1, 2. Why nao iumi shud ting long prea olsem wanfala nambawan privilege, and why nao iumi need for savve long wanem Bible hem teachim abaotem diswan?

TAEM iumi markem earth witim universe, earth hem barava smol. Tru nao, long Jehovah, “wea hem nao wakem skae and earth,” olketa nation bilong olketa man olsem wanfala smol drop wata from wanfala baket nomoa. (Psalm 115:15; Isaiah 40:15) Nomata olsem, Bible hem sei: “Jehovah stap klosap long evriwan wea singaot long hem, hem nao, evriwan wea duim stret samting. Hem bae duim samting wea olketa wea fraet long hem laekem, and hem bae herem singaot bilong olketa for help.” (Psalm 145:18, 19) Tingim datwan! Datfala Olmaeti hem klosap long iumi and bae herem iumi sapos iumi man wea “duim stret samting.” Hem nambawan privilege for iumi savve prea long God!

² Bat sapos iumi laekem Jehovah for herem prea bilong iumi, iumi mas prea long hem long wei wea hem acceptim. Hem hard for iumi savve duim datwan sapos iumi no savve long wanem Bible hem teachim abaotem prea. Hem barava important for savve long wanem Bible talem abaotem diswan, bikos prea helpem iumi for fren gud witim Jehovah.

3. Wanem nao wanfala important reason why iumi shud prea long Jehovah?

³ Wanfala important reason why iumi shud prea long Jehovah hem bikos hem encouragem iumi for duim datwan. Word bilong hem sei olsem: “Iufala no wari long eni samting, bat iufala prea and story long God from heart bilong iufala abaotem evri samting and askem God for olketa samting wea iufala needim witim wei for talem thankiu; taem iufala duim datwan, peace wea God givim wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:6, 7) Iumi no laek for ting smol long kaenfala arrangement hia wea Barava Haefala Ruler bilong universe hem mekem for iumi!

4. Hao nao wei for prea evritaem long Jehovah hem strongim wei wea iumi fren witim hem?

⁴ Narafala reason for prea hem bikos wei for prea evritaem long Jehovah bae strongim wei wea iumi fren witim hem. Olketa tru fren story long each other evritaem, no just long taem wea olketa needim samting. Olketa interest long each other, and wei wea olketa fren tugeta kamap moa strong taem olketa talem long each other tingting, wari, and feeling  bilong olketa. Wei wea iumi fren witim Jehovah God savve olsem tu. Disfala buk helpem iu for lanem plande samting from Bible finis abaotem fasin bilong Jehovah, and olketa plan bilong hem. Iu lanem finis hao hem samwan wea iu savve fren witim hem. Prea givim iu chance for story long Dadi bilong iu long heven abaotem olketa samting wea barava important long iu. Wei for duim datwan bae mekem iu fren gud witim Jehovah.—James 4:8.

5. Wanem nao showimaot Jehovah no herem evri prea?

⁵ Waswe, Jehovah herem evri prea? Tingim samting wea hem talem long olketa Israelite wea no obey long taem bilong datfala profet Isaiah. Hem sei: “Nomata iufala talem plande prea, mi no lisin bikos hand bilong iufala fulap witim blood bilong pipol wea iufala killim dae.” (Isaiah 1:15) So samfala samting wea man duim savve stopem God for herem prea bilong hem. Dastawe, for God herem prea bilong iumi, iumi mas duim samfala samting.

6. For God herem olketa prea bilong iumi, wanem nao wanfala main samting iumi mas duim, and hao nao iumi savve duim datwan?

⁶ Wanfala main samting nao hem for showimaot faith. (Mark 11:24) Aposol Paul hem sei: “Sapos man no garem faith hem hard nao for mekem [God] hapi, bikos man wea kam long God mas bilivim hao hem stap and hem kamap datwan for givim reward long olketa wea barava lukaotem hem.” (Hebrews 11:6) Moa samting hem insaed tru faith winim for savve God hem stap and hem herem and ansarem olketa prea nomoa. Samting iumi duim nao showimaot iumi garem faith. Olketa samting iumi duim evriday shud showimaot klia hao iumi garem faith.—James 2:26.

