1, 2. Hao nao world hem change start kam lo taem blo Noah, and hao nao Abram feel abaotem datwan?

 ABRAM hem luk go ap and hem lukim hae taoa wea olsem wanfala pyramid lo city blo Ur. a Hem herem pipol mek noes and hem lukim smoke blo fire go ap. Olketa priest offerim moa olketa sakrifaes for datfala moon god. Imaginim, Abram tane difren and sekem hed blo hem, and hem no luk hapi. Taem hem wakabaot followim road go bak lo haos, maet hem ting abaotem hao staka pipol lo Ur worshipim olketa idol. Maet hem tingim tu hao wei for worshipim idol hem spred evriwea lo world bihaen lo taem blo Noah!

² Noah dae tufala year nomoa bifor Abram hem born. Taem Noah and famili blo hem go aot from ark bihaen lo bigfala Flood, datfala faithful man offerim sakrifaes lo Jehovah God, and bihaen datwan Jehovah mekem rainbow for showaot lo skae. (Gen. 8:20; 9:12-14) Lo datfala taem, tru worship nomoa hem only worship wea stap lo full world. Then, lo mek-ten genereson blo Noah, tru worship hem gogo for lus. Pipol evriwea worshipim olketa heathen god. Nomata dadi blo Abram, Terah tu worshipim olketa idol, and maet hem wakem olketa idol tu.—Josh. 24:2.

 3. Wat nao main fasin wea Abram showimaot lo full laef blo hem, and wat nao iumi savve lanem from datwan?

³ Abram hem difren from evri pipol wea stap raonem hem. Lo full laef blo Abram, hem showimaot hem garem strong faith lo God. Dastawe aposol Paul kolem Abram lo “dadi bilong evriwan wea garem faith”! (Readim Rome 4:11.) Taem iumi storyim wat nao mekem Abram for garem faith olsem, iumi tu savve lanem staka samting abaotem hao for mekem faith blo iumi kamap strong.

4, 5. Abram maet lane abaotem Jehovah from hu, and why nao iumi savve sei datwan hem tru?

⁴ Hao nao Abram hem lane abaotem Jehovah God? Iumi savve samfala faithful servant blo Jehovah olketa stap lo earth bifor tu. Wanfala nao hem Shem. Bible evritaem mentionim Shem first, nomata hem no first born lo thrifala son blo Noah. Datwan hem bikos luk olsem Shem hem man wea showimaot faith. b Bihaen lo Flood, Noah sei Jehovah hem “God blo Shem.” (Gen. 9:26) Shem duim samting wea showimaot hem respectim Jehovah and tru worship.

⁵ Hao, Abram savve lo Shem? Maet olsem. Imaginim taem Abram hem smol boy. Bae hem interest tumas for savve dat wanfala ancestor blo hem still laef yet, wea lukim samting wea happen winim 400 year finis! Shem lukim olketa nogud samting wea happen bifor Flood, hem lukim tu big Flood wea finisim evri samting lo full earth, hem lukim taem wea pipol start for kamap staka lo disfala earth, and wei wea Nimrod bighed and wakem Taoa blo Babel. From Shem hem faithful hem no join insaed waka for buildim Taoa blo Babel, so taem Jehovah mekem pipol for konfius and story lo olketa difren languis, Shem and famili blo hem gohed for story lo original languis, wea hem languis blo Noah. Abram kam from datfala famili tu. So masbi, taem Abram grow ap, hem tinghae lo wei blo Shem. Luk olsem, Shem gohed laef yet bihaen Abram born. So maet Abram lanem staka samting abaotem Jehovah from Shem.

 6. (a) Wat nao Abram duim wea showimaot hem lanem samting from bigfala Flood wea happen? (b) Wat kaen laef nao Abram and Sarai garem?

⁶ Abram lanem wanfala important leson from datfala Flood. Hem nao for traem best for wakabaot witim God olsem Noah. Dastawe Abram rejectim wei for worshipim idol and hem difren from olketa narawan lo Ur, maet from famili blo hemseleva tu. Nomata olsem, hem faendem samwan for sapotim hem lo laef. Hem maritim Sarai, wanfala woman wea no just luk naes nomoa, bat hem garem strongfala faith lo Jehovah. c Nomata tufala no garem pikinini, tufala hapi for worshipim  Jehovah tugeta. And tu, tufala adoptim Lot wea hem nephew blo Abram wea no garem dadi and mami.

