Conclusion
“Followim example bilong olketa wea kasem samting wea God promisim bikos olketa garem faith and olketa patient.”—HEBREW 6:12.
1, 2. Why nao hem important for strongim faith blo iumi distaem? Storyim example.
FAITH. Hem wanfala naesfala word, wea representim wanfala naesfala wei. Bat taem iumi lukim or herem datfala word, maet iumi bae tingim nara word moa: “Urgent!” So, if iumi no garem faith, iumi need for garem datwan distaem. And if iumi garem faith, iumi need for protectim and gohed strongim datwan. Why nao olsem?
2 Imaginim iu lo wanfala big desert. Iu barava needim wata. Taem iu faendem samfala wata, bae iu protectim from sun for hem no drae. Then iu need for refillim moa mekem iu garem inaf wata wea savve helpem iu go kasem taem iu arrive lo destination blo iu. Distaem, iumi lo wanfala spiritual desert wea hem nao disfala world, and faith hem wanfala wei wea no isi for pipol garem, olsem tu wata wea hard for faendem and savve drae sapos iumi no protectim or refillim moa. Iumi barava needim faith for iumi laef lo spiritual wei, olsem wei wea iumi needim wata for stap laef.—Rom. 1:17.
3. Wat nao Jehovah provaedem for strongim faith blo iumi, and wat nao tufala samting wea iumi mas no forget for duim?
3 Jehovah savve iumi barava needim faith distaem, and hem savve dat hem no isi for iumi lukaftarem and strongim faith blo iumi. Dastawe hem provaedem olketa example for iumi followim. Jehovah iusim aposol Paul for raetem diswan: “Followim example bilong olketa wea kasem samting wea God promisim bikos olketa garem faith and olketa patient.” (Heb. 6:12) And dastawe organization blo Jehovah encouragem iumi for waka hard for followim example blo olketa faithful man and woman, olsem olketa wea disfala buk storyim. So wat nao iumi shud duim distaem? No forgetim tufala samting hia: (1) Iumi need for gohed strongim faith blo iumi; (2) Iumi need for evritaem tingim hope blo iumi.
4. Hao nao Satan hem enemy blo olketa wea garem faith, bat why nao iumi shud no fraet?
4 Gohed strongim faith blo iu. Wanfala main enemy blo faith hem Satan. Datfala ruler blo disfala world hem mekem disfala system for olsem desert wea mekem hem no isi for gohed garem faith. Hem barava strong winim iumi. Hao, iumi shud fraet for garem faith and gohed strongim datwan? Nomoa! Jehovah hem Fren blo evriwan wea garem faith. Hem talem iumi hao hem bae helpem iumi for againstim Devil and even for raosem Devil tu! (Jas. 4:7) Iumi savve againstim hem taem iumi markem taem each day for strongim faith blo iumi. Hao nao for duim datwan?
5. Hao nao olketa faithful man and woman lo Bible garem faith? Explainim.
5 Olsem iumi lukim, faith hem no samting wea olketa faithful man and woman hia born witim. Laef blo olketa pruvim hao faith hem wanfala frut blo holy spirit blo Jehovah. (Gal. 5:22, 23) Olketa prea for help and bikos lo datwan Jehovah gohed for strongim faith blo olketa. Iumi tu laek for followim example blo olketa, lo wei for no forgetim dat Jehovah hem willing for givim spirit blo hem lo olketa wea askem hem, and wea duim samting followim wat olketa prea for hem. (Luke 11:13) Wat moa iumi savve duim?
6. Hao nao iumi savve kasem gud samting from wei for studyim olketa Bible story hia?
6 Lo disfala buk, iumi storyim samfala example nomoa blo olketa wea garem strong faith. Staka nara example moa hem stap! (Readim Hebrew 11:32.) Iumi kasem encouragement for readim and studyim gud olketa example hia lo personal study blo iumi. If iumi hariap nomoa for readim olketa Bible story hia abaotem olketa pipol wea garem faith, datwan bae no strongim faith blo iumiseleva. For kasem gud samting from reading blo iumi, iumi need for spendem taem for studyim gud context and baekgraon blo olketa Bible story hia. If iumi evritaem tingim hao olketa man and woman hia wea no perfect olketa “olsem iumi nomoa,” bae example blo olketa kamap real lo iumi. (Jas. 5:17) Taem iumi savve gud lo story blo olketa, bae iumi minim feeling blo olketa taem olketa kasem olketa challenge and problem wea semsem olsem iumi tu.
