1-3. (a) Wanem present nao Jehovah givim, and hao nao iumi savve iusim long nogud wei? (b) For gohed kasem gud samting from love bilong God, wanem nao iumi mas duim?

TINGIM sapos iu givim present long samwan wea iu lovem, bat hem no iusim present hia long gudfala wei. Hao nao bae iu feel? Sapos iu givim hem wanfala trak, and then bihaen iu herem hem draev krangge and bangam samfala man. Datwan bae nating mekem iu hapi!

² Wei wea iumi savve story and narawan savve minim wanem iumi talem hem present from Jehovah, wea givim “evri gud and perfect present.” (James 1:17) From Jehovah wakem iumi long wei olsem, iumi savve talemaot tingting and feeling bilong iumi, bat olketa animal no olsem. Long sem wei wea man no careful taem hem draevem trak, maet man no careful tu long wanem hem talem. Jehovah nating hapi long man wea talem toktok wea mekem narawan sorre tumas and feel nogud!

³ For gohed kasem gud samting from love bilong God, iumi mas iusim present for toktok long wei wea Jehovah hapi long hem. Jehovah talem wanem kaen toktok nao hem laekem. Bible sei: “Iufala mas no talem eni nogud toktok. Iufala mas talem nomoa gudfala toktok for strongim and helpem olketa wea herem.” (Ephesus 4:29) Iumi bae storyim why iumi mas tingting gud firstaem bifor iumi toktok, wanem  kaen toktok nao iumi mas no talem, and hao iumi savve ‘talem toktok wea strongim narawan.’

4, 5. Buk bilong Proverbs storyim wanem abaotem toktok wea man talem?

⁴ Wanfala reason why iumi mas tingting gud firstaem bifor iumi toktok hem bikos wanem iumi talem savve strongim narawan or spoelem hem. Proverbs 15:4 sei: “Man wea talem gudfala toktok savve healim narawan, bat man wea talem nogud toktok savve spoelem man.” * Long sem wei wea wata savve mekem tree wea gogo for dae hem laef moa, naesfala toktok savve strongim man. Bat man wea talem samting wea no stret savve barava spoelem feeling bilong narawan. Tru tumas, wanem iumi talem savve helpem narawan or spoelem hem.—Proverbs 18:21.

⁵ Nara proverb sei: “Toktok wea man talem taem hem no tingting gud firstaem hem olsem sword wea katem man.” (Proverbs 12:18) Man wea no tingting firstaem and wea kwiktaem for talem samting savve barava spoelem feeling bilong narawan and savve spoelem tu wei wea tufala fren.  Waswe, enitaem eniwan talem toktok wea barava mekem iu feel nogud wea hem olsem hem katem iu long sword? Datfala sem proverb talem tu gudfala samting abaotem toktok bilong man. Hem sei: “Toktok bilong olketa wea wise hem healim man.” Toktok bilong man wea tingting gud firstaem and wea showimaot wisdom bilong God savve mekem narawan feel gud and helpem tufala fren gud moa. Waswe, iu savve tingim enitaem wea samwan talem kaenfala toktok wea mekem iu feel gud moa? (Readim Proverbs 16:24.) From iumi luksavve toktok bilong iumi savve mekem narawan feel gud or spoelem feeling bilong hem, iumi laek talem nomoa gudfala toktok.

6. Why nao hem barava no isi for kontrolem wanem iumi talem?

⁶ Iumi no savve barava kontrolem wanem iumi talem bikos iumi born sin and no perfect. Datwan hem mek-tu reason why iumi mas tingting gud firstaem bifor iumi toktok. Toktok wea iumi talem hem samting wea stap long heart bilong iumi and “heart bilong man laekem tumas for duim nogud samting.” (Genesis 8:21; Luke 6:45) Dastawe hem barava no isi for kontrolem wanem iumi talem. (Readim James 3:2-4.) Nomata iumi no savve barava kontrolem wanem iumi talem, iumi savve traem best for talem gudfala toktok. Man wea swim go ap long river wea ran big mas barava trae hard. Long sem wei tu, iumi man wea sin mas gohed traem best for no talem samting wea mekem narawan feel nogud.

7, 8. Hao nao tingting bilong Jehovah abaotem toktok wea iumi talem?

