HAO FOR CONTINUE LO STORY
LESON 7
No Givap
Principle: “Olketa gohed for teachim pipol and talemaot gud nius.”—Acts 5:42.
Wat Paul Duim
1. Watchim VIDEO, or readim Acts 19:8-10. Then ting raonem olketa kwestin hia:
Wat Nao Iumi Lanem From Paul?
2. Iumi need for iusim taem and strong blo iumi for mekem olketa return visit and startim Bible study.
Followim Example blo Paul
3. Adjustim schedule blo iu for fitim man wea iu story witim. Askem iuseleva: ‘Wat taem and lo wea nao hem fitim for mi visitim hem? Wat taem nao hem free for mitufala story?’ Willing for visitim hem moa, nomata lo taem wea no fitim iu.
4. Mekem appointment. Lo end blo each story, talem taem wea iu bae go bak for story moa witim datfala man. Mas duim wat iu talem.
5. Garem positive tingting. No kwiktaem for tingse datfala man no interest bikos hem no stap olowe lo haos or busy evritaem. (1 Cor. 13: 4, 7) Nomata olsem, iu mas balance and iusim gud taem blo iu.—1 Cor. 9:26.
