1, 2. Storyim gogo blo Mary, and explainim why datwan hem no isi for hem.

 IMAGINIM Mary wea babule hem stragol for sidaon antap lo wanfala smol donkey. Hem raed for staka hour finis. Joseph hem leadim datfala donkey and isisi wakabaot go firstaem, tufala followim longfala road for go lo Bethlehem. Mary feelim datfala baby gohed muv insaed lo bele blo hem.

² Bible storyim hao hem klosap kasem nao taem for Mary bornem baby. (Luke 2:5) Taem datfala couple go pas lo olketa field, maet samfala farmer stop for waka and luk strong lo tufala, and maet olketa ting, why nao wanfala woman wea babule olsem hem travel farawe. Why nao Mary travel farawe from hom blo hem lo Nazareth?

 3. Wat assignment nao Mary kasem, and wat nao bae iumi lanem abaotem hem?

³ Disfala young woman wea Jew, hem kasem wanfala spesol assignment wea winim eni assignment wea eniwan lo earth kasem. Hem bae bornem wanfala pikinini wea bae kamap datfala Messiah, Son blo God! (Luke 1:35) Hem klosap kasem taem nao for hem bornem baby, bat situation kamap wea mekem tufala mas travel. So, Mary feisim samfala challenge wea bae testim faith blo hem. Bae iumi lukim wat nao helpem hem for gohed strong lo spiritual wei.

4, 5. (a) Why nao Joseph and Mary go lo Bethlehem? (b) Hao nao law wea Caesar givim fulfillim wanfala profesi?

⁴ Hem no Joseph and Mary nomoa travel lo datfala taem. Caesar Augustus hem givim wanfala law for duim wanfala registration lo full kantri, and pipol mas go bak lo hom taon blo olketa for register. Wat nao Joseph duim? Bible sei: “Joseph tu hem lusim Nazareth, wea hem wanfala taon long Galilee, and hem go long Bethlehem long Judea. Bethlehem hem taon wea David hem born, and Joseph hem go long there bikos hem kam from laen bilong David.”—Luke 2:1-4.

 ⁵ Datfala law wea Caesar givim hem no happen nating. Hem fulfillim profesi wea olketa raetem seven handred years bifor abaotem datfala Messiah wea bae born lo Bethlehem. Wanfala taon wea nem blo hem Bethlehem tu stap eleven kilometer from Nazareth. Bat profesi talem klia hao “Bethlehem Ephrathah” nao ples wea Messiah bae born. (Readim Micah 5:2.) For kasem datfala smol vilij from Nazareth, olketa mas travel for samting olsem 130 kilometer lo staka hill and go thru lo Samaria. Datfala Bethlehem nao Joseph mas go kasem for register, bikos hem nao hom blo King David wea hem laen wea Joseph and Mary kam from.

6, 7. (a) Why nao hem wanfala challenge for travel go lo Bethlehem? (b) Taem Mary kamap waef blo Joseph, hao nao datwan affectim disison blo hem? (Lukim tu footnote.)

⁶ Waswe, Mary sapotim disison blo Joseph for go? Datfala trip bae no isi for hem. Luk olsem hem lo start blo autumn lo datfala year, so samfala taem hem maet rain bikos hem gogo for end blo drae season. Lo original languis hem sei olketa “go ap from Galilee,” and datwan hem fitim bikos Bethlehem hem stap winim 2,500 feet hae. Datwan minim tufala mas klae go ap hae bihaen tufala bin travel kam finis for samfala day. Bikos lo situation blo Mary, maet tufala mas rest staka taem lo road and datwan mekem tufala travel for longfala taem. Lo taem olsem, wanfala young woman bae laek for stap klosap lo hom blo hem, bikos famili and frens blo hem stap for  helpem hem taem hem redi for bornem baby. Datwan barava showimaot Mary hem brave for travel lo datfala taem.

