KWESTIN 9
Waswe, Mi Shud Biliv Long Evolution?
WANEM NAO BAE IU DUIM?
Tingim diswan: Alex hem konfius. Hem biliv long God and long creation. Bat wanday science teacher bilong hem sei evolution hem tru, and sei staka samting pruvim datwan. Alex no laekem eniwan for tingse hem dark hed. Hem garem tingting olsem, ‘Ei, sapos olketa savveman sei evolution hem tru, mi hard for kwestinim olketa bikos olketa nao garem bigfala savve.’
Sapos iu nao Alex, bae iu acceptim nomoa evolution bikos olketa skul textbuk sei hem tru?
TINGTING GUD FIRSTAEM!
Staka pipol wea biliv long evolution and staka wea biliv long creation, olketa no really savve why olketa bilivim datwan.
-
Samfala pipol biliv long creation bikos long wanem olketa herem nomoa long church.
-
Samfala pipol biliv long evolution bikos long wanem olketa lanem nomoa long skul.
SIXFALA KWESTIN FOR TINGIM
Bible sei: “Iumi savve, evri haos man nao wakem, bat man wea wakem evri samting hem God.” (Hebrew 3:4) Waswe, datwan mek sense?
Man wea sei no eniwan wakem olketa samting wea laef, hem semsem olsem hem sei no eniwan wakem disfala haos
SAMFALA SEI: Wanfala big bang hem happen long start wea mekem evri samting long universe kamap.
1. Hu or wanem nao kosim datfala big bang?
2. Waswe, hem mek sense for sei evri samting hem just kamap nomoa, or samwan nao kosim datwan?
SAMFALA SEI: Man hem kam from olketa animal.
3. Sapos man hem kam from monkey, why nao man garem bigfala savve winim monkey?
4. Nomata olketa barava simpol samting wea laef, design bilong olketa hem barava nambawan. Why nao olsem?
SAMFALA SEI: Pruv hem stap for sei evolution hem tru.
5. Waswe, man wea talem datwan chekim pruv hia?
6. Hao many pipol nao biliv long evolution from olketa narawan sei olketa kleva pipol nomoa biliv long evolution?
“Tingim sapos iu wakabaot long bush and iu lukim wanfala naes haos. Bae iu sei olketa tree foldaon seleva, then gogo olketa kamap datfala haos? Hard for iu ting olsem, iaman? So waswe, hem mek sense for sei evri samting long universe kamap seleva nomoa?”—Julia.
“Tingim sapos samwan sei wanfala bomb bosta long factory wea olketa printim olketa buk, and ink hem splash long olketa wall and kamap staka million word bilong wanfala dictionary wea followim order bilong alphabet. Waswe, bae iu bilivim?”—Gwen.
WHY BILIV LONG GOD?
Bible encouragem iumi for mas “mek sure long wanem hem tru.” (1 Thessalonica 5:21) Datwan minim iu shud biliv long God no bikos
-
HEM FEELING BILONG IU (Iu tingse masbi wanfala God hem stap)
-
OLKETA NARAWAN BILIVIM (Iu stap long ples wea evriwan biliv long God)
-
SAMWAN FORCEM IU (Parents forcem iu for biliv long God)
Iu shud garem olketa gudfala reason for biliv long God.
“Taem teacher explainim long class hao body bilong man hem waka, mi barava sure God hem stap. Evri part bilong body duim important waka and evri part hia gohed waka nomata iumi no savve or tingim. Body bilong man hem barava nambawan!”—Teresa.
“Taem mi lukim wanfala tourist boat, hae building, or trak, mi savve tingim hu nao wakem diswan? Olsem example, for wakem trak hem needim olketa man wea garem bigfala savve. Trak garem staka smol part wea mas waka gud tugeta. Sapos samwan nao hem designim wanfala trak, masbi samwan designim iumi tu.”—Richard.
“Taem mi studyim science, mi luksavve hard for evolution hem tru. . . . Hem barava mek sense for biliv long God and no long evolution.”—Anthony.
SAMTING FOR TINGIM
Nomata olketa savveman duim research for staka year finis, olketa no agree long hao for explainim evolution. Sapos olsem, waswe, hem rong for iu kwestinim evolution?
Iu Laek Lukim Nara Samting?
WANEM OLKETA NARA YOUNG WAN TALEM
Waswe, Hem Mek Sense for Biliv lo God?
Meetim tufala young pipol wea duim samting abaotem wat tufala daotem and tufala strongim faith blo tufala.