7. (a) Why nao iumi shud showimaot respect taem iumi prea long Jehovah? (b) Taem iumi prea long God, hao nao iumi savve showimaot iumi hambol and prea from heart?

⁷ Jehovah laekem tu for olketa wea prea long hem mas hambol and prea from heart bilong olketa. Iumi garem plande  gudfala reason for hambol taem iumi story long Jehovah. Taem pipol garem chance for story witim wanfala king or prime minister, olketa showimaot respect and luksavve long haefala position wea datfala man garem. Sapos iumi bae showimaot respect long wanfala man, iumi shud barava showimaot respect taem iumi prea long Jehovah! (Psalm 138:6) Tru nao, hem “Olmaeti God.” (Genesis 17:1) Taem iumi prea long God, wei wea iumi duim datwan shud showimaot iumi hambol front long hem and luksavve long haefala position bilong hem. Kaen wei for hambol olsem bae muvim iumi tu for no talem olketa sem toktok evritaem, bat for prea from heart bilong iumi.—Matthew 6:7, 8.

8. Hao nao iu savve duim samting followim wanem iu prea abaotem?

⁸ Nara samting iumi mas duim for mekem God herem prea bilong iumi, hem for duim samting followim wanem iumi prea abaotem. Jehovah laekem iumi for duim wanem iumi fit for duim for followim samting wea iumi prea abaotem. Olsem example, sapos iumi askem God for ‘givim iumi kaikai for tuday,’ iumi mas duim part bilong iumi for waka hard long garden or long wanfala waka for selen. (Matthew 6:11; 2 Thessalonians 3:10) Sapos iumi prea for God helpem iumi aotem from mind and heart feeling for laek duim samting wea rong, iumi shud stap klia long eni samting wea savve switim iumi for duim datfala rong. (Colossians 3:5) So iumi mas duim olketa main samting hia sapos iumi laekem God for herem prea bilong iumi, and iumi need for kasem ansa for samfala kwestin abaotem prea.

9. Hu nao iumi shud prea long hem, and iumi shud duim datwan thru long hu nao?

⁹ Iumi shud prea long hu nao? Jesus teachim olketa follower bilong hem for prea long “Dadi bilong [olketa] wea stap long heven.” (Matthew 6:9) So iumi shud prea long Jehovah God nomoa. Bat Jehovah laekem iumi for luksavve long position bilong datfala only Son bilong hem wea hemseleva wakem,  Jesus Christ. Iumi lanem long Chapter 5 hao God sendem Jesus kam long earth for kamap wanfala ransom for sevem iumi from sin and dae. (John 3:16; Romans 5:12) Hem nao datfala Hae Priest and Judge wea God appointim. (John 5:22; Hebrews 6:20) So Bible talem iumi for prea thru long Jesus. Jesus hem sei: “Mi nao datfala wei and truth and laef. Only wei for kam long Father hem thru long mi.” (John 14:6) So for Jehovah herem prea bilong iumi, iumi mas prea long Jehovah nomoa and duim datwan thru long nem bilong Son bilong hem.

10. Why nao iumi no need for sidaon or standap long spesol wei taem iumi prea?

¹⁰ Waswe, eni spesol wei for standap or sidaon taem iumi prea? Nomoa. Jehovah no talem eni spesol wei for sidaon, standap, or hao for putim hand taem iumi prea. Bible teachim hao iumi savve sidaon, baodaon, nildaon, standap, and samfala wei moa. (1 Chronicles 17:16; Nehemiah 8:6; Daniel 6:10; Mark 11:25) Samting wea barava important nao, hem for garem stretfala feeling long heart. Enitaem insaed day or maet taem iumi feisim wanfala emergency, nomata wea nao iumi stap, iumi savve prea long Jehovah. Nomata maet no eniwan luksavve iumi prea, Jehovah bae herem olketa prea olsem.—Nehemiah 2:1-6.

