1-3. Pipol askem olketa wanem kwestin abaotem dae, and wanem nao samfala ansa wea olketa religion talem?

PIPOL ting raonem olketa kwestin hia for plande thousand year finis. Olketa kwestin hia important tumas. From iumi evriwan dae, iumi evriwan interest long olketa ansa.

² Long Chapter 5, iumi storyim hao ransom sakrifaes bilong Jesus Christ hem mekem wei for iumi savve kasem laef olowe. Iumi lanem tu hao Bible storyim wanfala taem long future wea “dae bae nomoa.” (Revelation 21:4) Bat long distaem olketa man gohed for dae. King Solomon wea wise tumas hem sei: “Olketa wea laef savve olketa bae dae.” (Ecclesiastes 9:5) Iumi evriwan laek for laef longtaem. Nomata olsem, iumi laek for savve long wanem bae happen long iumi taem iumi dae.

³ Taem olketa fren and famili member dae, iumi barava sorre. And maet iumi ask olsem: ‘Wanem nao happen long olketa? Waswe, olketa gohed for safa? Waswe, olketa protectim iumi? Waswe, iumi savve helpem olketa? Waswe, enitaem bae iumi lukim olketa moa?’ Olketa religion long world talem olketa difren ansa for olketa kwestin hia. Samfala teachim hao sapos iu duim gud samting taem iu laef, iu bae go long heven, bat sapos iu duim nogud samting, iu bae bone long ples for safa. Olketa nara religion talem hao taem man hem dae, hem go long ples bilong olketa spirit for  stap witim olketa laen dadi bilong hem. Samfala religion sei olketa wea dae kasem judgment and then olketa born moa long difren body.

4. Wanem nao main teaching bilong plande religion abaotem dae?

⁴ Evri teaching hia talem sem samting, olketa talem hao taem man hem dae, body hem dae, bat wanfala part bilong man gohed for laef. Samting wea klosap evri religion long bifor and long distaem teachim, hem hao iumi gohed for laef olowe bihaen body hem dae. Iumi savve lukluk, herehere, and garem tingting. Bat hao nao datwan savve olsem? For man savve lukluk, herehere, and garem tingting, hem needim wanfala brain. Bat taem iumi dae, brain hem dae tu. Wei for savve remember, lukluk, herem samting, and garem tingting, hem no savve gohed. Olketa samting hia finis taem man hem dae.

5, 6. Wanem nao Bible teachim abaotem olketa wea dae finis?

⁵ Jehovah, wea hem nao creatim brain, savve long wanem hem happen taem man hem dae. Hem savve long samting wea tru, and insaed Word bilong hem, Bible, hem explainim samting wea happen taem man hem dae. Kliafala teaching bilong Bible hem olsem: Taem samwan hem dae, hem finis nao. Dae hem opposite long laef. Olketa wea dae finis no savve lukim samting, herehere, or garem tingting. No eni part bilong iumi wea man no savve lukim hem gohed for laef bihaen body hem dae. Iumi no garem spirit or soul wea no savve dae. *

⁶ Bihaen Solomon talem hao olketa wea laef savve olketa bae dae, hem sei: “Bat olketa wea dae finis nating savve long eni samting.” Then hem explainim diswan go moa taem hem sei olketa wea dae no savve showimaot love or heit and ‘no eni waka or plan or savve or wisdom stap long grev.’ (Ecclesiastes  9:5, 6, 10) Olsem tu, Psalm 146:4 talem hao taem man hem dae, “tingting bilong hem finis evribit.” Iumi no difren from body, iumi dae taem body hem dae. Laef bilong iumi hem olsem fire long wanfala kandol. Taem datfala fire hem dae, hem no go eniwea. Hem no stap nao.

7. Jesus sei dae hem olsem wanem?

⁷ Jesus Christ storyim samting wea happen taem man hem dae. Hem storyim diswan taem hem storyim wanfala man wea dae, Lazarus, wea hem savve gud long hem. Jesus sei olsem long olketa disaepol bilong hem: “Fren bilong iumi Lazarus hem go for rest.” From Jesus talem datwan, olketa disaepol tingse Lazarus hem sleep nomoa, mekem datfala sik hem finis from hem rest gud. Bat olketa no minim samting Jesus talem. Jesus hem sei: “Lazarus hem dae.” (John 11:11-14) Lukim hao Jesus markem dae witim rest and sleep. Lazarus hem no long heven and hem no bone long hell. Hem no stap witim olketa angel or olketa laen dadi. Lazarus hem no born moa olsem difren man. Hem rest long dae nomoa, olsem hem deepim sleep bat hem no garem olketa dream. Olketa nara scripture markem dae witim sleep tu. Olsem example, taem olketa sutim datfala disaepol Stephen witim olketa ston and hem dae, Bible sei hem “sleep.” (Acts 7:60) Olsem tu, aposol Paul hem storyim samfala long taem bilong hem wea “sleep” long dae.—1 Corinthians 15:6.

