1, 2. (a) Why nao wei for savve long samwan wea garem bignem no minim iumi savve gud long hem? (b) Wanem nao tingting bilong pipol abaotem Jesus?

STAKA pipol long world garem bignem. Samfala garem bignem long community, taon, or kantri bilong olketa. Olketa narawan garem bignem bikos pipol evriwea long world savve long olketa. Bat wei for just savve long nem bilong man no minim iumi savve gud long hem. Hem no minim iumi savve long evri samting abaotem hem and fasin bilong hem.

² Evriwea long world pipol savve long Jesus Christ nomata hem laef samting olsem 2,000 year go finis. Bat plande no really sure long hu nao hem. Samfala sei hem wanfala gud man nomoa. Olketa narawan sei hem wanfala profet nomoa. And samfala bilivim hao Jesus hem God and iumi shud worshipim hem. Waswe, hem stret for iumi duim datwan?

3. Why nao hem important for iu savve long truth abaotem Jesus?

³ Hem important for iu savve long truth abaotem Jesus. Why nao olsem? Bikos Bible hem sei: “For kasem laef olowe, olketa mas kasem savve abaotem iu, datfala only tru God, and abaotem datwan wea iu sendem kam, Jesus Christ.” (John 17:3) Tru nao, wei for savve long truth abaotem Jehovah God and Jesus Christ savve lead go for man kasem laef olowe long paradaes. (John 14:6) And tu, Jesus showimaot  best example long wanem iumi shud duim long laef and hao for iumi deal witim olketa narawan. (John 13:34, 35) Long first chapter bilong disfala buk, hem storyim truth abaotem God. Long disfala chapter iumi bae lanem really samting wea Bible teachim abaotem Jesus Christ.

4. Wanem nao mining bilong olketa title “Messiah” and “Christ”?

⁴ Longfala taem bifor Jesus hem born, Bible talem hao God bae sendem kam datfala Messiah, wea hem nao datfala Christ. Olketa title “Messiah” (wea kam from wanfala Hebrew word) and “Christ” (wea kam from  wanfala Greek word) minim “Datwan wea God anointim.” Datfala word “anointim” minim God markem hem for garem spesol position. Long olketa nara chapter long disfala buk iumi bae lanem moa samting abaotem important part wea Messiah duim for fulfillim olketa promis bilong God. Iumi bae lane abaotem olketa blessing wea iumi savve kasem from Jesus distaem tu. Bat bifor Jesus hem born, masbi plande pipol laek for savve, ‘Hu nao man wea bae kamap Messiah?’

5. Wanem nao olketa disaepol bilong Jesus bilivim abaotem hem?

⁵ Long first century C.E., olketa disaepol bilong Jesus, wea hem from Nazareth, barava bilivim hao hem nao datfala Messiah. (John 1:41) Wanfala disaepol hia, wea nem bilong hem Simon Peter, no hol bak for sei olsem long Jesus: “Iu nao datfala Christ.” (Matthew 16:16) Hao nao olketa disaepol hia, and iumi tu, savve sure Jesus hem really datfala Messiah?

6. Wanem example nao helpem iumi for minim wei wea Jehovah helpem olketa wea faithful for luksavve long Messiah?

⁶ Olketa profet bilong God wea laef bifor Jesus hem born raetem staka information abaotem datfala Messiah. Information hia bae helpem olketa narawan for luksavve long hu nao hem. For minim diswan, tingim sapos samwan askem iu for go pikim wanfala man wea iu no savve long hem from wharf or airport. Sapos samwan talem iu samfala samting abaotem datfala man, datwan bae helpem iu for faendem hem. Olsem tu, Jehovah iusim olketa profet for raetem plande information abaotem samting wea datfala Messiah bae duim and samting wea bae happen long hem. Wei wea olketa profesi hia fulfill hem helpem olketa wea faithful for luksavve long hu nao datfala Messiah.

