1. Why nao iumi shud laek for savve abaotem olketa angel?

PLANDE taem, wei for savve long famili bilong wanfala man bae helpem iumi for savve gud long hem. Olsem tu, samting wea bae helpem iumi for savve long Jehovah God hem wei for savve gud long olketa angel bikos olketa nao famili bilong God long heven. Bible kolem olketa angel hia “olketa son bilong God.” (Job 38:7) So wanem waka nao olketa duim for fulfillim plan bilong God? Waswe, olketa affectim samting wea olketa man duim bifor and kam kasem distaem? Waswe, olketa angel affectim laef bilong iu? Hao nao olsem?

2. Hu nao creatim olketa angel, and haomas angel nao stap?

² Plande handred taem nao Bible storyim olketa angel. Bae iumi storyim tu-thri example hia mekem iumi savve lanem moa samting abaotem olketa angel. Hu nao creatim olketa angel? Colossians 1:16 hem sei: “Thru long hem [Jesus Christ] evri narafala samting kamap long heven and long earth.” So Jehovah God creatim evri angel wanwan thru long firstborn Son bilong hem. Haomas angel nao stap? Bible showimaot hao God creatim plande million angel, and evri angel garem bigfala paoa.—Psalm 103:20, Revelation 5:11.

3. Wanem nao Job 38:4-7 talem iumi abaotem olketa angel?

³ Word bilong God, Bible, talem iumi hao taem God creatim earth, “evri son bilong God start for singaot for givim praise.”  (Job 38:4-7) So God creatim olketa angel longfala taem bifor hem creatim earth and olketa man. Disfala scripture long Bible showimaot hao olketa angel garem feeling, bikos hem sei olketa “singaot tugeta witim hapi.” Disfala scripture hem sei “evri son bilong God” hapi tugeta. Long datfala taem, evri angel olketa member bilong famili bilong Jehovah God wea wan mind for servem hem.

4. Hao nao Bible showimaot olketa faithful angel interest long samting wea olketa man duim?

⁴ Start kam long taem wea olketa faithful angel lukim God creatim Adam and Eve, olketa barava interest long olketa man and long wei wea plan bilong God hem gohed for fulfill. (Proverbs 8:30, 31; 1 Peter 1:11, 12) Bat gogo, olketa angel lukim hao bigfala haf bilong olketa man lusim wei for servem loving Creator bilong olketa. Masbi diswan mekem olketa angel feel sorre. Long narasaed, taem wanfala man hem kam bak long Jehovah, “olketa angel bilong God hapi.” (Luke 15:10) From olketa angel barava tingim olketa wea servem God, iumi savve minim why Jehovah hem plande taem iusim olketa angel for strongim and protectim olketa faithful servant bilong hem long earth. (Hebrews 1:7, 14) Tingim samfala example.

5. Wanem nao samfala example insaed Bible wea olketa angel givim sapot long olketa wea faithful?

⁵ Tufala angel leadim datfala raeteous man Lot and olketa dota bilong hem go aot from tufala wicked taon, Sodom and Gomorrah, taem God distroem olketa. (Genesis 19:15, 16) Plande handred year bihaen, olketa enemy bilong profet Daniel torowem hem go insaed long hol witim olketa lion, bat olketa lion no kaikaim hem. Daniel hem sei: “God bilong mi sendem kam angel bilong hem and satem mouth bilong olketa lion.” (Daniel 6:22) Long taem bilong olketa aposol, wanfala angel aotem Peter from prison. (Acts 12:6-11) And tu, olketa angel sapotim Jesus long start bilong ministry bilong hem long earth. (Mark 1:13) And no longtaem bifor hem  dae, wanfala angel kam long Jesus and “strongim hem.” (Luke 22:43) Masbi datwan hem really comfortim Jesus long olketa barava important taem long laef bilong hem olsem!

6. (a) Hao nao olketa angel protectim pipol bilong God distaem? (b) Bae iumi kasem ansa for olketa wanem kwestin?

