1, 2. Wanem nambawan present nao God givim, and why nao hem nambawan?

GOD givim iumi wanfala nambawan present. Hem givim iumi laef. Hem givim tu wei for savve minim and tingting raonem samting and for showimaot olketa wei bilong hem. (Genesis 1:27) From God givim iumi datfala present, iumi fit for minim olketa Bible principle, and for minim tu, hao olketa principle hia savve helpem iumi. Taem iumi followim olketa Bible principle, iumi savve kamap strongfala Christian wea lovem Jehovah and wea ‘iusim evritaem tingting bilong iumi for luksavve long samting, wea diswan mekem iumi fit for luksavve long wanem hem stret and no stret.’—Hebrew 5:14.

² Hem barava important for ting raonem olketa Bible principle bikos enikaen samting savve kamap distaem and hem hard nao for garem olketa law for fitim evri samting wea savve happen. Wanfala example long diswan nao hem saed long medical. Distaem olketa wakem enikaen treatment and duim olketa operation wea iusim blood. Evriwan wea laek obeyim Jehovah mas tingting gud abaotem diswan. Sapos iumi minim gud olketa Bible principle, iumi bae disaedem gudfala samting wea bae no spoelem konsens bilong iumi and iumi bae gohed kasem gud samting from love bilong God. (Proverbs 2:6-11) Iumi bae storyim samfala Bible principle.

3, 4. Wanem taem nao Bible firstaem storyim hao blood hem holy samting, and diswan hem kam from olketa wanem Bible principle?

³ Bihaen Cain killim dae Abel, Jehovah showimaot for first  taem, blood hem piksarem laef bilong man, and laef and blood tufala evriwan holy samting. God sei long Cain: “Herem! Blood bilong brata bilong iu hem singaot kam long mi from graon.” (Genesis 4:10) Long tingting bilong Jehovah, blood bilong Abel hem piksarem laef bilong hem wea hem no laef longtaem bikos Cain killim hem dae. So hem olsem blood bilong Abel singaot go long God mekem hem changem bak nogud samting wea Cain duim.—Hebrew 12:24.

⁴ Bihaen long Flood, God letem olketa man for kaikaim meat bilong animal bat olketa mas no kaikaim blood. God sei: “Iufala mas no kaikaim meat wea blood stap yet insaed long hem bikos datwan hem laef bilong hem. Nara samting tu, mi bae askem bak blood bilong soul bilong iufala.” (Genesis 9:4, 5) Start kam long taem bilong Noah, iumi evriwan mas obeyim datfala law. Datfala law mekhae long samting wea God showimaot long Cain taem hem sei blood bilong evri animal and man hem piksarem soul, wea minim laef bilong olketa. Law hia showimaot tu, Jehovah wea givim laef bae judgem evri man wea no respectim laef and blood.—Psalm 36:9.

5, 6. Hao nao Law bilong Moses showimaot blood hem holy and spesol? (Lukim box wea garem title “ Tinghae Long Laef Bilong Animal.”)

⁵ Law bilong Moses showimaot tu blood piksarem laef and hem holy. Long Leviticus 17:10, 11 hem sei: “Sapos eni man . . . kaikaim blood, mi bae barava againstim man wea kaikaim blood, and mi bae killim hem dae. Laef hem stap long blood, and mi putim datwan long altar for aotem sin bilong iufala. From laef hem stap insaed long blood, datfala blood savve aotem sin, dastawe nao mi putim blood long altar.” *—Lukim box wea garem title “ Blood Savve Kavarem Sin.”

⁶ Sapos olketa Israelite no putim blood bilong animal long altar, olketa mas kapsaetem blood hia long graon. So long tokpiksa wei, hem olsem laef bilong datfala animal hem go bak long Jehovah wea ownim datwan. (Deuteronomy 12:16; Ezekiel 18:4)  Datwan no minim olketa mas barava aotem evri sismol blood from meat bifor olketa kaikaim. Sapos wanfala Israelite busarem animal and hem aotem blood long stretfala wei, konsens bilong hem savve letem hem kaikaim datwan bikos hem showimaot hem respectim Jehovah, wea givim laef.

