1, 2. Wat nao happen lo disfala barava important day lo laef blo Elijah?

 ELIJAH ran insaed lo rain and hem gogo for dark. Hem mas ran for long distance bifor hem kasem Jezreel, and hem olo man tu. Nomata olsem, hem ran and hem no taed, bikos “paoa blo Jehovah” stap lo hem. Datfala energy wea hem kasem lo datfala taem hem winim enitaem lo laef blo hem. Hem even ran fast winim olketa horse wea pullim chariot blo King Ahab!—Readim 1 Kings 18:46.

² Hem ran followim datfala big road. Imaginim taem Elijah ran and rain drop lo feis blo hem. Masbi hem tingim bak evri samting wea happen lo datfala barava important day. Hem wanfala day wea barava mekhae lo God blo Elijah, Jehovah, and tru worship. Elijah ran insaed datfala big wind and rain and Maunt Carmel hem farawe nao, ples wea Jehovah iusim Elijah for duim mirakol and barava daonem worship blo Baal. Pipol lukim klia hao staka handred profet blo Baal olketa laea nomoa and from datwan olketa killim olketa dae. Then Elijah prea lo Jehovah for mekem rain foldaon lo datfala land wea drae for thri and haf years. And then datfala rain hem kam!—1 Ki. 18:18-45.

3, 4. (a) Why nao maet Elijah garem hae hope taem hem go for Jezreel? (b) Wat nao olketa kwestin wea iumi bae story raonem?

³ Taem Elijah ran lo rain for 30 kilometer go lo Jezreel, maet hem garem hae hope for evriting kamap gud. Maet hem ting situation blo olketa lo Israel hem change. Maet Ahab bae change tu! From Ahab lukim samting wea happen, masbi bae hem luksavve hem shud lusim wei for worshipim Baal and stopem nogud wei blo waef blo hem Queen Jezebel; and for hem stopem tu persecution againstim olketa servant blo Jehovah.

⁴ Taem situation wea iumi feisim hem followim wat iumi laekem, staka taem iumi savve garem hae hope for evriting kamap gud. Maet iumi ting evriting bae gohed for impruv, and maet iumi ting olketa hard situation iumi feisim hem finis nao. If hem nao wat Elijah tingim, hem fitim bikos hem “garem sem feeling olsem iumi” nomoa. (Jas. 5:17, ftn.) Bat really, situation blo Elijah hem nating impruv. Bikos insaed short taem nomoa, feeling blo Elijah  hem change, and hem fraet tumas, and discourage gogo hem laek for dae nomoa. Wat nao mekem datwan for happen, and hao nao Jehovah helpem profet blo hem for strongim bak faith blo hem and no fraet? Bae iumi storyim.

 5. Bihaen evriting happen lo Maunt Carmel, waswe Ahab lane for respectim Jehovah tu, and hao nao iumi savve lo datwan?

⁵ Taem Ahab kasem palace blo hem lo Jezreel, waswe, eni pruv showimaot wei blo hem change tu? Bible hem sei: “Ahab storyim lo Jezebel evri samting wea Elijah duim, and hao hem killim dae evri profet lo sword.” (1 Ki. 19:1) Lukim hao taem Ahab talem datfala story, hem nating talem eni samting abaotem Jehovah, God blo Elijah. Ahab hem man wea tingim nomoa olketa physical samting, so nomata hem lukim olketa mirakol wea happen hem still ting lo datwan olsem samting wea “Elijah duim.” Hem klia dat hem nating lane for respectim Jehovah God. So wat nao nogud waef blo hem duim taem hem herem datwan?

