LONG firstaem wea olketa raetem Bible, olketa iusim datfala Hebrew word sheʼohlʹ and Greek word wea garem sem mining, haiʹdes, winim 70 taem. Tufala word evriwan abaotem taem man hem dae. Samfala English Bible iusim olketa word olsem “grev,” “hell,” or “hol.” Bat klosap evri languis no garem eni word wea garem barava sem mining olsem Hebrew and Greek word hia. So dastawe New World Translation hem iusim “Sheol” and “Hades.” Wanem nao really mining bilong tufala word hia? Bae iumi lukim wei wea olketa man for raetem Bible iusim olketa word hia long olketa difren scripture.

Ecclesiastes 9:10 hem sei: “Nomoa eni waka or plan or savve or wisdom stap long Sheol, wea hem nao ples wea iu bae go long hem.” Waswe, diswan minim Sheol hem wanfala ples wea maet iumi berem finis samwan iumi lovem? Nomoa. Taem Bible storyim wanfala ples wea pipol berem samwan, hem iusim olketa nara Hebrew and Greek word, no sheʼohlʹ and haiʹdes. (Genesis 23:7-9; Matthew 28:1) And tu, Bible no iusim datfala word “Sheol” for wanfala grev wea olketa berem tu-thri man tugeta, olsem wanfala area for berem full famili or kaen bigfala grev for berem staka pipol wea dae.—Genesis 49:30, 31.

So sapos olsem, “Sheol” hem wanem kaen ples? Word bilong God showimaot hao “Sheol,” or “Hades,” hem minim moa samting winim wanfala barava bigfala grev for staka man wea dae. Olsem example, Isaiah 5:14 talem hao Sheol hem “garem staka spes, and hem openem mouth bilong hem waed winim olketa spialaen.” Long tokpiksa wei, Sheol  hem swallowim finis staka million pipol, nomata olsem, hem hangre for staka moa. (Proverbs 30:15, 16) Wanfala really beregraon savve fulap and nomoa eni spes for berem man nao, bat ‘Sheol no savve satisfae.’ (Proverbs 27:20) Diswan hem minim, no enitaem Sheol hem full. Hem no garem eni spialaen. So Sheol or Hades hem no wanfala ples long earth wea man savve go lukim. Hem minim nomoa, grev bilong olketa man, wea hem wanfala tokpiksa ples wea klosap evri man wea dae stap long there.

Samting wea Bible teachim abaotem resurrection helpem iumi for minim moa samting abaotem “Sheol” and “Hades.” Bible showimaot hao Sheol and Hades hem ples for olketa wea dae and wea garem hope for savve resurrect bihaen. * (Job 14:13; Acts 2:31; Revelation 20:13) Word bilong God showimaot tu hao hem no just olketa wea servem Jehovah bifor olketa dae nomoa wea stap insaed Sheol or Hades, bat plande wea no servem hem tu stap long there. (Genesis 37:35; Psalm 55:15) Dastawe Bible teachim iumi “hao wanfala resurrection bae kamap for olketa wea raeteous and olketa wea no raeteous.”—Acts 24:15.