7. Wanem nao David duim wea showimaot hem respectim blood?

⁷ David hem man wea “barava wan mind witim [God],” and  hem minim gud olketa principle wea join witim law bilong God abaotem blood. (Acts 13:22) Wanfala taem, David laek drink wata tumas, so thrifala soldia bilong hem go insaed long camp bilong enemy mekem olketa tekem kam wata from wanfala well. Wanem nao tingting bilong David abaotem datwan? Hem sei: “Hard for mi drinkim blood bilong olketa man wea putim laef bilong olketa long danger.” Long tingting bilong hem, wei for drinkim datfala wata bae olsem hem drinkim blood bilong olketa. Diswan hem bikos olketa putim laef bilong olketa long danger wea blood nao mekem olketa for laef. Nomata David laek drink tumas, hem “kapsaetem wata hia long graon, wea hem olsem hem givim go bak long Jehovah.”—2 Samuel 23:15-17.

8, 9. Waswe, tingting bilong God abaotem laef and blood hem change taem firstfala Christian kongregeson start? Minim kam.

⁸ Long samting olsem 2,400 year bihaen long Flood, and long samting olsem 1,500 year bihaen Jehovah givim Law covenant long Moses, Jehovah iusim holy spirit for leadim governing body bilong firstfala Christian kongregeson for sei: “Samting wea holy spirit helpem mifala for disaedem nao hem for no putim eni hevi long iufala, bat for askem iufala for duim nomoa olketa important samting hia: Stap klia long eni kaikai wea pipol sakrifaesim long olketa idol, stap klia long blood, no kaikaim eni animal wea olketa skwisim nek bilong hem, and no durong.”—Acts 15:28, 29.

⁹ Tru tumas, firstfala governing body luksavve blood hem holy and sapos man no stap klia long blood, datwan hem barava rong olsem wei for worshipim idol or durong. Olketa tru Christian distaem tu stap klia long blood. Nara samting tu, olketa ting raonem and followim olketa Bible principle, dastawe olketa mekem Jehovah hapi taem olketa disaedem eni samting abaotem blood.

10, 11. (a) Wanem nao tingting bilong Olketa Jehovah’s Witness abaotem blood transfusion wea iusim full blood and fofala main part bilong hem? (b) Wanem kaen treatment nao olketa Christian wanwan mas disaedem?

¹⁰ Olketa Jehovah’s Witness luksavve wei for “stap klia long blood” hem minim for no tekem blood transfusion, no givim blood, and no keepim blood bilong olketa seleva for iusim long narataem. Olketa tinghae long law bilong God so olketa no  tekem fofala main part bilong blood tu, wea hem nao: olketa red cell, olketa white cell, olketa platelet, and plasma.

¹¹ Distaem olketa doctor iusim olketa fraction, wea hem nao olketa barava smol part wea olketa tekem from fofala main part long blood. Olketa iusim olketa fraction long samfala treatment. Waswe, hem olraet for Christian tekem olketa fraction? Waswe, hem ting long olketa fraction hia olsem “blood”? Man seleva nao mas disaed. Hemseleva mas disaed tu sapos hem bae letem doctor for iusim olketa samting olsem hemodialysis, hemodilution, or cell salvage, wea iusim blood bilong hemseleva. Bat doctor mas no aotem blood bilong hem firstaem, keepim for lelebet taem, and then putim go bak insaed long hem.—Lukim Appendix wea garem title “Olketa Blood Fraction and Operation.”

12. Iumi mas ting hao long olketa samting wea man wanwan mas disaedem followim konsens bilong hem?

¹² Sapos iumi wanwan free for disaedem samting saed long  blood, waswe, datwan minim samting wea iumi disaedem hem no important long Jehovah? Nomoa, bikos hem laek savve long tingting bilong iumi and why nao iumi disaed olsem. (Readim Proverbs 17:3; 24:12.) So bihaen iumi askem God for helpem iumi and iumi duim research abaotem wanfala medicine or operation, iumi shud followim konsens bilong iumi wea followim wanem Bible talem. (Rome 14:2, 22, 23) Olketa narawan shud no forcem iumi for followim konsens bilong olketa and iumi tu shud no askem narawan olsem: “Sapos samting olsem kasem iu, wanem nao bae iu duim?” Long olketa kaen samting olsem, “man seleva” nao mas disaedem wanem hem bae duim. *—Galatia 6:5; Rome 14:12; lukim box wea garem title “ Waswe, Mi Ting Long Blood Hem Holy Samting?”

