Long 1 Corinth 6:1-8, aposol Paul storyim olketa Christian wea tekem brata bilong olketa long kot. Hem no hapi bikos samfala Christian long Corinth “go long kot for olketa wea no biliv nao stretem [problem].” (Verse 1) Paul talem olketa gud reason why olketa Christian shud no go long kot for stretem problem witim nara Christian, bat olketa shud followim information wea olketa kongregeson kasem abaotem datwan. Bae iumi storyim samfala reason why datfala kaonsel from God hem stap insaed long Bible. Then bae iumi storyim samfala samting moa wea maet datfala kaonsel hem no storyim.

Sapos iumi garem problem saed long bisnis witim nara Christian, iumi laek stretem datwan followim samting wea Jehovah talem, no followim samting wea iumiseleva tingse hem stret. (Proverbs 14:12) Jesus sei hem gud for kwiktaem stretem problem, nogud gogo hem kamap bigfala problem. (Matthew 5:23-26) Bat sorre tumas, samfala Christian raoa tumas gogo olketa tekem brata bilong olketa long kot. Paul sei: “Taem iufala tekem brata bilong iufala long kot iufala mek shame long iufala seleva.” Why nao olsem? Wanfala main reason hem bikos for duim olsem savve spoelem nem bilong kongregeson and no mekhae long God wea iumi worshipim. So hem gud for tingim wanem Paul talem: “Betawei iufala letem nomoa brata for spoelem and ravem iufala.”—Verse 7

Paul talem tu God mekem gudfala arrangement long kongregeson for stretem olketa problem. Olketa Christian elder wise bikos olketa kasem savve from Bible. Paul sei olketa fit for “stretem problem bilong olketa brata” saed long “olketa problem distaem.” (Verse 3-5) Jesus storyim thrifala samting wea Christian savve duim for stretem problem wea kamaot from kaen bigfala sin olsem man laea for spoelem narawan and ravem narawan saed long selen. First samting, iuseleva mas go story witim man wea sin againstim iu for trae stretem datfala problem. Mek-tu samting, sapos iu duim finis firstfala samting  wea Jesus storyim and datwan no stretem problem, go bak long hem and tekem wan or tufala man for herem story bilong iufala. Mek-thri samting, sapos iu traem finis first and mek-tu samting bat datwan no stretem problem yet, go story long kongregeson, wea minim olketa elder.—Matthew 18:15-17.

Hem no waka bilong olketa elder for givim advaes saed long law or bisnis. Olketa no mekem tu olketa rul wea olketa brata mas followim for stretem problem saed long bisnis. Bat olketa elder trae hard for helpem olketa wea garem problem for followim wanem Bible talem, and for stretem datfala problem long wei wea mekem evriwan hapi. Sapos hem wanfala hard problem, olketa elder savve story witim circuit overseer or branch office bilong Olketa Jehovah’s Witness. Bat samfala samting savve happen wea kaonsel bilong Paul no storyim. Wanem nao datwan?

Samfala taem, iumi mas go long kot for stretem problem. Samfala example nao maet for mekem divorce, disaedem hu nao bae tekem pikinini, disaedem selen for maintenance, kasem compensation from insurance company, kasem selen sapos wanfala bisnis hem bankrupt, and for kot sei wanfala will hem stret followim law. Maet wanfala brata mas go long kot tu for protectim hemseleva taem narawan tekem hem long kot. *

Sapos iu go long kot for kaen samting olsem and iu no garem tingting for raoa taem iu go, maet datwan no againstim kaonsel wea Paul talem. * Bat main samting wea Christian mas evritaem tingim hem for mekhae long nem bilong Jehovah, and for kongregeson garem peace and wan mind. Main samting wea showimaot iumi olketa Christian nao hem love, and “man wea garem love . . . no tingim hemseleva nomoa.”—1 Corinth 13:4, 5; John 13:34, 35.