8. Hao nao iumi savve hem no plan bilong God firstaem for pipol mas dae?

⁸ Waswe, hem plan bilong God firstaem for pipol savve dae? Nomoa nao! Jehovah wakem olketa man for laef olowe long earth. Olsem iumi lanem finis long disfala buk, God putim  first man and woman long wanfala barava naes paradaes. Hem givim perfect body long tufala, and olketa nating sik. Jehovah laekem tufala for garem gud samting. Waswe, bae eni mami or dadi wea lovem pikinini bilong olketa hapi for pikinini kamap olo, safa, and dae? Barava nomoa nao! Jehovah lovem olketa pikinini bilong hem and laekem olketa for hapi for olowe long earth. Bible hem sei olsem abaotem olketa man: “[Jehovah] putim feeling for laek laef olowe insaed heart bilong olketa.” (Ecclesiastes 3:11) God creatim iumi witim feeling for laek laef olowe. And hem mekem wei for iumi savve kasem datwan.

9. Wanem tambu nao Jehovah putim for Adam, and why nao hem no hard for hem obeyim disfala komand?

⁹ So, why nao olketa man dae? For kasem ansa, iumi mas tingim samting wea happen taem wanfala man and woman nomoa stap long earth. Bible hem sei: “Jehovah God mekem grow long graon evri tree wea luk naes tumas and wea gud for kaikai.” (Genesis 2:9) Nomata olsem, hem tambuim wanfala samting nomoa. Jehovah hem sei long Adam: “From evri tree bilong garden iu savve kaikai gogo iu satisfae. Bat iu mas no kaikai from datfala tree bilong savve long samting wea gud and samting wea nogud, bikos long day wea iu kaikaim bae iu dae.” (Genesis 2:16, 17) Hem no hard for Adam and Eve obeyim datfala komand. Staka nara tree stap for tufala savve kaikai long hem. Bat disfala komand givim tufala spesol chance for showimaot olketa thankiu long God for wei wea hem givim evri samting long olketa, and perfect laef tu. Wei wea tufala obey bae showimaot tu hao olketa respectim paoa wea Dadi bilong olketa long heven garem, and hao tufala laekem tumas direction wea hem givim from hem lovem olketa.

10, 11. (a) Wanem nao mekem first man and woman for no obeyim God? (b) Why nao wei wea Adam and Eve no obey hem serious samting?

¹⁰ Sorre nao, firstfala man and woman chus for no obeyim Jehovah. Satan iusim wanfala snek for story long Eve, and hem sei: “Waswe, hem really tru God talem iu for no kaikai from evri tree bilong garden?” Eve hem sei: “Mifala savve kaikaim frut bilong olketa tree long garden. Bat saed long wei for kaikaim frut bilong tree wea stap long midol bilong garden, God hem sei, ‘Iu mas no kaikaim, tru nao, iu mas no tasim, mekem iu no dae.’”—Genesis 3:1-3.

¹¹ Satan hem sei: “Iu bae nating dae. From God hem savve hao long day wea iu kaikaim datwan, eye bilong iu bae open and iu bae kamap olsem God long wei for savve long gud samting and nogud samting.” (Genesis 3:4, 5) Satan laekem Eve for bilivim hao sapos hem kaikaim datfala frut wea God tambuim, hem bae  kasem gud samting. Hem laekem hem for bilivim tu hao hem savve disaedem seleva samting wea stret and samting wea no stret, and for bilivim hao hem savve duim eni samting wea hem laekem. Satan talem tu hao Jehovah hem laea abaotem samting wea bae kasem tufala sapos olketa kaikaim datfala frut. Eve bilivim Satan. So hem tekem samfala frut and kaikaim. Then hem givim samfala frut long hasband bilong hem, and hem tu kaikaim datwan. Olketa savve long wanem olketa duim. Olketa savve hao olketa barava duim samting wea God talem olketa for no duim. Taem olketa kaikaim datfala frut, olketa barava min for no obeyim wanfala komand wea no hard for obeyim and wea bae no putim hevi long olketa. Olketa showimaot hao olketa nating respectim Dadi bilong olketa long heven and paoa bilong  hem. No eni excuse for kaen wei olsem for nating respectim Creator bilong olketa!

12. Wanem example nao hem helpem iumi for minim feeling bilong Jehovah taem Adam and Eve duim samting wea againstim hem?

¹² Tingim disfala example: Hao nao bae feeling bilong iu sapos son or dota wea iu lukaftarem for staka year no obeyim iu, and hem duim datwan long wei wea showimaot hem nating respectim or lovem iu? Datwan bae mekem iu barava feel sorre. So masbi Jehovah hem barava feel sorre tumas tu taem Adam and Eve duim samting wea againstim hem.

13. Wanem nao Jehovah sei bae happen long Adam taem hem dae, and wanem nao diswan hem minim?

¹³ Jehovah no garem eni reason for letem Adam and Eve wea no obey for gohed laef olowe. Tufala dae, olsem hem talem finis bae happen long olketa. Adam and Eve finis nao. Olketa no gohed for laef olsem olketa spirit samwea. Iumi savve long diswan bikos long samting wea Jehovah talem long Adam bihaen hem no obey. God hem sei: “Iu [bae] go bak long graon, bikos iu kamaot from graon. Iu dust nomoa and iu bae go bak long dust.” (Genesis 3:19) God hem wakem Adam from dust bilong graon. (Genesis 2:7) Bifor long datwan, Adam no stap. So, taem Jehovah sei Adam bae go bak long dust, Hem minim Adam bae nomoa nao. Adam bae no garem laef, olsem datfala dust wea God iusim for wakem hem no garem laef tu.

