Man wea tinghae lo hemseleva savve ting daonem narawan. Lo tingting blo hem, hem nao gud winim olketa narawan. Eniwan savve start for garem kaen tingting olsem. Encyclopædia Britannica sei: “Staka taem pipol from wanfala ples tingse kaikai blo olketa, religion blo olketa, wei blo olketa, and olketa kaen samting olsem hem gud winim pipol lo nara ples.” Wanem nao savve helpem iumi for no garem kaen tingting olsem?

“Iufala mas hambol and ting long narawan olsem hem winim iufala.”—PHILIPPI 2:3.

Wanem nao verse hia minim? Taem man hem hambol hem bae no tinghae tumas lo hemseleva. And tu, hem bae luksavve olketa narawan garem gudfala wei or savve duim samfala samting wea winim hem.

Tingim story blo Stefan. Hem born lo kantri wea pipol Communist, so hem les lo pipol from olketa kantri wea no olsem. Bat gogo, hem changem tingting blo hem. Hem sei: “Taem mi tingim narawan hem winim mi, datwan helpem mi for no ting daonem hem. Hard for mi savve lo evri samting. Mi savve lanem samting from olketa narawan.”

Luksavve iumi savve duim mistek. And luksavve tu, olketa narawan savve duim samting wea winim wanem iumi savve duim. No tingse evriwan wea kam from wanfala ples garem semkaen wei.

Iumi no laek for tingim nogud saed blo samwan from nara ples, so hem gud for tingim olketa kwestin hia:

•  ‘Waswe, wei blo datfala man hem nogud, or hem difren nomoa?’

•  ‘Waswe, man hia lukim olketa wik point blo mi tu?’

•  ‘Wanem nao samfala samting man hia savve duim wea mi no fit for duim?’

Taem iu ting raonem olketa kwestin hia, datwan bae helpem iu for no ting daonem olketa narawan, and for luksavve olketa gudfala wei blo datfala man.