7. Wanem nao tufala profesi wea fulfill long Jesus?

⁷ Tingim tufala example nomoa. First wan, winim 700 year bifor Jesus hem born, profet Micah talem hao man wea God promis for sendem kam bae born long  Bethlehem, wanfala smol taon long Judah. (Micah 5:2) So wea nao Jesus hem born? Hem born barava long datfala taon! (Matthew 2:1, 3-9) Mek-tu example, staka year bifor datfala Messiah hem showim hemseleva, Daniel 9:25 markem barava year wea hem bae duim datwan, hem nao, 29 C.E. * Wei wea olketa profesi hia and olketa nara profesi fulfill pruvim hao Jesus nao datfala Messiah.

8, 9. Wanem samting wea pruvim Jesus hem Messiah nao hem showaot klia taem hem baptaes?

⁸ Olketa nara samting wea pruvim Jesus hem datfala Messiah hem showaot klia klosap long end bilong year 29 C.E. Datwan hem year wea Jesus go long John Baptaesa for baptaesim hem long Jordan River. Jehovah promis for givim John wanfala saen mekem hem fit for luksavve long hu nao datfala Messiah. John lukim datfala saen taem Jesus hem baptaes. Bible hem sei: “Bihaen hem baptaes, Jesus kamaot from wata; and semtaem nomoa, heven hem open, and hem lukim spirit bilong God kam daon long hem olsem wanfala kurukuru. And tu, wanfala voice from heven hem sei: ‘Diswan nao Son bilong mi, wea mi lovem, wea mi appruvim.’” (Matthew 3:16, 17) Bihaen John herem and lukim samting wea happen, hem barava feel sure hao Jesus nao datwan wea God sendem kam. (John 1:32-34) Long datfala taem wea God pourimaot spirit bilong hem long Jesus, hem kamap datfala Messiah, wea hem nao Christ, man wea God markem for kamap Leader and King.—Isaiah 55:4.

⁹ Olketa profesi long Bible wea fulfill and toktok bilong Jehovah tu showimaot klia hao Jesus nao datfala Messiah. Bat Bible ansarem nara tufala kwestin abaotem Jesus Christ tu: Wea nao hem kam from? And wanem nao olketa fasin bilong hem?

10. Wanem nao Bible teachim abaotem laef bilong Jesus bifor hem kam long earth?

¹⁰ Bible teachim hao Jesus stap long heven bifor hem kam long earth. Micah talem profesi hao Messiah bae born long Bethlehem, and hem talem tu hao hem “from taem bifor kam.” (Micah 5:2) Plande taem, Jesus talem hao hem stap long heven bifor hem kam long earth. (John 3:13; 6:38, 62; 17:4, 5) Hem wanfala spirit long heven, and hem garem spesol wei for fren witim Jehovah.

11. Hao nao Bible showimaot Jesus hem Son bilong Jehovah wea hem barava lovem winim olketa narawan?

¹¹ Jesus hem Son bilong Jehovah wea hem barava lovem winim olketa narawan, and gudfala reason stap for diswan. Bible kolem hem “firstborn bilong evri creation,” bikos hem first samting wea God creatim. * (Colossians 1:15) Nara samting tu mekem disfala Son hem spesol. Hem nao ‘only Son wea God seleva wakem.’ (John 3:16) Jesus hem only wan tu wea God iusim for helpem hem taem hem creatim evri nara samting. (Colossians 1:16) And tu, Bible kolem Jesus “datfala Word.” (John 1:14) Diswan showimaot hao God iusim hem for talem olketa message and instruction bilong hem long olketa nara spirit son bilong hem and olketa man.