⁷ Nomata hem farawe, Luke sei Joseph hem go tu witim Mary mekem tufala savve register lo gavman. Hem talem tu hao “Joseph hem tekem Mary witim hem wea tufala marit finis.” (Luke 2:4, 5) Taem Mary kamap waef blo Joseph, datwan affectim disison blo hem. Hem ting lo Joseph olsem spiritual hed blo hem and duim waka wea God givim lo hem, olsem wanfala helper lo wei for sapotim olketa disison blo Joseph. a So datwan kamap challenge for faith blo Mary lo wei for obeyim Joseph.

 8. (a) Wat nao nara samting wea maet muvim Mary for go lo Bethlehem witim Joseph? (b) Hao nao Mary hem nambawan example for olketa wea faithful distaem?

⁸ Wat nao nara samting wea maet muvim Mary for obey? Waswe, hem savve lo profesi wea sei dat Messiah bae born lo Bethlehem? Bible no talem. Luk olsem, hem information wea evriwan savve abaotem nomata olketa religious leader tu. (Matt. 2:1-7; John 7:40-42) Iumi savve dat Mary hem wanfala gele wea savve gud lo olketa scripture. (Luke 1:46-55) Maet Mary disaed for travel bikos hem  obeyim hasband blo hem, law blo kantri, or bikos lo profesi blo Jehovah. Nomata wat nao reason blo hem, Mary showimaot nambawan example. Jehovah tinghae lo olketa man and woman wea hambol and garem wei for obey. Lo taem blo iumi, wei for obey hem samting wea pipol ting daonem. So Mary hem nambawan example for olketa faithful wan distaem.

9, 10. (a) Wat nao maet Mary and Joseph tingim taem olketa klosap kasem Bethlehem? (b) Why nao Joseph and Mary stap lo ples for keepim olketa animal?

⁹ Masbi Mary mas hapi taem hem lukim dat tufala klosap kasem Bethlehem. Taem tufala wakabaot go ap lo olketa hill, go pas lo olketa olive tree wea olketa klosap finis for harvestim, maet Mary and Joseph ting abaotem history blo datfala smol vilij. Olsem profet Micah talem, Bethlehem hem wanfala taon wea smol tumas lo olketa nara taon lo Judah. Nomata olsem, winim wan thousand year bifor, hem nao ples wea Boaz, Naomi, and David born.

¹⁰ Taem Mary and Joseph kasem datfala vilij, hem full finis lo pipol. Staka narawan arrive finis for register tu, so no eni spes for tufala stap lo olketa resthaos. b So tufala mas spendem datfala naet lo stable wea hem ples for keepim olketa animal. Imaginim hao Joseph mas wari tumas taem hem lukim waef blo hem start for feelim sharp pain wea no bin kasem hem bifor, and datfala pain hem start for kamap moa big. Mary kasem nao taem for hem bornem baby, bat tufala stap nomoa lo ples for keepim olketa animal.

11. (a) Why nao evri woman savve minim feeling blo Mary? (b) Lo olketa wanem wei nao Jesus hem “firstborn”?

¹¹ Evri woman savve minim feeling blo Mary. Winim 4,000 years finis, Jehovah talem finis hao bikos lo sin, hem bae normal samting nomoa for wanfala woman kasem pain taem hem bornem pikinini. (Gen. 3:16) No eni pruv hem showimaot hao Mary hem no kasem datfala pain. Bible no storyim staka detail abaotem taem wea datfala baby born, bat Luke hem sei: “[Mary] bornem firstborn son bilong hem.” (Luke 2:7) Yes, datwan hem firstborn blo Mary. Bihaen, hem garem staka pikinini moa, samting olsem sevenfala. (Mark 6:3) Bat datfala baby hem spesol. Hem no just firstborn blo Mary, bat hem ‘firstborn blo evri creation,’ datfala son wea God seleva nao wakem!—Col. 1:15.

12. Wea nao Mary putim baby hia for leidaon, and hao nao datfala real situation hem difren from wat pipol tingim taem olketa actim and drawim datfala story?