11. Wanem nao samfala samting wea hem fitim for iumi prea abaotem?

¹¹ Wanem nao iumi savve prea abaotem? Bible hem sei: “Sapos iumi askem eni samting wea fitim will bilong hem, bae [Jehovah] herem iumi.” (1 John 5:14) So iumi savve prea for eni samting wea fitim will bilong God. Waswe, hem will bilong hem for iumi savve prea abaotem olketa hevi and wari bilong iumi? Barava nao! Wei for prea long Jehovah savve olsem wei for story long wanfala gud fren. Iumi shud feel free for barava storyim long God evri wari and hevi bilong iumi. (Psalm 62:8) Hem fitim for iumi prea for holy spirit, bikos datwan bae helpem iumi for duim samting wea stret. (Luke 11:13) Iumi savve askem tu for Jehovah helpem iumi mekem olketa  disison wea wise and for givim iumi strong wea iumi needim for deal witim olketa hard samting. (James 1:5) Taem iumi sin, iumi shud askem God for forgivim iumi long faondeson bilong sakrifaes bilong Christ. (Ephesians 1:3, 7) Bat iumi shud prea for nara pipol, no just iumiseleva nomoa. Maet iumi savve prea for olketa famili member and olketa narawan wea worshipim God.—Acts 12:5; Colossians 4:12.

12. Hao nao iumi savve mekem olketa samting wea join witim Dadi bilong iumi long heven kamap olketa main samting wea iumi prea abaotem?

¹² Main samting for prea abaotem nao hem olketa samting wea join witim Jehovah God. Iumi garem gudfala reason for talem thankiu long hem for olketa gudfala samting wea hem duim for iumi. (1 Chronicles 29:10-13) Jesus givim iumi datfala example prea long Matthew 6:9-13. Long datfala prea hem teachim iumi for prea for evriwan mas ting long nem bilong God olsem hem holy. Next samting hem talem, hem for Kingdom bilong God mas kam and for hem duim will bilong hem long heven and long earth. Then Jesus storyim samting wea man seleva needim, bat hem ask for datwan bihaen hem prea for olketa important samting hia firstaem. Olsem tu, taem nem bilong God, kingdom bilong hem, and olketa nara samting olsem hem main samting iumi prea abaotem, iumi showimaot hao iumi no just tingim iumiseleva nomoa.

13. Wanem nao Bible showimaot abaotem hao long nao olketa prea wea God acceptim?

¹³ Hao long nao shud prea bilong iumi? Bible no talem eni samting abaotem hao long nao shud prea bilong man seleva or prea wea man talem long pablik. Prea savve short, olsem long taem for kaikai, or maet hem long lelebet from iumi barava talemaot feeling bilong iumi long Jehovah. (1 Samuel 1:12, 15) Nomata olsem, Jesus judgem olketa man wea talem olketa prea wea long tumas, and wea olketa talem for show-off long pipol. (Luke 20:46, 47) Jehovah no tinghae long olketa prea olsem. Samting wea important nao hem for iumi prea from heart bilong iumi. So maet prea hem savve long or short, wea datwan bae depend long need and samting wea kamap.

14. Wanem nao Bible hem minim taem hem encouragem iumi for “prea evritaem,” and why nao datwan hem comfortim iumi?

 ¹⁴ Haomas taem insaed day nao iumi savve prea? Bible encouragem iumi for “prea evritaem,” “gohed for prea,” and “prea olowe.” (Matthew 26:41; Romans 12:12; 1 Thessalonians 5:17) Bat diswan no minim iumi prea long Jehovah evri minute insaed day. Bible hem barava encouragem iumi for evritaem talem thankiu long Jehovah for olketa gud samting hem duim for iumi, and evritaem depend long hem for direction, comfort, and strong. Hem comfortim iumi for savve hao Jehovah no putim eni spialaen long hao long or haomas taem insaed day iumi savve story witim hem. Sapos iumi barava tinghae long privilege wea iumi garem for prea, bae iumi lukaotem eni chance for prea long Dadi bilong iumi long heven.