13. Wanem nao olketa law and principle bilong Jehovah showimaot abaotem hem? Storyim kam.

¹³ Olketa law and principle wea stap long Bible showimaot Jehovah hem wise, hem Dadi wea lovem olketa pikinini bilong hem, and hem laekem olketa for stap gud. (Psalm 19:7-11) Taem God givim law for iumi “stap klia long blood,” hem no talem datwan for mekem iumi garem healthy body. Bat taem iumi obeyim datfala law, iumi bae no kasem nogud samting wea man savve kasem taem hem tekem blood transfusion. (Acts 15:20) Tru tumas, staka doctor and olketa man wea savve gud long olketa medicine and treatment sei “operation wea no iusim blood nao hem barava gud winim operation wea iusim blood.” Olketa tru Christian luksavve olketa samting hia showimaot Jehovah garem barava bigfala savve and hem lovem iumi.—Readim Isaiah 55:9; John 14:21, 23.

14, 15. (a) Olketa wanem law nao showimaot God lovem pipol bilong hem? (b) Hao nao iu savve followim olketa Bible principle wea join witim olketa law hia?

¹⁴ Plande law wea God givim long olketa Israelite showimaot hem tingim olketa. Long Israel bifor, famili savve duim plande  samting long ruf long haos wea hem flat. Dastawe Jehovah talem olketa mas wakem smol wall raonem ruf mekem no eniwan savve foldaon. (Deuteronomy 22:8; 1 Samuel 9:25, 26; Nehemiah 8:16; Acts 10:9) God talem olketa tu for putim long fence olketa buluka wea savve killim man dae. (Exodus 21:28, 29) Sapos man no obeyim olketa law hia, hem showimaot hem ting nating long laef bilong narawan and hem savve kamap guilty sapos nara man hem dae.

¹⁵ Wanem nao iu savve duim mekem iu followim olketa Bible principle long olketa law hia? Ting raonem olketa kwestin hia: Waswe, trak bilong iu sef for draevem? Waswe, iu careful taem iu draev? Waswe, iu mek sure olketa animal bilong iu no attakim pipol? Waswe, evri samting long haos bilong iu and ples wea iu waka hem sef? Waswe, iu careful for no duim eni hapitaem wea danger? Long samfala kantri, staka young wan dae bikos olketa duim krangge samting. Bat olketa young wan wea laek gohed kasem gud samting from love bilong God olketa tinghae long laef. Olketa no duim krangge hapitaem wea savve killim olketa dae. Olketa no tingse from olketa young, olketa bae no kasem eni nogud samting. Bat taem olketa young, olketa enjoyim laef long wei for stap klia long eni samting wea savve isi for spoelem olketa.—Ecclesiastes 11:9, 10.

16. Wanem Bible principle nao storyim wei for no killim dae baby long bele? (Lukim tu footnote.)

¹⁶ God tinghae tumas long baby wea stap insaed bele bilong mami. Long Israel bifor, sapos wanfala man mekem samting wea spoelem woman wea babule and woman hia or baby bilong hem dae, long tingting bilong God, hem olsem man hia killim man dae, so hem mas “dae” tu. * (Readim Exodus 21:22, 23.) Tingim feeling bilong Jehovah taem hem lukim olketa killim dae staka baby long bele evri year. Olketa duim datwan bikos olketa durong olobaot and no laek hard waka for lukaftarem pikinini.

