1, 2. Wat nao wanfala samting wea Elijah mas duim wea hem no laekem, and hao nao hem and Ahab tufala barava difren?

 ELIJAH barava laek for story witim Dadi blo hem wea stap lo heven. Bat staka pipol stap raonem hem and olketa just lukim hao hem talem fire for kam from heven, and maet staka lo olketa gohed praisem hem mekem hem savve blessim olketa. Bifor Elijah savve go ap lo Maunt Carmel for story lo Jehovah God lo prea, hem mas duim wanfala samting wea hem no laekem. Hem mas story lo King Ahab.

² Wei blo tufala man hia barava difren. Ahab hem werem spesol kaleko blo King, and hem wanfala apostate wea greedy, and isi for followim tingting blo olketa narawan. Bat Elijah hem barava difren, hem werem kaleko blo profet wea hem simpol and wea maet olketa wakem from skin blo wanfala animal or from hair blo camel or goat. Elijah hem wanfala brave man, wea faithful, and garem strong faith. Datfala important day wea gogo for end hem barava showimaot klia wei blo tufala man hia.

3, 4. (a) Why nao datwan hem wanfala nogud day for Ahab and olketa narawan wea worshipim Baal? (b) Olketa wanem kwestin nao bae iumi storyim?

³ Samting wea happen lo datfala day hem barava mek shame lo Ahab and olketa narawan wea worshipim Baal. Datfala heathen religion blo Ahab and waef blo hem, Queen Jezebel, and wea evriwan lo ten-tribe kingdom blo Israel followim, hem barava fail. Evriwan lukim klia hao Baal hem laea nomoa. Datfala god hem no even savve laetem wanfala fire nomata olketa profet blo hem krae big, dance, and katem olketa seleva for mekem blood ran. Baal hem fail for protectim 450 man hia and olketa killim olketa dae. Bat, nara samting tu Baal hem fail for duim. For winim thri years, olketa profet blo Baal askem god blo olketa for rain, bat Baal no fit for mekem hem rain. Bat Jehovah redi for showimaot hao hem nao garem paoa for mekem hem rain.—1 Ki. 16:30–17:1; 18:1-40.

⁴ Wat taem nao bae Jehovah duim datwan? Wat nao bae Elijah duim taem hem weit for datwan happen? And wat nao iumi savve lanem from faith wea hem showimaot? Bae iumi lukim datwan taem iumi lukluk lo disfala story.—Readim 1 Kings 18:41-46.

 5. Wat nao Elijah talem Ahab for duim, and waswe, Ahab lanem eni samting from datfala day tu?

⁵ Elijah go lo Ahab and sei: “Iu go ap, kaikai and drink, noes blo bigfala rain nao kam ia.” Hao, wicked king hia hem lane tu from wat hem happen lo datfala day? Bible no really talem, bat iumi savve lukim hao hem no talem eni toktok for showimaot hem repent, hem no askem profet blo Jehovah for story on behalf lo hem for kasem forgiveness. Nomoa nao, Ahab hem “go nao for kaikai and drink.” (1 Ki. 18:41, 42) Waswe, lo Elijah?

6, 7. Wat nao Elijah prea for hem, and why?

⁶ “Elijah hem go antap lo Maunt Carmel and hem bendaon lo graon and putim feis blo hem between tufala knee blo hem.” Ahab hem busy for kaikai, bat Elijah hem iusim datfala taem for prea lo Dadi blo hem lo heven. Elijah hem showimaot hao hem barava hambol taem hem baodaon lo graon gogo feis blo hem kasem knee blo hem. Why nao Elijah duim olsem? Bible talem klia lo James 5:18, wea hem sei dat Elijah prea for datfala rain for kam. So luk olsem hem duim datwan barava antap lo Maunt Carmel.

⁷ No long taem bifor diswan, Jehovah hem talem Elijah: “Bae mi  mekem rain foldaon lo graon.” (1 Ki. 18:1) So Elijah prea for Jehovah duim samting wea hem talem finis bae hem duim, olsem hao Jesus teachim olketa follower blo hem for prea winim wan thousand years bihaen.—Matt. 6:9, 10.

 8. Wat nao iumi lanem from example blo Elijah abaotem wei for prea?

⁸ Example blo Elijah teachim iumi staka samting abaotem prea. Main samting wea Elijah ting hem important nao hem for duim will blo God. Taem iumi prea, hem gud for tingim: “Eni samting wea iumi askem wea followim tingting bilong God, God hem herem iumi.” (1 John 5:14) So hem important for iumi savve lo wat nao will blo God mekem iumi savve prea lo wei wea hem bae acceptim, dastawe hem gud for mekem wei for studyim Bible hem kamap part lo laef blo iumi evriday. Iumi sure Elijah hem laekem datfala rain for kam tu bikos pipol blo hem barava safa from no eni rain. Luk olsem heart blo hem fulap witim feeling for sei thankiu bihaen hem lukim datfala mirakol wea Jehovah duim lo datfala day. Iumi tu laekem olketa prea blo iumi for showimaot dat iumi thankiu from heart and iumi tingim olketa narawan.—Readim 2 Corinth 1:11; Philippi 4:6.

