1, 2. Bihaen iu lusim false religion, wanem kwestin nao iu mas askem iuseleva, and long tingting bilong iu, why nao datwan hem important?

TINGIM sapos iu faendemaot hao samwan poisonim olketa ples wea iu go for tekem wata, and from iu drinkim datfala wata, laef bilong iu stap long danger. So wanem nao bae iu duim? Maet iu go stap long difren ples sapos iu savve duim datwan. Bat nomata iu duim datwan, iu mas tingim wanfala important kwestin, ‘Waswe, poison hia hem spoelem mi finis?’

² Hem olsem tu saed long false religion. Bible teachim hao kaen false worship olsem hem fulap witim olketa teaching and samting wea no klin and wea savve spoelem man. (2 Corinthians 6:17) Dastawe hem important for iu go aot from “Bigfala Babylon,” wea hem nao evri false religion long world. (Revelation 18:2, 4) Waswe, iu duim diswan finis? Sapos olsem, datwan hem gud tumas. Bat for lusim wanfala false religion iu mas duim moa samting winim for talem olketa nomoa hao iu no laek for member bilong datfala religion nao. Bihaen, iu mas askem iuseleva, ‘Waswe, eni samting bilong false worship hem gohed for affectim mi yet?’ Tingim samfala example.

3. (a) Wanem nao Bible hem sei abaotem wei for iusim olketa idol, and why nao hem savve hard for samfala acceptim tingting bilong God abaotem olketa idol? (b) Wanem nao iu shud duim sapos iu garem eni samting wea join witim false worship?

³ Maet samfala garem olketa idol long haos bilong olketa for plande year finis. Waswe, iu garem olketa idol tu? Sapos olsem, maet long tingting bilong iu, wei for no iusim olketa samting hia for prea long God hem rong. Maet olketa samting hia hem barava important long iu. Bat God nao talem iumi hao for worshipim hem, and Bible teachim iumi hao hem no laekem iumi for iusim olketa idol. (Exodus 20:4, 5; Psalm 115:4-8; Isaiah 42:8; 1 John 5:21) So iu savve showimaot iu strong for followim tru worship taem iu torowem eni samting wea join witim false worship. Jehovah hem “barava heitim” olketa samting hia, and hem important for iu garem sem tingting abaotem olketa tu.—Deuteronomy 27:15.

4. (a) Hao nao iu savve wei for worshipim olketa laen dadi hem iusles? (b) Why nao Jehovah tambuim olketa Israelite for duim spiritism?

⁴ Wei for worshipim olketa laen dadi hem samting wea pipol  long plande religion duim. Bifor samfala lanem truth from Bible, olketa bilivim hao olketa wea dae go stap long wanfala ples and olketa savve helpem or spoelem olketa wea laef yet. Maet bifor, iu barava traem best bilong iu for mekem olketa laen dadi bilong iu hapi. Bat iu lanem finis long Chapter 6 bilong disfala buk hao olketa wea dae no gohed for laef long eni ples. So hem iusles for trae story witim olketa. Maet hem luk olsem wanfala message hem kam from wanfala relative wea dae finis, bat really, datwan kam from olketa demon. Dastawe Jehovah tambuim olketa Israelite for trae story witim olketa wea dae finis or for join insaed eni wei for duim spiritism.—Deuteronomy 18:10-12.

5. Wanem nao iu savve duim sapos iu iusim olketa idol or worshipim olketa laen dadi bifor?

⁵ Sapos iu worshipim olketa laen dadi or olketa idol bifor, wanem nao iu savve duim? Readim and ting raonem olketa part bilong Bible wea showimaot tingting bilong Jehovah abaotem olketa samting hia. Talem Jehovah evriday hao iu laek for strong for tru worship, and askem hem for helpem iu garem sem tingting olsem hem.—Isaiah 55:9.

6, 7. (a) Pipol sei Christmas hem for celebratem wanem, and waswe, olketa follower bilong Jesus long taem bilong hem celebratem datwan? (b) Long taem bilong olketa disaepol bilong Jesus, olketa birthday celebration join witim olketa wanem samting?

