1, 2. (a) Taem Hannah prepare for go lo wanfala trip, why nao hem no hapi? (b) Wat nao iumi savve lanem from story blo Hannah?

 HANNAH gohed busy for redyim olketa samting for trip blo hem, and hem trae for forgetim olketa problem blo hem. Hem shud taem blo hapi; bikos evri year Elkanah, hasband blo hem savve tekem full famili for go for worship lo tabernacle lo Shiloh. Jehovah laekem evriwan for hapi taem olketa go lo olketa spesol occasion olsem. (Readim Deuteronomy 16:15.) Masbi, since Hannah hem smol, hem savve hapi tumas for go lo olketa festival olsem, bat gogo situation blo hem change.

² Hem garem wanfala naes hasband wea lovem hem tumas, bat Elkanah garem nara waef tu. Nem blo hem Peninnah, and luk olsem hem savve laek tumas for mekem Hannah feel nogud. And tu, Peninnah iusim olketa spesol occasion hia wea kamap evri year olsem chance for mekem Hannah feel nogud tumas. Wat nao hem duim? Samting wea moa important, hao nao faith blo Hannah helpem hem for deal witim disfala situation wea luk olsem hem barava hard tumas? If iu feisim olketa challenge olsem wea spoelem wei wea iu hapi, iu bae faendem hao story blo Hannah savve barava helpem iu.

3, 4. Wat nao tufala big problem wea Hannah feisim, and why nao each problem hem wanfala challenge for hem?

³ Bible storyim tufala big problem wea Hannah feisim lo laef blo hem. First wan hem bae hard for hem changem, and mek-tu problem, hem hard for Hannah duim eniting abaotem. First problem wea Hannah mas deal witim, hem wei wea hasband blo hem garem nara waef wea heitim hem tumas. And mek-tu problem, Hannah no savve garem pikinini. Datwan hem no wanfala isi situation for eni waef wea laekem tumas for garem pikinini for deal witim. Bat lo taem blo Hannah and lo culture blo olketa datwan hem big samting, each wan lo famili mas garem pikinini mekem laen blo olketa savve gohed. Lo tingting blo olketa, taem wanfala woman no garem pikinini datwan hem samting for shame lo hem.

 ⁴ Hannah maet savve deal nomoa witim datfala situation bat bikos lo Peninnah hem kamap hard go moa. For garem tu-thri waef hem no wanfala isi situation. Wei for raoa, jealous and kros hem normal samting lo kaen situation olsem. Diswan hem barava difren from standard wea God markem finis lo garden blo Eden for man garem wanfala waef nomoa. (Gen. 2:24) So Bible storyim hao wei for garem staka waef savve spoelem famili and diswan showaot klia lo famili blo Elkanah.

 5. Why nao Peninnah laekem Hannah for safa, and hao nao datwan mekem Hannah feel nogud tumas?

⁵ Elkanah lovem Hannah winim Peninnah. Olketa Jew biliv hao luk olsem Elkanah maritim Hannah firstaem then bihaen samfala year nao hem just maritim Peninnah. Nomata datwan hem tru or nomoa, Peninnah hem barava jealous lo Hannah, and hem faendem eni wei for mekem Hannah hem safa. Samting wea Peninnah hem winim Hannah lo hem nao wei wea hem savve garem pikinini. Peninnah garem staka pikinini and each taem hem garem pikinini datwan mekem hem feel olsem hem important moa winim Hannah. Instead for hem comfortim Hannah from hem no garem pikinini, Peninnah iusim datwan for mekem Hannah feel nogud go moa. Bible sei Peninnah tok spoelem Hannah “for mekem hem feel nogud.” (1 Sam. 1:6) Peninnah min for duim datwan, hem laek for mekem Hannah feel nogud and hem win for duim datwan.

6, 7. (a) Nomata Elkanah traem best for comfortim Hannah, why nao maet Hannah hol bak for talem hem full story? (b) Waswe, wei wea Hannah no savve garem pikinini hem minim Jehovah no hapi lo hem? Explainim. (Lukim footnote.)

⁶ Luk olsem favorite chance blo Peninnah for spoelem Hannah hem nao taem olketa go lo Shiloh each year for celebratem olketa festival. Elkanah savve givim sakrifaes lo Jehovah and hem savve givim part lo datfala sakrifaes lo each lo olketa pikinini blo Peninnah, “lo evri son and dota.” Bat lo Hannah, from hem lovem hem tumas, hem givim best part lo hem. Peninnah hem jealous tumas and hem iusim datwan for daonem Hannah and for talem hem hao hem no savve garem pikinini gogo hem no laek for kaikai nao. Elkanah hem luksavve dat Hannah hem barava wari and no savve kaikai, so hem trae for comfortim hem. Hem sei lo hem, “Hannah, why nao iu krae, and why nao iu les for kaikai, and why nao iu sorre tumas? Iu no sorre, mi nao hasband blo iu. Mi gud winim tenfala son.”—1 Sam. 1:4-8.