 6. Wanem message nao Jezebel sendem lo Elijah, and wat nao datwan minim?

⁶ Jezebel kros tumas! From hem barava kros, hem sendem disfala message lo Elijah: “Letem olketa god panisim or killim mi dae sapos lo semtaem olsem tumoro, mi no killim iu dae olsem iu bin duim lo each wan lo olketa profet hia!” (1 Ki. 19:2) Hem barava threatenim Elijah nao. Really, hem olsem Jezebel hem sei if hem no killim dae Elijah bifor next day for changem bak dae blo olketa profet blo Baal, then hemseleva nao mas dae. Imaginim feeling blo Elijah taem olketa wekapem hem from sleep, lo wanfala smol haos lo Jezreel lo datfala naet wea hevi rain and big wind, and hem herem olketa talem hem toktok blo datfala queen. Wat nao bae hem duim?

 7. Hao nao samting Jezebel talem affectim Elijah, and wat nao hem duim?

⁷ Sapos Elijah tingse datfala wei for worshipim Baal bae klosap for finis nao, masbi hem barava lus hope nao lo datfala taem. Jezebel hem barava no change. Jezebel killim finis staka lo olketa faithful profet lo taem blo Elijah, and luk olsem hem nao next wan. Hao nao samting wea Jezebel talem affectim Elijah? Bible hem sei: “Hem fraet fogud.” Maet Elijah piksarem lo mind blo hem hao Jezebel bae killim hem. If hem gohed tingim olketa samting olsem, datwan bae mekem hem fraet tumas. Iumi no savve bat samting wea iumi savve nao, Elijah “hem ranawe nao for sevem laef blo hem.”—1 Ki. 18:4; 19:3.

 8. (a) Hao nao Peter hem semsem witim Elijah? (b) Wat nao iumi savve lanem from Elijah and Peter?

⁸ Hem no only Elijah nomoa faithful man wea fraet affectim hem.  Staka year bihaen, aposol Peter tu kasem sem samting. For example, taem Jesus mekem Peter for wakabaot witim hem antap lo wata, Peter gohed lukluk lo “strongfala wind.” Then hem feel fraet and hem start for sink daon. (Readim Matthew 14:30.) Example blo Elijah and Peter teachim iumi important leson. If iumi laek for brave and no fraet, iumi mas no letem mind blo iumi for gohed ting abaotem olketa danger wea mekem iumi fraet. Iumi need for focus lo Man wea iumi hope lo hem and wea bae strongim iumi.

 9. Describem gogo blo Elijah and tingting blo hem taem hem ranawe.

⁹ From Elijah fraet tumas, hem ranawe go lo direction lo southwest for samting olsem 150 kilometer go lo Beer-sheba, wea hem wanfala taon wea stap lo southern border blo Judah. Hem lusim wakaman blo hem lo there and hem go seleva lo wilderness. Bible sei hem wakabaot for “wanfala full day,” so iumi savve imaginim maet hem start wakabaot taem sun kamap lo early morning, and luk olsem hem no tekem eni kaikai witim hem tu. Hem feel depress, and barava fraet, and hem mas wakabaot lo hot sun and go thru lo datfala ples wea garem staka rock and wea bushes fogud. Gogo taem sun hem start for go daon, Elijah hem barava taed nao. From hem no strong nao, hem go sidaon andanit wanfala broom tree, wea hem nomoa only ples for shelter lo datfala emti wilderness.—1 Ki. 19:4.

10, 11. (a) Wat nao Elijah minim taem hem prea lo Jehovah? (b) Iusim olketa scripture for describem feeling blo olketa wea faithful lo God bat wea gogo olketa discourage.

¹⁰ Elijah barava prea and talemaot feeling blo hem. Hem ask for dae nomoa. Hem sei: “Mi semsem nomoa olsem olketa grandadi blo mi.” Hem savve olketa grani blo hem olketa bon and dust nating insaed grev, and olketa hard for duim eni samting for helpem eniwan. (Eccl. 9:10) Elijah hem feel olsem hem iusles. Dastawe hem singaot olsem: “Hem tumas nao!” Man gohed laef for wat nomoa ia?

¹¹ Hao, iumi sapraes for herem dat wanfala man wea faithful savve feel discourage olsem? Nomoa. Staka faithful man and woman lo Bible talemaot sorre blo olketa and sei olketa laek for dae nomoa, samfala lo olketa nao hem Rebekah, Jacob, Moses, and Job.—Gen. 25:22; 37:35; Num. 11:13-15; Job 14:13.

