For Iufala Olketa Brata and Sista:

Lo January 1, 2008, hem firstaem for iumi garem olketa niu article lo pablik Wastaoa blo iumi anda lo title “Followim Faith Bilong Olketa”, wea distaem iumi kolem lo “Garem Sem Faith Olsem Olketa.” Start from datfala taem, olketa gohed for pablisim olketa niu article hia, and datwan mekem iumi hapi tumas!

Wat nao feeling blo olketa wea readim olketa article hia? Bihaen wanfala sista readim article abaotem Martha, hem raet olsem: “Mi laf taem mi readim bikos mi olsem hem, evritaem mi wari for lukaftarem olketa wea kam lo haos, and mi savve busy tumas lo datwan gogo mi forget tu for rest and for associate witim olketa.” Wanfala teenager talem disfala interesting koment afta hem readim story blo Esther: “Mi tingim hao samfala taem iumi savve ova tumas for laekem kaleko, and olketa niu fashion. Iumi shud werem gud kaleko bat iumi no laek for ova tumas.” Hem sei tu, “Jehovah tingim wat nao insaed lo heart blo iumi.” Wanfala sista hem hapi tumas afta hem readim wanfala article abaotem aposol Peter, hem sei: “Mi feel olsem mi insaed lo datfala story, datfala story kamap real lo mi! Taem mi readim, mi imaginim hao bae mi feel sapos mi lo there.”

Olketa hia, and staka narawan moa wea raet kam for sei thankiu for olketa article hia, pruvim hao samting wea aposol Paul raetem hem tru: “Evri samting wea olketa raetem bifor hem for teachim iumi.” (Rome 15:4) Yes, Jehovah mek sure olketa story hia stap insaed lo Bible for teachim iumi olketa nambawan leson. Iumi evriwan, nomata iumi stap lo truth for longtaem finis, iumi savve lane from olketa.

Mifala encouragem iu for readim disfala buk. Iu savve duim datwan lo Famili Worship program blo iu, olketa pikinini bae laekem tumas! Taem kongregeson studyim disfala buk lo Kongregeson Bible Study, no misstim eni week! Markem taem for readim and no hariap. Trae for imaginim and tingim iuseleva insaed datfala story. Trae for garem sem feeling olsem man wea insaed lo story, and trae for lukim wat olketa lukim. Comparem wat nao olketa duim taem wanfala situation kamap and wat nao bae iu duim sapos kaen situation olsem kamap.

Mifala hapi tumas for givim disfala pablikeson lo iu. Letem hem kamap wanfala blessing for iu and famili blo iu. Mifala sendem love and greetings,

Governing Body blo Olketa Jehovah’s Witness