17. Hao nao iu savve encouragem samwan wea killim dae baby long bele from hem no savve yet law bilong God?

 ¹⁷ Waswe sapos wanfala woman killim dae baby long bele bilong hem taem hem no savve yet long wanem Bible talem?  Waswe, Jehovah bae no forgivim hem nao? God savve forgivim hem! Tru tumas, Jehovah bae forgivim man wea repent bikos Jesus peim finis price for sevem evri man. (Psalm 103:8-14; Ephesus 1:7) Christ hem sei: “Mi no kam for talem gudfala pipol for repent, bat for talem pipol wea sin nao for repent.”—Luke 5:32.

18. Wanem nao Bible talem abaotem samting wea savve mekem pipol for killim dae narawan?

¹⁸ Jehovah no laekem iumi for spoelem narawan. Bat samting wea barava important nao, hem laekem iumi for aotem from heart eni feeling for heitim narawan wea savve mekem iumi for killim man dae. Aposol John sei: “Eniwan wea heitim brata bilong hem, hem man for killim man dae.” (1 John 3:15) Datfala scripture no storyim man wea no laekem narawan, bat hem storyim man wea laekem narawan for dae. Hem showimaot hem heitim brata bilong hem taem hem laea for spoelem hem, or hem laea for accusim hem long samting wea bae mekem Jehovah for judgem hem. (Leviticus 19:16; Deuteronomy 19:18-21; Matthew 5:22) Dastawe iumi mas waka hard for aotem from heart eni rabis tingting wea bae mekem iumi heitim narawan!—James 1:14, 15; 4:1-3.

19. Man wea followim olketa Bible principle bae ting hao long olketa scripture olsem Psalm 11:5 and Philippi 4:8, 9?

¹⁹ Olketa wea tinghae long laef olsem Jehovah, and wea laek gohed kasem gud samting from love bilong God, olketa bae stap klia long enikaen raf samting. Psalm 11:5 talem ‘Jehovah heitim eniwan wea laekem raf wei.’ Datfala scripture no storyim nomoa wei bilong God, bat hem talem samting wea savve helpem iumi long laef bilong iumi. Hem helpem pipol wea lovem God for no duim hapitaem wea savve mekem olketa start for laekem raf wei. Nara scripture wea sei Jehovah hem “God wea givim peace” helpem pipol bilong hem for gohed tingim evritaem evri samting wea naes tumas, wea gud, and wea fit for kasem praise. Taem olketa duim olsem, olketa bae stap gud witim narawan.—Readim Philippi 4:8, 9.

20-22. Olketa Christian ting hao long world, and why nao olsem?

²⁰ Long tingting bilong God, full world bilong Satan hem blood guilty. Bible storyim olketa gavman bilong world olsem olketa wild animal wea killim dae plande million pipol and killim dae tu pipol bilong Jehovah. (Daniel 8:3, 4, 20-22; Revelation 13:1, 2, 7, 8) Olketa bisnis and savveman long science waka tugeta witim olketa gavman hia for wakem staka nogud samting for killkill and olketa kasem bigfala selen from wanem olketa wakem. Tru tumas, “full world hem stap long paoa bilong Satan”!—1 John 5:19.

²¹ Jesus and olketa wea followim hem “no olsem pipol long world” dastawe olketa no joinim politik and war. So, olketa no blood guilty. * (John 15:19; 17:16) From olketa followim wei bilong Christ, olketa no raf taem pipol spoelem olketa. Bat olketa lovem enemy bilong olketa and prea for olketa tu.—Matthew 5:44; Rome 12:17-21.

 ²² Olketa tru Christian no joinim “Bigfala Babylon,” wea hem nao evri false religion long world wea barava blood guilty. Bible sei: “Blood bilong olketa profet and olketa holy wan and evriwan wea olketa killim dae long earth, hem stap long datfala taon.” Dastawe Bible warnim iumi olsem: “Pipol bilong mi, . . . iufala mas go aot from hem nao.”—Revelation 17:6; 18:2, 4, 24.