12. If enitaem iu feel discourage, hao nao iu savve followim example blo Elijah?

¹² Distaem iumi stap lo olketa last day wea “evri samting hem hard tumas,” so iumi no sapraes hao staka pipol, even olketa faithful  servant blo God, savve barava discourage samfala taem. (2 Tim. 3:1) If enitaem iu go thru lo situation olsem, followim example blo Elijah: Pourimaot feeling blo iu lo God. Remember, Jehovah hem “God wea givim iumi comfort wea iumi needim.” (Readim 2 Corinth 1:3, 4.) Hao, hem comfortim Elijah tu?

13, 14. (a) Hao nao Jehovah iusim wanfala angel for showimaot hem kea for profet blo hem? (b) Why nao iumi kasem comfort taem iumi savve Jehovah savve gud lo each wan lo iumi and hem luksavve lo limit blo iumi?

¹³ Hao nao feeling blo Jehovah taem hem luk kam daon from heven and lukim profet blo hem wea hem lovem hem leidaon andanit wanfala tree lo wilderness and sei hem laek dae nomoa? Iumi savve lukim datwan lo wat hem duim. Bihaen Elijah sleep, Jehovah sendem wanfala angel go lo hem and datfala angel tasim hem and wekapem hem and sei: “Iu getap and kaikai.” Taem Elijah getap, datfala angel putim wanfala simpol kaikai for hem lo there, wea hem fresh warm bred witim wata. Hao, hem sei thankiu lo datfala angel tu? Only samting wea Bible talem nao, profet hia kaikai and drink and sleep bak moa. Waswe, sorre feeling blo hem nao mekem hem no laek story? Iumi no savve, bat datfala angel wekapem hem mek-tu taem, maet lo morning nao. And hem sei moa lo Elijah, “Iu getap and kaikai, bikos iu needim strong for disfala longfala gogo blo iu.”—1 Ki. 19:5-7.

¹⁴ Jehovah talem finis datfala angel wea nao Elijah bae go, dastawe angel hia hem savve. Hem savve tu dat Elijah bae no strong fitim datfala gogo. Iumi barava kasem comfort bikos iumi savve God wea iumi servem, hem savve tumas lo olketa goal and limit blo iumi winim iumi! (Readim Psalm 103:13, 14.) Hao nao datfala kaikai helpem Elijah?

15, 16. (a) Kaikai wea Jehovah provaedem for Elijah hem strongim hem for duim wanem? (b) Why nao iumi shud tinghae lo wei wea Jehovah strongim iumi distaem?

¹⁵ Bible sei: “Hem getap and kaikai, and datfala kaikai strongim hem for wakabaot for 40 day and 40 naet go kasem taem hem kasem Horeb, maunten blo tru God.” (1 Ki. 19:8) Elijah hem no kaikai for 40 day and 40 naet olsem Moses duim samting olsem six handred year bifor, and olsem Jesus duim klosap 1,000 year bihaen. (Ex. 34:28; Luke 4:1, 2) Datfala kaikai wea Jehovah provaedem for Elijah hem no finisim olketa problem blo hem, bat hem wanfala mirakol wea givim hem strong wea hem needim. Imaginim, datfala old man gohed for wakabaot for staka day and week for klosap wan and haf month, lo wilderness wea no garem eni road!

¹⁶ Jehovah strongim tu olketa servant blo hem distaem, no witim  mirakol wea hem provaedem physical kaikai, bat lo nara barava important wei. Hem provaedem spiritual need blo olketa servant blo hem. (Matt. 4:4) Taem iumi lane abaotem God lo Bible and olketa Bible pablikeson datwan bae strongim iumi. Olketa spiritual kaikai olsem maet no finisim olketa problem blo iumi, bat hem savve helpem iumi for no givap nomata situation wea iumi deal witim hem hard tumas. And tu, hem bae lead go for “laef olowe.”—John 17:3.

