1, 2. (a) Olketa wanem change nao Joseph and famili blo hem feisim? (b) Wanem nogud nius nao Joseph mas talem lo waef blo hem?

 IMAGINIM Joseph lo datfala naet lo Bethlehem. Taem hem putim nara basket lo baksaed blo datfala donkey, masbi hem tingim datfala long trip for kasem Egypt. Hem tingim hao olketa bae go lo ples blo olketa difren pipol wea garem difren languis and kastom, and hao nao bae smol famili blo hem deal witim datwan?

² Hem no isi for Joseph talem disfala nogud nius lo waef blo hem Mary, bat hem mas duim nao. Hem storyim wanfala dream lo Mary wea wanfala angel talem, hem message from God. Angel hia sei: King Herod laek for killim dae smol son blo tufala! So olketa mas lusim Bethlehem kwiktaem. (Readim Matthew 2:13, 14.) Mary hem barava wari. Mary and Joseph no minim nao why eniwan laek for killim dae smol pikinini blo tufala. Nomata olsem, from tufala trustim Jehovah, tufala redyim evri samting for go.

 3. Storyim hao Joseph and famili blo hem lusim Bethlehem. (Lukim tu piksa.)

³ Taem Joseph, Mary and Jesus go kwaet from datfala taon, pipol lo Bethlehem sleep and no savve wanem nao gohed. Taem Joseph leadim famili blo hem and hem start for daylaet maet hem tingim wanem nao bae happen. Hao nao bae hem protectim famili blo hem from Herod? Hao nao bae hem provaedem need blo famili blo hem? Waswe, hem gohed for no givap for duim disfala waka for lukaftarem and teachim disfala spesol pikinini wea God givim hem? Joseph mas deal witim olketa hard samting wea bae kamap. Taem iumi storyim wanem Joseph duim for deal witim olketa hard taem hia, datwan bae helpem iumi for lukim why olketa dadi distaem and iumi evriwan mas followim faith blo Joseph.

4, 5. (a) Hao nao laef blo Joseph hem barava change? (b) Hao nao wanfala angel encouragem Joseph for duim wanfala hard assignment?

⁴ Samfala month go pas since Joseph engage for maritim dota blo Heli lo hom blo hem lo Nazareth, and laef blo hem barava change bihaen datwan. Joseph savve Mary hem wanfala gud gele  wea faithful. Then Mary talem Joseph dat hem babule! Joseph ting for divorcem Mary lo wei wea no eniwan savve, mekem pipol no story nogud abaotem Mary. a Bat lo wanfala dream wanfala angel explainim lo Joseph, holy spirit blo Jehovah nao mekem Mary for babule. Datfala angel sei son wea born bae “sevem pipol bilong hem from sin bilong olketa.” Hem strongim Joseph taem hem sei: “No fraet for tekem waef bilong iu Mary go long haos bilong iu.”—Matt. 1:18-21.

⁵ From Joseph hem raeteous and man wea obey, hem duim samting wea angel talem. Hem redi for duim barava important waka for lukaftarem and teachim wanfala boy wea hem no own pikinini blo hem, bat wea barava spesol lo God. Then for followim law blo king, Joseph mas tekem waef blo hem wea babule for go lo Bethlehem for registerim nem blo tufala. And lo Bethlehem nao datfala pikinini hem born.

6-8. (a) Olketa wanem samting nao happen wea mekem nara change kamap lo laef blo Joseph and famili blo hem? (b) Wanem pruv nao showimaot dat Satan nao sendem datfala “star”? (Lukim tu footnote.)

⁶ Joseph no tekem famili blo hem go bak lo Nazareth. Bat olketa stap lo Bethlehem wea no farawe from Jerusalem. Olketa no garem staka samting, bat Joseph mek sure Mary and Jesus garem wanem tufala needim and for stap sef. Gogo olketa go stap lo wanfala smol haos. Then seknomoa laef blo olketa hem change moa, distaem maet Jesus hem winim wan year nao.

⁷ Samfala man wea studyim star olketa kam, maet from Babylon lo East. Olketa lukaotem nao wanfala pikinini wea bae kamap king blo olketa Jew. Olketa followim wanfala “star” for kam lo haos blo Joseph and Mary. Olketa man hia showimaot respect lo famili blo Joseph.

⁸ Maet olketa man hia no savve, bat samting wea olketa duim hem putim laef blo datfala pikinini Jesus lo danger. Datfala “star” wea olketa followim leadim olketa for go firstaem lo Jerusalem and no lo Bethlehem. b Taem olketa kasem Jerusalem, olketa go talem lo datfala nogud King Herod, olketa lukaotem wanfala pikinini wea bae kamap king blo olketa Jew. Datwan mekem datfala king jealous and barava kros.

