’—Psalm 68:6; Philippi 4:5; 1 Peter 5:6.

15. Why nao Bible no garem olketa rul saed long kaleko, lukluk, and wei for klin?

¹⁵ Bible no garem olketa rul saed long kaleko, lukluk, and wei for klin. Jehovah no stopem iumi for disaedem wanem for werem bat hem laekem iumi for garem gudfala tingting taem iumi chusim kaleko. Hem laekem iumi for kamap mature Christian wea savve ting raonem olketa Bible principle. Hem laekem iumi for ‘iusim evritaem tingting bilong iumi for luksavve long samting, wea diswan mekem iumi fit for luksavve long wanem hem stret and no stret.’ (Hebrew 5:14) Important samting nao, kaleko and lukluk bilong iumi mas showimaot iumi lovem God and narawan. (Readim Mark 12:30, 31.) Nomata olsem, datwan no stopem iumi for werem difren kaen kaleko and garem difren kaen lukluk. Iumi savve lukim diswan taem pipol bilong Jehovah long olketa  difren kantri werem difren kaen kalakala kaleko taem olketa hipap.

16. (a) Long wanem wei nao tingting bilong world hem difren from samting Jesus teachim? (b) Hem gud for tingim olketa wanem kwestin?

¹⁶ Tingting bilong world savve laea long man and hem mekem staka million pipol tingse selen and material samting savve mekem olketa hapi. Bat Jesus sei: “Nomata man garem staka samting, evri samting hia no mekem hem laef.” (Luke 12:15) Jesus no minim man mas no garem eni samting. Bat hem sei sapos pipol laek hapi and kasem laef, olketa mas “luksavve olketa needim God.” Olketa mas garem simpol laef, wea minim main samting olketa tingim hem for fren gud witim God. (Matthew 5:3; 6:22, 23) Tingim olketa kwestin hia: ‘Waswe, toktok wea Jesus talem hem tru,  or mi letem “dadi bilong wei for laea” spoelem tingting bilong mi? (John 8:44) Wanem nao toktok bilong mi, samting mi laek duim, samting mi tingse hem important, and living bilong mi showimaot abaotem mi?’—Luke 6:45; 21:34-36; 2 John 6.

17. Storyim gud samting man kasem taem hem garem simpol laef.

¹⁷ Jesus sei: “Olketa gudfala samting wea man duim nao showimaot hem garem gudfala tingting.” (Matthew 11:19) Tingim gud samting wea man kasem taem hem garem simpol laef. Taem hem duim waka bilong Kingdom, datwan barava strongim hem. (Matthew 11:29, 30) Hem no kasem staka problem and no wari tumas. (Readim 1 Timothy 6:9, 10.) Hem hapi nomoa long wanem hem garem, so hem garem staka taem for stap witim famili and olketa Christian brata and sista. Hem savve sleep gud tu. (Ecclesiastes 5:12) Hem hapi tumas for givim samting long narawan long taem wea hem fit for duim datwan. (Acts 20:35) Hem “garem strongfala hope” long Jehovah, hapi, and hem satisfae. (Rome 15:13; Matthew 6:31, 32) Tru tumas, olketa blessing hia nambawan!

18. Wanem nao Bible talem abaotem Satan and hao hem faetem iumi?

¹⁸ Sapos iumi gohed kasem gud samting from love bilong God, hem bae protectim iumi long spiritual wei from Satan. Satan no laekem iumi for hapi and for kasem laef olowe. (1 Peter 5:8) Paul sei: “Iumi insaed wanfala faet wea iumi no faetem olketa man bat iumi faetem olketa gavman, olketa leader, and olketa ruler bilong disfala world wea hem dark, wea hem nao bigfala sekson bilong olketa demon wea stap long heven.” (Ephesus 6:12) Greek word wea iumi transleitim “faet,” hem minim kaen faet wea man grabim narawan for torowem hem long graon. Datwan showimaot Satan witim olketa demon stap klosap nomoa olsem tufala man hia wea faet. Nara samting, toktok olsem “olketa gavman,”  “olketa leader,” and “olketa ruler bilong disfala world” showimaot Satan and olketa demon plan for faetem iumi and organize for duim datwan.