17. Wea nao Elijah go, and why nao hem wanfala important ples?

¹⁷ Elijah wakabaot for samting olsem 320 kilometer go kasem Maunt Horeb. Maunt Horeb hem wanfala important ples lo history blo pipol blo God, bikos lo there nao Jehovah God tok kam thru lo wanfala angel lo Moses lo datfala thornbush and bihaen, Jehovah mekem datfala Law covenant witim Israel lo there. Elijah hem go shelter insaed wanfala cave.

18, 19. (a) Wat nao kwestin wea angel blo Jehovah askem, and wat nao ansa blo Elijah? (b) Wat nao thrifala reason why Elijah hem discourage?

¹⁸ Lo Horeb, taem Jehovah story kam lo hem, luk olsem hem iusim wanfala angel. Hem askem disfala simpol kwestin: “Elijah, why nao iu kam lo hia?” Luk olsem datfala angel story lo hem lo kaenfala wei, datwan mekem Elijah for talemaot feeling blo hem from heart. Hem sei: “Mi bin strong for worshipim Jehovah, God wea hem komanda blo olketa army. Pipol lo Israel no keepim agreement blo iu, olketa altar blo iu olketa brekem, and olketa profet blo iu olketa killim dae lo sword, and mi nomoa mi stap laef. Distaem olketa lukaotem mi for tekem aot laef blo mi.” (1 Ki. 19:9, 10) Toktok blo Elijah showimaot thrifala reason why hem discourage.

¹⁹ First samting, Elijah feel olsem waka blo hem iusles nomoa. Nomata hem bin “strong” for servem Jehovah for staka year, hem evritaem putim worship and nem blo Jehovah olsem first samting lo laef blo hem, Elijah lukim situation lo datfala taem hem gohed for kamap worse. Olketa pipol still no garem faith and olketa bighed, and staka gohed nomoa lo false worship. Second samting, Elijah feel olsem hemseleva nomoa gohed servem Jehovah. Hem sei, “Mi nomoa mi stap.” Hem feel olsem hem nomoa last man lo full nation wea still gohed for servem Jehovah. Third, Elijah hem fraet. Staka nara profet blo Jehovah, olketa killim dae finis, and Elijah tingse bae hem nao next wan for dae. Hem maet no isi for Elijah talem hao hem feel, bat hem no letem wei for praod or shame for stopem hem for duim datwan. Wei wea hem talemaot heart blo hem lo God taem hem prea, hem gudfala example for evri faithful pipol.—Ps. 62:8.

20, 21. (a) Describem wat Elijah lukim taem hem standap front lo cave lo Maunt Horeb. (b) Taem Jehovah showimaot paoa blo hem, hao nao datwan teachim Elijah?

 ²⁰ Wat nao Jehovah duim for helpem Elijah deal witim wei wea hem fraet and wari? Angel talem Elijah for standap front lo datfala cave. Hem obey, bat hem no savve wat nao bae happen. Wanfala maeti wind hem start! Masbi saond blo datfala wind hem laod tumas, hem brekem olketa maunten and olketa big rock. Imaginim Elijah hem standap and wind blowim kaleko blo hem wea olketa wakem from hair blo animal and hem trae for protectim feis blo hem from datfala strong wind. Masbi hem stragol for standap bikos graon hem start for seksek bikos lo wanfala big earthquake. Seke nomoa, wanfala big fire hem kam pas and hem mas muv bak insaed lo cave for protectim hemseleva from hot blo datfala fire.—1 Ki. 19:11, 12.

