Staka taem pipol ting daonem narawan bikos olketa no savve lo tru samting abaotem hem. Tingim thrifala example hia:

•  Samfala boss no laekem olketa woman for waka for olketa, from olketa tingse olketa woman no garem bigfala savve or no strong.

•  Samfala pipol savve sei olketa from nara kantri kam stealim waka blo olketa.

•  Staka pipol tingse evriwan wea blind or iusim wheelchair savve sorre lo seleva and kros olowe.

Olketa wea garem datkaen tingting, maet storyim samfala example for pruvim datwan. And sapos iumi no agree, olketa sei iumi nao no savve lo tru samting.

“Man wea no garem savve hem no mas gud.”—PROVERBS 19:2, NW.

Wanem nao verse hia minim? Sapos iumi bilivim samting wea no tru abaotem pipol, maet iumi ting daonem olketa.

Taem iumi savve lo tru samting abaotem pipol, bae iumi no bilivim samting olketa narawan talem  abaotem olketa wea no tru. And bae iumi careful for no kwiktaem judgem olketa narawan.

•  Nomata samfala no laekem wei blo pipol from nara ples, iumi shud tingim no evriwan from datfala ples hem bae olsem.

•  Staka taem iumi no savve lo evri samting abaotem pipol.

•  Hem important for savve lo tru samting abaotem pipol.