7-9. (a) Hao nao maet samfala faithful man and woman lo bifor maet feel abaotem hao iumi worshipim Jehovah distaem? (b) Why nao iumi shud duim samting for strongim faith blo iumi?
7 Iumi savve strongim faith blo iumi thru lo wat iumi duim. Bikos “faith bilong man wea no duim gudfala samting hem dae.” (Jas. 2:26) Imaginim hao olketa man and woman wea iumi storyim finis bae hapi tumas if olketa kasem assignment for duim waka wea Jehovah talem iumi for duim distaem!
8 For example, hao nao Abraham bae feel if Jehovah talem hem for worship, no lo wanfala altar wea olketa wakem lo ston lo wilderness, bat for worship tugeta witim olketa brata and sista lo Kingdom Hall and lo olketa big convention, and olketa bae story raonem and explainim evri detail blo olketa promis wea hem lukim olsem hem “farawe yet”? (Readim Hebrew 11:13.) And hao nao Elijah wea trae for servem Jehovah anda lo rul blo wicked apostate king bae feel sapos hem kasem assignment no for go finisim olketa profet blo Baal bat for go visitim pipol and talem message wea givim comfort and hope lo olketa? Really, olketa man and woman wea garem faith wea Bible storyim bae kwiktaem acceptim datfala assignment for worshipim Jehovah olsem iumi duim distaem.
9 So iumi laek for gohed strongim faith blo iumi lo wat iumi duim. Taem iumi duim olsem, iumi followim example blo olketa man and woman wea garem faith wea Bible storyim. Olsem iumi storyim lo Introduction, iumi bae savve gud lo olketa olsem olketa fren blo iumi. Bat, klosap nao bae iumi kamap olketa real fren blo olketa.
10. Wat nao iumi luk forward for hem lo Paradaes?
10 Iu need for evritaem tingim hope blo iu. Olketa faithful man and woman bifor garem strong faith bikos olketa evritaem tingim hope wea God givim. Waswe iu? For example, imaginim bae iu hapi for meetim olketa faithful servant blo God taem olketa laef bak lo resurrection for olketa wea raeteous. (Readim Acts 24:15.) Wat nao samfala kwestin wea iu laek for askem lo olketa?
11, 12. Lo niu world, wat kaen kwestin nao iu laek for askem lo (a) Abel? (b) Noah? (c) Abraham? (d) Ruth? (e) Abigail? (f) Esther?
11 Taem iu meetim Abel, hao, bae iu laek askem hem abaotem parents blo hem? Or maet iu ask: “Enitaem iu story lo olketa cherub wea gardim Eden? Olketa cherub hia story kam lo iu tu?” Waswe Noah? Iu maet askem hem: “Hao, iu fraetem olketa Nephilim? Wat nao iu duim for lukaftarem olketa animal lo datfala year wea iufala stap insaed ark?” If iu meetim Abraham, maet iu ask: “Iu story witim Shem enitaem? Hu nao teachim iu abaotem Jehovah? Hao iu faendem hem no isi for lusim Ur?”
12 Maet iu laek for askem tu samfala kwestin lo olketa faithful woman wea bae resurrect. Iu savve ask: “Ruth, wat nao mekem iu laek for worshipim Jehovah?” “Abigail, hao iu fraet for talem Nabal abaotem wei wea iu helpem David?” “Esther, afta datfala story blo iutufala Mordecai lo Bible hem end, wat moa happen lo iutufala?”
13. (a) Olketa wat kaen kwestin nao maet olketa wea resurrect askem iu? (b) Hao nao iu feel abaotem wei for meetim olketa faithful man and woman lo bifor?
13 Hem tru, olketa faithful man and woman hia maet garem staka kwestin for askem lo iu tu. Iumi bae hapi tumas for story lo olketa abaotem olketa last day and hao Jehovah blessim pipol blo hem lo olketa hard taem! For sure, olketa bae hapi tumas for savve hao Jehovah fulfillim evri promis blo hem. Lo niu world, bae iumi no need for imaginim story blo olketa faithful servant blo God lo Bible. Olketa bae stap witim iumi lo Paradaes! So gohed for duim wat iu fit for duim distaem for mekem olketa pipol hia kamap real lo iu. Gohed garem sem faith olsem olketa. Iu bae worshipim Jehovah witim olketa, olsem olketa gud frens blo iu for olowe!
