1. Long wea nao iumi savve lane abaotem future?

WASWE, enitaem iu herem nius long radio and barava wari abaotem future? Olketa barava nogud samting savve seknomoa happen, wea mekem hem hard for savve long wanem nao bae happen tumoro. (James 4:14) Nomata olsem, Jehovah savve long wanem bae happen long future. (Isaiah 46:10) Longfala taem bifor, Word bilong hem, Bible, talem hao olketa nogud samting bae happen long taem bilong iumi, bat hem talem hao olketa nambawan samting bae happen tu.

2, 3. Wanem nao olketa disaepol askem Jesus, and wanem nao hem sei?

² Jesus Christ story abaotem Kingdom bilong God wea bae finisim olketa wicked samting and mekem earth kamap wanfala paradaes. (Luke 4:43) Pipol laek for savve long wanem taem nao Kingdom bae kam. Olketa disaepol bilong Jesus askem hem: “Wanem nao bae saen for showimaot iu stap moa and wea showimaot olketa samting wea happen long world distaem bae finis?” (Matthew 24:3) Jesus talem olketa hao Jehovah God nomoa savve long barava  taem wea disfala world bae finis. (Matthew 24:36) Nomata Jesus no talem olketa disaepol barava taem wea end bae kam, hem storyim olketa samting wea bae kamap long earth bifor Kingdom hem mekem olketa man for garem tru peace and sef living. Samting wea hem storyim hem gohed distaem!

³ Bae iumi lukluk long pruv wea showimaot iumi stap insaed taem wea ‘world bae finis,’ bat firstaem, iumi tingim wanfala war wea no eni man lukim. Hem kamap long heven, and samting wea kamaot from datwan hem affectim iumi.

4, 5. (a) Wanem nao happen long heven no longtaem bihaen Jesus hem kamap King? (b) Wanem nao Revelation 12:12 sei bae kamaot from datfala war long heven?

⁴ Long Chapter 8, hem explainim hao Jesus Christ kamap King long heven long year 1914. (Daniel 7:13, 14) No longtaem bihaen hem kamap King, Jesus hem duim samting. Bible hem sei, “War hem start long heven. Michael [wea datwan hem nara nem for Jesus] and olketa angel bilong hem faet againstim datfala big snek [wea hem nao Satan], and datfala big snek and olketa angel bilong hem faet bak.” * Satan and olketa wicked angel bilong hem, olketa demon, lus long datfala faet and Jesus torowem olketa kam daon long earth. Olketa faithful angel bilong God hapi from wei wea Satan and olketa demon bilong hem no stap long there nao. Bat olketa man bae no garem hapi olsem, bikos Bible hem sei: “Trabol for earth . . . bikos Devil hem kam daon long iufala, and hem kros tumas, from hem savve hem garem shortfala taem nomoa.”—Revelation 12:7, 9, 12.

⁵ Lukim samting wea kamaot from datfala war long heven. From Satan hem kros tumas, hem mekem bigfala trabol kamap for olketa long earth. Bae iu lanem hao distaem, iumi stap long datfala taem bilong trabol. Bat datwan bae gohed  for “shortfala taem nomoa.” Nomata Satan tu bat luksavve long datwan. Disfala short taem wea Bible storyim, hem “olketa last day.” (2 Timothy 3:1) Iumi savve barava hapi hao klosap nao God bae finisim wei wea Devil hem mek trabol hia long earth! Bae iumi storyim samfala samting wea happen distaem, wea hem nao olketa samting wea Bible talem bae happen. Olketa samting hia pruvim hao iumi insaed olketa last day and hao klosap nao Kingdom bilong God bae mekem evriwan wea lovem Jehovah for kasem olketa blessing wea bae gohed for olowe. Firstaem, iumi storyim fofala samting insaed datfala saen wea Jesus sei bae showaot long taem bilong iumi.

6, 7. Hao nao samting wea Jesus talem abaotem war and wei wea kaikai bae short hem fulfill distaem?

⁶ “Nation bae againstim nation and kingdom bae againstim kingdom.” (Matthew 24:7) Staka million pipol dae long olketa war wea kamap insaed 100 year wea go pas. Wanfala savveman long England hem sei: “Staka pipol dae from olketa war long mek-20 century winim enitaem bifor. . . . For klosap full wan handred year hia, war hem gohed long earth.” Report from wanfala organization wea studyim olketa samting wea gohed long world, hem sei: “Long  [mek-20] century, war spoelem thri taems moa pipol winim namba bilong pipol wea evri war wea kamap insaed 1,900 year bifor datwan hem spoelem.” Start kam long 1914, winim 100 million pipol dae from olketa war. Staka million pipol safa and feel sorre tumas bikos olketa relative and fren bilong olketa dae long war. Maet wanfala relative bilong iu tu dae long war.

