1. (a) Wanem kaen pipol nao Jehovah leadim kam long hem? (b) Why nao olketa mas gohed for mek sure long samting wea God hapi long hem?

JESUS hem sei: “Olketa wea worshipim God long stretfala wei bae worshipim hem followim holy spirit and followim samting wea tru. God lukaotem kaen pipol olsem for worshipim hem.” (John 4:23) Taem Jehovah lukim pipol olsem, wea iu tu wanfala, hem leadim olketa for kam long hem and long Son bilong hem. (John 6:44) Datwan hem barava nambawan samting! Bat olketa wea tinghae long tru samting wea Bible talem mas ‘gohed for mek sure olketa savve long samting wea Lord hapi long hem’ bikos Satan hem savve tumas hao for trikim pipol.—Ephesus 5:10; Revelation 12:9.

2. Hao nao tingting bilong Jehovah abaotem olketa wea joinim tru religion witim false religion?

² Tingim samting wea happen klosap long Maunt Sinai taem olketa Israelite askem Aaron for wakem wanfala god. Aaron duim datwan. Hem mekem wanfala gold buluka and then hem talem samting wea mekem olketa for tingse datwan hem stand for Jehovah. Hem sei: “Wanfala festival for Jehovah bae kamap tumoro.” Waswe, Jehovah hapi long wei wea olketa joinim tru religion witim false religion? Nomoa. Long datfala taem, Jehovah killim dae samting olsem 3,000 pipol wea worshipim datfala idol. (Exodus 32:1-6, 10, 28) Wanem nao iumi lanem from datwan? Sapos iumi laek gohed kasem gud samting from love bilong God, iumi mas “no tasim eni samting wea no klin” and no duim eni samting wea spoelem trufala worship.—Isaiah 52:11; Ezekiel 44:23; Galatia 5:9.

3, 4. Why nao iumi mas followim olketa Bible principle taem iumi ting raonem olketa celebration and kastom wea pipol duim?

 ³ Olketa aposol helpem olketa Christian for no followim apostate teaching. Bat bihaen olketa aposol dae, samfala wea sei olketa Christian bat wea no tinghae long tru samting long Bible start for followim olketa heathen wei for worship. Olketa duim olketa heathen celebration, and markem olketa day wea olketa heathen sei hem holy. Olketa sei hem olraet nomoa for Christian duim olketa samting hia. (2 Thessalonica 2:7, 10) Taem iumi storyim samfala celebration hia, trae for luksavve hao olketa followim tingting bilong pipol long world and no tingting bilong God. Staka taem, olketa celebration wea world duim mekhae long samting wea body laekem. Olketa mekhae tu long olketa laea teaching bilong false religion, and samting wea join witim devildevil. Kaen samting olsem join witim “Bigfala Babylon.” * (Revelation 18:2-4, 23) Iumi mas luksavve tu, Jehovah lukim nogud samting wea olketa heathen duim long worship bilong olketa bifor. Olketa samting hia nao start bilong staka celebration distaem. Distaem tu Jehovah barava feel nogud long olketa celebration olsem. Iumi tu shud garem sem tingting olsem Jehovah!—2 John 6, 7.

⁴ Iumi olketa tru Christian savve Jehovah no hapi long samfala celebration and iumi mas disaed strong for no duim eni samting wea join witim olketa celebration olsem. Taem iumi storyim samfala celebration wea Jehovah no laekem, datwan bae strongim iumi for no duim eni samting wea bae mekem iumi no gohed kasem gud samting from love bilong God.

5. Hao nao iumi savve Jesus hem no born long December 25?

⁵ Bible nating storyim birthday bilong Jesus. No eniwan savve long barava day wea hem born tu. Iumi savve hem no  born long December 25 bikos long datfala month hem barava cold long Bethlehem. * Samting wea Luke talem helpem iumi for savve Jesus no born long datfala taem. Luke storyim taem wea Jesus hem born, and hem sei: “Samfala man . . . stap aotsaed long naet for lukaftarem sheepsheep.” (Luke 2:8-11) Sapos hem wei bilong olketa for “stap aotsaed” evri month, Luke bae no storyim datwan. Bethlehem savve cold tumas long month bilong December, so hard for olketa man “stap aotsaed” long datfala taem. Long cold taem olketa savve keepim olketa sheepsheep long ples wea cold no spoelem olketa. Nara samting tu, Joseph and Mary go long Bethlehem bikos King Augustus laek duim wanfala census. (Luke 2:1-7) King bae no talem pipol wea les long Rome for go bak long hom bilong olketa long taem wea hem barava cold tumas.