⁷ At least, Elkanah hem luksavve hao Hannah hem stress tumas bikos hem no savve garem pikinini. For sure, Hannah hem tinghae lo  kaenfala wei wea hasband blo hem showimaot hem lovem hem. a Bat Elkanah hem no storyim nogud samting wea Peninnah duim and Bible no storyim tu sapos Hannah hem storyim datwan lo Elkanah. Luk olsem hem savve dat sapos hem talem moa wat Peninnah hem duim, datwan bae mekem situation blo Hannah for worse go moa. Waswe, Elkanah savve duim samting for changem wat hem happen? Maet datwan bae mekem Peninnah for heitim go moa Hannah and maet olketa pikinini and olketa servant blo hem duim sem samting lo Hannah tu. Maet gogo bae Hannah hem feel dat olketa lo own haos blo hem rejectim hem nao.

 8. Taem samwan maet treatim iu nogud or duim samting wea no followim justice, why nao iumi kasem comfort taem iumi savve dat Jehovah hem God blo justice?

⁸ Nomata Elkanah hem savve sapos Peninnah hem jealous or nomoa, Jehovah God lukim evri samting. Bible hem barava showimaot full story and diswan hem wanfala warning for eniwan wea garem wei for jealous and laek for duim samting bikos olketa heitim narawan. Bat olketa wea innocent and keepim peace olsem Hannah, savve kasem comfort from wei wea olketa savve dat God blo justice bae stretem evri samting lo taem blo hem and followim wei blo hem. (Readim Deuteronomy 32:4.) Luk olsem Hannah savve lo diswan, dastawe hem luk lo Jehovah for helpem hem.

 9. Wat nao iumi lanem from wei wea Hannah willing for go lo Shiloh nomata hem faendem hem bae hard for deal witim Peninnah?

⁹ Lo early morning evriwan lo haos busy, evriwan redi for go lo datfala trip, nomata olketa pikinini tu. For kasem Shiloh, full famili mas travel for winim 20 miles akrosim Ephraim wea garem staka hill. b Olketa mas wakabaot for wan or tufala day. Hannah savve finis lo wanem Peninnah bae duim. Nomata olsem, Hannah no laek for stap lo haos. Datwan hem nambawan example for olketa wea worshipim God distaem. Hem no wise for letem nogud samting wea olketa narawan duim for disturbim worship blo iumi for God. Sapos iumi duim datwan, bae iumi no kasem olketa blessing wea savve strongim iumi for no givap.

10, 11. (a) Why nao Hannah barava laek kwiktaem for kasem tabernacle? (b) Hao nao Hannah prea lo Dadi blo hem lo heven from heart blo hem?

¹⁰ Bihaen datfala full famili wakabaot lo staka maunten, olketa kasem Shiloh. Datfala ples Shiloh hem stap antap lo wanfala hill and olketa  nara big hill moa stap raonem. Taem olketa klosap kasem lo there, maet Hannah hem ting raonem wat nao bae hem storyim lo Jehovah taem hem prea. Taem olketa arrive, famili kaikai tugeta. Kwiktaem nomoa Hannah hem lusim olketa and go lo tabernacle blo Jehovah. Hae Priest Eli lo there, hem sidaon klosap lo door blo tabernacle, bat Hannah hem concentrate for prea lo God blo hem. From hem lo tabernacle, hem barava feel sure dat God bae herem prea blo hem. Nomata sapos no eniwan minim situation blo hem, Dadi blo hem lo heven bae minim datwan. Heart blo hem fulap witim sorre and hem start for krae.

¹¹ Hannah gohed for krae gogo full body blo hem seksek, hem story from heart blo hem lo Jehovah. Lips blo hem muv bat hem no tok big, hem gohed for talem sorre feeling blo hem lo Jehovah. And hem prea for longtaem, hem pourimaot heart blo hem lo dadi blo hem. Hem no just askem God nomoa for givim hem wanem hem laekem wea hem nao for hem savve garem pikinini. Hannah no just ask for kasem blessing from God nomoa, bat hem laek for givim best blo hem lo Jehovah tu. So hem mekem wanfala promis and sei if hem garem wanfala son, bae hem givim datfala pikinini for waka for Jehovah for full laef blo hem.—1 Sam. 1:9-11.