9-11. (a) Lo olketa wanem wei nao Herod and Satan no garem paoa? (b) Hao nao datfala gogo for Egypt difren from olketa kastom story?

⁹ Bae iumi lukim hao Jehovah no letem eni nogud plan blo Herod  or Satan for spoelem datfala pikinini. Hao nao hem duim datwan? Tingim, olketa man hia kam lo haos blo Jesus and lukim hem witim mami blo hem, olketa givim olketa present and no askem eniting for changem datwan. Joseph and Mary mas sapraes tumas for garem olketa expensive samting olsem “gold witim tufala paoda wea smel naes.” Plan blo olketa man hia hem for go talem lo King Herod olketa faendem datfala pikinini lo Bethlehem. Bat insaed wanfala dream, Jehovah talem olketa for go bak lo hom blo olketa followim difren road.—Readim Matthew 2:1-12.

¹⁰ Bihaen olketa man hia go, Joseph kasem disfala warning from angel blo Jehovah: “Getap, tekem pikinini hia witim mami bilong hem, and ranawe go long Egypt. Stap long there go kasem taem wea mi talem iu for kam bak, bikos Herod hem lukaotem disfala pikinini for killim hem dae.” (Matt. 2:13) Olsem iumi storyim lo start blo disfala chapter, Joseph kwiktaem for obey. Laef blo Jesus nao barava important winim eni nara samting, so Joseph tekem famili blo hem go lo Egypt. From olketa man wea studyim star givim olketa expensive present lo tufala, famili blo Joseph garem samting for iusim lo gogo blo olketa.

¹¹ Samfala kastom story sei, datfala gogo blo olketa for Egypt hem difren from wanem Bible talem. Olketa story hia sei, Jesus duim samfala mirakol, olsem hem mekem olketa for kasem Egypt kwiktaem, hem stopem olketa man for steal, and hem mekem olketa date palm tree for bend mekem Mary savve pikim frut blo olketa. c For tok stret, datfala gogo blo olketa for Egypt hem no isi.

12. Wanem nao parents wea garem pikinini lo disfala nogud world savve lanem from Joseph?

¹² Olketa dadi and mami savve lanem staka samting from example blo Joseph. Hem willing for leavim waka and lusim olketa material samting for protectim famili taem laef blo olketa stap lo danger. Hem tinghae lo datfala important responsibility wea Jehovah givim lo hem for lukaftarem famili blo hem. Distaem, olketa parents trae for protectim pikinini blo olketa from danger blo disfala world and olketa nogud samting wea savve spoelem olketa young wan. Iumi tinghae lo olketa parents wea disaed strong for duim samting for protectim olketa pikinini, olsem Joseph hem duim!

13, 14. Hao nao gogo Joseph and Mary go bak witim famili blo olketa and stap lo Nazareth?

¹³ Luk olsem famili blo Joseph no stap longtaem lo Egypt bikos datfala angel talem lo Joseph, Herod hem dae nao. So Joseph tekem famili blo hem go bak lo hom blo hem. Wanfala Bible profesi talem dat Jehovah bae “kolem kam bak son bilong [hem] from Egypt.” (Matt. 2:15) Joseph duim samting for mekem datfala profesi kamap tru. Bat wea nao bae hem tekem famili blo hem go stap?

¹⁴ Joseph mas barava careful, bikos Archelaus wea changem Herod, hem wanfala raf and nogud man olsem Herod tu. God talem Joseph for tekem famili blo hem for go bak lo Nazareth lo Galilee, wea hem farawe from Jerusalem and evriwan wea againstim hem. Lo there nao Joseph and Mary stap witim famili blo tufala.—Readim Matthew 2:19-23.

15, 16. Wat kaen waka nao Joseph duim, and olketa wanem tul nao maet hem iusim?

¹⁵ Famili blo Joseph olketa stap gud, bat laef hem no isi. Bible sei Joseph hem wanfala carpenter. Disfala word hem minim man wea iusim timba lo waka blo hem. Hem minim man hia katem and karem timba, draem timba for wakem haos, kanu, olketa smol bridge, trailer, olketa wheel, olketa yoke, and eni kaen tul for waka lo garden. (Matt. 13:55) Diskaen waka hem no isi. Lo bifor, olketa carpenter savve duim waka blo olketa front lo haos or lo wanfala workshop wea stap klosap.

¹⁶ Joseph iusim staka difren kaen tul. Maet samfala tul hia hem from dadi blo hem. Maet hem iusim square, plummet, chalk line, hatchet, saw, adze, hammer, mallet, olketa chisel, drill, difren kaen glue, and maet tu-thri nila, nomata olketa samting hia hem expensive.