⁷ Mek-thri reason why iumi mas tingting gud firstaem bifor iumi toktok hem bikos Jehovah bae judgem iumi long toktok wea iumi talem. Samting iumi talem savve spoelem wei wea iumi fren gud witim narawan and spoelem wei wea iumi fren gud witim Jehovah tu. Long James 1:26 hem sei: “Sapos eniwan tingse hem worshipim God long stretfala wei, bat hem no kontrolem toktok bilong hem, hem laea  long hemseleva and worship bilong hem iusles nomoa.” Iumi lanem long Chapter 11, Jehovah no hapi long worship bilong man wea no talem gudfala toktok. Sapos staka taem iumi talem samting wea mekem narawan feel nogud and barava spoelem hem, long tingting bilong God, evri samting iumi duim for worshipim hem bae iusles nomoa. Datwan hem big samting, so iumi mas tingting gud firstaem bifor iumi toktok!—James 3:8-10.

⁸ Tru tumas, iumi garem olketa gudfala reason for no talem nogud toktok. Iumi bae story abaotem toktok wea savve strongim narawan, bat firstaem, iumi laek story abaotem toktok wea tru Christian mas no talem.

9, 10. (a) Long world distaem, wanem kaen toktok nao pipol savve talem evritaem? (b) Why nao iumi mas no talem rabis toktok? (Lukim tu footnote.)

⁹ Rabis toktok. Long world distaem, pipol savve swear and talem rabis toktok. Staka swear taem olketa kros and talem rabis toktok saed long sex for mekem pipol laflaf. Bat rabis toktok olsem hem no samting for man laflaf long hem. Hem barava nogud samting. Samting olsem 2,000 year go finis, aposol Paul kaonselem kongregeson long Colossae for no talem “rabis toktok.” (Colossae 3:8) Paul talem kongregeson long Ephesus “olketa dirty toktok for mekfani” hem samting olketa tru Christian mas “no storyim.”—Ephesus 5:3, 4.

¹⁰ Jehovah barava les long rabis toktok. Pipol wea lovem hem tu les long datwan. Tru tumas, sapos iumi lovem Jehovah iumi bae no talem rabis toktok. Taem Paul storyim “olketa nogud samting wea man laek for duim,” hem sei wanfala nao hem “wei for no klin,” wea insaed diswan hem for talem dirty toktok. (Galatia 5:19-21) Datwan hem barava nogud samting. Man savve disfellowship sapos hem no repent nomata staka taem finis olketa elder trae helpem hem from  hem storyim or mekhae long nogud samting saed long sex wea barava dirty and nogud tumas. *

11, 12. (a) Wanem kaen wei for story abaotem pipol nao hem nogud? (b) Why nao pipol wea worshipim Jehovah mas no laea for spoelem narawan?

¹¹ Nogud gossip, laea for spoelem man. Pipol laek for story abaotem nara pipol. Waswe, wei for story abaotem pipol hem nogud? Hem gud nomoa sapos iumi storyim gudfala samting or naesfala nius, olsem hu nao hem just baptaes, or hu nao iumi savve go for encouragem. Olketa firstfala Christian interest tumas for savve long wanem nao happen long olketa brata and sista, and for storyim samfala samting abaotem olketa. (Ephesus 6:21, 22; Colossae 4:8, 9) Gossip savve nogud sapos samting man talem hem no barava tru or hem storyim samting wea narawan shud no herem. Gogo hem savve laea for spoelem narawan, wea hem nao “slander.” Datwan minim ‘man accusim narawan long samting wea no tru and wea datwan barava spoelem nem bilong hem.’ Olketa Pharisee laea for spoelem Jesus. (Matthew 9:32-34; 12:22-24) Kaen laea for spoelem narawan hem plande taem mekem raoa for kamap.—Proverbs 26:20.

¹² Jehovah no hapi long pipol wea laea for spoelem narawan or mekem wei for divaed kamap. Hem heitim olketa wea “mekem olketa brata for raoa.” (Proverbs 6:16-19) Nara nem for Satan hem “Devil,” wea kam from Greek word di·aʹbo·los, wea minim “man wea laea for spoelem narawan.” Disfala nem barava fitim Satan bikos hem barava laea nogud for spoelem God. (Revelation 12:9, 10) So iumi no laek for talem toktok wea mekem iumi kamap man wea olsem  Devil. Hem no fitim for eniwan long kongregeson laea for spoelem narawan wea mekem “raoa” and “wei for divaed” kamap. (Galatia 5:19-21) Dastawe, bifor iu talem moa story wea iu herem, hem gud for tingim diswan: ‘Waswe, story hia hem tru? Sapos mi talem moa story hia, bae hem spoelem datfala man? Waswe, mi mas talem story hia long olketa narawan?’—Readim 1 Thessalonica 4:11.

13, 14. (a) Wei for tok nogud savve mekem narawan feel hao? (b) Wanem nao hem minim for tok spoelem narawan, and wanem nogud samting nao man wea duim datwan savve kasem?