12. Hao nao iumi savve datfala firstborn Son hem no semsem witim God?

¹² Waswe, firstborn Son hem semsem witim God, olsem hao samfala bilivim? Bible no teachim datwan. Olsem iumi lukim long paragraf bifor diswan, God creatim Jesus. So hem klia hao hem garem start, bat Jehovah God no garem start or end. (Psalm 90:2) No enitaem disfala only Son wea Jehovah seleva creatim trae for semsem witim Dadi  bilong hem. Bible showimaot klia hao Jehovah hem winim Son bilong hem. (John 14:28; 1 Corinthians 11:3) Jehovah nomoa hem “Olmaeti God.” (Genesis 17:1) So no eniwan semsem witim hem. *

13. Wanem nao hem minim taem Bible hem sei Son hem “image bilong datfala God wea iumi no savve lukim”?

¹³ Jehovah and firstborn Son bilong hem fren gud tugeta for plande billion year, longfala taem bifor Jehovah creatim olketa star and earth. Masbi tufala barava lovem each other! (John 3:35; 14:31) Disfala Son hem barava olsem Dadi bilong hem. Hem nao why Bible sei datfala Son hem “image bilong datfala God wea iumi no savve lukim.” (Colossians 1:15) Tru nao, long sem wei wea wanfala son savve barava olsem dadi bilong hem long samfala wei, disfala Son barava showimaot olketa fasin bilong Dadi bilong hem tu.

14. Hao nao datfala only son wea Jehovah seleva wakem hem born olsem wanfala man?

¹⁴ Disfala only son wea God seleva wakem lusim heven and hem kamap wanfala man hia long earth. Bat maet iu laek for savve, ‘Hao nao wanfala spirit savve born olsem wanfala man?’ For duim diswan, Jehovah duim wanfala mirakol. Hem tekem laef bilong firstborn Son bilong hem long heven and putim insaed bele bilong wanfala gele wea hem Jew and wea nem bilong hem Mary. Jehovah no needim eni dadi long earth for mekem Jesus grow insaed Mary. So from diswan, Mary bornem wanfala perfect son wea nem bilong hem Jesus.—Luke 1:30-35.

15. Hao nao samting wea Jesus talem and duim helpem iumi for savve gud long Jehovah?

¹⁵ Samting wea Jesus talem and duim taem hem long earth helpem iumi for savve gud long hem. Winim datwan, samting wea Jesus talem and duim helpem iumi for savve  gud long Jehovah. Hao nao olsem? Remember hao disfala Son showimaot olketa fasin bilong Dadi bilong hem long perfect wei. Hem nao why Jesus hem sei olsem long wanfala disaepol bilong hem: “Man wea lukim mi hem lukim Father tu.” (John 14:9) Fofala Gospel buk long Bible—Matthew, Mark, Luke, and John—talem iumi staka samting abaotem laef, waka, and olketa fasin bilong Jesus Christ.

16. Wanem nao main message bilong Jesus, and olketa teaching bilong hem kam from wea nao?

¹⁶ Evriwan kolem Jesus “Teacher.” (John 1:38; 13:13) Wanem nao hem teachim? Main message bilong hem nao, hem “gud nius abaotem kingdom,” wea datwan hem Kingdom bilong God, datfala gavman long heven wea bae rul ovarem full earth and givim staka blessing long olketa man wea obey. (Matthew 4:23) Diswan hem message bilong hu nao? Jesus hem sei: “Samting mi teachim hem no bilong mi, bat bilong datwan wea sendem mi kam,” wea hem nao Jehovah. (John 7:16) Jesus savve hao Dadi bilong hem laekem olketa man for herem gud nius abaotem Kingdom. Long Chapter 8, bae iumi lanem moa samting abaotem Kingdom bilong God and samting wea hem bae duim.

17. Wea nao Jesus hem teach, and why nao hem barava waka hard for teachim olketa narawan?

¹⁷ Long wea nao Jesus hem teach? Long evriwea wea hem lukim pipol—long bush, long olketa taon, vilij, market, and long haos bilong pipol. Jesus no tingse pipol shud kam long hem. Hem nao go for story witim olketa. (Mark 6:56; Luke 19:5, 6) Why nao Jesus hem barava evritaem preach and teachim pipol? Bikos wei for duim olsem hem will bilong Dadi bilong hem. Jesus hem evritaem duim will bilong Dadi bilong hem. (John 8:28, 29) Bat nara reason why hem preach, hem bikos hem feel sorre for pipol wea kam for lukim hem. (Matthew 9:35, 36) Olketa bigman bilong olketa Jew shud teachim truth long pipol, bat olketa no duim datwan. Jesus savve hao pipol barava need for herem datfala Kingdom message.