⁶ Wanfala wei wea false religion savve mekem worship bilong iumi dirty hem saed long samfala celebration wea olketa markem. Olsem example, tingim Christmas. Olketa sei Christmas hem for celebratem birthday bilong Jesus Christ, and klosap evri religion wea sei olketa Christian celebratem datwan. Bat no eni pruv stap for sei olketa disaepol long taem bilong Jesus celebratem datwan. Datfala buk Sacred Origins of Profound Things hem sei: “For tu handred year bihaen Christ hem born, no eniwan savve, and only tu-thri pipol nomoa interest long barava day wea hem born.”

⁷ Nomata sapos olketa disaepol bilong Jesus savve long barava day wea hem born, olketa bae hard for celebratem datwan. Why  nao olsem? Bikos olsem The World Book Encyclopedia hem talem, olketa first Christian “ting long wei for celebratem birthday bilong samwan olsem wanfala kastom bilong olketa heathen.” Bible storyim samfala wea celebratem birthday bilong olketa, bat olketa hia olketa ruler wea no worshipim Jehovah. (Genesis 40:20; Mark 6:21) Olketa celebratem olketa birthday for honorim olketa heathen god tu. Olsem example, long May 24 olketa bilong Rome celebratem birthday bilong datfala woman god Diana. Long next day, olketa celebratem birthday bilong Apollo, wea hem nao sun-god bilong olketa. So olketa birthday celebration join witim olketa heathen kastom, no witim Christian Wei.

8. Explainim wei wea olketa birthday celebration join witim olketa kastom samting.

⁸ Narafala reason hem stap for why olketa Christian long taem bilong Jesus no celebratem birthday bilong hem. Masbi olketa disaepol bilong hem savve hao olketa birthday celebration join witim olketa kastom samting. Olsem example, plande pipol long Greece and Rome bifor bilivim hao wanfala spirit stap taem each man hem born and datfala spirit protectim hem for full laef bilong hem. Olketa wea no Christian long datfala taem celebratem olketa birthday bikos olketa tingse wei for duim olsem bae mekem olketa god bilong olketa protectim man wea olketa celebratem birthday bilong hem. Hard for Jehovah hapi witim eni celebration wea joinim Jesus witim olketa kastom samting. (Isaiah 65:11, 12) So why nao staka pipol celebratem Christmas?

9. Why nao olketa markem December 25 olsem day for celebratem wei wea Jesus hem born?

⁹ Pipol start for celebratem Christmas plande handred year bihaen Jesus hem laef long earth. Olketa celebratem datwan long December 25. Bat datwan hem no day wea Jesus born. So why nao olketa chusim December 25? Luk olsem samfala wea bihaen olketa sei olketa Christian “laekem for datfala date mas long semtaem olsem datfala heathen festival bilong Roman pipol bifor, wea hem for celebratem ‘birthday bilong sun.’” (The New Encyclopædia  Britannica) Long cold season olketa heathen long olketa kantri long Europe and Middle East garem olketa celebration for mekem laet and hot bilong sun hem strong bak. Olketa duim diswan bikos olketa lukim gogo bilong sun long skae hem isisi change and muv awe from olketa and olketa laekem hem for kam bak. Long tingting bilong olketa, December 25 hem day wea sun hem start for muv kam bak long ples long skae wea hem stap long hot season. For mekem olketa heathen hia willing for kamap Christian, olketa bigman bilong church mekem datfala heathen idea kamap part bilong worship, and olketa trae for mekem hem luk olsem datwan hem wanfala “Christian” celebration. *

10. Long bifor kam, why nao samfala pipol no celebratem Christmas?

¹⁰ For longfala taem finis, pipol savve hao Christmas hem kam from olketa heathen celebration. From Christmas no kam from Bible, olketa tambuim datwan long England and samfala colony long America long mek-17 century. Olketa strict tumas long diswan, dastawe nomata sapos man hem just stap long haos and no waka long Christmas day, hem mas peim compensation. Bat no longtaem bihaen, olketa start for followim moa olketa samting wea join witim Christmas, and tu, samfala niu samting wea olketa addim go long datfala celebration. Gogo, Christmas kamap wanfala barava important celebration, and kam kasem distaem, hem barava big samting yet long plande kantri. Bat from Christmas hem  join witim false religion, olketa wea laek for mekem God hapi no celebratem datwan or eni nara celebration wea kam from worship bilong olketa heathen bifor. *

11. Why nao samfala pipol celebratem olketa samting olsem Christmas, bat wanem nao shud moa important long iumi winim eni nara samting?