⁶ Distaem, olketa angel no showim olketa seleva long pipol bilong God long earth. Nomata iumi no savve lukim olketa, olketa strongfala angel bilong God gohed yet for protectim pipol bilong hem, especially from olketa samting wea savve spoelem spiritual saed bilong olketa. Bible hem sei: “Angel bilong Jehovah hem stap raonem evriwan wea fraet long hem, and hem sevem olketa.” (Psalm 34:7) Why nao toktok hia shud barava comfortim iumi? Bikos olketa wicked spirit stap wea laek for finisim iumi! Hu nao olketa? Wea nao olketa kam from? Hao nao olketa trae for spoelem iumi? For kasem ansa, bae iumi storyim samting wea happen bifor kam.

7. Wanem nao showimaot Satan hem win for mekem pipol no obeyim God

⁷ Iumi lanem finis long Chapter 3 hao wanfala angel garem feeling for laek rul ovarem olketa narawan, and from diswan, hem againstim God. Bihaen, Bible kolem disfala angel, Satan. (Revelation 12:9) Insaed 1,600 year bihaen Satan hem trikim Eve, hem win for mekem klosap evriwan no obeyim God. Tu-thri man nomoa faithful, olsem Abel, Enoch, Noah, and samfala moa.—Hebrews 11:4, 5, 7.

8. (a) Hao nao samfala angel kamap olketa demon? (b) For mekem olketa no dae long Flood long taem bilong Noah, wanem nao olketa demon duim?

⁸ Long taem bilong Noah, olketa nara angel bighed againstim Jehovah tu. Olketa lusim famili bilong God long heven, kam daon long earth, and mekem olketa seleva for garem body bilong olketa man. Why nao olsem? Genesis 6:2 hem sei: “Olketa son bilong tru God start for lukluk long olketa dota bilong man and tingim hao olketa luk naes tumas; and olketa  start for tekem samfala olsem waef for olketa seleva, evriwan wea olketa chusim.” Bat Jehovah God no letem samting wea olketa angel hia duim, and wei wea diswan spoelem olketa man, for gohed. Hem mekem datfala big Flood kamap wea distroem olketa wea wicked and hem sevem nomoa olketa faithful servant bilong hem. (Genesis 7:17, 23) So diswan forcem olketa bighed angel hia, wea Bible kolem olketa demon, for go aot from body bilong olketa and go bak long heven. Olketa saedem Devil, and from diswan, hem kamap “ruler bilong olketa demon.”—Matthew 9:34.

9. (a) Wanem nao happen long olketa demon taem olketa go bak long heven? (b) Wanem nao bae iumi storyim saed long olketa demon?

 ⁹ Taem olketa bighed angel hia kasem bak long heven, olketa no savve part long famili bilong God nao, olsem ruler bilong olketa, Satan. (2 Peter 2:4) Nomata God stopem olketa for garem body bilong olketa man moa, olketa gohed yet for affectim olketa man long nogud wei. Tru nao, olketa demon hia helpem Satan for “giamanim olketa man long full earth.” (Revelation 12:9; 1 John 5:19) Hao nao olsem? Olketa demon iusim olketa difren wei for savve trikim pipol. (2 Corinthians 2:11) Iumi bae storyim samfala wei wea olketa iusim hia for trikim pipol.

10. Wanem nao spiritism?

¹⁰ Olketa demon iusim spiritism for trikim pipol. Spiritism hem wei for story witim olketa spirit. Maet man duim diswan seleva, or hem savve iusim wanfala kastom man for duim datwan for hem. Bible hem againstim spiritism, and hem warnim iumi for stap klia long eni samting wea join witim datwan. (Galatians 5:19-21) Olketa demon iusim spiritism long sem wei wea wanfala fisherman iusim bait. Fisherman savve iusim olketa difren kaen bait for kasem olketa difren kaen fish. Olsem tu, olketa wicked spirit iusim olketa difren kaen wei for duim spiritism for mekem olketa difren kaen pipol stap anda long paoa bilong olketa.