⁷ “Kaikai bae short.” (Matthew 24:7) Olketa wea duim research talem hao insaed 30 year wea go pas, olketa kantri growim staka moa kaikai winim bifor. Nomata olsem, pipol no garem inaf selen for baem kaikai or for baem land for wakem garden. Winim wan billion pipol safa from olketa barava hangre fogud. World Health Organization talem hao wei for no garem inaf kaikai hem wanfala main samting wea kosim winim faev million pikinini each year for dae.

8, 9. Wanem nao showimaot olketa profesi bilong Jesus abaotem olketa earthquake and sik hem fulfill?

⁸ “Olketa bigfala earthquake bae kamap.” (Luke 21:11) Olketa savveman sei olketa expectim samting olsem 19 bigfala earthquake evri year. Olketa bae spoelem samfala building and mekem graon garem olketa big krak. And klosap evri year, olketa earthquake happen wea big tumas and wea barava pisisim nao olketa building. Olketa record  showimaot, start kam long 1900 olketa earthquake killim dae winim tu million pipol. Wanfala buk hem sei: “Nomata olketa niu technology kamap distaem, staka pipol still dae long olketa earthquake.”

⁹ “Olketa . . . nogud sik bae kamap.” (Luke 21:11) Nomata distaem olketa doctor garem staka medicine and olketa niu teknik for treatim man, olketa sik wea stap for longfala taem finis and olketa niu sik wea kamap spoelem olketa man. Wanfala report talem hao 20-fala sik wea staka pipol savve long olketa—wea samfala nao hem tuberculosis, malaria, and cholera—kamap moa big insaed 20 year wea go pas and hem kamap moa hard for finisim samfala sik witim medicine. Winim 30 niu sik hem kamap distaem. No eni medicine fitim samfala sik hia and olketa savve killim man dae.

10. Olketa wanem fasin bilong pipol wea 2 Timothy 3:1-5 storyim nao iu lukim distaem?

¹⁰ Bible talem tu hao long olketa last day pipol bae change. Aposol Paul storyim fasin bilong pipol long taem bilong iumi. Long 2 Timothy 3:1-5, hem sei: “Nogud taem wea hard for deal witim bae gohed insaed long olketa last day.” Paul talem hao pipol bae

•   lovem seleva

• lovem selen

• no obeyim dadi and mami

• no loyal

• no garem love for narawan insaed famili

• no savve kontrolem seleva

• raf tumas

• lovem hapitaem winim wei for lovem God

• olketa luk olsem olketa worshipim God bat olketa nating followim hem

11. Hao nao Psalm 92:7 storyim samting wea bae happen long olketa wea wicked?

¹¹ Waswe, pipol long community bilong iu garem fasin olsem tu? Masbi olsem. Evriwea long world pipol garem olketa nogud fasin. Diswan showimaot hao klosap nao God bae duim samting, from Bible hem sei: “Taem olketa wea wicked kamap olsem olketa plant, and pipol wea spoelem narawan kamap staka, datwan hem for olketa mas finis for olowe.”—Psalm 92:7.

12, 13. Hao nao datfala “tru savve” hem kamap staka long disfala “taem bilong end”?

¹² Tru nao, olsem Bible talem, olketa last day fulap witim trabol. Nomata olsem, samfala gud samting hem kamap midolwan olketa wea worshipim Jehovah.

 ¹³ “Datfala tru savve bae kamap staka.” Diswan nao samting wea Bible buk bilong Daniel talem bae happen. Long wanem taem nao datwan bae happen? Long “taem bilong end.” (Daniel 12:4) Diswan hem barava olsem start kam long 1914. Start long datfala year, Jehovah helpem olketa wea really laek for servem hem for minim plande moa samting insaed long Bible. Olketa gohed for minim plande moa samting abaotem nem and plan bilong God, ransom sakrifaes bilong Jesus Christ, samting wea happen long pipol wea dae, and datfala resurrection. And tu, olketa wea worshipim Jehovah lane hao for garem living wea mekem olketa kasem gud samting and wea praisem God. Olketa minim long wei wea moa klia tu samting wea Kingdom bilong God hem duim and hao hem bae stretem olketa problem long earth. Wanem nao olketa duim witim disfala savve? Datfala kwestin hem mekem iumi tingim narafala profesi wea hem gohed for fulfill long olketa last day hia.