²¹ Lo each samting wea happen, Bible sei, Jehovah hem no insaed thrifala samting hia wea showimaot paoa blo nature. Elijah savve Jehovah hem no laea god olsem Baal, wea pipol sei hem god blo nature, wea olketa bilivim dat hem “man for raed antap lo olketa cloud,” or man wea mekem hem for rain. Really, Jehovah nao Man wea givim paoa lo evri samting lo nature and paoa blo hem winim eni samting wea hem creatim. Nomata physical heven tu hard for hem stap insaed! (1 Ki. 8:27) Hao nao diswan helpem Elijah? Tingim hao hem fraet tumas. From Jehovah nao sapotim hem, no eniwan savve winim paoa wea Jehovah garem. So Elijah no need for fraetem Ahab and Jezebel!—Readim Psalm 118:6.

22. (a) Hao nao datfala “voice wea tok kwaet” hem encouragem Elijah? (b) Datfala “voice wea tok kwaet” maet hem voice blo hu? (Lukim footnote.)

²² Bihaen datfala fire go pas, evriting hem kwaet and Elijah herem wanfala “voice wea tok kwaet.” Datfala voice invaetem Elijah for story moa, and so Elijah pourimaot evri wari blo hem mek-tu taem moa. a For sure datwan helpem hem for katem daon olketa wari blo hem. Masbi, hem kasem moa comfort from nara samting wea datfala voice hem talem. Jehovah helpem Elijah for luksavve dat hem no iusles. Lo wanem wei? Jehovah God showimaot lo hem wat nao hem bae duim lo future for  finisim Baal worship lo Israel. Elijah lukim klia hao waka wea hem duim hem no iusles, bat bae hem gohed followim plan blo God. And tu, Elijah luksavve hem still garem waka for duim, bikos Jehovah sendem hem go bak for duim samfala samting moa.—1 Ki. 19:12-17.

23. Wat nao tufala wei wea Jehovah helpem Elijah deal witim feeling for lonely?

²³ Wat nao Jehovah duim for helpem Elijah deal witim feeling for lonely? Hem duim tufala samting. First samting, hem talem Elijah for anointim Elisha for kamap profet bihaen hem. Datfala young man bae kamap fren and helper blo Elijah for samfala year. Datwan hem nambawan wei for helpem Elijah! Second samting, Jehovah talem disfala hapi nius: “Mi garem yet 7,000 man lo Israel wea nating baodaon for worshipim Baal and wea no kissim hem.” (1 Ki. 19:18) Datwan showimaot Elijah no stap seleva. Hem mas barava hapi for herem staka thousand faithful pipol les for worshipim Baal. Olketa needim Elijah for gohed duim faithful service blo hem and for gohed showimaot nambawan example for loyal lo Jehovah lo olketa hard taem. Elijah mas barava kasem encouragement taem hem herem olketa samting hia from datfala messenger blo Jehovah wea story kam lo datfala “voice wea tok kwaet.”

24, 25. (a) Distaem, hao nao iumi savve lisin lo voice from Jehovah wea “tok kwaet” kam lo iumi? (b) Why nao iumi sure Elijah acceptim comfort wea Jehovah givim hem?

²⁴ Olsem Elijah, iumi tu maet barava tinghae lo paoa blo nature wea showaot lo creation. Creation barava showimaot bigfala paoa blo Creator. (Rome 1:20) Kam kasem distaem, Jehovah still laek for iusim bigfala paoa blo hem for helpem olketa faithful servant blo hem. (2 Chron. 16:9) Bat nara samting wea God iusim staka taem for story lo iumi nao hem Word blo hem Bible. (Readim Isaiah 30:21.) So Bible hem olsem nao datfala “voice wea tok kwaet” wea savve helpem iumi distaem. Lo Bible, Jehovah stretem iumi, encouragem iumi, and showimaot hao hem lovem iumi.

²⁵ Waswe, Elijah acceptim comfort wea Jehovah givim hem lo Maunt Horeb? Barava nao! Hem kwiktaem strong for duim bak waka blo hem and defendim pure worship blo Jehovah and againstim false worship. Sapos iumi duim sem samting for lisin lo toktok blo God, bae iumi kasem comfort from olketa Scripture, and datwan bae helpem iumi for garem sem faith olsem Elijah.—Rome 15:4.