17, 18. (a) Wat nao Jesus lanem from dadi blo hem wea adoptim hem? (b) Why nao Joseph mas waka hard go moa lo waka blo hem?

¹⁷ Tingim, Jesus lukluk lo hao dadi wea adoptim hem duim waka. Hem lukluk gud lo evri samting wea Joseph duim. Masbi hem lukim hao Joseph hem strong and savve tumas hao for iusim olketa tul hia. Maet Joseph lanem boy blo hem hao for iusim skin blo  fish wea olketa draem, for smoothim raf timba. Maet hem lanem Jesus lo olketa difren kaen timba wea hem iusim, olsem sycamore fig, oak, or olive.

¹⁸ Jesus lukim wei wea Joseph hem wanfala strong man wea savve katem tree, sawim timba, and hammerim timba for join go lo nara timba. Bat hem lukim tu Joseph hem man wea kaen and tingim hem, mami blo hem, and olketa brata and sista blo hem. Luk olsem Joseph and Mary garem big famili nao, samting olsem sevenfala pikinini. (Matt. 13:55, 56) Joseph mas barava waka hard for lukaftarem olketa.

19. Hao nao Joseph kea for spiritual need blo famili blo hem?

¹⁹ Bat Joseph luksavve important waka wea hem mas duim hem for lukaftarem famili blo hem lo spiritual wei. So hem iusim taem for teachim olketa pikinini blo hem abaotem Jehovah God and olketa law blo Hem. Hem and Mary evritaem tekem olketa pikinini go lo sinagog for herem taem olketa readim and explainim Law. Bihaen datwan, maet Jesus garem staka kwestin wea Joseph traem best blo hem for ansarem. Joseph tekem famili blo hem tu lo olketa festival lo Jerusalem. Maet hem tekem Joseph and famili blo hem tufala week for go lo Pasova lo Jerusalem and kam bak, wea hem samting olsem 120 kilometer.

20. Hao nao olketa Christian famili hed followim example wea Joseph showimaot?

²⁰ Olketa Christian dadi distaem tu mas lukaftarem spiritual need blo famili blo olketa. Olketa savve wei for teachim pikinini lo olketa spiritual samting hem winim eni nara samting olketa savve duim. Olketa waka hard for tekem pikinini lo olketa Christian meeting and olketa assembly. Olsem Joseph, olketa dadi savve best wei for helpem olketa pikinini, hem nao for duim olketa samting hia.

21. Wat nao Joseph and famili blo hem savve duim lo taem blo Pasova, and wat taem nao Joseph and Mary luksavve dat Jesus hem no stap?

²¹ Taem Jesus hem 12 year, Joseph tekem famili go lo Jerusalem olsem hem savve duim evri year. Hem taem blo Pasova and evriwan hapi bikos staka famili wakabaot and story tugeta lo road for go lo Jerusalem. Taem olketa klosap kasem Jerusalem, olketa singim olketa psalm. (Ps. 120-134) Taem olketa kasem Jerusalem, masbi datfala taon fulap lo staka pipol. Bihaen Pasova, olketa famili hia wakabaot go bak lo hom blo olketa, and maet Joseph and Mary tingse Jesus  hem wakabaot witim olketa nara relative blo olketa. Bat bihaen olketa wakabaot for wan full day finis nao, olketa just luksavve Jesus no kam witim olketa.—Luke 2:41-44.

22, 23. Wat nao Joseph and Mary duim taem tufala savve boy blo tufala hem lus, and wat nao Mary talem taem olketa lukim hem?

²² Tufala wari fogud and kwiktaem go bak lo Jerusalem for lukaotem Jesus. Imaginim, tufala wakabaot lo datfala taon and kolem nem blo boy blo tufala. Tufala mas barava laek for savve wea nao boy blo tufala stap. Lo mek-thri day, hao, Joseph start for feel olsem hem no lukaftarem gud datfala spesol son blo Jehovah? Then, tufala go lo temple. Tufala go lo wanfala rum wea olketa bigman wea barava savve gud lo Law olketa sidaon, and Jesus tu hem sidaon  witim olketa. Tingim, Joseph and Mary mas hapi tumas for lukim Jesus!—Luke 2:45, 46.

²³ Jesus lisin gud lo olketa bigman hia and askem staka kwestin lo olketa. Olketa sapraes lo bigfala savve wea boy hia garem and olketa samting wea hem storyim. Joseph and Mary sapraes lo wat Jesus duim. Joseph no talem eni samting, bat Mary nao hem sei: “Pikinini bilong mi, why nao iu duim olsem long mitufala? Mi and dadi bilong iu lukaotem iu long evri ples and mitufala barava wari fogud.”—Luke 2:47, 48.