 7. Hao nao olketa wea followim Jesus need for garem sem faith olsem Abram?

⁷ Abram no letem wei for worshipim idol lo Ur for affectim wei wea hem worshipim Jehovah. Abram and Sarai no worshipim idol and datwan mekem tufala for difren from evriwan lo community. If iumi laek for garem tru faith, iumi need for garem sem kaen wei olsem Abram and Sarai. Iumi tu mas willing for difren from olketa narawan. Jesus talem olketa follower blo hem for “no olsem pipol long world” and from datwan nao pipol lo world heitim olketa. (Readim John 15:19.) If iu feel sorre from olketa famili member or olketa lo community no laekem iu bikos iu disaed for servem Jehovah, tingim hao datwan no kasem iuseleva. Iu semsem olsem Abram and Sarai wea wakabaot witim God.

8, 9. (a) Wat nao Abram no savve forgetim? (b) Wat nao message wea Jehovah talem lo Abram?

⁸ Wanday, samting happen wea Abram no savve forgetim. Hem kasem wanfala message from Jehovah God! Bible no storyim staka samting abaotem datwan, bat hem sei “God wea garem bigfala paoa” hem appear lo datfala faithful man. (Readim Acts 7:2, 3.) Maet Jehovah iusim wanfala angel for showim lo Abram lelebet part lo bigfala paoa blo hem olsem Sovereign blo universe. Iumi savve imaginim hao Abram mas barava hapi for luksavve hao tru God hem laef and difren from olketa idol wea no laef, wea pipol gohed for worshipim lo datfala taem.

⁹ Wat nao message wea Jehovah talem for Abram? “Lusim hom and pipol bilong iu and go long nara ples wea bae mi showim long iu.” Jehovah no talem which ples nao hem tingim, bat hem sei bae hem showim lo Abram. Nomata olsem, first samting wea Abram mas duim, hem for lusim hom blo hem and olketa relative blo hem. Lo culture blo Middle East bifor, famili hem barava important samting. For man lusim olketa relative blo hem and go stap lo wanfala farawe ples, olketa savve ting lo datwan olsem barava nogud samting and samfala ting hem worse winim dae!

10. Why nao wei wea Abram and Sarai willing for lusim hom blo tufala lo Ur hem wanfala sakrifaes?

¹⁰ For lusim Ur, Abram need for mekem samfala sakrifaes. Olketa pruv stap wea showim Ur hem wanfala city wea barava busy and rich. (Lukim box “ Datfala City wea Abram and Sarai Lusim Bihaen.”) Olketa archaeologist faendaot dat lo bifor olketa naesfala haos hem stap lo Ur, samfala haos garem staka rum insaed for olketa lo famili and olketa wakaman, olketa rum hia stap raonem courtyard blo  datfala haos. Olketa haos garem evri samting wea man needim olsem wata, toilet, and ples for torowem rabis. Tingim tu dat Abram and Sarai tufala no young, Abram hem 70 years finis and Sarai hem 60 years finis tu. Hem barava laekem waef blo hem Sarai for stap lo gud haos and for lukaftarem hem gud, wea datwan hem samting wea wanfala gud hasband bae laek for duim for waef blo hem. Imaginim taem tufala story abaotem datfala assignment, maet tufala storyim olketa kwestin and eni samting wea maet tufala wari abaotem. Abram mas barava hapi tumas taem Sarai willing for duim datfala assignment wea no isi! Olsem Abram, Sarai willing for lusim gud laef wea hem garem lo hom blo hem.

11, 12. (a) Wat nao tufala need for redyim and disaedem bifor tufala lusim Ur? (b) Hao nao maet iumi describem morning wea olketa redi for go?