 9. Wat nao Elijah talem for wakaman blo hem duim, and wat nao tufala wei blo Elijah wea iumi bae storyim?

⁹ Elijah hem sure Jehovah bae duim samting for mekem hem rain, bat hem no savve wat taem nao Jehovah bae duim. So, wat nao datfala profet gohed for duim taem hem weit? Lukim wanem Bible talem: “Hem sei lo wakaman blo hem: ‘Plis iu go ap, and luk go lo sea.’ So hem go and luk and hem sei: ‘Mi no lukim eni samting.’ Sevenfala taem nao Elijah talem hem ‘for go.’” (1 Ki. 18:43) Example blo Elijah teachim iumi tufala leson. First, datfala profet barava sure Jehovah bae mekem hem rain. And then, hem gohed lukluk for next samting wea bae happen.

10, 11. (a) Hao nao Elijah showimaot hem sure Jehovah bae duim samting hem promisim? (b) Why nao iumi tu savve barava sure olsem hem?

¹⁰ From Elijah barava sure Jehovah bae duim wanem hem promisim, hem laek for lukim wat nao Jehovah hem redi for duim. Hem sendem wakaman blo hem for go ap lo ples wea hae mekem hem savve luk farawe go antap lo sea for lukim if eni saen blo rain hem showaot. Taem datfala wakaman kam bak, hem talem disfala nius wea maet isi for mekem man feel wikdaon, hem sei: “Mi no lukim eni samting.”  Sea hem klia, and skae no garem eni cloud. Bat tingim wanfala interesting samting. Elijah hem tok olsem finis lo King Ahab: “Noes blo bigfala rain nao kam ia.” Why nao datfala profet tok olsem, taem nomata cloud bat no stap lo skae?

¹¹ Elijah savve lo promis blo Jehovah. From hem profet and representative blo Jehovah, hem sure God bae duim wat Hem talem. Elijah hem barava sure, dastawe hem sei hem herem finis saond blo bigfala rain. Diswan maet remindim iumi lo samting Bible talem abaotem Moses: “Hem gohed strong bikos hem olsem hem lukim God wea no eniwan savve lukim.” Waswe, hem tu hao iu ting lo God? Hem provaedem staka reason for iumi garem sem kaen faith olsem abaotem hem and olketa promis blo hem.—Heb. 11:1, 27.

12. Hao nao Elijah showimaot hem gohed for lukluk, and wat nao hem duim taem hem herem dat wanfala smol cloud showaot lo skae?

¹² Nara samting iumi lanem, hem nao wei wea Elijah hem gohed for lukluk. Hem sendem wakaman blo hem for go luk, no just wantaem or tu taem nomoa, bat hem duim datwan sevenfala taem! Iumi savve imaginim hao maet datfala wakaman hem taed for go chek evritaem, bat Elijah hem laekem for mas lukim eni saen and hem no givap. Gogo lo mek-seven taem, datfala wakaman go chek hem kam bak and sei: “Mi lukim wanfala smol cloud wea size blo hem olsem hand blo man, antap lo sea.” Hao, iu savve imaginim datfala wakaman hem story and showim hand blo hem for describem size blo datfala smol cloud wea showaot antap lo Great Sea? Maet datfala wakaman ting datfala smol cloud hem no important nomoa. Bat, lo Elijah, datfala cloud hem barava important saen. Hem kwiktaem talem wakaman blo hem: “Go and sei lo Ahab, ‘Redyim chariot blo iu and go daon kwiktaem mekem big rain ia no stopem iu!’”—1 Ki. 18:44.

13, 14. (a) Hao nao iumi savve followim example blo Elijah for gohed lukluk? (b) Wat nao olketa reason blo iumi for kwiktaem duim samting?

¹³ Elijah showimaot nara nambawan example for iumi distaem. Iumi distaem stap lo wanfala taem wea klosap nao God bae duim samting for fulfillim wat hem talem. Elijah mas weit kasem taem wea datfala rain bae kam, distaem tu olketa servant blo God mas weit go kasem taem wea disfala nogud system hem finis. (1 John 2:17) Go kasem taem wea Jehovah God duim samting, iumi mas gohed for lukluk for wat bae happen, olsem Elijah duim. Even Son blo God, Jesus, talem olketa wea followim hem: “Gohed for lukaot, bikos iufala no savve long wanem taem nao Lord bilong iufala bae kam.” (Matt. 24:42) Hao, Jesus minim dat olketa follower blo hem bae no savve eniting abaotem taem wea end bae kam? Nomoa, hem storyim staka samting abaotem wat bae happen lo disfala world bifor end hem kam. Iumi evriwan savve lukim hao toktok blo hem kamap tru taem iumi lukim  olketa saen wea showimaot “world hem gogo for finis.”—Readim Matthew 24:3-7.