¹² Lo disfala part blo story, iumi savve lukim wanfala information  wea staka pipol savve gud lo hem, hem nao wei wea Mary pasolem datfala baby lo kaleko and mekem hem leidaon lo manger. (Luke 2:7) Pipol raonem world savve actim and drawim piksa blo datfala story and mekem hem barava luk naes. Bat tingim real situation. Wanfala manger hem wanfala tray wea olketa animal savve kaikai insaed. Remember, olketa stap insaed datfala stable, wea environment and air hem no klin. Really, hu nao bae laekem pikinini blo hem for born lo kaen ples olsem? Staka parents bae laekem best samting for pikinini blo olketa. For sure Joseph and Mary bae laek for provaedem best samting for Son blo God!

13. (a) Lo wanem wei nao Mary and Joseph duim best blo tufala nomata situation blo olketa no isi? (b) Hao nao olketa wise parents distaem savve followim example blo Joseph and Mary lo wei for luksavve wat nao important?

¹³ Nomata wat nao happen, tufala no letem situation blo tufala for affectim wei wea tufala duim best blo tufala. Tingim diswan, Mary hem mas lukaftarem seleva datfala baby, pasolem gud witim olketa kaleko, and mekem hem leidaon lo manger for sleep. Hem mas mek sure hem warm and sef. Mary no letem wei for wari abaotem situation blo hem for stopem hem for duim best blo hem for lukaftarem baby blo hem. Hem and Joseph luksavve dat wei for lukaftarem spiritual saed blo disfala pikinini nao hem barava important responsibility winim eni nara samting. (Readim Deuteronomy 6:6-8.) Distaem tu, olketa wise parents savve followim example blo tufala for mek sure spiritual saed blo olketa pikinini nao important, bikos iumi stap lo world wea nogud tumas.

14, 15. (a) Why nao olketa shepherd laekem tumas for lukim datfala baby? (b) Wat nao olketa shepherd duim bihaen olketa lukim baby hia lo stable?

¹⁴ Seknomoa, wanfala grup arrive. Olketa shepherd hariap kam insaed stable, olketa laekem tumas for lukim datfala famili, especially datfala baby. Olketa man hia barava hapi tumas. Olketa bin hariap kam daon from olketa hill wea olketa sheepsheep blo olketa stap. c Mary and Joseph sapraes tumas for herem spesol samting wea olketa shepherd experiencem. Olketa storyim hao taem olketa sidaon lo hill lo naet, seke nomoa wanfala angel appear kam lo olketa. Glory blo Jehovah hem shaen evriwea and datfala angel talem olketa hao datfala Christ, or Messiah, hem just born lo Bethlehem. Hem sei, olketa bae faendem datfala pikinini wea olketa pasolem  witim olketa kaleko, insaed lo wanfala manger. Then, nara barava spesol samting happen. Staka angel nao appear and praisem God!—Luke 2:8-14.

¹⁵ Dastawe olketa hambol shepherd hia hariap for kam lo Bethlehem! Olketa mas barava hapi tumas for lukim datfala baby leidaon lo barava ples wea angel hem talem. Olketa no hol bak for talemaot datfala gud nius. Bible sei: “Olketa storyim samting wea angel talem . . . Evriwan wea herem samting wea olketa man hia talem barava sapraes tumas.” (Luke 2:17, 18) Olketa religious leader lo datfala taem ting daonem olketa shepherd. Bat hem klia, Jehovah tinghae lo olketa hambol faithful man hia. Bat hao nao disfala visit affectim Mary?

16. Hao nao samting wea Mary duim showimaot hem wise, and wat nao datwan showimaot abaotem faith blo hem?

¹⁶ Mary mas taed tumas bihaen hem bornem pikinini, nomata olsem, hem barava lisin taem olketa story. And hem no just lisin nomoa, “bat Mary hem no forgetim olketa toktok hia, and hem ting raonem wanem nao olketa samting hia minim.” (Luke 2:19) Tru nao, Mary hem woman for ting raonem samting. Hem savve disfala message wea kam from angel hem important. God blo hem, Jehovah, laekem hem for savve and for tinghae lo datfala son blo hem and why hem important. So Mary no just lisin, bat hem keepim evri toktok hia lo heart blo hem mekem hem savve ting raonem lo olketa month and years wea bae kam. Datwan hem main samting wea Mary duim lo full laef blo hem for gohed garem strong faith.—Readim Hebrew 11:1.

