1, 2. Wea nao iumi savve faendem wanfala sef ples distaem?

TINGIM sapos iu wakabaot long road and from lukluk bilong skae iu savve hem klosap for rain and big wind. Skae hem dark tumas. Hem start for thunder, and then, hem barava rain big. Iu ran and lukaotem eni ples for iu haed from rain hia. Then iu lukim wanfala resthaos long saed road, and iu ran go insaed. Datfala resthaos hem drae insaed and iu barava hapi iu faendem datwan nao. Hem barava sef ples for haed!

² Olketa nogud samting wea gohed long world distaem hem olsem wanfala big rain and wind. Olketa nogud samting hia kamap worse nao. Bat wanfala ples for iumi ran go insaed hem stap, wanfala sef ples wea savve protectim iumi from samting wea savve spoelem iumi for olowe. Wanem nao datwan? Tingim samting wea Bible hem teachim long disfala scripture: “Mi bae sei long Jehovah: ‘Iu nao sef ples bilong mi, God bilong mi, wea mi trustim.’”—Psalm 91:2.

3. Hao nao iumi savve mekem Jehovah kamap sef ples bilong iumi?

³ Tingim datwan! Jehovah, wea hem nao Creator  and Haefala Ruler bilong universe, savve kamap sef ples for iumi. Hem savve duim diswan bikos hem garem moa paoa winim eniwan or eni samting wea savve spoelem iumi. Nomata samting hem spoelem iumi, Jehovah savve stretem bak datwan tu. Hao nao iumi savve mekem Jehovah kamap sef ples bilong iumi? Iumi need for trustim hem. And tu, Word bilong God encouragem iumi for ‘gohed duim samting wea mekem iumi kasem love bilong God.’ (Jude 21) Tru nao, iumi need for mek sure iumi gohed for kasem love bilong God, wea insaed diswan hem for keepim gudfala wei for fren witim Dadi bilong iumi long heven. Sapos olsem, iumi savve sure hem kamap sef ples bilong iumi. Bat hao nao iumi savve fren gud witim God olsem?

4, 5. Wanem nao samfala wei wea Jehovah showimaot love for iumi?

⁴ For mek sure iumi gohed for kasem love bilong God, iumi need for minim olketa wei wea Jehovah showimaot love long iumi. Tingim samfala Bible teaching wea iu lanem insaed disfala buk. From hem Creator, Jehovah givim earth olsem hom for iumi. Hem mekem earth for garem staka kaikai and wata, olketa samting man savve iusim, olketa naes animal, and olketa ples wea luk naes fogud. God givim kam Bible, and insaed long datwan hem showimaot long iumi nem and olketa fasin bilong hem. And tu, Word bilong hem showimaot hao hem sendem Son bilong hem Jesus long earth and letem hem for safa and dae for iumi. (John 3:16) Hao nao datfala present savve helpem iumi? Hem givim iumi hope for kasem olketa nambawan samting long future.

⁵ Disfala hope bilong iumi depend tu long nara samting wea God duim. Jehovah startim wanfala gavman long heven, wea hem nao datfala Kingdom bilong Messiah. Klosap nao, datfala gavman bae finisim wei wea pipol safa and bae mekem earth kamap wanfala paradaes. Tingim datwan! Iumi savve garem peace and hapi for olowe. (Psalm 37:29) Bat nomata distaem tu, God helpem iumi for savve long hao iumi savve barava hapi.  Nara present wea hem givim iumi hem prea, wea mekem iumi savve story witim hem enitaem and long eni ples. Olketa samting hia tu-thri example nomoa long wei wea Jehovah showimaot love for olketa man, and for iu tu.

6. Hao nao iu savve showimaot iu tinghae long love wea Jehovah showimaot long iu?

⁶ Barava important kwestin for iu ting raonem nao, hem: Hao nao bae mi showimaot mi tinghae long love bilong Jehovah? Staka bae sei, “Mi mas lovem Jehovah nao.” Waswe, iu garem tingting olsem tu? Jesus talem komand wea winim evri nara komand taem hem sei: “Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.” (Matthew 22:37) Tru nao, iu garem staka reason for lovem Jehovah God. Bat waswe, only samting iu mas duim for lovem Jehovah witim full heart, soul, and mind bilong iu, hem for feelim love for hem nomoa?

