Pipol savve ting daonem olketa wea kam from nara kantri, wea garem difren kala skin, tribe, or languis. Samfala ting daonem narawan from hem garem difren religion, hem woman, or hem poor. Samfala savve les lo man wea young or olo, wea no garem bigfala education, wea sik, or maet from hem no luk naes. Nomata olsem, olketa no luksavve olketa ting daonem narawan.

Waswe lo iu? Nomata hem isi for luksavve taem narawan ting daonem man, maet hem hard for luksavve iumiseleva garem datkaen wei. Bat iumi evriwan savve ting daonem narawan. Wanfala professor, David Williams sei taem samwan wea ting daonem pipol from nara kantri meetim wanfala man from datfala kantri, “bae hem no treatim man hia olsem hem treatim olketa narawan, and bae hem no luksavve hem duim olsem.”

Olsem example, Jovica stap lo wanfala kantri lo Southeast Europe. Samfala lo datfala kantri story lo difren languis. Hem sei: “Mi tingse olketa hia nogud pipol. Bat mi no luksavve tingting blo mi nao hem no stret.”

Staka kantri garem law wea stopem pipol for spoelem man bikos lo skin kala blo hem or bikos lo eni nara samting. Nomata olsem, pipol gohed ting daonem narawan. Why nao olsem? Bikos olketa law hia no savve stopem tingting and feeling blo man. So waswe, hem minim hem hard nao for stopem pipol for ting daonem narawan? Waswe, eni wei for stopem datwan?