¹³ Wei for tok nogud. Olsem iumi lanem finis, samting iumi talem savve barava spoelem feeling bilong narawan. Hem tru, from iumi no perfect, samfala taem iumi evriwan talem toktok wea no fitim. Nomata olsem, Bible talem warning abaotem toktok wea barava no fitim for Christian talem long narawan long famili or long kongregeson. Paul sei: ‘Lusim kaen wei for feel nogud and laek pei bak. Lusim tu, wei for kros, singaot, and tok nogud.’ (Ephesus 4:31) Olketa nara Bible transleison transleitim “tok nogud” olsem “barava rabis toktok” and “toktok wea spoelem narawan.” Wei for tok nogud savve minim tu wei for kolem man long enikaen nogud nem, and evritaem tok daonem hem. Datwan savve mekem man feel iusles. From olketa pikinini trustim tumas olketa wea lukaftarem olketa, kaen wei for tok nogud olsem savve isi tumas for spoelem feeling bilong olketa.—Colossae 3:21.

¹⁴ Bible barava tok strong againstim wei for tok spoelem narawan. Datwan nao hem wei for talem enikaen nogud toktok for daonem narawan and for tok nogud long hem. Man wea gohed for tok spoelem narawan savve kasem barava nogud samting. Sapos hem no changem wei bilong hem nomata olketa elder traem best for helpem hem, hem savve disfellowship. Maet hem no kasem tu olketa blessing from Kingdom bilong God. (1 Corinth 5:11-13; 6:9, 10) Tru tumas, sapos hem wei bilong iumi for talem nogud toktok, tok  laea, or tok spoelem narawan, bae iumi no savve gohed kasem gud samting from love bilong God. Nogud toktok olsem hem spoelem narawan.

15. Wanem kaen toktok nao savve ‘strongim narawan’?

¹⁵ Hao nao iumi savve iusim present for toktok long wei wea Jehovah hapi long hem? Tingim wanem Bible encouragem iumi for duim. Hem sei: ‘Talem gudfala toktok for strongim narawan.’ (Ephesus 4:29) Jehovah hapi taem iumi talem toktok wea encouragem man and strongim hem. For duim olsem, iumi mas tingting gud firstaem bifor iumi story. Bible no garem olketa rul saed long diswan and hem no listim olketa “gudfala toktok.” (Titus 2:8) Bat sapos iumi laek ‘talem toktok for strongim narawan,’ iumi mas tingim thrifala important samting. Toktok mas gud, mas tru, and hem mas toktok wea kaen. Hem gud for iumi tingim thrifala important samting hia taem iumi storyim samfala toktok wea strongim narawan.—Lukim box wea garem title “ Waswe, Toktok Bilong Mi Strongim Narawan?”

16, 17. (a) Why nao hem gud for praisem narawan? (b) Long olketa wanem wei nao iumi savve praisem olketa long kongregeson and long famili?

¹⁶ Praisem narawan. Jehovah and Jesus luksavve hem important for talem toktok wea praisem narawan and wea showimaot tufala hapi long narawan. (Matthew 3:17; 25:19-23; John 1:47) Hem gud tu for iumi olketa Christian talem gudfala toktok for praisem narawan. Why nao olsem? Proverbs 15:23 sei: “Toktok wea man talem long barava taem hem gud tumas!” Hao nao feeling bilong iu taem narawan talem naesfala toktok for praisem iu? Waswe, iu hapi tumas and datwan encouragem iu? Taem man praisem iu, iu savve hem luksavve long samting wea iu duim, hem tingim iu, and iu no hard waka nating for duim datfala samting. Datwan mekem iu laek for duim samfala samting moa and iu  laek gohed waka hard long samting wea iu duim. From iu hapi taem samwan praisem iu, waswe, iu traem best bilong iu tu for praisem narawan?—Readim Matthew 7:12.

¹⁷ Lane for luksavve long olketa gudfala wei bilong narawan, and then talem toktok for praisem hem. Long kongregeson, iu savve herem naesfala tok, lukim wanfala young wan wea traem best for kasem olketa spiritual goal bilong hem, or iu savve lukim wanfala olo kam evritaem long meeting nomata hem no isi for hem. Taem iu praisem olketa hia, datwan encouragem olketa and strongim olketa for gohed worshipim Jehovah. Insaed long famili tu, hasband and waef mas praisem tufala and talem toktok wea showimaot tufala tinghae long each other. (Proverbs 31:10, 28) Olketa pikinini bae barava stap gud and hapi sapos iu praisem and tinghae long olketa. Olketa barava needim datwan olsem wanfala plant barava needim sun and rain for grow gud. Olketa dadi and mami, lukaotem eni chance for praisem olketa pikinini bilong iufala for gudfala wei bilong olketa and gudfala samting wea olketa duim. Sapos iu praisem pikinini olsem, bae iu helpem hem for no fraet and for no daotem hemseleva. Hem bae traem best bilong hem for duim samting wea stret.