24. Hao nao Bible storyim waka blo olketa dadi and mami?

²⁴ Disfala short story lo Bible helpem iumi for minim hao waka blo olketa dadi and mami hem no isi. And nomata Jesus hem  wanfala perfect pikinini, hem no isi tu for Joseph and Mary. For garem pikinini lo disfala world wea staka problem stap savve mekem mami and dadi “barava wari fogud.” Bat from olketa dadi and mami savve Jehovah hem luksavve hem no isi for olketa, datwan comfortim olketa.

25, 26. Hao nao Jesus ansarem parents blo hem, and hao nao maet Joseph feel abaotem olketa toktok blo son blo hem?

²⁵ Lo temple nao hem ples wea Jesus feel olsem hem klosap lo Dadi blo hem Jehovah, and wea hem savve lisin and lanem staka samting abaotem Hem. So hem talem stret lo mami and dadi blo hem: “Hao nao iufala lukaotem mi? Iufala shud savve finis, mi mas stap long haos bilong Dadi bilong mi ia!”—Luke 2:49.

²⁶ Joseph waka hard for teachim son blo hem for lovem Jehovah God. Masbi staka taem nao Joseph ting raonem olketa toktok hia wea Jesus talem and datwan mekem hem hapi tumas lo Jesus. From Joseph hem kaen and lovem Jesus, datwan mekem Jesus for fren gud witim Joseph, nomata hem wanfala boy nomoa lo datfala taem.

27. Olsem wanfala dadi, hao nao datwan hem wanfala privilege, and why nao iu shud tingim example blo Joseph?

²⁷ Sapos iu wanfala dadi, iu garem privilege for duim samting for helpem pikinini blo iu luksavve wanfala dadi hem lovem and protectim olketa pikinini blo hem. Sapos iu garem olketa step-pikinini or iu adoptim samfala pikinini, followim example blo Joseph and tingim evri pikinini olketa spesol. Helpem olketa for fren gud witim Dadi blo olketa lo heven, Jehovah God.—Readim  Ephesus 6:4.

28, 29. (a) Wat nao olketa toktok wea stap lo Luke 2:51, 52 talem abaotem Joseph? (b) Wat nao Joseph duim for helpem son blo hem for gohed kasem wisdom?

²⁸ Bible storyim tu-thri nara samting moa abaotem Joseph wea hem gud for iumi ting raonem. Bible sei Jesus “hem gohed for obeyim”  mami and dadi blo hem. Hem sei tu: “Jesus start for big nao and gohed for garem gudfala tingting. God barava hapi long hem and olketa man tu hapi long hem.” (Read Luke 2:51, 52.) Wanem nao iumi savve lanem abaotem Joseph from olketa toktok hia? Iumi lanem Joseph hem gohed lead for lukaftarem famili blo hem, dastawe datfala perfect son blo hem respectim and obeyim hem.

²⁹ Iumi lanem tu, Jesus gohed for garem bigfala wisdom. Iumi sure Joseph nao helpem son blo hem for kamap olsem. Wanfala toktok blo olketa Jew lo datfala taem sei olketa rich pipol nomoa olketa wise, bat olketa carpenter, farmer, man wea wakem samting from metal, olketa no savve wanem hem stret and wanem hem no stret and olketa no fit for judgem nara pipol. Taem Jesus big finis hem showimaot datfala toktok blo olketa Jew hem no tru. Taem hem smol boy, hem evritaem herem dadi blo hem wea hem wanfala carpenter nomoa, teachim hem lo olketa samting wea Jehovah sei hem stret and no stret.

30. Hao nao Joseph showimaot example for olketa famili hed distaem?

³⁰ Iumi savve lukim tu wei wea Joseph lukaftarem gud Jesus for hem healthy, and strong. And Joseph trainim son blo hem tu for duim gud waka blo hem. Jesus hem no just son blo carpenter nomoa bat olketa kolem hem “datfala carpenter” tu. (Mark 6:3) So datfala training wea Jesus kasem from Joseph barava helpem hem. Hem gud for olketa dadi followim example blo Joseph taem olketa lukaftarem pikinini blo olketa for stap healthy, and for trainim olketa for duim waka.

31. (a) Wanem pruv nao showimaot taem wea Joseph hem dae? (Lukim tu  box.) (b) Wanem example nao Joseph showim for iumi followim distaem?

³¹ Taem Jesus hem kasem 30 year and hem baptaes, Bible no storyim nao Joseph. Luk olsem Joseph hem dae finis taem Jesus start for duim ministry blo hem. (Lukim box “ Wanem Taem Nao Joseph Hem Dae?”) Bat Joseph hem showimaot nambawan example olsem wanfala dadi wea protectim famili blo hem, provaedem need blo olketa, and wea no givap go kasem taem hem dae. So olketa dadi, eni famili hed, and iumi evriwan savve followim faith blo Joseph.