11. Wanem nao divination, and why nao iumi shud stap klia long hem?

¹¹ Wanfala bait wea olketa demon iusim hem divination. Wanem nao divination? Hem wei for trae savve long wanem bae happen long future, or for faendaot abaotem samting. Samfala wei for duim divination nao hem for go lukim wanfala kastom man, iusim olketa card, and for lukaotem olketa saen insaed dream. Nomata plande pipol tingse diswan hem gud nomoa and no savve spoelem man, Bible showimaot hao olketa wea duim diswan waka tugeta witim olketa demon. Olsem  example, Acts 16:16-18 storyim “wanfala demon bilong divination” wea givim paoa long wanfala gele for hem savve “talem wanem bae happen long future.” Bat taem aposol Paul aotem datfala demon from gele hia, hem no savve duim datwan nao.

12. Why nao hem danger tumas for trae story witim olketa wea dae finis?

¹² Narafala wei wea olketa demon savve trikim man hem wei wea olketa encouragem pipol for laek story witim olketa wea dae finis. Plande taem, pipol wea sorre from wanfala famili member or fren hem dae, bilivim samting wea no stret abaotem olketa wea dae finis. Maet wanfala kastom man givim olketa spesol information abaotem man wea dae finis or story long voice wea here olsem voice bilong datfala man. From diswan, plande pipol barava bilivim hao nomata man hem dae finis, really hem gohed for laef samwea, and wei for trae story witim man olsem bae helpem olketa wea laef for deal witim bigfala sorre wea olketa feelim. Bat really, datwan hem no tru comfort, and hem danger tumas. Why nao olsem? Bikos olketa demon savve copyim voice bilong man wea dae finis and  givim wanfala kastom man information abaotem samwan wea dae. (1 Samuel 28:3-19) And tu, iumi lanem finis long Chapter 6 hao olketa wea dae finis barava no laef nao. (Psalm 115:17) So “eniwan wea laek story witim olketa wea dae finis,” hem samwan wea olketa wicked spirit trikim, and hem duim samting wea againstim will bilong God. (Deuteronomy 18:10, 11; Isaiah 8:19) So iumi mas barava rejectim disfala bait wea olketa demon iusim and wea danger tumas.

13. Wanem nao staka pipol wea bifor olketa fraetem olketa demon win for duim?

¹³ Olketa wicked spirit trae for mekem pipol fraet tu. Distaem, Satan and olketa demon bilong hem savve olketa garem “shortfala taem nomoa” bifor Jesus putim olketa long datfala hol wea deep tumas, and olketa moa raf distaem winim enitaem bifor. (Revelation 12:12, 17) Nomata olsem, plande thousand pipol wea evri day olketa wari nogud olketa wicked spirit bae spoelem olketa, distaem olketa no fraet nao. Hao nao olketa lusim wei for fraet olsem? Wanem nao man savve duim nomata sapos hem barava insaed spiritism finis?

14. Olsem olketa Christian long Ephesus bifor, hao nao man savve kamap free from olketa wicked spirit?

¹⁴ Bible talem hao iumi savve againstim olketa wicked spirit, and tu, hao man wea evritaem story witim olketa savve kamap free from olketa. Tingim example bilong olketa Christian long Ephesus long taem bilong olketa aposol. Samfala duim spiritism bifor olketa kamap Christian. Taem olketa disaed for lusim wei for duim spiritism, wanem nao olketa duim? Bible hem sei: “Plande long olketa wea duim magic hipimap olketa buk bilong olketa and bonem front long evriwan.” (Acts 19:19) Wei for olketa niu Christian hia bonem olketa buk abaotem magic showimaot gudfala example for olketa wea laek againstim olketa wicked spirit distaem tu. Pipol wea laek for servem Jehovah need for torowem eni samting wea join witim spiritism. Insaed diswan hem olketa buk, magasin, movie, piksa,  and kaset wea mekhae long spiritism and wea mekem man tingse datwan hem gud nomoa. Insaed diswan tu hem olketa kastom samting wea man werem or karem for protectim hem from samting wea nogud.—1 Corinthians 10:21.