18. Olketa wanem fasin bilong Jesus nao iu barava laekem?

 ¹⁸ Jesus hem barava kaen and hem tingim pipol. Dastawe pipol feel free for kam long hem. Nomata olketa pikinini tu bat no fraet long hem. (Mark 10:13-16) Jesus hem no teksaed. Hem heitim raverave fasin and olketa samting pipol duim wea no stret. (Matthew 21:12, 13) Long datfala taem, olketa man barava no respectim olketa woman and olketa woman no garem olketa sem right olsem man, bat Jesus tingim olketa and showimaot respect long olketa. (John 4:9, 27) Jesus hem barava hambol. Wantaem, hem wasim leg bilong olketa aposol bilong hem, wea plande taem datwan hem samting wea wanfala slave nomoa bae duim.

19. Wanem example nao showimaot Jesus hem tingim olketa need bilong nara pipol?

¹⁹ Jesus hem luksavve long olketa need bilong pipol. Diswan hem barava showaot taem hem iusim spirit bilong God for healim pipol long mirakol wei. (Matthew 14:14) Olsem example, wanfala man wea garem leprosy kam long Jesus and sei: “Sapos iu willing, iu savve mekem mi kamap klin.”  Jesus barava minim wei wea disfala man hem safa and garem pain. From hem feel sorre long hem, hem tasim datfala man and sei: “Ia mi willing. Iu kamap klin.” And hem healim hem. (Mark 1:40-42) Tingim hapi bilong datfala man from Jesus healim hem!

20, 21. Hao nao Jesus showimaot gudfala example bilong wei for loyal and obeyim God?

²⁰ Jesus showimaot best example bilong wei for loyal and obeyim God. Hem gohed faithful long Dadi bilong hem long heven nomata hem kasem olketa test, pipol againstim hem, and hem safa long bigfala wei. Jesus hem strong for againstim olketa temptation bilong Satan and hem win long datwan. (Matthew 4:1-11) Wantaem, samfala relative bilong Jesus no putim faith long hem, and olketa sei hem “kamap krangge nao.” (Mark 3:21) Bat Jesus no letem olketa for affectim hem; hem gohed nomoa for duim waka bilong God. Nomata pipol tok spoelem and killim hem, Jesus  gohed for kontrolem hemseleva, and hem no trae for pei bak long olketa.—1 Peter 2:21-23.

²¹ Jesus hem faithful go kasem taem hem dae, nomata olketa enemy bilong hem barava raf and mekem hem kasem bigfala pain. (Philippians 2:8) Tingim nogud samting wea happen long hem long last day bifor hem dae. Olketa kasholem hem, olketa nogud judge iusim olketa witness wea laea for accusim hem, olketa raf sekson mekfani long hem, and olketa soldia whipim hem nogud. Olketa nilam hem long wanfala post, and just bifor hem dae hem sei: “Hem fulfill nao!” (John 19:30) Nomata olsem, long mek-thri day bihaen Jesus hem dae, Dadi bilong hem long heven resurrectim hem for kamap wanfala spirit moa. (1 Peter 3:18) Foti day bihaen, hem go bak long heven. Long there, hem “sidaon long raet saed bilong God” and weit for kasem paoa olsem king.—Hebrews 10:12, 13.

22. Wei wea Jesus faithful go kasem taem dae mekem wanem chance kamap for iumi?

²² Wei wea Jesus hem faithful go kasem taem hem dae mekem wanem chance kamap? Dae bilong Jesus mekem chance kamap for iumi savve kasem laef olowe long paradaes, wea datwan nao hem plan bilong Jehovah long firstaem. Next chapter bae storyim why dae bilong Jesus mekem diswan savve kamap.