23. Wanem nao man mas duim mekem hem ranawe from Bigfala Babylon?

²³ Hao nao iumi savve ranawe from Bigfala Babylon? No just long wei for aotem nem bilong iumi from membership roll bilong olketa. Bat long wei for no duim rabis samting tu wea false religion sei hem olraet nomoa, or wea false religion mekhae long hem, olsem wei for durong, joinim politik, and laekem tumas for garem staka selen. (Readim Psalm 97:10; Revelation 18:7, 9, 11-17) Staka taem wei for aftarem olketa samting olsem savve mekem man for killim dae narawan!

24, 25. (a) Wanem nao savve mekem God forgivim man wea blood guilty bat hem repent? (b) Diswan mekem iumi for tingim wanem arrangement bilong God long bifor?

²⁴ Taem iumi no worshipim Jehovah yet, iumi wanwan saedem world bilong Satan wea datwan mekem iumi tu blood guilty. Bat God hapi long iumi taem iumi lusim nogud wei bilong iumi, showimaot faith long sakrifaes bilong Christ, and givim laef bilong iumi long hem. God protectim iumi tu from eni samting wea savve spoelem wei wea iumi fren witim hem. (Acts 3:19) Diswan mekem iumi for tingim arrangement bilong hem bifor for garem olketa taon wea man savve stap sef long hem.—Numbers 35:11-15; Deuteronomy 21:1-9.

²⁵ Hu nao savve go stap long olketa taon hia? Sapos wanfala Israelite no min for killim dae nara man, hem mas ranawe go stap long wanfala taon hia. Bihaen olketa judge herem full story bilong hem and luksavve hem no min for killim man dae, hem mas stap long taon hia for hem sef go kasem taem hae priest hem dae. Bihaen, hem savve lusim datfala taon and go stap long eni ples wea hem laekem. Datwan hem nambawan samting wea showimaot God forgivim man and hem tinghae long laef bilong man! Long sem wei tu, God givim samting for helpem iumi stap sef olsem olketa taon long bifor. Sapos iumi  no min for brekem law bilong God abaotem laef and blood, dae bilong Jesus savve sevem iumi mekem iumi no kasem panis for dae. Waswe, iu tinghae long wanem God duim? Wanem nao iu savve duim for showimaot iu tinghae? Iu savve helpem nara pipol for showimaot faith long sakrifaes bilong Christ. Hem gud for duim olsem bikos “bigfala trabol” hem klosap tumas for kam.—Matthew 24:21; 2 Corinth 6:1, 2.

26-28. (a) Wanem waka nao iumi duim distaem wea olsem waka wea profet Ezekiel duim bifor? (b) Wanem nao iumi savve duim for gohed kasem gud samting from love bilong God?

²⁶ Waka wea pipol bilong God duim distaem mekem iumi tingim profet Ezekiel. Jehovah talem hem for warnim olketa Israelite. God sei long hem: “Taem iu herem toktok bilong mi iu mas talem olketa warning wea mi talem long iu.” Sapos Ezekiel no duim, hem nao bae guilty sapos pipol long Jerusalem dae taem Jehovah judgem olketa. (Ezekiel 33:7-9) Bat Ezekiel obeyim God so hem no guilty taem eniwan hem dae.

²⁷ Klosap nao world bilong Satan bae finis. Dastawe Olketa Jehovah’s Witness luksavve olketa garem privilege and responsibility for talem pipol abaotem “day wea God . . . bae changem bak nogud samting” and for preachim gud nius abaotem Kingdom. (Isaiah 61:2; Matthew 24:14) Waswe, iu busy for duim disfala barava important waka? Aposol Paul barava tinghae long preaching waka wea hem duim. Dastawe hem sei: “Sapos eniwan hem no sev, bae mi no kasem blame for datwan bikos mi traem best for talem iufala evri samting wea God bae duim for olketa man.” (Acts 20:26, 27) Hem showimaot nambawan wei for iumi followim!

²⁸ Sapos iumi laek for gohed kasem gud samting from love bilong Jehovah, iumi mas tinghae long laef and blood olsem hem tu. Bat iumi mas duim nara samting moa. Iumi mas duim samting wea mekem iumi klin long tingting bilong Jehovah tu. Iumi bae storyim diswan long Chapter 8.