12. Olsem example blo Hannah, wat nao iumi savve tingim evritaem abaotem wei for prea?

¹² Hannah showim gudfala example for evri servant blo God abaotem wei for prea. Jehovah hem kaen tumas so hem invaetem evri pipol blo hem for feel free for story lo hem, and no hol bak for storyim wari blo olketa lo hem olsem wanfala pikinini wea trustim parents blo hem wea lovem hem. (Readim Psalm 62:8; 1 Thessalonica 5:17.) Thru lo holy spirit, aposol Peter raetem olketa toktok hia wea comfortim iumi abaotem wei for prea lo Jehovah. Hem sei: “Putim evri wari blo iufala lo hand blo hem bikos hem tingim iufala.”—1 Pet. 5:7.

13, 14. (a) Wat nao Eli kwiktaem talem abaotem Hannah? (b) Hao nao reaction blo Hannah lo wat Eli talem hem nambawan example blo faith?

¹³ Bat iumi olketa human being, no savve minim gud and tingim feeling blo olketa man olsem hao Jehovah minim olketa. Taem Hannah hem gohed for krae and prea, hem seke lo voice blo Eli. Eli datfala hae priest, hem gohed for watchim hem. Hem sei lo hem: “Hao nao iu drunk lo hia? Stop for drinkim wine blo iu.” Eli hem bin watchim Hannah taem hem gohed for muvim lips blo hem and krae and talemaot lo Jehovah wei wea hem feel nogud tumas. Winim wei for hem askem wat nao rong, hem kwiktaem tingse Hannah hem drunk.—1 Sam. 1:12-14.

¹⁴ Hem fitim nomoa for Hannah barava feel nogud bikos lo situation blo hem lo datfala taem wea no isi, and man wea evriwan tinghae lo hem nao accusim hem! Nomata olsem, Hannah hem gohed for showimaot nambawan example blo faith. Hem no letem wei wea samwan wea no perfect spoelem worshipim blo hem for Jehovah. Hem ansarem Eli lo wei wea showimaot respect and hem explainim situation blo hem.  Maet taem Eli ansa, hem tok kaen lo hem and sei: “Iu go and iu no wari, letem God blo Israel givim iu wanem iu askem lo hem.”—1 Sam. 1:15-17.

15, 16. (a) Wei wea Hannah story from heart blo hem lo Jehovah and worshipim hem lo tabernacle, hao nao datwan affectim hem? (b) Hao nao iumi savve followim example blo Hannah, taem iumi stragol witim olketa negative feeling?

¹⁵ Hao nao wei wea Hannah story from heart blo hem lo Jehovah and worshipim hem lo tabernacle affectim hem? Bible sei: “And datfala woman go, and kaikai and hem no wari nao.” (1 Sam. 1:18) Lo Jerusalem Bible olketa transleitim datfala toktok olsem: “Feis blo hem no sorre nao.” Hannah hem hapi bak moa. Hem feel olsem hem givim go datfala hevi wea hem no fit for karem lo datfala man wea strong for karem datfala hevi wea hem nao dadi blo hem lo Heven. (Readim Psalm 55:22.) Waswe, eni problem hem hevi tumas for Jehovah? No eni problem hem hevi tumas lo Hem nomata lo datfala taem, distaem or lo future!

¹⁶ Taem iumi feel wikdaon, no wei nao or iumi sorre tumas, iumi savve followim example blo Hannah and feel free for story witim datwan wea Bible kolem hem “man for herem olketa prea.” (Ps. 65:2) Taem iumi duim datwan bikos iumi garem faith, iumi bae lukim hao wei wea iumi sorre hem change and bae iumi garem “peace blo God wea winim nao wanem man savve minim.”—Phil. 4:6, 7.

17, 18. (a) Hao nao Elkanah duim samting for sapotim promis blo Hannah? (b) Wat nao Peninnah luksavve hem no garem paoa nao?

¹⁷ Lo next morning, Hannah go bak lo tabernacle witim Elkanah. Luk olsem hem talem hem finis lo request and promis blo hem. Lo Law blo Moses, wanfala hasband hem garem raet for finisim promis wea wanfala waef mekem sapos hem no agree witim datwan. (Num. 30:10-15) Bat datfala faithful wan hem no duim datwan. Hem and Hannah, worshipim Jehovah tugeta lo tabernacle and bihaen evriwan go bak lo hom.