14. Why nao iumi dae?

¹⁴ From Adam and Eve chus for no obeyim God, wea datwan hem sin, tufala dae; sapos nomoa tufala bae laef yet. Iumi dae bikos Adam pasim sin and dae go long olketa pikinini bilong hem. (Romans 5:12) Datfala sin hem olsem wanfala nogud sik wea nating savve finis wea man hem kasem from mami or dadi bilong hem. Samting wea kamaot from datwan, wea hem nao dae, hem barava nogud tumas. Dae hem wanfala enemy, no wanfala fren. (1 Corinthians 15:26) Iumi barava thankiu long Jehovah for wei wea hem provaedem datfala ransom for sevem iumi from disfala nogud enemy!

15. Why nao hem comfortim iumi for savve long really samting wea Bible teachim abaotem dae?

¹⁵ Samting wea Bible teaching abaotem olketa wea dae finis hem comfortim iumi. Iumi lanem hao olketa wea dae finis no safa long pain or sorre. No eni reason stap for fraet long olketa bikos olketa no savve spoelem iumi. Olketa no needim iumi for helpem olketa, and olketa no savve helpem iumi. Iumi no savve story long olketa, and olketa no savve story long iumi. Plande bigman bilong religion rong for talem pipol hao olketa savve helpem olketa wea dae finis, and pipol wea bilivim olketa bigman hia givim selen long olketa. Bat for savve long truth abaotem dae bae protectim iumi from wei wea olketa wea teachim olketa laea olsem trae for giamanim iumi.

16. Hu nao bihaenem olketa teaching bilong plande religion, and long wanem wei?

¹⁶ Waswe, religion bilong iu agree witim samting wea Bible teachim abaotem dae? Staka religion no agree witim Bible. Why nao olsem? Bikos Satan nao bihaenem olketa teaching bilong olketa. Hem iusim false religion nao for mekem pipol bilivim hao olketa bae gohed for laef olsem spirit bihaen body bilong olketa hem dae. Diswan hem wanfala laea wea Satan hem joinim witim olketa nara laea for mekem pipol no interest long Jehovah God. Hao nao olsem?

17. Why nao datfala teaching abaotem wei wea pipol bone for olowe hem no honorim Jehovah?

¹⁷ Olsem iumi storyim finis, samfala religion teachim hao pipol wea duim olketa nogud samting taem olketa laef bae go long ples wea fire bae bonem olketa for olowe taem olketa dae. Disfala teaching hem no honorim God. Jehovah hem God wea showimaot love and hem bae nating mekem pipol safa long wei olsem. (1 John 4:8) Hao nao tingting bilong iu sapos wanfala man hem putim hand bilong wanfala pikinini wea no obey insaed fire for panisim hem? Waswe, bae iu respectim man olsem? Waswe, bae iu laek for fren witim hem? Barava nomoa nao! Bae iu sei datfala man hem barava raf and spoelem datfala pikinini.  Bat Satan laekem iumi for tingse Jehovah hem spoelem pipol witim fire for olowe!

18. Wei for worshipim olketa wea dae finis hem kamaot from wanem laea teaching bilong religion?

¹⁸ Satan iusim samfala religion for teachim tu hao bihaen pipol dae olketa kamap olketa spirit wea olketa wea laef yet mas respectim and honorim. Olketa teachim hao olketa spirit bilong pipol wea dae savve kamap olketa fren wea garem bigfala paoa, or olketa nogud enemy. Plande pipol bilivim disfala laea. Olketa fraet long olketa wea dae finis and honorim and worshipim olketa. Bat Bible teachim hao olketa wea dae finis, olketa sleep nomoa, and hao iumi shud worshipim tru God, Jehovah nomoa, wea hem nao Creator and Man wea provaed for iumi.—Revelation 4:11.

19. For savve long samting wea Bible teachim abaotem dae bae helpem iumi for minim wanem nara teaching insaed Bible?

¹⁹ Wei for savve long truth abaotem olketa wea dae hem protectim iu from olketa laea bilong religion. Hem helpem iu for minim tu olketa nara Bible teaching. Olsem example, taem iu luksavve hao pipol wea dae no kamap olketa spirit, datfala promis abaotem laef olowe long paradaes long earth bae barava encouragem iu.

20. Wanem kwestin nao bae iumi storyim long next chapter?

²⁰ Longfala taem bifor, datfala raeteous man Job hem ask olsem: “Sapos wanfala man hem dae, waswe, hem savve laef moa?” (Job 14:14) Waswe, man wea sleep long dae savve laef bak? Samting wea Bible teachim abaotem diswan hem barava comfortim iumi, olsem next chapter bae showim.