7. Waswe, moa samting hem insaed wei for lovem God winim for just feelim love for hem nomoa? Explainim diswan.

⁷ Bible showimaot hao moa samting hem insaed wei for lovem God winim for just feelim love for God nomoa. Tru nao, nomata hem barava important for feelim love for Jehovah, datwan hem just start nomoa bilong really wei for lovem hem. Olsem example, for garem wanfala apple tree, iu mas garem seed bilong apple firstaem. Bat sapos iu laekem wanfala apple nomoa, waswe, bae iu hapi sapos samwan givim iu wanfala seed bilong apple? Barava nomoa nao! Olsem tu, for feelim love for Jehovah God, datwan hem start nomoa. Bible hem sei: “Samting wea showimaot iumi lovem God nao, hem wei wea iumi obeyim olketa komandment bilong hem; bat hem no wanfala hevi for obeyim olketa komandment bilong hem.” (1 John 5:3) Samting wea showimaot man hem really lovem God, hem wei wea datfala love muvim hem for duim samting.—Matthew 7:16-20.

8, 9. Hao nao iumi savve showimaot iumi lovem and tinghae long God?

 ⁸ Iumi showimaot love for God taem iumi obeyim olketa komandment bilong hem and followim olketa principle bilong hem. Datwan hem no hard tumas for duim. Olketa law bilong Jehovah no wanfala hevi for iumi karem. Olketa law hia hem for helpem iumi garem laef wea mekem iumi hapi and satisfae. (Isaiah 48:17, 18) Taem iumi live followim samting wea Jehovah talem, iumi showimaot long Dadi bilong iumi long heven hao iumi barava tinghae long evri samting wea hem duim for iumi. Bat sorre nao, no staka pipol long world distaem showimaot fasin for tinghae olsem. Iumi no laek for olsem samfala pipol long taem bilong Jesus wea no tinghae long samting hem duim. Jesus healim tenfala man wea garem sik leprosy, bat wanfala nomoa hem talem thankiu long hem. (Luke 17:12-17) Iumi laek for olsem datwan wea talem thankiu, no olsem naenfala narawan hia!

⁹ So wanem nao olketa komandment bilong Jehovah wea iumi need for obeyim? Iumi storyim staka long disfala buk finis, bat distaem, bae iumi reviewim tu-thri long olketa. Wei for obeyim olketa komandment bilong God bae helpem iumi for gohed kasem love bilong God.

10. Why nao hem important for gohed kasem moa savve abaotem Jehovah God?

¹⁰ Barava important samting wea bae helpem iumi fren gud witim Jehovah nao hem for lane abaotem hem. Hem samting wea iumi shud gohed duim olowe. Sapos iu sidaon klosap long fire long wanfala barava cold naet, waswe, bae iu letem datfala fire for isisi go daon, gogo, hem dae nao? Nomoa. Bae iu putim samfala firewood moa long hem for mekem datfala fire hem hot and laet gud. Sapos nomoa, maet iu barava cold tumas and laef bilong iu stap long danger! Long sem wei wea firewood mekem fire hem bone gud and strong, “datfala barava savve bilong God” bae mekem love bilong iumi for Jehovah hem gohed strong tu.—Proverbs 2:1-5.

11. Hao nao teaching bilong Jesus hem affectim olketa follower bilong hem?

¹¹ Jesus laekem olketa follower bilong hem for mas mekem love bilong olketa for Jehovah and datfala nambawan Word bilong Hem strong and hem samting wea muvim olketa. Bihaen hem resurrect, Jesus teachim tufala disaepol bilong hem abaotem samfala profesi long olketa Hebrew Scripture wea fulfill long hem. Hao nao datwan affectim olketa? Bihaen, olketa sei: “Samting wea hem storyim long iumi long road taem hem explainim gud olketa scripture, hem barava muvim tumas heart bilong iumi, iaman!”—Luke 24:32.

12, 13. (a) Hao nao feeling bilong plande pipol distaem abaotem God and Word bilong hem? (b) Hao nao iumi savve stopem love bilong iumi for gogo daon?

¹² Long firstaem wea iu lanem really samting wea Bible hem teachim, waswe, datwan barava mekem iu hapi and muvim heart bilong iu for lovem God and laek servem hem witim strong? Mas olsem nao. Staka garem sem feeling olsem iu. Bat samting wea bae no isi for duim nao, hem for mekem love bilong iu gohed for kamap moa strong. Iumi no laek followim nomoa pipol long world distaem. Jesus hem sei: “Love bilong plande pipol bae gogo daon.” (Matthew 24:12) Hao nao iu savve stopem love bilong iu for Jehovah and olketa tru samting insaed Bible for gogo daon?

¹³ Gohed for kasem savve abaotem Jehovah God and Jesus  Christ. (John 17:3) Ting raonem samting wea iu lanem from Word bilong God, and askem iuseleva: ‘Wanem nao diswan hem teachim mi abaotem Jehovah God? Diswan givim mi olketa wanem reason moa for lovem hem witim full heart, mind, and soul bilong mi?’ (1 Timothy 4:15) Kaen wei olsem for ting raonem samting iu lanem bae mekem love bilong iu for Jehovah hem gohed for strong.