¹⁸ Lo wanem taem nao Peninnah luksavve hem no garem paoa nao for mekem Hannah feel nogud? Bible no talem datwan, bat datfala toktok “hem no wari nao” hem showimaot dat Hannah hem no feel sorre moa start lo datfala taem. Gogo, Peninnah luksavve no eni gud samting hem kamaot from wat hem duim. Bihaen datwan, Bible no story abaotem hem moa.

19. Wanem blessing nao Hannah kasem, and hao nao hem showimaot hem tinghae lo datwan wea givim datfala blessing?

¹⁹ Gogo, datfala peace lo mind wea Hannah garem hem change for kamap bigfala hapi. Hem babule! And hem barava hapi tumas. Nomata olsem, Hannah hem no forgetim hao datfala blessing hem kam from Jehovah. Taem datfala boy hem born, hem chusim nem Samuel, wea minim “Nem blo God.” Luk olsem datwan hem join witim wei wea Hannah hem ask lo nem blo God for datfala boy. Lo datfala year Hannah hem no go witim Elkanah and famili blo hem for Shiloh. Hem stap lo  haos witim pikinini blo hem for thri years go kasem taem datfala boy hem lusim susu. Then Hannah hem redi for datfala day wea bae hem givim datfala son wea hem lovem tumas.

20. Hao nao Hannah and Elkanah duim samting wea tufala promisim lo Jehovah?

²⁰ For lusim Samuel hem no isi samting. Hannah savve olketa woman wea waka lo tabernacle bae lukaftarem Samuel lo Shiloh. Bat Samuel hem young tumas and evri mami bae laekem pikinini blo olketa for stap witim olketa. Nomata olsem, Hannah and Elkanah givim datfala boy witim full heart blo tufala. Tufala givim olketa sakrifaes lo haos blo God, and tufala givim Samuel lo Eli and remindim hem abaotem promis wea Hannah mekem lo tabernacle, samfala year go pas.

21. Hao nao prea blo Hannah lo Jehovah showimaot hao strong nao faith blo hem? (Lukim tu box “ Tufala Spesol Prea.”)

²¹ Jehovah barava tinghae lo prea wea Hannah talem dastawe hem putim insaed lo word blo hem, Bible. Taem iu readim evri toktok blo Hannah wea stap lo 1 Samuel 2:1-10, bae iu lukim hao strong nao faith blo Hannah lo evri toktok wea hem talem. Hem praisem Jehovah for wei wea hem iusim paoa blo hem for mekem man wea praod for hambol. Hem blessim olketa wea pipol spoelem olketa, hem savve finisim laef blo man and hem savve sevem laef blo man from dae. Hem praisem dadi blo hem for wei wea hem Holi, justice blo hem and wei wea hem faithful. Dastawe Hannah hem sei: “No eni rock hem olsem god blo iumi.” Jehovah hem strong and hem no savve change, Hem ples for haed for olketa pipol wea sorre wea needim samwan for helpem olketa, and pipol wea olketa narawan spoelem olketa.

22, 23. (a) Hao nao iumi sure dat taem Samuel growap, hem savve dat parents blo hem lovem hem? (b)  Wanem moa olketa nara blessing wea Jehovah givim lo Hannah?

²² Hem wanfala big privilege for Samuel garem wanfala mami, wea garem faith lo Jehovah. Nomata Samuel missim mami blo hem  taem hem growap, hem savve dat mami blo hem no forgetim hem. Evri year, taem Hannah go ap lo Shiloh, hem savve tekem go wanfala coat for Samuel lo tabernacle. Hao hem soengim datfala coat hem showimaot hem lovem and kea for son blo hem. (Readim 1 Samuel 2:19.) Iumi savve imaginim taem hem putim datfala niu coat lo boy blo hem and wei wea hem showimaot hem lovem hem taem hem story kaen lo hem and talem olketa toktok for encouragem hem. Hem wanfala bigfala blessing for Samuel garem wanfala mami olsem Hannah, and hem growap for kamap wanfala blessing for parents blo hem and for full Israel tu.

²³ Jehovah no forgetim Hannah tu, Hem blessim hem witim wei for garem olketa pikinini, and hem and Elkanah garem faevfala pikinini moa. (1 Sam. 2:21) Nara bigfala blessing wea Hannah garem nao, hem wei wea hem fren klos witim dadi blo hem Jehovah. And evri year datwan hem kamap moa strong. Iu savve olsem tu, taem iu garem sem faith olsem Hannah.