¹¹ Afta Abram and Sarai mekem datfala disison, tufala garem staka samting for duim. Olketa mas pakim ap and organizem evriting. Tufala need for tingim wat for tekem and wat for no tekem, bikos tufala no savve wea nao bae tufala go. And nara important samting tufala need for tingim, hem famili blo tufala. Wat nao bae olketa disaedem abaotem Terah wea olo finis? Olketa disaed for tekem hem and lukaftarem hem. Maet Terah hapi for go, from Bible storyim hem olsem wanfala man wea willing for lusim Ur witim famili blo hem. Luk olsem hem lusim finis wei for worshipim idol. Nephew blo Abram, Lot go witim olketa tu.—Gen. 11:31.

¹² Imaginim morning wea olketa redi for go. Evriwan redi aotsaed lo wall and wata wea stap raonem city blo Ur. Olketa camel and donkey karem staka samting, olketa sheepsheep hipap tu lo there, olketa lo famili and olketa servant standap lo ples blo olketa, and olketa barava hapi and redi for go. d Maet evriwan luk lo Abram, and weitim taem for hem talem olketa for go. Then, hem kasem taem for olketa go, olketa lusim Ur for olowe.

13. Hao nao staka wea worshipim Jehovah distaem showimaot sem wei olsem Abram and Sarai?

¹³ Distaem tu, staka wea worshipim Jehovah disaed for muv lo ples wea needim moa pablisa for preach. Samfala disaed for lanem niu languis for duim moa samting lo ministry. Or maet olketa disaed for traem samfala niu wei for preach wea olketa no duim bifor. For mekem olketa disison olsem, iumi need for sakrifaesim samfala samting and for willing for let go lo samfala material samting. Iumi tinghae lo olketa wea garem kaen wei olsem, for willing for sakrifaesim samfala samting olsem Abram and Sarai! If iumi showim kaen faith  olsem, iumi sure dat Jehovah bae evritaem givim staka samting for iumi winim wanem iumi givim lo hem. Hem evritaem blessim olketa wea garem faith. (Heb. 6:10; 11:6) Hao nao Jehovah duim diswan for Abram?

14, 15. Describem datfala gogo from Ur kasem Haran, and why nao maet Abram disaed for stap lo Haran for lelebet taem?

¹⁴ Imaginim olketa isisi followim road wea olketa travel lo hem. Abram and Sarai raedem carmel and samfala taem tufala wakabaot and gohed story. Olketa savve herem tu mek noes blo olketa belo wea hange lo strap blo olketa animal. Evriwan start for getius nao lo wei for setimap camp and aotem, and olketa savve helpem tu Terah wea olo for sidaon antap lo wanfala camel or donkey. Olketa travel go lo northwest, followim Euphrates River wea barava big. Olketa travel for staka day and staka week.

¹⁵ Bihaen olketa travel for samting olsem 960 kilometer, olketa kasem olketa hut lo Haran wea sheip blo olketa raon. Haran hem wanfala rich city wea stap lo midol blo East-West trade road wea pipol savve kam for duim bisnis. Lo there, famili blo Abram stop, and stap for lelebet taem. Maet Terah hem wik tumas for travel nao.

16, 17. (a) Wat nao covenant wea Abram barava hapi for kasem? (b) Hao nao Jehovah blessim Abram taem hem stap lo Haran?

 ¹⁶ Gogo, Terah dae taem hem 205 years old. (Gen. 11:32) Abram kasem comfort lo datfala taem wea hem lusim dadi blo hem, bikos Jehovah story moa lo hem. Jehovah talem moa sem instruction wea hem talem lo Ur, then hem mekem nara promis moa. Hem sei Abram bae kamap “wanfala maeti nation,” and evri famili lo earth bae kasem blessing bikos lo hem. (Readim Genesis 12:2, 3.) Taem Jehovah God mekem datfala covenant, Abram barava hapi tumas and hem luksavve hem taem for olketa muv.

¹⁷ Famili blo Abram garem staka samting nao for tekem bikos Jehovah blessim Abram taem hem stap lo Haran. Bible storyim dat taem olketa lo Haran, olketa kasem staka samting moa and staka servant tu. (Gen. 12:5) For kamap wanfala nation, Abram needim staka material samting, olketa wakaman, diswan minim hem garem big famili. Jehovah no evritaem mekem olketa wakaman blo hem for rich, bat hem givim wat olketa needim for mekem plan blo hem kamap tru. From datwan, Abram redi nao for gohed travel nomata hem no savve wea nao hem go.