14. Hao big nao disfala waka for preachim gud nius abaotem Kingdom distaem, and hu nao olketa wea preachim datwan?

¹⁴ “Olketa bae preachim disfala gud nius bilong kingdom evriwea long earth.” Jesus talem diswan insaed profesi bilong hem abaotem end bilong world bilong Satan. (Matthew 24:3, 14) Olketa preachim disfala gud nius bilong Kingdom long winim 230 kantri, and long winim 400 languis. Disfala gud nius explainim wanem nao Kingdom, samting wea hem bae duim, and hao iumi savve kasem olketa blessing from hem. Plande million Jehovah’s Witness strong for preachim disfala gud nius abaotem Kingdom. Olketa kam from “evri nation and tribe and pipol and languis.” (Revelation 7:9) Olketa Jehovah’s Witness conductim olketa free Bible study witim plande million pipol wea laek for savve long really samting wea Bible hem teachim. Wei wea disfala profesi hem fulfill olsem hem barava nambawan, especially taem iumi tingim hao Jesus sei “pipol bae heitim” olketa tru Christian!—Luke 21:17.

15. (a) Waswe, iu bilivim hao iumi stap insaed olketa last day, and why nao iu bilivim datwan? (b) Taem “end” hem kam, wanem nao bae happen long olketa wea againstim Jehovah, and waswe long olketa wea stap anda long rul bilong Kingdom bilong God?

¹⁵ From staka Bible profesi fulfill distaem, waswe, iu agree hao iumi stap insaed olketa last day? Waka for preachim gud nius bae gohed go kasem taem wea Jehovah sei hem inaf nao, then “end” bae kam. (Matthew 24:14) “End” hem minim taem wea God bae distroem olketa wea wicked. Jehovah bae iusim Jesus and olketa strongfala angel for distroem olketa wea againstim hem. (2 Thessalonians 1:6-9) Satan and olketa demon bilong hem bae no stap for leadim olketa nation go rong. Bihaen datwan, Kingdom bilong God bae givim staka blessing long olketa wea stap anda long raeteous rul bilong hem.—Revelation 20:1-3; 21:3-5.

16. Wanem nao bae wise samting for iu duim?

¹⁶ From end bilong disfala world bilong Satan hem klosap, iumi shud garem tingting olsem, ‘Wanem nao mi shud duim?’ Iumi bae wise sapos iumi gohed for lanem moa samting abaotem Jehovah and abaotem olketa samting wea hem laekem iumi for duim. (John 17:3) Studyim gud Bible. Mekem hem kamap wei bilong iu for kaban evritaem witim olketa narawan wea laek for duim will bilong Jehovah. (Hebrews 10:24, 25) Kasem gud samting from staka savve wea Jehovah provaedem for pipol evriwea long world, and changem olketa samting wea iu need for changem for mekem God hapi long iu.—James 4:8.

17. Why nao staka pipol bae seke taem Jehovah distroem olketa wea wicked?

¹⁷ Jesus talem hao staka pipol bae ting nating long pruv wea showimaot iumi stap insaed olketa last day. Jehovah bae seknomoa distroem wicked pipol. Pipol bae seke long diswan long sem wei wea olketa bae seke taem wanfala man kam long naet for stealim haos bilong olketa. (1 Thessalonians 5:2) Jesus talem disfala warning: “Taem wea Son  bilong man stap moa bae olsem taem bilong Noah. Bifor long flood, olketa kaikai and drink, olketa man marit and givim olketa gele for marit, go kasem taem wea Noah hem go insaed long ark; and olketa nating lisin go kasem taem flood hem kam and swipim olketa go. Bae hem olsem tu long taem wea Son bilong man stap moa.”—Matthew 24:37-39.

18. Iumi shud ting strong long wanem warning wea Jesus talem?

¹⁸ So dastawe Jesus sei olsem long olketa wea lisin long hem: “Lukluk gud long iufala seleva, nogud heart bilong iufala kamap hevi from iufala ova tumas for kaikai and drink and from wari bilong living, and from datwan, datfala day hem seknomoa kasem iufala olsem wanfala trap. From bae hem kasem evriwan wea stap long earth. So gohed for wekap and prea evritaem mekem iufala savve win for missim evri samting hia wea mas happen, and mekem iufala savve standap [wea minim God acceptim olketa] front long Son bilong man.” (Luke 21:34-36) Iumi wise sapos iumi ting strong long samting wea Jesus talem. Why nao olsem? Bikos olketa wea Jehovah God and datfala “Son bilong man,” Jesus Christ acceptim, garem chance for sev taem world bilong Satan hem finis and for laef olowe insaed datfala nambawan niu world wea barava klosap nao!—John 3:16; 2 Peter 3:13.