14. Hao nao prea savve helpem iumi for keepim love bilong iumi for Jehovah hem strong?

¹⁴ Narafala wei for mekem love bilong iu for Jehovah hem gohed strong hem for prea evritaem. (1 Thessalonians 5:17) Iumi lanem long Chapter 17 hao prea hem wanfala spesol present from God. Wei for story gud evritaem witim pipol iumi laekem hem mekem iumi fren gud witim olketa, olsem tu, wei for prea evritaem bae mekem iumi savve gohed for fren witim Jehovah. Hem barava important for no letem olketa prea bilong iumi kamap semsem evritaem. Iumi need for story long Jehovah long sem wei wea wanfala pikinini hem story witim dadi bilong hem wea hem lovem. Iumi shud story long wei wea showimaot respect, bat long semtaem, iumi shud no hol bak for storyim barava samting long heart bilong iumi. (Psalm 62:8) Tru nao, wei for studyim Bible witim wei for prea from heart hem olketa barava important samting insaed worship bilong iumi, and olketa bae helpem iumi for mek sure iumi gohed for kasem love bilong God.

15, 16. Why nao hem stret for ting long waka for preachim Kingdom olsem wanfala privilege and wanfala riches?

¹⁵ Wei for studyim Bible and for prea, hem kaen wei for worship wea iumi savve duim seleva. Bat tingim wanfala part bilong worship wea iumi duim long pablik, hem nao, wei for storyim biliv bilong iumi long olketa narawan. Waswe, enitaem iu storyim samfala truth from Bible witim olketa narawan? Sapos olsem, iu enjoyim wanfala nambawan privilege. (Luke 1:74) Taem iumi storyim long narawan olketa samting iumi lanem abaotem Jehovah God, iumi duim wanfala barava important assignment wea evri tru Christian kasem, hem nao, for preachim datfala gud nius abaotem Kingdom bilong God.—Matthew 24:14; 28:19, 20.

 ¹⁶ From aposol Paul hem barava tinghae long ministry bilong hem, hem kolem datwan wanfala riches. (2 Corinthians 4:7) Wei for story long pipol abaotem Jehovah God and olketa plan bilong hem, hem best waka wea iu savve duim. Why nao olsem? Bikos no eniwan wea iumi savve waka for hem savve winim Masta bilong iumi, and gud samting iumi kasem from datfala waka hem winim nao eni samting wea eni man savve givim long iumi. Taem iu busy for duim disfala waka, iu helpem pipol  wea garem gudfala heart for fren witim Dadi bilong iumi long heven and for start for wakabaot long road wea lead go long laef olowe! No eni narafala waka bae mekem iumi feel satisfae olsem! And tu, wei for witness abaotem Jehovah and Word bilong hem bae mekem faith bilong iu and wei wea iu lovem hem kamap moa big. And Jehovah hem barava tinghae long wei wea iu waka hard for duim datwan. (Hebrews 6:10) Wei for gohed busy long olketa waka olsem bae helpem iu for gohed kasem love bilong God.—1 Corinthians 15:58.

17. Why nao hem important tumas for duim Christian ministry distaem?

¹⁷ Hem important for no forgetim hao iumi mas busy for preach abaotem Kingdom. Bible hem sei: “Preachim word, and hariap for duim datwan.” (2 Timothy 4:2) Why nao olsem? Word bilong God hem sei: “Bigfala day bilong Jehovah hem klosap. Hem klosap nao, and hem hariap tumas.” (Zephaniah 1:14) Tru tumas, klosap nao Jehovah bae finisim disfala world. Iumi mas warnim pipol! Olketa need for savve hao olketa mas no delay for chusim Jehovah olsem Ruler bilong olketa. Datfala end “bae no leit.”—Habakkuk 2:3.

18. Why nao iumi shud joinim olketa nara tru Christian for worshipim Jehovah?

¹⁸ Jehovah laekem iumi for worshipim hem witim olketa nara tru Christian. Hem nao why Word bilong hem sei: “Iumi mas tingim and muvim each other for showimaot love and duim gudfala waka, no lusim wei for hipap tugeta, olsem fasin bilong samfala, bat encouragem each other, and duim long wei wea moa big taem iufala lukim hao datfala day hem kakam moa klos.” (Hebrews 10:24, 25) Taem iumi hipap witim olketa narawan long olketa Christian meeting, iumi garem barava naesfala chance for praisem and worshipim God bilong iumi wea iumi lovem. And tu, iumi buildimap and encouragem each other.

