CHAPTER 2
“Iufala Bae Talem Pipol Abaotem Mi”
Hao Jesus redyim olketa aposol for leadim preaching waka
Acts 1:1-26 storyim diswan
1-3. Wanem nao happen long mek-40 day, and wanem nao bae iumi lanem long Acts chapter 1?
OLKETA aposol barava sorre taem Jesus dae, bat olketa hapi tumas taem hem laef bak. Insaed 40 day bihaen Jesus laef bak, plande taem hem go long olketa follower bilong hem for teachim and encouragem olketa. Olketa aposol no laekem Jesus for lusim olketa! Bat long mek-40 day, hem lastaem for olketa lukim Jesus.
2 Long datfala day, 11-fala aposol standap long Maunt Olive Tree. Olketa lisin gud long Jesus taem hem story. Bihaen Jesus story, hem liftimap tufala hand bilong hem and blessim olketa. Then hem go ap long skae nao! Gogo, hem lus insaed cloud. Nomata olketa no savve lukim hem, olketa gohed lukluk yet long skae bihaenem hem.—Luke 24:50; Acts 1:9, 10.
3 Nomata samting wea happen changem laef bilong olketa aposol, Jesus redyim olketa finis for gohed duim waka wea hem startim. Long Acts chapter 1, iumi bae lanem wei wea Jesus redyim olketa aposol for duim datfala important waka and tingting bilong olketa abaotem datwan. Iumi bae lanem tu hao datwan savve helpem olketa Christian distaem.
“Hao Hem Kam Long Olketa Nao Pruvim Hem Laef Bak” (Acts 1:1-5)
4. Long Acts chapter 1, Luke raet go long hu and wanem nao hem storyim?
4 Luke raetem Gospel bilong hem and buk bilong Acts for Theophilus. a Long Acts chapter 1, Luke storyim moa samfala samting wea hem storyim long end bilong Gospel bilong hem, bat hem iusim olketa difren word and hem storyim samfala nara samting tu. Datwan showimaot Luke raetem firstaem Gospel bilong hem, then bihaen hem raetem buk bilong Acts.
5, 6. (a) Wanem nao strongim faith bilong olketa follower bilong Jesus? (b) Wanem nao mekem olketa tru Christian distaem garem faith”?
5 Wanem nao strongim faith bilong olketa follower bilong Jesus? Acts 1:3 sei: “Insaed foti day bihaen Jesus safa and dae, plande taem nao hem kam long olketa aposol bilong hem, and hao hem kam long olketa nao pruvim hem laef bak.” Insaed long Bible, only Luke “datfala doctor wea staka olketa lovem” nao hem storyim olketa samting wea “pruvim” datwan hem tru. (Col. 4:14) Hem iusim olketa medical toktok and diswan mekem story hem klia and hem givim strongfala pruv. Jesus tu showim samfala samting wea pruvim datwan. Samfala taem Jesus kam long tu-thri disaepol nomoa, samfala taem hem kam long evri aposol, and wanfala taem winim 500 brata nao lukim hem. (1 Cor. 15:3-6) Olketa samting hia hem olketa strongfala pruv!
6 Olketa tru Christian distaem garem faith bikos long staka pruv tu. Iumi garem pruv long Bible wea showimaot Jesus stap long earth, dae for olketa sin bilong iumi, and laef bak. Pipol lukim olketa samting hia long eye bilong olketa and olketa raetem datwan long Bible. Taem iumi studyim wanem olketa raetem and prea long Jehovah for helpem iumi followim samting wea iumi lanem, datwan savve strongim faith bilong iumi. Iumi mas tingim hao for garem trufala faith, man no bilivim samting nating nomoa bat hem garem pruv for bilivim datwan. Bible sei man mas garem trufala faith mekem hem savve kasem laef olowe.—John 3:16.
7. Wanem nao iumi lanem from example bilong Jesus abaotem wei for teach and preach?
7 Insaed 40 day wea Jesus go lukim olketa disaepol, hem teachim olketa “plande samting abaotem Kingdom bilong God.” Olsem example, hem explainim olketa profesi wea storyim Messiah bae safa and dae. (Luke 24:13-32, ) Bihaen Jesus minim gud long olketa waka bilong hem olsem Messiah, hem mekhae long Kingdom bilong God from hem nao bae King bilong datfala Kingdom. Jesus evritaem preach abaotem Kingdom and iumi tu mekhae long Kingdom taem iumi preach.— 46, 47Matt. 24:14; Luke 4:43.
