Datfala Actor wea Luk Shaen Long Show Bilong Olketa Bird

FROM MAN WEA RAET FOR WEKAP! LONG SPAIN

DATFALA peacock luk olsem wanfala actor wea kamaot front long wanfala barava luk naes curtain wea kalakala. Feather bilong hem wea shaen tumas, wea faev taems long winim body bilong hem, hem spread open and shaen insaed long sun.

Peacock duim disfala spesol show taem hem frenim wanfala mere wan. Taem show hem gogo for end, tail bilong hem start for seksek and mekem saond wea helpem hem for win long disfala show. Bae mere wan hia hard for les long hem nao, from diswan hem wanfala show wea olketa kolem ‘barava nambawan advertisement long world.’

Bat, peacock savve mekem disfala show for eniwan wea lukluk kam long hem nomata hem no frenim olketa. Datfala buk Wonders of Peacocks hem sei: “Olketa wea studyim nature pruvim hao olketa peacock duim disfala show front long pipol planti taem and for longfala taem winim taem wea olketa duim for olketa mere wan.” Maet olketa toktok abaotem wei wea peacock hem praod hem kamap from disfala wei wea hem willing tumas for showim olketa feather bilong hem.

Hem barava fitim for hem duim olsem. Tru nao, show bilong hem barava interesting samting for lukim. Olketa feather long tail bilong peacock garem olketa raon samting wea luk olsem eye. From size bilong olketa feather no semsem, taem tail hem open hem luk olsem wanfala fan. Kala bilong olketa feather depend long wei wea sun shaen, hem savve kala olsem copper, bronze, and gold and deep blue, green and purple.

Long samfala kantri, pipol maet tingse only samting wea peacock savve duim hem for wakabaot raon and show off witim olketa feather bilong hem. Bat long India, ples wea hem really kam from, pipol long vilij tinghae tu long wei wea hem savve kaikaim olketa young cobra and nara poison snek. From cobra no savve poisonim hem, pipol long Asia ting long hem olsem samting wea piksarem olketa god and wei for no savve dae.

Samting olsem 3,000 year bifor, peacock hem bird wea olketa long Middle East barava tinghae long hem. King Solomon tekem kam olketa peacock, witim olketa nara samting wea garem hae price olsem ‘gold, silver, and ivory.’ (1 Kings 10:22) Datfala buk The Natural History hem sei, “Wei wea Solomon tekem kam olketa Peafowl hem maet firstaem wea olketa bird hia for stap long olketa kantri bilong Mediterranean.” Samfala handred year bihaen, Alexander the Great tinghae long olketa peacock and stopem olketa soldia bilong hem for no killim dae.

Nomata distaem olketa pipol tinghae long spesol show bilong datfala peacock. And iumi mas no forgetim datwan wea creatim datfala actor bilong show. Olsem savve bilong wanfala artist showaot long samting wea kamaot from waka bilong hem, savve bilong creator bilong iumi showaot klia long disfala spesol creation bilong hem.

 [Piksa long page 23]

[Credit line long page 22]

Cortesía del Zoo de la Casa de Campo, Madrid