15. For againstim olketa wicked spirit, wanem nao iumi need for duim?

¹⁵ Plande year bihaen olketa Christian long Ephesus distroem olketa buk abaotem magic, aposol Paul hem sei olsem long olketa: ‘Iumi insaed wanfala faet againstim olketa wicked spirit.’ (Ephesians 6:12) Olketa demon no givap for trae mekem olketa stap anda long olketa. So wanem moa olketa Christian hia need for duim? Paul hem sei: “Winim evri samting, karem bigfala shield bilong faith mekem iufala savve stopem olketa arrow bilong fire bilong wicked wan [wea hem nao Satan].” (Ephesians 6:16) Taem shield bilong faith bilong iumi hem strong, iumi savve againstim olketa wicked spirit.—Matthew 17:20.

16. Hao nao iumi savve strongim faith bilong iumi?

¹⁶ So hao nao iumi savve strongim faith bilong iumi? Long wei for studyim Bible. Wanfala wall for protectim samting bae strong only sapos faondeson bilong datfala wall hem strong tu. Olsem tu, faith bilong iumi bae strong only sapos faondeson bilong hem strong, wea datwan nao hem stretfala savve from Word bilong God, Bible. Sapos iumi readim and studyim Bible evriday, faith bilong iumi bae kamap strong. Kaen faith olsem bae olsem wanfala strong wall wea protectim iumi from olketa wicked spirit.—1 John 5:5.

17. Wanem nao iumi mas duim mekem iumi savve againstim olketa wicked spirit?

¹⁷ Wanem nao nara samting wea olketa Christian long Ephesus need for duim? Olketa needim moa protection bikos olketa stap long taon wea pipol interest tumas for duim spiritism. So Paul talem olketa for ‘prea strong from heart and gohed for prea evritaem thru long paoa bilong spirit.’ (Ephesians 6:18) From iumi tu stap insaed world wea staka pipol duim spiritism, hem important tumas for barava askem Jehovah for protectim iumi taem iumi gohed for againstim olketa wicked spirit. Iumi  need for iusim tu nem bilong Jehovah taem iumi prea. (Proverbs 18:10) So iumi shud gohed for prea long God for “sevem iumi from datwan wea wicked,” Satan. (Matthew 6:13) Jehovah bae ansarem olketa prea olsem wea iumi talem from heart.—Psalm 145:19.

18, 19. (a) Why nao iumi savve sure iumi savve win for againstim olketa wicked spirit? (b) Next chapter bae ansarem wanem kwestin?

¹⁸ Olketa wicked spirit danger tumas, bat iumi no need for fraet long olketa sapos iumi againstim Devil and fren gud witim God long wei for duim will bilong Hem. (James 4:7, 8) Paoa bilong olketa wicked spirit hem garem spialaen. God panisim olketa long taem bilong Noah, and long future, olketa bae barava kasem judgment. (Jude 6) Tingim tu hao olketa strongfala angel bilong God protectim iumi. (2 Kings 6:15-17) Olketa angel hia barava laekem iumi for win againstim olketa wicked spirit. Olketa raeteous angel stap for encouragem and sapotim iumi. So iumi mas gohed for kasem strong and help from Jehovah and olketa angel bilong hem wea faithful. Iumi mas stap klia tu long evrikaen wei for duim spiritism and evritaem followim kaonsel insaed Word bilong God. (1 Peter 5:6, 7; 2 Peter 2:9) Sapos iumi duim olsem, iumi savve win for againstim olketa wicked spirit.

¹⁹ Bat why nao God letem olketa wicked spirit and wicked fasin for gohed spoelem pipol olsem? Next chapter bae ansarem datfala kwestin.