15. Why nao iumi shud sei “Amen” long end bilong prea bilong iumiseleva, and prea wea narawan talem?

¹⁵ Why nao iumi shud sei “Amen” long end bilong wanfala prea? Datfala word “amen” hem minim “barava nao.” Olketa example insaed Bible showimaot hao hem fitim for sei “Amen” long end bilong prea bilong iumiseleva or prea wea nara man talem. (1 Chronicles 16:36; Psalm 41:13) Taem iumi sei “Amen” long end bilong prea bilong iumi, datwan showimaot iumi barava laekem God for ansarem prea bilong iumi. Taem iumi sei “Amen” long end bilong prea wea samwan talem for olketa narawan wea stap, iumi savve talem datwan long heart bilong iumi or iumi savve talem datwan big. Wei for sei “Amen” olsem showimaot iumi agree witim samting wea datfala man talem.—1 Corinthians 14:16.

16. Saed long prea, iumi savve feel sure long wanem samting?

¹⁶ Waswe, Jehovah really ansarem olketa prea? Barava nao! Iumi savve sure hao Jehovah, wea hem nao “Datwan wea herem prea,” hem ansarem olketa prea wea plande million pipol talem from heart bilong olketa. (Psalm 65:2) Jehovah savve ansarem olketa prea bilong iumi long plande difren wei.

17. Why nao iumi fit for sei God iusim olketa angel and olketa servant bilong hem long earth for ansarem prea bilong iumi?

 ¹⁷ Jehovah iusim olketa angel and olketa servant bilong hem long earth for ansarem olketa prea. (Hebrews 1:13, 14) Staka taem man hem prea for God helpem hem minim Bible, and then no longtaem bihaen, Olketa Jehovah’s Witness kam long haos bilong hem. Olketa experience olsem showimaot hao olketa angel directim waka for preachim Kingdom. (Revelation 14:6) Taem iumi kasem bigfala hevi and prea long Jehovah, samfala taem Hem savve muvim narafala Christian  for helpem iumi.—Proverbs 12:25; James 2:16.

18. Hao nao Jehovah iusim holy spirit and Word bilong hem for ansarem prea bilong olketa servant bilong hem?

¹⁸ Jehovah God iusim tu holy spirit and Word bilong hem, Bible, for ansarem prea bilong olketa servant bilong hem. Taem iumi kasem hard taem, hem savve ansarem prea bilong iumi for help long wei for iusim holy spirit bilong hem for givim iumi direction and strong. (2 Corinthians 4:7) Taem iumi askem Jehovah for direction, plande taem iumi kasem datwan from Bible. Long there nao Jehovah helpem iumi for mekem olketa wise disison. Iumi savve faendem olketa scripture wea really help taem iumi studyim Bible and readim olketa Christian buk olsem diswan. Maet iumi herem olketa important point wea iumi need for ting raonem long wanfala Christian meeting or from wanfala elder long kongregeson wea laek for helpem iumi.—Galatians 6:1.

19. Wanem nao iumi shud no forgetim sapos samfala taem hem luk olsem God no ansarem prea bilong iumi?

¹⁹ Sapos hem luk olsem Jehovah no kwiktaem for ansarem prea bilong iumi, datwan no minim hem no fit for ansarem datwan. Iumi mas no forgetim hao Jehovah ansarem olketa prea long wei wea followim will bilong hem, and long taem wea hem markem. Hem savve long wanem iumi needim, and hem savve long best wei for provaedem olketa need hia. Plande taem hem letem iumi for ‘gohed for ask, gohed for lukaotem, and gohed for noknok.’ (Luke 11:5-10) Wei for gohed prea olsem and no givap  showimaot long God hao iumi barava laekem for hem ansarem prea, and hao faith bilong iumi hem strong. And tu, Jehovah savve ansarem prea bilong iumi long wei wea maet iumi no luksavve. Olsem example, maet hem ansarem prea bilong iumi abaotem hard samting wea kasem iumi, no long wei for finisim datfala hard samting, bat long wei for givim iumi strong wea iumi needim for deal witim datwan.—Philippians 4:13.

20. Why nao iumi shud mekius long spesol privilege wea iumi garem for prea?

²⁰ Iumi barava hapi hao Creator bilong universe hem no farawe from olketa wea prea long hem long wei wea fitim! (Psalm 145:18) Iumi shud prea evritaem long Jehovah bikos hem wanfala spesol privilege for iumi savve duim datwan. Datwan givim iumi nambawan chance for barava fren gud witim Jehovah, wea hem nao Datwan wea herem prea.