¹¹ Samfala agree hao olketa celebration olsem Christmas kam from olketa heathen samting, nomata olsem, long tingting bilong olketa hem no rong for celebratem olketa. Tru nao, klosap evriwan wea celebratem olketa samting hia no tingim hao datwan hem join witim false worship. And tu, olketa celebration hia givim chance for olketa member bilong famili hipap and enjoyim lelebet hapitaem tugeta. Waswe, hem nao wei wea iu ting long diswan? Sapos olsem, maet samting wea mekem hem hard for lusim olketa celebration hia and followim tru worship, hem wei wea iu lovem tumas famili bilong iu, no wei for lovem false religion. Jehovah nao startim famili arrangement and iu savve sure hao hem laekem iu for stap gud witim olketa relative bilong iu. (Ephesians 3:14, 15) Bat iu savve strongim wei wea iu fren gud witim olketa famili member long olketa wei wea God acceptim. Paul storyim samting wea shud moa important long iumi winim eni nara samting taem hem sei: “Gohed for mek sure long samting wea Lord hem acceptim.”—Ephesians 5:10.

12. Givim example wea helpem iumi minim why iumi shud stap klia long olketa kastom and celebration wea kam from olketa samting wea no klin.

¹² Maet long tingting bilong iu, reason why olketa startim wanfala celebration bifor hem difren from reason why pipol celebratem datwan distaem. Waswe, reason why olketa startim wanfala celebration firstaem hem important? Ia! Tingim sapos iu lukim wanfala loli long drain. Waswe, bae iu aotem from drain and kaikaim? Barava nomoa nao! Datfala loli hem dirty. Olsem datfala  loli, maet hem luk olsem olketa celebration bilong world olketa swit and naes, bat really, olketa kam from olketa samting wea no klin. For kamap strong for tru worship, iumi need for garem sem tingting olsem profet Isaiah, wea sei olsem long olketa tru worshiper: “No tasim eni samting wea no klin.”—Isaiah 52:11.

13. Wanem nao maet samfala hard samting wea kamap taem iu no join insaed samfala celebration?

¹³ Maet iu feisim samfala hard samting taem iu chus for no join insaed samfala celebration. Olsem example, taem olketa long ples wea iu waka lukim hao iu no joinim olketa long samfala celebration, maet olketa konfius. Waswe sapos olketa laek givim iu wanfala Christmas present? Waswe, hem rong for acceptim datwan? Waswe sapos marit partner bilong iu no garem olketa sem biliv olsem iu? Hao nao iu savve mek sure olketa pikinini bilong iu no feel olsem olketa missim gud samting from olketa no join insaed olketa celebration olsem?

14, 15. Wanem nao iu savve duim sapos samwan talem “Hapi Christmas” long iu or hem laek givim wanfala present long iu?

¹⁴ Fasin for luksavve bae helpem iu savve long best wei for deal witim olketa samting wea kamap. Sapos hem wei bilong pipol for sei “Hapi Christmas,” or olketa nara toktok olsem, maet iu savve talem thankiu nomoa long olketa. Bat waswe sapos iu mas deal witim samwan wea iu lukim or waka witim evritaem? Maet iu disaed for talem moa samting long hem. Evritaem, iumi mas tingim feeling bilong man. Bible talem disfala advaes: “Toktok bilong iufala mas kaenfala evritaem, garem salt, mekem iufala savve hao for givim ansa long each wan.” (Colossians 4:6) Careful for no talem samting wea mekem man tingse iu no respectim hem. Bat explainim why iu no duim datwan. Explainim long kliafala wei hao iu no againstim wei for enjoyim hapitaem and wei for givim present, bat iu disaed for duim olketa samting hia long olketa narataem, no long datfala day.