18. (a) Wat taem nao wanfala barava important samting hem happen lo laef blo Abram wea join witim hao Jehovah deal witim pipol blo hem? (b) Wat nao olketa nara important samting wea happen lo Nisan 14 lo olketa year bihaen? (Lukim box “ Wanfala Important Date lo History lo Bible.”)

¹⁸ Samfala day bihaen wea olketa travel from Haran, olketa kasem Carchemish, ples wea pipol savve iusim for akrosim Euphrates River. Luk olsem, lo there nao wanfala barava important samting hem happen lo laef blo Abram wea join witim hao Jehovah deal witim pipol blo hem. Diswan kamap lo mek-14 day lo month blo Nisan, 1943 B.C.E., taem Abram leadim famili blo hem for akrosim datfala river. (Ex. 12:40-43) Datfala land wea Jehovah promis for givim lo Abram hem stap lo south saed. So lo datfala day nao, covenant wea God mekem witim Abram hem start.

19. Wat nao nara samting wea Jehovah talem taem hem mekem promis lo Abram, and diswan maet remindim Abram lo wanem samting?

¹⁹ Abram hem isisi travel go lo south, and olketa go stop klosap lo olketa big tree lo Moreh, klosap lo Shechem. Lo there, Jehovah hem  story kam moa lo Abram. Lo datfala taem nao, God hem promisim dat seed, or pikinini blo Abram nao bae stap lo datfala land. Hao, datwan mekem Abram for tingim bak profesi wea Jehovah talem lo Eden, wea sei wanfala “seed,” or pikinini bae helpem olketa man? (Gen. 3:15; 12:7) Maet olsem. Luk olsem Abram start for luksavve dat hem part lo datfala plan blo Jehovah.

20. Hao nao Abram showimaot hem tinghae lo privilege wea Jehovah givim lo hem?

²⁰ Abram barava tinghae lo privilege wea Jehovah givim lo hem. Taem hem travel go thru lo datfala land, Abram stop lo samfala ples and buildim olketa altar for Jehovah. Nomata olsem, Abram mas careful bikos olketa Canaanite still stap lo there. First altar hem klosap lo olketa big tree lo Moreh, then narawan klosap lo Bethel. Hem kol lo nem blo Jehovah, and talemaot thankiu blo hem lo God taem hem ting abaotem future wea olketa pikinini blo hem bae garem. Maet hem preach tu lo olketa Canaanite wea stap lo there. (Readim Genesis 12:7, 8.) Faith blo Abram kasem olketa bigfala challenge taem hem stap lo there. Nomata olsem, Abram wise for no tingim bak hom blo hem and gudfala laef wea hem lusim lo Ur. Hem gohed tingim future. Hebrew 11:10 sei olsem abaotem Abram: “Hem weitim datfala taon wea garem strongfala faondeson wea God nao planim and buildim.”

21. Hao nao iumi comparem savve wea iumi garem distaem abaotem Kingdom blo God witim savve wea Abram garem, and wat nao iu laek for duim?

²¹ Distaem, iumi wea gohed worshipim Jehovah, savve lo staka samting winim Abram abaotem datfala tokpiksa taon, wea hem nao Kingdom blo God. Iumi savve dat Kingdom hem rul lo heven distaem and klosap nao bae hem finisim evri gavman lo world, and iumi savve tu datfala promis Seed blo Abram, Jesus Christ, hem nao rul lo datfala Kingdom. Hem bae wanfala privilege for iumi lukim Abraham taem hem resurrect, and lo datfala taem nao, Abraham bae just minim gud hao plan blo God hem kamap tru! Hao, iu laek for lukim taem evri promis blo Jehovah kamap tru? Sapos olsem, gohed followim example blo Abram. Willing for mekem olketa sakrifaes, obey, and prea lo Jehovah, for showimaot iu tinghae lo privilege wea hem givim iu. Taem iu garem sem faith olsem Abram, wea hem “dadi bilong evriwan wea garem faith,” bae hem kamap dadi blo iu tu!