19. Hao nao iumi savve help for strongim wei wea olketa long Christian kongregeson garem love for each other?

¹⁹ Taem iumi kaban witim olketa nara worshiper bilong Jehovah, iumi strongim wei wea evriwan garem love for narawan and stap gud tugeta. Hem important for tingim nomoa olketa gud point bilong olketa narawan, olsem wei wea Jehovah lukaotem olketa gud point bilong iumi. No laekem for olketa narawan mas perfect. No  forgetim hao samfala no barava strong long spiritual wei bikos olketa servem Jehovah for tu-thri year nomoa, and tu, iumi evriwan savve duim mistek. (Colossians 3:13) Sapos iu trae for garem gudfala wei for fren witim olketa wea barava lovem Jehovah, bae iu lukim hao datwan hem helpem iu for kamap strong long spiritual wei. Tru nao, wei for worshipim Jehovah witim olketa spiritual brata and sista bae helpem iu for gohed for kasem love bilong God. Long wanem wei nao Jehovah rewardim olketa wea worshipim hem long faithful wei, wea datwan nao mekem olketa gohed for kasem love bilong hem?

20, 21. Wanem nao “datfala really laef,” and why nao datwan hem wanfala nambawan hope?

²⁰ Reward wea Jehovah givim olketa faithful servant bilong hem, hem laef, bat wanem kaen laef nao datwan? For ansarem datwan, tingim narafala kwestin: Waswe, iumi really laef distaem? Maet iu no minim why nao iumi askem datfala kwestin. Iumi evriwan gohed for brith, kaikai, and drink. So ansa hem, ia, iumi laef distaem. And taem iumi barava hapi, maet iumi sei, “Iumi barava enjoyim laef nao!” Nomata olsem, Bible showimaot hao long wanfala important wei, no eniwan distaem really garem laef.

²¹ Word bilong God barava encouragem iumi for “hol strong long datfala really laef.” (1 Timothy 6:19) Toktok hia showimaot hao “datfala really laef” hem samting wea iumi hope for kasem long future. Tru nao, taem iumi perfect, iumi bae barava garem datfala really laef wea iumi shud garem firstaem, bat wea Adam hem spoelem. Taem iumi stap long paradaes and garem perfect health, peace, and hapi, datfala taem nao iumi bae enjoyim “datfala really laef,” wea hem nao laef olowe. (1 Timothy 6:12) Datwan hem wanfala barava nambawan hope!

22. Hao nao iu savve “hol strong long datfala really laef”?

²² Hao nao iumi savve “hol strong long datfala really laef”? Taem Paul storyim “datfala really laef,” hem barava encouragem olketa Christian tu “for duim gudfala samting” and “for duim staka gudfala waka.” (1 Timothy 6:18) So for kasem “datfala really laef” iumi mas followim olketa samting iumi lanem from Bible. Bat waswe, samting wea Paul talem showimaot hao wei for duim olketa gudfala  samting nao bae mekem iumi fit for kasem “datfala really laef”? Nomoa, bikos only wei wea man savve kasem olketa nambawan samting olsem, hem from ‘kaenfala fasin bilong God wea man no fit for kasem.’ (Romans 5:15) Nomata olsem, Jehovah hem barava hapi for rewardim olketa wea servem hem long faithful wei. Hem laekem iu for garem “datfala really laef.” Olketa wea gohed for duim samting wea mekem olketa kasem love bilong God savve kasem datfala laef wea olketa bae garem peace and hapi for olowe.

23. Why nao hem barava important for gohed duim samting wea mekem iumi kasem love bilong God?

²³ Iumi wanwan shud askem iumiseleva, ‘Waswe, mi worshipim God long wei wea hem markem insaed Bible?’ Sapos evriday iumi mek sure iumi worshipim God long wei olsem, iumi savve barava luk forward for kasem “datfala really laef.” Iumi savve sure Jehovah hem sef ples bilong iumi. Hem bae keepim olketa faithful servant bilong hem sef insaed olketa last day bilong disfala world wea fulap witim trabol. And tu, klosap nao Jehovah bae tekem iumi go insaed datfala nambawan niu world. Iumi bae hapi tumas for lukim datwan hem kamap! And iumi bae barava hapi tumas from wei wea iumi chusim olketa wise samting insaed olketa last day hia! Sapos iu chusim olketa samting olsem distaem, iu bae enjoyim “datfala really laef,” wea hem nao laef wea Jehovah God laekem iumi for garem firstaem, and iumi bae enjoyim datwan for olowe!