¹⁴ Each part lo datfala saen hem givim klia pruv wea mekem iumi barava sure lo wat bae happen. Waswe, datfala pruv hem muvim iumi for kwiktaem duim samting lo service blo iumi for Jehovah? Nomata datfala cloud hem smol nomoa antap lo sea, hem mekem Elijah bilivim dat Jehovah hem klosap for duim samting. Waswe, hem nao wat happen?

15, 16. Wat nao hem kwiktaem for happen, and wat nao maet tingting blo Elijah abaotem Ahab?

¹⁵ Bible hem sei: “Gogo skae hem dark, wind hem blow, and wanfala hevi rain hem foldaon. And Ahab gohed raedem chariot blo hem go nao for kasem Jezreel.” (1 Ki. 18:45) Olketa samting start for happen kwiktaem nomoa. Taem wakaman blo Elijah talem message blo datfala profet go lo Ahab, datfala smol cloud hem kwiktaem kamap staka fogud and hem kavarem full skae and hem kamap dark. Wanfala big wind start for blow kam. And then bihaen thri and haf year, rain hem start for foldaon moa lo graon blo Israel. Datfala drae graon kwiktaem for drinkim olketa drop blo rain wea foldaon kam. Gogo datfala rain start for foldaon big, datfala river Kishon hem start for fulap, and for sure hem wasim go daon blood blo olketa profet blo Baal wea olketa killim dae lo there. Diswan hem chance tu for olketa Israelite wea sin and worshipim Baal for wasim aot datfala religion wea barava dirty from datfala land.

¹⁶ Masbi Elijah barava hope datwan bae happen! Maet hem ting, wat nao bae Ahab duim bihaen olketa spesol samting wea gohed for happen. Hao, bae Ahab repent and lusim datfala nogud wei for worshipim Baal? Olketa samting wea happen lo datfala day barava givim staka reason for hem change. Bat iumi no savve wat nao tingting blo Ahab lo datfala taem. Only samting Bible talem nao, datfala king “gohed raedem chariot blo hem go nao for kasem Jezreel.” Hao, hem lanem eniting from datfala day? Waswe, hem disaed for changem wei blo hem? Olketa samting wea happen bihaen showimaot ansa blo olketa kwestin hia hem, no. Nomata olsem, datfala day no finis yet for Ahab, and Elijah.

17, 18. (a) Wat nao happen lo Elijah lo road for go lo Jezreel? (b) Why nao wei wea Elijah ran from Carmel go lo Jezreel, hem barava spesol samting? (Lukim tu footnote.)

 ¹⁷ Profet blo Jehovah hem start for go followim sem road wea Ahab go lo hem. Hem bae mas wakabaot longtaem and hem dark and hem tuwet. Bat wanfala spesol samting hem klosap for happen.

¹⁸ “Paoa blo Jehovah kam lo Elijah and hem taengem kaleko blo hem raonem hips blo hem and ran go firstaem lo Ahab go kasem Jezreel.” (1 Ki. 18:46) Samting wea happen showimaot, “paoa blo Jehovah” hem kam lo Elijah lo wanfala spesol wei. Jezreel hem 30 kilometer from Carmel, and Elijah hem olo man finis. a Imaginim datfala profet apim kam kaleko blo hem lo hips blo hem, mekem leg blo hem free for ran, and then hem ran followim datfala road wea rain rainim. Hem ran fast tumas gogo hem kasem datfala chariot blo king, hem go pasim and ran winim nao!

19. (a) Wei wea God givim paoa lo Elijah and strongim hem, remindim iumi lo olketa wanem profesi? (b) Taem Elijah ran go lo Jezreel, wat nao hem savve lo hem?

¹⁹ Hem mas wanfala nambawan blessing for Elijah lo datfala taem! For feelim datfala paoa, strong and energy, hem barava spesol experience, masbi hem winim hao hem feel taem hem young tu. Diswan remindim iumi lo olketa promis blo Jehovah for givim lo olketa wea faithful, perfect health and wei for strong moa lo datfala Paradaes earth wea klosap for kam. (Readim Isaiah 35:6; Luke 23:43) Taem Elijah ran go followim datfala road wea tuwet, for sure hem savve dat Dadi blo hem datfala only tru God, Jehovah, hem barava hapi lo hem!

20. Hao nao iumi savve kasem olketa blessing from Jehovah?

²⁰ Jehovah hem barava laek for blessim iumi. Iumi mas traem best for kasem olketa blessing from hem; bae iumi savve kasem staka nambawan samting. Olsem Elijah, iumi tu need for gohed lukluk and luksavve lo olketa pruv wea showimaot Jehovah hem klosap for duim samting lo olketa last day distaem, wea hem danger and short taem nomoa stap. Olsem Elijah, iumi garem staka reason for barava sure Jehovah bae duim wat hem promisim, from hem “datfala God blo truth.”—Ps. 31:5.