Preach “Long Evri Farawe Ples Long Earth” (Acts 1:6-12)
8, 9. (a) Wanem tufala samting nao olketa aposol tingim wea no stret? (b) Wanem nao Jesus duim for helpem olketa garem stretfala tingting, and wanem nao iumi lanem from datwan?
8 Taem olketa aposol hipap witim Jesus long Maunt Olive Tree, hem last meeting wea olketa garem witim hem. Olketa askem hem: “Hao Lord, distaem nao bae iu mekem rul bilong God kamap moa long Israel?” (Acts 1:6) Kwestin wea olketa askem showimaot olketa tingim tufala samting wea no stret. First samting, olketa tingse Kingdom bilong God bae kamap moa long Israel. Mek-tu, olketa tingse Kingdom bilong God bae start for rul long datfala taem. Wanem nao Jesus duim for helpem olketa garem stretfala tingting?
9 Luk olsem Jesus savve no longtaem bihaen, olketa aposol bae garem stretfala tingting hao Kingdom bilong God bae no kamap moa long Israel. Samting olsem tenfala day bihaen, olketa aposol bae kasem holy spirit and kamap part bilong wanfala niu nation, wea hem nao Israel bilong God. So spesol wei wea God fren witim nation bilong Israel hem klosap for finis. Jesus helpem olketa aposol for garem stretfala tingting tu hao Kingdom bilong God bae no start for rul long datfala taem. Hem sei: “Dadi long heven nomoa garem paoa for markem taem for olketa samting wea bae happen and iufala no need for savve long olketa taem hia.” (Acts 1:7) Jehovah nao markem taem for olketa samting wea bae happen. Taem Jesus stap long earth, hem sei nomata hem Son bilong God hem no savve long “wanem day and taem nao” end bae kam. Hem sei “Dadi bilong [hem] long heven nomoa savve.” (Matt. 24:36) Sapos olketa Christian distaem warim tumas wanem day and taem nao end bae kam, datwan showimaot olketa wari abaotem samting wea olketa no need for savve long hem.
10. Wanem example bilong olketa aposol nao iumi shud followim, and why nao olsem?
10 Nomata kwestin wea olketa aposol askem showimaot olketa tingim tufala samting wea no stret, iumi shud no ting daonem olketa. Olketa garem strongfala faith and taem Jesus stretem olketa, olketa hambol for acceptim datwan. Tingim tu hao kwestin wea olketa askem showimaot olketa “gohed for lukaot,” olsem Jesus encouragem olketa for duim. (Matt. 24:42; 25:13; 26:41) Olketa gohed lukaot for eni saen wea showimaot Jehovah klosap for duim samting. Iumi tu need for duim sem samting. From iumi stap long “olketa last day,” hem important tumas for iumi gohed for lukaot.—2 Tim. 3:1-5.
11, 12. (a) Wanem waka nao Jesus talem olketa aposol for duim? (b) Why nao Jesus sei olketa bae needim holy spirit?
11 Jesus talem olketa aposol main samting wea olketa shud tingim. Hem sei: “Taem iufala kasem holy spirit datwan bae strongim iufala, and iufala bae talem pipol abaotem mi long Jerusalem, long evri ples long Judea and long Samaria, and long evri farawe ples long earth.” (Acts 1:8) Nomata Jerusalem hem ples wea pipol killim dae Jesus, hem nao first ples wea olketa aposol bae talem pipol Jesus hem laef bak. Bihaen, olketa bae talemaot datfala message long pipol long evri ples long Judea, Samaria, and evri farawe ples.
12 Bat bifor Jesus talem olketa aposol for go preach, hem talem narataem moa olketa bae kasem holy spirit for helpem olketa. Winim 40 taem nao disfala toktok “holy spirit” stap long buk bilong Acts. Datwan showimaot hem hard for iumi duim wanem Jehovah laekem sapos hem no givim holy spirit for helpem iumi. So hem important for evritaem askem Jehovah for givim holy spirit long iumi! (Luke 11:13) Iumi barava needim datwan.
13. Pipol bilong God distaem duim preaching waka go kasem wea, and why nao iumi shud duim best bilong iumi for preach?
13 Long first century, olketa Christian preach “long evri farawe ples long earth.” Bat distaem iumi preachim gud nius long full earth. Iumi lanem finis long Chapter 1, Olketa Jehovah’s Witness duim best bilong olketa for preach long evriwan. Olketa luksavve God laekem evri difren kaen man for herem gud nius abaotem Kingdom. (1 Tim. 2:3, 4) Waswe, iu busy long datfala waka for helpem pipol kasem laef? Datfala waka nomoa savve mekem iu hapi and satisfae! Jehovah bae strongim iu for duim datwan. Long buk bilong Acts, bae iu lanem staka samting abaotem hao for preach and tingting wea iu mas garem mekem iu savve preach gud.