17. Hao nao iumi savve followim example blo Mary saed lo olketa spiritual truth insaed Bible?

¹⁷ Hao nao iumi savve followim example blo Mary? Jehovah putim olketa important spiritual truth insaed lo Bible. Nomata olsem, bae iumi kasem gud samting only sapos iumi barava lisin gud lo olketa truth hia. Iumi duim datwan taem iumi readim Bible evritaem and no ting lo datwan olsem eni buk nomoa bat hem buk wea kam from God. (2 Tim. 3:16) Then, olsem Mary, iumi need for keepim olketa spiritual truth hia lo heart blo iumi and ting raonem. Taem iumi ting raonem wat iumi readim lo Bible, trae for barava followim gud olketa kaonsel wea kam from Jehovah, datwan bae strongim faith blo iumi and mekem faith blo iumi for grow.   

18. (a) Hao nao Mary and Joseph obeyim Law blo Moses taem Jesus smol? (b) Offering wea Joseph and Mary givim lo temple hem showimaot wanem samting abaotem situation blo tufala saed lo selen?

¹⁸ Eitfala day bihaen baby hia born, Mary and Joseph obeyim Law blo Moses and tekem Jesus go for circumcise and for followim instruction wea tufala kasem, tufala nemim hem Jesus. (Luke 1:31) Then, lo mek-40 day, olketa tekem hem from Bethlehem and go lo temple lo Jerusalem, wea hem samting olsem ten kilometer farawe. And lo there olketa sakrifaesim offering for kamap klin. Law allowim olketa wea poor for offerim tufala turtledove or tufala pigeon. Maet tufala feel shame bikos tufala no fit for peim wanfala ram and turtledove for offerim olsem olketa nara parents. Nomata olsem, tufala duim wanem tufala fit for duim. Bat taem tufala lo there, tufala kasem nambawan encouragement.—Luke 2:21-24.

19. (a) Wat nao Simeon talem wea Mary no forgetim? (b) Wat nao Anna duim taem hem lukim Jesus?

¹⁹ Wanfala old man wea nem blo hem Simeon kam lo olketa and talem toktok wea Mary no forgetim. Jehovah promisim lo Simeon hao hem bae lukim Messiah bifor hem dae, and holy spirit showim lo hem dat Jesus nao datfala Savior. Simeon warnim Mary hao wanday bae hem feelim barava bigfala pain and sorre olsem hao wanfala sword kat go deep insaed lo hem. (Luke 2:25-35) Nomata datwan hem olketa sorre toktok, hem helpem Mary for deal witim samting wea bae happen  thirti years bihaen. Bihaen Simeon story, wanfala woman profet wea nem blo hem Anna hem lukim Jesus and start for story abaotem Jesus lo evriwan wea hope for Jehovah sevem Jerusalem.—Readim Luke 2:36-38.

20. Why nao wei wea olketa tekem kam Jesus lo Jerusalem hem wanfala gud disison?

²⁰ Wei wea Joseph and Mary tekem kam baby blo olketa lo temple blo Jehovah lo Jerusalem hem wanfala gud disison! Diswan hem start blo wei wea son blo tufala faithful for go lo temple blo Jehovah. Taem olketa lo temple, olketa givim best blo olketa and kasem olketa instruction and encouragement. For sure, taem Mary lusim temple lo datfala day, faith blo hem strong go moa and heart blo hem fulap witim olketa spiritual toktok wea hem bae ting raonem and sharem witim olketa narawan.

21. Hao nao iumi savve mek sure faith blo iumi bae gohed for strong olsem wanem Mary duim?

²¹ Hem barava naes for lukim olketa parents distaem followim datfala example. Olketa parents wea Jehovah’s Witness olketa faithful for tekem olketa pikinini go lo olketa Christian meeting. Olketa parents olsem duim best blo olketa and talem olketa toktok wea encouragem olketa nara brata and sista. Bihaen olketa meeting, olketa feel strong, hapi, and garem staka gud samting for sharem witim olketa narawan. Iumi hapi tumas for hipap witim olketa. Taem iumi duim datwan, bae iumi lukim hao faith blo iumi kamap moa strong olsem Mary.