6, 7. (a) Wei for celebratem Christmas hem start kam from wanem? (b) Hao nao wei wea pipol givim Christmas present hem difren from wei wea Christian givim present?

⁶ Bible nating storyim Christmas, bat wei for celebratem Christmas hem start kam from olketa heathen celebration. Wanfala nao hem Roman Saturnalia, wea hem nao celebration wea olketa duim for Saturn, god bilong agriculture. Nara samting tu, New Catholic Encyclopedia sei pipol wea worshipim god Mithra markem December 25 olsem “birthday bilong sun.” Datfala buk sei “Christmas hem start long taem wea pipol long Rome strong for worshipim sun god.” Datwan hem samting olsem 300 year bihaen Christ hem dae.

⁷ Long taem wea olketa heathen duim olketa celebration hia, olketa savve givim present and mekem olketa big kaikai. Olketa wea celebratem Christmas distaem tu duim sem samting. Long bifor and distaem tu, wei wea olketa givim present hem no followim wanem 2 Corinth 9:7 talem. Hem sei: “Evri  man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.” Olketa tru Christian givim samting long narawan bikos olketa lovem hem, no from olketa followim wanfala date or laek kasem samting from narawan. (Luke 14:12-14; readim Acts 20:35.) From olketa tru Christian no celebratem Christmas, olketa no busy tumas long olketa Christmas samting and olketa no garem big kaon tu.—Matthew 11:28-30; John 8:32.

8. Waswe, olketa man wea lukluk long olketa star givim birthday present long Jesus? Storyim kam.

⁸ Samfala sei olketa man wea lukluk long olketa star givim birthday present long Jesus. Olketa givim present, bat hem no birthday present. Olketa givim present for showimaot olketa respectim samwan wea hem important. Hem nao samting  wea pipol long datfala taem savve duim. (1 Kings 10:1, 2, 10, 13; Matthew 2:2, 11) Nara samting tu, olketa no go lukim Jesus long naet wea hem born. Taem olketa go for lukim Jesus, hem no wanfala baby bat hem big lelebet nao and hem stap long wanfala haos.

9. Wanem nao happen long olketa birthday celebration wea Bible storyim?

⁹ Nomata evriwan savve hapi taem baby hem born, Bible no storyim eniwan wea worshipim God celebratem birthday bilong hem. (Psalm 127:3) Waswe, olketa wea raetem Bible forget for story abaotem birthday? Nomoa. Bible storyim birthday bilong Pharaoh long Egypt and birthday bilong Herod Antipas. (Readim Genesis 40:20-22; Mark 6:21-29.)  Bat nogud samting nao happen long tufala birthday hia. Long birthday bilong Herod Antipas, hem komandim wanfala soldia for katemaot hed bilong John Baptaesa.

10, 11. Wanem nao tingting bilong olketa firstfala Christian abaotem birthday, and why nao olsem?

¹⁰ The World Book Encyclopedia sei: “Long tingting bilong olketa firstfala Christian, olketa heathen nomoa celebratem birthday.” Pipol long Greece bifor bilivim evri man wanwan garem spirit for protectim hem. Olketa bilivim datfala spirit kam taem man born and lukaftarem hem for full laef bilong hem. Wanfala buk The Lore of Birthdays sei datfala spirit hem fren gud witim god wea garem birthday wea semsem witim birthday bilong datfala man. Nara samting, for longfala taem finis pipol luksavve wei for celebratem birthday hem join witim wei for lukluk long olketa star for trae savve long samting wea bae happen, wea datwan hem “astrology.”

¹¹ So pipol wea worshipim God bifor no celebratem birthday bikos olketa savve hem samting olketa heathen duim and hem devildevil samting. Nara reason olketa no duim hem bikos olketa hambol. Long tingting bilong olketa, day wea olketa born hem no important mekem olketa celebratem. * (Micah 6:8; Luke 9:48) Bat olketa mekhae long Jehovah and thankiu long hem for laef wea olketa garem. *—Psalm 8:3, 4; 36:9; Revelation 4:11.

12. Hao nao day wea man dae hem gud winim day wea hem born?

¹² God no savve forgetim pipol wea faithful long hem wea dae, and bae hem mekem olketa for laef bak. (Job 14:14, 15)  Long Ecclesiastes 7:1 hem sei: “Gudfala nem hem gud winim spesol oil, and day wea man dae hem gud winim day wea hem born.” Iumi bae garem “gudfala nem” sapos God tinghae long iumi bikos iumi faithful long hem. Bible no talem olketa Christian for celebratem birthday. Bat interesting samting nao, Bible komandim olketa Christian for duim wanfala celebration nomoa, wea hem nao for celebratem day wea Jesus dae. Diswan hem bikos gudfala “nem” wea Jesus garem witim God nao main samting wea savve sevem iumi.—Hebrew 1:3, 4; Luke 22:17-20.

