Disfala buk Scripture for Laef blo Christian bae mekem hem isi for iu faendem olketa Bible verse and story wea savve helpem iu for deal witim olketa challenge wea iu feisim. Hem bae helpem iu tu for faendem olketa Bible verse wea iu savve iusim for encouragem and helpem samwan for mekem disison wea bae mekhae lo Jehovah. Luk for topic wea iu laek for savve abaotem, and readim olketa kwestin and short summary abaotem olketa story lo Bible. (Lukim box “ Hao for Iusim Disfala Pablikeson.”) Iu bae kasem staka naesfala kaonsel, guidance, and comfort from toktok blo God. Iu bae faendem tu staka gudfala point for sharem witim olketa narawan, olsem olketa Bible verse wea strongim man, helpem olketa for deal witim olketa problem, and wea givim kaonsel and encouragement.

Disfala pablikeson hem no showim evri scripture abaotem wanfala topic. Bat hem best ples for start duim research blo iu. (Pr 2:​1-6) For kasem moa information, iusim olketa marginal reference and study note lo New World Translation of the Holy Scriptures. Iusim tu datfala Research Index for Olketa Jehovah’s Witness or Watch Tower Publications Index for faendem moa information abaotem mining blo wanfala scripture or hao for applyim datwan. Chekim latest information wea olketa pablisim for mek sure iu kasem latest understanding lo olketa truth insaed lo Bible.

Mifala hope Scripture for Laef blo Christian bae helpem iu for faendem wisdom, knowledge, and understanding, wea stap lo olketa Holy Scripture. Taem iu iusim disfala pablikeson, bae iu barava sure dat “toktok bilong God hem laef and hem garem paoa.”—Heb 4:12.