19. Wanem nao evri samting for faet wea God givim?

¹⁹ From iumi man nomoa, iumi no strong, bat iumi savve winim Satan. Hao nao iumi savve winim hem? Iumi mas werem “evri samting for faet wea God givim.” (Ephesus 6:13) Ephesus 6:14-18 storyim datwan olsem: “Faet strong taem iufala werem truth olsem wanfala belt raonem bele bilong iufala. Werem tu datfala samting for kavarem chest bilong iufala wea hem nao wei for raeteous. Werem olsem sandol nao, wei wea iufala redi for talemaot gud nius abaotem peace. Nomata wanem hem happen, holem datfala big shield wea hem nao faith. Iufala savve iusim diswan for blokem olketa arrow bilong Satan wea laet long fire. Werem helmet, [or, hope] wea hem nao wei for sev, and holem tu sword bilong spirit, wea hem nao toktok bilong God. Long semtaem, gohed evritaem for talem olketa difren kaen prea witim wei for barava prea strong tu. Taem iufala prea, letem spirit for leadim iufala.”

20. Hao nao faet wea Christian insaed, hem difren from olketa soldia wea faet long war?

²⁰ God nao givim evri samting for faet, so sapos iumi werem evritaem, datwan bae protectim iumi. Iumi Christian insaed faet wea no olsem olketa soldia wea faet long war. Olketa soldia savve rest longtaem lelebet taem no eni faet gohed. Bat iumi Christian mas faet evriday for gohed fren witim God, go kasem taem God finisim world bilong Satan and putim hem witim olketa demon insaed hol wea deep tumas. (Revelation 12:17; 20:1-3) So no givap sapos iu garem wik point or samfala taem iu laek duim rabis samting. Iumi evriwan mas “whipim” iumiseleva mekem iumi gohed faithful long Jehovah. (1 Corinth 9:27) Tru tumas, sapos iumi no faet, hem nao taem for lukluk gud long iumiseleva!

21. Hao nao iumi savve winim Satan taem hem faetem iumi?

 ²¹ Nara samting, iumiseleva no strong for faetem Satan and winim hem. Dastawe Paul sei iumi mas prea long Jehovah and “letem spirit for leadim” iumi. Iumi mas lisin long Jehovah tu long wei for studyim Bible and hipap evritaem witim olketa nara “soldia,” bikos no iumiseleva nomoa faet! (Philemon 2; Hebrew 10:24, 25) Olketa wea duim evri samting hia bae winim Satan and bae redi evritaem for ansarem eniwan wea kwestinim hope bilong olketa.

22, 23. (a) Why nao iumi mas redi evritaem for ansarem eniwan wea kwestinim hope bilong iumi? (b) Olketa wanem kwestin nao hem gud for tingim? (c) Wanem nao iumi bae storyim long Chapter 6?

²² Jesus sei: “Iufala no olsem pipol long world. Dastawe pipol long world heitim iufala.” (John 15:19) So olketa Christian mas redi evritaem for ansarem eniwan wea kwestinim hope bilong olketa, bat givim ansa long wei wea hambol and showimaot bigfala respect. (Readim 1 Peter 3:15.) Tingim olketa kwestin hia: ‘Waswe, mi savve why Olketa Jehovah’s Witness samfala taem duim samting wea difren from wanem staka pipol duim? Taem mi no followim world, waswe, mi bilivim samting wea Bible talem and wakaman wea faithful and wise talem hem tru? (Matthew 24:45; John 17:17) And waswe, mi hapi for duim samting wea difren from wanem nara pipol duim bikos mi laek mekem Jehovah hapi?’—Psalm 34:2; Matthew 10:32, 33.

²³ Staka taem, olketa samting wea mekem iumi followim tingting bilong world savve traem iumi long wei wea iumi no luksavve. Iumi storyim finis Satan iusim hapitaem wea no fitim olketa Christian for switim olketa for followim world. Hao nao iumi savve chusim hapitaem wea savve strongim iumi and konsens bilong iumi hapi long hem? Iumi bae storyim datwan long Chapter 6.