13, 14. Wanem nao olketa samting wea join witim Easter?

¹³ Pipol sei Easter hem for celebratem taem wea Christ hem laef bak, bat Easter start kam from false religion. Samfala pipol sei disfala nem Easter kam from Eostre, or Ostara wea hem nem bilong wanfala woman god bilong Anglo-Saxon pipol. Hem woman god bilong early morning and spring season. Bat hao nao gogo rabbit and egg join witim Easter? Encyclopædia Britannica sei egg “hem savve piksarem niu laef and wei for laef bak.” Olketa rabbit hem samting wea pipol iusim for longtaem finis for piksarem wei for garem staka pikinini. Pipol sei Easter hem taem for celebratem day wea Christ laef bak, bat tru samting nao, hem join witim wei for worshipim heathen god for garem staka pikinini. *

¹⁴ Waswe, Jehovah hapi taem pipol joinim kaen rabis samting olsem witim wei wea Son bilong hem laef bak? Barava nomoa nao! (2 Corinth 6:17, 18) Tru samting nao, Bible nating talem iumi for celebratem taem wea Jesus laef bak. So man wea celebratem Easter and hem sei hem celebratem taem wea Jesus laef bak, hem nating obeyim God.

15, 16. (a) Why nao olketa wea plan for marit mas ting raonem firstaem olketa Bible principle? (b) Olketa Christian shud ting hao abaotem wei for torowem rice or eni nara samting long taem bilong wedding?

¹⁵ Klosap nao “no eniwan bae herem moa voice bilong man and gele wea bae marit [long Bigfala Babylon].” (Revelation 18:23) Why nao olsem? From hem duim samting wea join witim devildevil, hem bae finis. Wei for duim samting wea join witim devildevil long wedding day savve spoelem marit.—Mark 10:6-9.

¹⁶ No evri kantri hem semsem long hao pipol duim marit. Maet pipol tingse samting wea olketa duim long wedding hem olraet nomoa, bat maet hem join witim samting wea pipol duim long Babylon bifor. Long tingting bilong olketa, wei for duim olketa samting hia savve mekem tufala wea marit or pipol wea kam long marit for kasem ‘gud samting.’ (Isaiah 65:11) Wanfala samting wea olketa savve duim nao hem for torowem rice or eni nara samting antap long tufala wea marit. Luk olsem, datwan hem kam from biliv wea sei kaikai savve mekem olketa demon for no kros and no duim eni nogud samting long tufala wea marit. Nara samting tu, start long bifor kam pipol bilivim rice hem join witim wei for garem staka pikinini, wei for hapi, and for laef longtaem. Tru tumas, for gohed kasem gud samting from love bilong God, iumi mas no duim kaen samting olsem.—Readim 2 Corinth 6:14-18.

17. Olketa wanem Bible principle nao tufala wea plan for marit and olketa wea kam long wedding shud followim?

¹⁷ Pipol wea worshipim Jehovah no duim eni samting wea followim nogud wei bilong pipol long world wea savve spoelem wedding and marit feast, or wea savve spoelem konsens bilong narawan. Speech wea olketa mekem long marit feast hem mas no garem eni nogud toktok or dirty toktok for mekfani. Hem no fitim tu for talem eni toktok or duim eni samting wea savve mekem tufala wea marit and olketa narawan for feel shame. (Proverbs 26:18, 19; Luke 6:31; 10:27)  Olketa Christian bae no garem tu marit feast wea ova tumas wea showimaot “wei for man show-off witim samting wea hem garem.” (1 John 2:16) Taem iu planim marit, tingim hao Jehovah laekem iu for hapi and no sorre taem iu ting go bak long wedding day bilong iu. *

18, 19. (a) Wanem nao wanfala buk talem abaotem start bilong wei for apim glass? (b) Why nao olketa Christian no duim datwan?

¹⁸ Staka taem pipol savve apim glass (toasting) long taem bilong olketa marit feast and long taem olketa hipap. Datfala 1995 International Handbook on Alcohol and Culture sei: “Wei for apim glass . . . hem start kam from lotu samting wea pipol duim bifor taem olketa offerim alcohol long olketa god . . . . Olketa duim diswan for mekem olketa god ansarem prea wea man talem for narawan, wea hem ask for hem ‘laef longtaem!’ or ‘garem gudfala health!’”