14, 15. (a) Wanem nao tufala angel talem abaotem hao Christ bae kam bak, and samting wea tufala talem hem minim wanem? (Lukim footnote tu.) (b) Hao nao Christ kam bak “long sem wei” olsem hao hem lusim earth?
14 Iumi storyim long paragraf 2 hao 11-fala aposol nomoa lukim Jesus go ap long skae gogo hem lus insaed cloud. Nomata olketa no savve lukim hem, olketa gohed standap and lukluk go ap long skae. Then nomoa, tufala angel kam long olketa and sei: “Olketa man bilong Galilee, hao nao iufala lukluk go long skae olsem? Disfala man Jesus wea God tekem hem go ap long skae bae hem kam bak long sem wei tu olsem hao iufala lukim hem go ap long skae.” (Acts 1:11) Waswe, tufala angel minim pipol bae lukim Jesus long sem body taem hem kam bak, olsem samfala religion teachim? Nomoa, tufala angel no minim olsem. Hao nao iumi savve?
15 Tufala angel no sei pipol bae lukim Jesus long eye bilong olketa taem hem kam bak bat Jesus bae kam bak “long sem wei” olsem hem go ap long skae. b Long wanem wei nao Jesus lusim earth? Taem tufala angel kam story long olketa aposol, olketa no lukim Jesus nao. Olketa aposol nomoa luksavve Jesus lusim earth and go bak long Dadi bilong hem long heven. Olketa angel sei Christ bae kam bak long sem wei, and hem nao wanem hem happen. Distaem olketa wea minim gud Bible and luksavve iumi stap long olketa last day, olketa nomoa luksavve Jesus hem King long heven distaem. (Luke 17:20) Hem important for iumi luksavve long pruv wea showimaot Jesus hem stap and helpem olketa narawan savve long datwan mekem olketa tu luksavve end hem klosap.
‘Showim Long Mifala Hu Nao Iu Chusim’ (Acts 1:13-26)
16-18. (a) Wanem nao iumi lanem from Acts 1:13, 14 abaotem olketa Christian hipap? (b) Wanem nao iumi lanem from example bilong Mary? (c) Why nao hem important for go long olketa meeting?
16 Taem olketa aposol “go bak long Jerusalem,” olketa “hapi tumas.” (Luke 24:52) Bat waswe, olketa duim samting wea Christ laekem olketa for duim? Acts 1:13, 14 sei olketa aposol hipap long ‘rum antap long wanfala haos,’ and iumi lanem interesting samting abaotem kaen hipap olsem. Long datfala taem, plande haos long Palestine garem ladder long aotsaed for go long rum antap long haos. Maet rum wea olketa aposol hipap long hem, hem rum antap long haos bilong mami bilong Mark wea Acts 12:12 storyim. Nomata sapos hem datfala rum or nomoa, hem ples wea fitim olketa Christian for hipap long hem. Bat hu nao hipap and wanem nao olketa duim?
17 Acts 1:13, 14 sei “samfala woman” tu hipap witim olketa aposol and olketa man. Wanfala nao hem Mary, mami bilong Jesus. Bihaen datwan, no enitaem moa Bible story abaotem Mary. Hem gud for tingim Mary no praod bat hem wanfala hambol woman wea hipap witim olketa nara Christian for worshipim God. Hem no laekem pipol for mekhae long hem. Taem Jesus laef yet, fofala nara son bilong Mary no bilivim dat God nao sendem kam Jesus. Masbi Mary hapi tumas taem hem lukim fofala son bilong hem hipap witim hem. (Matt. 13:55; John 7:5) Bihaen Jesus dae and laef bak, olketa haf brata bilong Jesus changem tingting bilong olketa.—1 Cor. 15:7.
18 Tingim tu why olketa disaepol hipap tugeta. Bible sei: “Olketa gohed prea tugeta evritaem.” (Acts 1:14) Start kam bifor yet hem important for olketa Christian hipap tugeta for worship. Iumi hipap for encouragem narawan and for kasem instruction and kaonsel from Bible. Bat important reason why iumi hipap tugeta hem for worshipim Dadi bilong iumi long heven, Jehovah. Olketa prea wea olketa brata talem and olketa song wea iumi singim savve strongim iumi and mekem Jehovah hapi. Iumi no laek misstim wei for hipap tugeta and for encouragem narawan!—Heb. 10:24, 25.
