BIBLE no talem iumi wanem taem Jesus hem born. Nomata olsem, hem givim iumi gudfala reason for sei hem no born long December.

Tingim weather long December long Bethlehem, taon wea Jesus hem born. Datfala month long kalenda bilong olketa Jew wea olketa kolem Chislev (November/December) hem barava taem bilong rain and cold. Month bihaen datwan  hem Tebeth (December/January). Datfala month hem cold winim eni nara month bilong year, and samfala taem hem snow long olketa hill. Tingim samting wea Bible talem abaotem weather long datfala ples.

Man wea raetem samfala buk insaed Bible, Ezra, showim hao Chislev hem barava month wea cold tumas and hem savve rain olowe. Bihaen Ezra talem hao olketa pipol hipap long Jerusalem “long mek-naen month [Chislev] long mek-twenti day bilong month,” hem talem hao olketa pipol “barava cold tumas . . . bikos long staka rain.” Olketa pipol wea hipap long there sei olsem abaotem weather long datfala taem: “Hem wet season, and mifala no savve standap aotsaed.” (Ezra 10:9, 13; Jeremiah 36:22) Dastawe, long December, olketa shepherd long olketa area raonem Bethlehem mek sure olketa and olketa animal bilong olketa no stap aotsaed long naet!

Bat Bible talem hao long naet wea Jesus hem born, olketa shepherd stap aotsaed witim olketa sheepsheep. Tru nao, narawan wea raetem samfala buk insaed Bible, Luke, talem hao long datfala taem, olketa shepherd klosap long Bethlehem “stap aotsaed long naet and lukaftarem sheepsheep bilong olketa.” (Luke 2:8-12) Lukim hao masbi weather hem gud bikos olketa shepherd no really needim wanfala haos, from scripture hem sei olketa stap aotsaed. Sheepsheep bilong olketa stap aotsaed long naet tu. Samting wea Bible talem hia hem difren from weather long Bethlehem long December! So olketa samting wea Bible talem abaotem taem wea Jesus hem born showimaot hem no born long December. *

Word bilong God talem iumi barava taem wea Jesus hem dae, bat hem no talem staka samting abaotem wanem taem nao hem born. Diswan mekem iumi tingim toktok bilong King Solomon, wea sei: “Gudfala nem hem moabeta winim gudfala oil, and day wea man dae hem winim day wea hem born.” (Ecclesiastes 7:1) Dastawe iumi no sapraes for savve hao Bible talem staka samting abaotem ministry and dae bilong Jesus, bat no staka samting abaotem taem wea hem born.