¹⁵ Waswe sapos samwan laek for givim wanfala present long iu? Diswan bae depend long wanem nao happen. Maet datfala man  hem sei: “Mi savve iu no celebratem diswan. Nomata olsem, mi laek for givim iu disfala present.” Maet iu disaedem hao wei for acceptim datfala present hem no olsem wei for tekpart long datfala celebration. Sapos datfala man no savve gud long why iu no tekpart, maet iu savve explainim datwan long hem. For duim olsem bae helpem hem minim why iu no givim wanfala present long hem. Long narasaed, hem bae no wise for acceptim wanfala present sapos hem klia hao man givim datwan bikos hem laek pruvim iu no strong for followim samting iu bilivim, and hao iu bae isi nomoa for brekem faith bilong iu for kasem material samting.

16. Hao nao iu savve tingim feeling bilong pipol saed long olketa celebration bilong false religion?

¹⁶ Waswe sapos olketa long famili no garem sem biliv olsem iu? Iu mas isisi witim olketa. Iu no need for argue abaotem evri samting wea olketa relative bilong iu laek for celebratem. Iu laekem olketa for respectim tingting and biliv bilong iu, so iu mas respectim tingting and biliv bilong olketa tu. (Matthew 7:12) Stap klia long eni samting wea bae mekem iu join insaed datfala celebration. Nomata olsem, trae for balance saed long olketa samting wea no really part bilong wanfala celebration. Bat no duim eni samting wea bae spoelem conscience bilong iu.—1 Timothy 1:18, 19.

17. Hao nao iu savve helpem pikinini bilong iu for no feel olsem hem missim gud samting taem hem lukim olketa narawan join insaed samfala celebration?

¹⁷ Wanem nao iu savve duim sapos olketa pikinini bilong iu feel olsem olketa missim gud samting from wei wea iufala no join insaed olketa celebration hia? Diswan bae barava depend long wanem iu duim long olketa narataem insaed year. Samfala parents markem olketa narafala taem for givim present long olketa pikinini. Wanfala best present wea iu savve givim long pikinini bilong iu, hem love and taem bilong iu.

18. Hao nao wei for attendim olketa Christian meeting savve helpem iu for strong for followim tru worship?

¹⁸ For mekem God hapi, iu mas rejectim false worship and  strong for followim tru worship. Hao nao iu savve duim diswan? Bible hem sei: “Iumi mas tingim and muvim each other for showimaot love and duim gudfala waka, no lusim wei for hipap tugeta, olsem fasin bilong samfala, bat encouragem each other, and duim long wei wea moa big taem iufala lukim hao datfala day hem kakam moa klos.” (Hebrews 10:24, 25) Iu bae hapi taem iu attendim olketa Christian meeting wea givim iu chance for worshipim God long wei wea hem acceptim. (Psalm 22:22; 122:1) Long olketa meeting olsem, olketa faithful Christian savve “encouragem each other.”—Romans 1:12.

19. Why nao hem important for story witim olketa narawan abaotem olketa samting iu lanem from Bible?

¹⁹ Narafala wei wea iu savve showimaot iu strong for tru worship hem for story long olketa narawan abaotem olketa samting iu lanem from wei wea iu studyim Bible witim Olketa Jehovah’s Witness. Tru nao, staka pipol “feel nogud and krae” bikos long olketa wicked samting wea gohed long world distaem. (Ezekiel 9:4) Maet iu savve long samfala pipol olsem. Hao sapos iu trae for story long olketa abaotem Bible hope bilong iu for future? Taem iu kaban witim olketa tru Christian and story witim olketa narawan abaotem olketa nambawan samting wea iu lanem from Bible, bae iu faendem hao eni feeling bilong iu for laek followim yet olketa samting bilong false worship bae isisi aot from heart bilong iu. Sapos iu strong for followim tru worship, bae iu barava hapi and kasem staka blessing.—Malachi 3:10.