19-21. (a) Wanem nao iumi lanem from wei wea Jehovah iusim Peter for mekem change kamap long organization? (b) Why nao samwan mas changem Judas, and wanem nao iumi lanem from samting wea olketa aposol duim?
19 Wanfala important change mas kamap long organization long datfala taem and Jehovah iusim aposol Peter for storyim datwan. (Verse 15-26) Samting wea Peter duim strongim iumi bikos hem showimaot Peter barava changem wei bilong hem. Bifor Jesus dae, thrifala taem Peter sei hem no savve long Jesus. (Mark 14:72) Iumi evriwan savve sin and need for tingim evritaem Jehovah hem “gud and willing for forgivim” olketa wea barava repent.—Ps. 86:5.
20 Peter luksavve samwan shud changem Judas wea givim go Jesus long enemy. Bat hu nao bae changem Judas? Datfala niu aposol hem mas samwan wea followim Jesus taem hem duim ministry and hem mas man wea lukim Jesus taem hem laef bak. (Acts 1:21, 22) Datwan hem fitim wanem Jesus promisim. Hem sei: “Iufala wea followim mi bae sidaon tu long twelvfala throne and judgem twelvfala tribe bilong Israel.” (Matt. 19:28) Luk olsem hem plan bilong Jehovah for 12-fala aposol wea followim Jesus taem hem duim ministry for kamap “twelvfala ston” for faondeson bilong datfala taon, Niu Jerusalem. (Rev. 21:2, 14) So God helpem Peter for luksavve Judas hem man wea profesi storyim wea sei “nara man nao mas tekem position bilong hem for lukaftarem waka.”—Ps. 109:8.
21 So wanem nao olketa aposol duim for chusim man wea bae changem Judas? Olketa lukaotem saen from God. Pipol long taem bilong Bible iusim samting olsem daes for savve wanem nao God laekem. (Prov. 16:33) Bat long Acts 1:26, hem lastaem wea Bible storyim pipol iusim samting olsem daes. Bihaen datwan, holy spirit nao helpem olketa for savve wanem God laekem. Bat tingim why olketa aposol lukaotem saen from God. Olketa aposol prea olsem: “Jehovah, iu nao savve gud long tingting bilong evriwan. Plis iu showim long mifala hu long tufala man hia nao iu chusim.” (Acts 1:23, 24) Olketa laekem Jehovah nao for chus, so Jehovah chusim Matthias. Luk olsem hem wanfala long 70 disaepol wea Jesus sendem for go preach. So Matthias kamap wanfala long “twelvfala aposol.” c—Acts 6:2.
22, 23. Why nao iumi shud obeyim and stap anda long olketa wea leadim waka long kongregeson distaem?
22 Samting wea olketa aposol duim showimaot hem important for pipol bilong God mas organize gud. Kam kasem distaem, olketa elder recommendim olketa brata wea fit for kamap elder long kongregeson. Olketa elder lukluk gud sapos olketa brata hia kasem olketa mark long Bible, and olketa elder prea tu for holy spirit helpem olketa. Kongregeson luksavve holy spirit nao markem olketa brata hia for elder. Iumi obeyim and stap anda long olketa elder wea leadim waka long kongregeson mekem evriwan waka gud tugeta.—Heb. 13:17.
Iumi obeyim and stap anda long olketa elder wea leadim waka long kongregeson
23 From olketa disaepol lukim Jesus bihaen hem laef bak and wei wea samfala change kamap long organization, datwan barava strongim olketa. Olketa redi nao for big samting wea bae happen. Next chapter bae storyim datwan.
a Long Gospel bilong hem, “Luke hem iusim wanfala toktok wea maet datwan for showimaot respect long Theophilus, or maet datwan for showimaot hem garem haefala position.” (Luke 1:3, footnote) Samfala tingse Theophilus garem hae position bifor hem kamap Christian. Bat long buk bilong Acts, Luke talem nomoa nem bilong hem. Samfala savveman sei Theophilus kamap Christian bihaen hem readim Gospel bilong Luke, dastawe Luke no iusim datfala Greek toktok bat hem raet go long hem olsem spiritual brata bilong hem.
b Long hia Bible iusim Greek word troʹpos wea minim “wei,” and no Greek word mor·pheʹ wea minim “body.”
c Bihaen nao God chusim Paul for kamap “wanfala aposol for preach long pipol wea no Jew,” bat hem no wanfala long 12-fala aposol. (Rome 11:13; 1 Cor. 15:4-8) Hem no qualify for kasem spesol privilege for kamap wanfala long 12-fala aposol bikos hem no followim Jesus taem Jesus duim ministry bilong hem.