LONG Bible bilong iu, wanem nao Psalm 83:18 hem sei? Long New World Translation of the Holy Scriptures hem sei: “Mekem pipol savve hao iu, wea nem bilong iu Jehovah, iu nomoa Most Hae ovarem full earth.” Plande nara Bible talem sem samting tu. Nomata olsem, plande Bible no garem datfala nem Jehovah. Olketa changem datwan witim olketa title olsem “Lord” or “Eternal.” Wanem nao shud stap long disfala verse, wanfala title or datfala nem Jehovah?

Disfala verse hem story abaotem wanfala nem. Long Hebrew languis wea olketa iusim for raetem bigfala haf bilong Bible, wanfala spesol nem hem stap long verse hia. Spelling bilong datwan long Hebrew raeting hem יהוה (YHWH). Long English, wei for raetem datfala nem wea staka iusim hem “Jehovah.” Waswe, wanfala verse insaed Bible nomoa garem datfala nem? Nomoa. Hem stap klosap 7,000 taem long olketa Hebrew Scripture wea olketa raetem firstaem!

Waswe, nem bilong God hem important? Tingim datfala example prea wea Jesus givim. Hem start olsem: “Dadi bilong mifala wea stap long heven, mifala laekem for evriwan mas ting long nem bilong iu olsem hem holy.” (Matthew 6:9) Bihaen, Jesus hem sei olsem long God: “Dadi, mekem nem bilong iu kasem glory.” God ansa kam from heven and sei: “Mi mekem hem kasem glory finis and mi bae mekem hem kasem glory moa.” (John 12:28) So hem klia, nem bilong God hem barava important. Sapos olsem, why nao samfala Bible changem nem bilong God witim olketa title?

Luk olsem diswan hem from tufala main reason. First reason, staka pipol sei iumi shud no talem datfala nem bikos no eniwan distaem savve long barava stretfala wei for talem datfala nem. Hebrew languis wea olketa iusim for raetem Bible bifor no garem eni vowel saond. Dastawe no eniwan distaem barava savve  long hao pipol bifor kam talem datfala YHWH. Nomata olsem, waswe, diswan hem gudfala reason for no iusim nem bilong God? Long taem wea olketa raetem Bible, maet olketa talem nem bilong Jesus olsem Yeshua or maet Yehoshua, bat no eniwan really sure long hao olketa barava talem datfala nem. Nomata olsem, pipol evriwea long world distaem iusim olketa difren wei for raetem and talem nem bilong Jesus wea followim languis bilong olketa. Maet olketa no barava savve hao pipol long taem bilong Jesus talem nem bilong hem, bat datwan no stopem olketa for iusim datfala nem. Olsem tu, sapos iu go long nara kantri, maet wei wea pipol long there talem nem bilong iu hem barava here difren from hao pipol long hom bilong iu talem datwan. So, maet iumi no barava savve long stretfala wei for talem nem bilong God, bat datwan hem no gudfala reason for no iusim datwan.

Mek-tu reason wea plande taem pipol talem for wei wea olketa aotem nem bilong God from Bible hem bikos long wanfala kastom bilong olketa Jew wea start longtaem kam finis. Staka bilivim hao no eniwan shud talem nem bilong God. Luk olsem olketa bilivim diswan bikos long wei wea olketa minim rong wanfala law long Bible wea sei: “Iu mas no iusim nem bilong God bilong iu, Jehovah, long nogud wei, bikos Jehovah bae panisim man wea iusim nem bilong hem long nogud wei.”—Exodus 20:7.

Disfala law tambuim wei for iusim nem bilong God long nogud wei. Bat waswe, datwan hem tambuim man for iusim datfala nem long wei wea showimaot respect? Nomoa nao. Olketa man wea raetem olketa Hebrew Scripture (datfala “Old Testament”) olketa faithful and live followim datfala Law wea God givim long olketa Israelite bifor. Nomata olsem, olketa iusim nem bilong God staka taem. Olsem example, olketa putim datfala nem insaed plande psalm wea staka worshiper wea hipap savve singim. Jehovah God givim instruction long olketa worshiper bilong hem tu for olketa mas singaot go long nem bilong hem, and olketa wea faithful obeyim komand for duim datwan. (Joel 2:32; Acts 2:21) So from diswan, olketa Christian distaem no hol bak for iusim nem bilong God long wei wea showimaot respect, olsem Jesus hem duim.—John 17:26.

 Hem wanfala serious mistek for changem nem bilong God witim olketa title. Diswan mekem pipol feel olsem God hem wanfala paoa nomoa and hem farawe from iumi, bat datwan hem nogud bikos Bible encouragem olketa man for garem wei for “fren gud witim Jehovah.” (Psalm 25:14) Tingim wanfala barava gud fren bilong iu. Waswe, bae iu savve fren gud witim hem sapos iu no savve long nem bilong hem? Olsem tu, sapos pipol no savve long nem bilong God, Jehovah, hao nao olketa savve barava fren gud witim hem? And tu, taem pipol no iusim nem bilong God, olketa no savve long nambawan mining bilong hem. Wanem nao nem bilong God hem minim?

God nao explainim mining bilong nem bilong hem long faithful servant bilong hem Moses. Taem Moses hem ask abaotem nem bilong God, Jehovah hem sei: “Mi bae kamap wanem mi bae kamap.” (Exodus 3:14) Datfala Rotherham Bible hem sei: “Mi Bae Kamap eni samting wea mi laek for kamap.” So Jehovah savve kamap eni samting wea hem need for kamap for fulfillim olketa plan bilong hem.

Tingim sapos iu savve kamap eni samting wea iu laek for kamap. Wanem nao bae iu duim for helpem olketa fren bilong iu? Sapos wanfala hem barava sik, iu savve kamap wanfala doctor and healim hem. Sapos narawan hem lusim staka selen, iu savve kamap wanfala rich man and givim selen long hem. Bat tru samting nao, iu no savve duim datwan. Iumi evriwan olsem. Taem iu gohed for studyim Bible, bae iu sapraes for lukim hao Jehovah savve kamap eni samting wea hem need for kamap for fulfillim olketa promis bilong hem. And hem mekem hem hapi for iusim paoa bilong hem for helpem olketa wea lovem hem. (2 Chronicles 16:9) Pipol wea no savve long nem bilong hem no luksavve long olketa barava naesfala fasin bilong Jehovah olsem.

So hem klia hao datfala nem Jehovah shud stap insaed Bible. Wei for savve long mining bilong datfala nem and iusim datwan evritaem long worship bilong iumi savve barava helpem iumi for fren gud witim Dadi bilong iumi long heven, Jehovah. *