¹⁹ Hem tru, maet staka pipol no tingim wei for apim glass hem lotu samting or hem samting wea join witim kastom. Nomata olsem, wei for apim wine glass hem savve luk olsem man laek kasem blessing from samwan long heven. Bat datfala wei for askem blessing hem no followim wanem Bible talem.—John 14:6; 16:23. *

20. Wanem kaen festival nao olketa Christian no joinim, and why nao olsem?

²⁰ Long samfala kantri, evri year pipol mekem samfala festival wea savve mekhae long kaen wei for dance wea nogud.  Maet olketa festival hia mekhae tu long wei for man sleep witim man, and woman sleep witim woman. Olketa festival hia showimaot nogud wei bilong pipol long world wea Bigfala Babylon sapotim. Waswe, hem fitim for ‘man wea lovem Jehovah’ go lukluk long kaen festival olsem? Sapos hem duim datwan, waswe, hem showimaot hem heitim nogud samting? (Psalm 1:1, 2; 97:10) Hem gud for followim tingting bilong man wea raetem psalm wea sei: “No letem eye bilong mi lukim rabis samting”!—Psalm 119:37.

21. Wanem taem nao Christian savve disaed followim konsens bilong hem for joinim wanfala celebration or nomoa?

²¹ Long day wea pipol long world garem celebration, olketa Christian mas no duim eni samting wea mekem pipol tingse olketa joinim datfala celebration. Paul sei: “Nomata iufala kaikai or drink or duim eni nara samting, evri samting wea iufala duim mas givim praise long God.” (1 Corinth 10:31; lukim box wea garem title “ Mekem Olketa Wisefala Disison.”) Bat sapos wanfala celebration no join witim false religion, no join witim politik, no mekhae long kantri, and no againstim eni Bible principle, then Christian savve disaed seleva for joinim datwan or nomoa. Nomata olsem, hem no laek duim eni samting wea bae mekem narawan stambol.

22, 23. Hao nao iumi savve helpem narawan for laek duim samting wea Jehovah sei hem stret?

²² Staka pipol tingse olketa celebration distaem hem chance nomoa for olketa fren and famili hipap tugeta. Waswe sapos samwan tingse wei wea iumi followim Bible hem no showimaot love and hem ova tumas? Long kaenfala wei, iumi savve talem hem Olketa Jehovah’s Witness tinghae long wei for olketa fren and famili hipap tugeta. (Proverbs 11:25; Ecclesiastes 3:12, 13; 2 Corinth 9:7) Staka  taem long year, iumi hapi for hipap witim olketa wea iumi lovem. Bat from iumi lovem God and iumi laek for duim samting wea hem sei hem stret, iumi no laek duim eni samting wea bae mekem hem no hapi.—Lukim box wea garem title “ Tru Worship Mekem Man Barava Hapi.”

²³ Samfala Witness duim gud samting long ministry taem olketa storyim samfala point long chapter 16 long buk, Wanem Nao Really Samting wea Bible Teachim? * Bat hem gud for tingim diswan: Iumi laek helpem man for interest long tru samting, iumi no trae for pruvim hem rong. Iumi mas respectim narawan, gohed for hambol, and ‘toktok bilong iumi mas evritaem kaen and olsem iumi putim solt long hem.’—Colossae 4:6.

24, 25. Wanem nao dadi and mami savve duim for helpem pikinini garem strong faith and lovem Jehovah?

²⁴ Iumi wea worshipim Jehovah savve long olketa celebration and hao olketa start. Iumi savve why iumi bilivim and duim samfala samting, and why iumi no duim olketa nara samting. (Hebrew 5:14) So dadi and mami, hem gud for iufala teachim pikinini for minim olketa Bible principle and for savve hao for storyim long olketa narawan. Taem iufala duim olsem, iufala strongim faith bilong pikinini, iufala helpem hem for iusim Bible for ansarem eniwan wea askem hem wanem hem bilivim, and hem bae luksavve Jehovah lovem hem.—Isaiah 48:17, 18; 1 Peter 3:15.

²⁵ Sapos iumi worshipim God “followim holy spirit and followim samting wea tru,” iumi bae no duim celebration wea no followim wanem Bible talem. Iumi bae traem best tu for honest long evri samting wea iumi duim. (John 4:23) Long tingting bilong staka pipol distaem, man no need for honest. Bat long Chapter 14, iumi bae lanem hem gud for evritaem duim wanem God laekem.