18, 19. (a) Why nao iumi mas traem best for encouragem and comfortim olketa brata and sista? (b) Wanem nao iumi savve duim for comfortim olketa?

¹⁸ Encouragem and comfortim narawan. Jehovah barava tingim “olketa wea wikdaon” and “man wea kasem hevi.” (Isaiah 57:15) Bible talem iumi for “gohed for encouragem” and “comfortim olketa wea sorre.” (1 Thessalonica 5:11, 14) Iumi savve God hem hapi taem hem lukim iumi traem best for encouragem and comfortim olketa brata and sista wea feel sorre tumas.

¹⁹ Bat wanem nao iu savve talem for strongim wanfala Christian wea wikdaon or wea feel sorre? No tingse iu nao mas stretem problem wea mekem hem feel olsem. Staka  taem, hem fitim nomoa for talem samfala naes toktok. Story long wei wea mekem hem luksavve iu tingim hem. Askem hem for iu prea witim hem sapos hem olraet. Taem iu prea, iu savve askem Jehovah for helpem hem luksavve olketa narawan and God tu barava lovem hem. (James 5:14, 15) Helpem hem for luksavve olketa nara brata and sista tinghae long hem and iufala hapi hem long kongregeson bilong iufala. (1 Corinth 12:12-26) Readim wanfala scripture for encouragem hem and for helpem hem luksavve Jehovah barava tingim hem. (Psalm 34:18; Matthew 10:29-31) Sapos iu talem “gudfala toktok” from heart bilong iu, datwan bae mekem hem luksavve olketa narawan lovem hem and tinghae long hem.—Readim Proverbs 12:25.

20, 21. Olketa wanem samting nao savve mekem man for givim kaonsel wea helpem narawan?

²⁰ Kaonsel wea savve helpem man. Iumi evriwan no perfect dastawe samfala taem hem fitim for iumi kasem kaonsel. Bible sei: “Followim kaonsel and acceptim discipline mekem iu kamap wise.” (Proverbs 19:20) Hem no olketa elder nomoa wea savve givim kaonsel. Mami and dadi savve kaonselem olketa pikinini. (Ephesus 6:4) Olketa mature Christian sista savve givim kaonsel long olketa young sista. (Titus 2:3-5) From iumi lovem olketa narawan, iumi bae givim kaonsel long kaenfala wei, no long wei wea mekem olketa  feel nogud. Wanem nao savve helpem iumi for givim kaen kaonsel olsem? Sapos iumi tingim firstaem, why iumi laek givim kaonsel, wanem hem best information for iusim, and for tingim tu hao for iumi givim kaonsel, datwan bae helpem iumi givim kaonsel wea barava helpem man.

²¹ Man wea givim kaonsel mas garem gudfala tingting firstaem mekem hem givim kaonsel wea savve helpem man. Ting raonem disfala kwestin, ‘Wanem nao mekem hem isi for mi followim kaonsel wea narawan givim?’ Hem bae moa isi sapos iu savve man wea givim kaonsel hem tingim iu, hem no givim kaonsel from hem kros long iu, and hem no garem eni rongfala tingting wea mekem hem laek givim datfala kaonsel. So hem gud sapos olketa stretfala reason olsem nao mekem iu for laek givim kaonsel long narawan! Nara samting tu, taem man givim kaonsel wea kam from Bible, datwan nao bae helpem man. (2 Timothy 3:16) Kaonsel wea iumi givim mas evritaem kam from Bible. Maet iumi readim wanfala scripture or talem nomoa toktok wea stap long Bible. Dastawe olketa elder keakea for no mekem narawan followim tingting bilong olketa seleva or mekem hem luk olsem hem kam from Bible. Kaonsel bae helpem man sapos iu givim long gudfala wei tu. Sapos iu givim kaonsel long kaenfala wei, datwan bae mekem hem isi for man followim and hem bae no ting daonem hemseleva.—Colossae 4:6.

22. Long wanem wei nao iu laek for iusim present for toktok?

²² Tru tumas, wei for toktok hem nambawan present wea God givim. From iumi lovem Jehovah, datwan mekem iumi laek for talem gudfala toktok and no talem nogud toktok. Toktok bilong iumi savve helpem narawan or spoelem hem. So iumi mas traem best for iusim present for toktok long wei wea Jehovah hapi long hem, hem nao for ‘talem toktok wea strongim narawan.’ Taem iumi duim olsem, toktok bilong iumi bae encouragem and strongim narawan and iumi bae gohed kasem gud samting from love bilong God.