Hao Iu Fit for Savve Long Mining Bilong Nem Bilong God for Iu

WANFALA woman wea raet for wanfala niuspepa hem kasem disfala leta from samwan wea readim datfala niuspepa: “Long full laef bilong mi, mi ting strong long disfala kwestin, and mi hope iu savve ansarem for mi. Wanem nao nem bilong God? Olketa Jew sei really nem hem lus for staka year finis. Olketa Christian sei nem bilong hem Jesus. Olketa Muslim sei Allah. . . . So, wanem nao nem bilong hem?” Datfala niuspepa printim datfala kwestin and disfala ansa: “Followim olketa Hebrew teaching bifor, God hem paoa wea no garem spialaen, so wanfala nem seleva no savve fitim Hem. Nomata olsem, mi promisim iu Hem bae ansarem iu long eni nem wea iu kolem long hem witim respect.”

 Kaen wei for no kea olsem saed long nem bilong God hem normal samting distaem. Nomata olketa interest long religion, staka pipol wea biliv long Bible no tinghevi long kwestin abaotem nem bilong God. Bat hao nao tingting bilong God long diswan? Waswe, hem smol samting nomoa long hem?

No Smol Samting

Tingim wei wea Bible talem nem bilong God, Jehovah, staka thousand taem. Insaed New World Translation of the Holy Scriptures, nem bilong God kamap 7,210 taem! * God seleva nao muvim olketa man wea raetem Bible for iusim nem bilong hem long big wei. Asaph, man wea raetem samfala psalm sei olsem: “Iu, wea nem bilong iu Jehovah, iu nomoa Most Hae ovarem full earth.” (Psalm 83:18) David raet olsem tu long wanfala psalm: “For iumi, bae iumi talemaot nem bilong God bilong iumi Jehovah.”—Psalm 20:7.

Bible showim dat Jehovah God lukluk insaed heart bilong iumi for luksavve wanem nao tingting bilong iumi abaotem nem bilong hem. Man wea raetem psalm hem sei: “Sapos iumi forgetim nem bilong God bilong iumi, . . . waswe, God bae no lukim diswan? From hem luksavve long olketa secret bilong heart.” (Psalm 44:20, 21) Profet Isaiah hem raet olsem: “Givim thankiu long Jehovah, iufala pipol! Singaot long nem bilong hem. Talemaot long pipol olketa waka bilong hem. Talem hao nem bilong hem nao stap long hae.”—Isaiah 12:4.

 God seleva sei: “Olketa mas savve hao nem bilong mi hem Jehovah.” (Jeremiah 16:21) Long narataem hem sei: “Mi bae mekem nambawan nem bilong mi holy, wea kamap no klin midolwan olketa nation, . . . and bae olketa nation mas savve hao mi nao Jehovah.” (Ezekiel 36:23) Samfala long olketa toktok hia point go long wanfala taem wea Jehovah bae duim samting from kros bilong hem long olketa wea no showimaot respect for nem bilong hem. Kwestin abaotem nem bilong hem, hem no smol samting long God.

Jehovah Hem No Farawe From Iu

Hao nao bae iu fit for savve long mining bilong nem bilong God for iu? Wanem nao hem minim for savve long mining bilong nem bilong God for iu? Bible givim disfala ansa: “Olketa wea savve long nem bilong iu bae trustim iu.” (Psalm 9:10) Hem klia hao wei for savve long nem bilong God hem minim moa samting winim wei for savve hem garem wanfala nem wea stap. Iu mas trustim hem. Datwan minim for savve wanem kaen God nao hem and lanem olketa fasin and tingting bilong hem. Diswan bae muvim iu for trust long hem.

Wei for readim and studyim gud Bible nomoa savve givim iu savve abaotem wanem kaen God nao Jehovah. Hem promis for protectim olketa wea showimaot olketa lovem hem and nem bilong hem. God sei olsem abaotem olketa man olsem: “From hem lovem mi, mi bae sevem hem. Mi bae protectim hem bikos hem savve long nem bilong mi. Hem bae singaot long mi, and mi bae ansarem hem. Mi bae stap witim hem long taem bilong trabol. Mi bae sevem hem and givim hem glory. Mi bae mekem hem stap for longfala taem, and hem bae lukim hao mi nao sevem hem.”—Psalm 91:14-16.

Jehovah God hem fren long nambawan wei witim olketa wea savve long mining bilong nem bilong hem for olketa! Iu tu savve garem kaen wei for fren olsem witim hem. No hol bak for iusim nem taem iu prea long hem from heart. Hem bae ansa bikos Bible sei, “hem no farawe from iumi wanwan.”—Acts 17:27.

[Footnotes]

[Box/Piksa long page 11]

God Savve Long Nem Bilong Iu

God sei long Moses: “Mi savve long mining bilong nem bilong iu.” (Exodus 33:12) Story wea iumi evriwan savve abaotem datfala bushes wea bone hem showimaot diswan hem tru. Bible sei God “singaot long hem from midol bilong datfala bushes and sei: ‘Moses! Moses!’ ” (Exodus 3:4) Diswan hem wanfala example nomoa bilong staka taem wea God iusim nem bilong pipol taem hem story witim olketa. Tru tumas, Creator bilong universe hem interest long iumi wanwan.

Bible sei God savve long nem bilong each wan long olketa billion star wea stap. (Isaiah 40:26) Haomas moa hem kea for olketa man wea worshipim hem! Aposol Paul hem raetem hao “Jehovah savve long olketa wea bilong hem.” (2 Timothy 2:19) Datwan hem minim moa samting winim wei for rememberim olketa nem nomoa. God hem garem full savve long olketa wea worshipim hem. Dastawe iumi tu shud savve long mining bilong nem bilong God for iumi and kasem full savve abaotem olketa fasin bilong hem.

Last buk bilong Bible hem story abaotem wanfala tokpiksa buk wea God raetem nem bilong evriwan wea worshipim hem long full history. Buk hia garem nem “scroll bilong laef” bikos Jehovah God bae givim laef olowe long olketa wea nem bilong olketa stap insaed. (Revelation 17:8) Diswan hem hapi hope for olketa wea savve long mining bilong nem bilong God for olketa.

[Box/Piksa long page 12]

Olketa Talemaot Nem Bilong God

● Song bilong Moses bifor Israel go insaed long Promis Land: “Mi bae talemaot nem bilong Jehovah.”—Deuteronomy 32:3.

● Toktok bilong David for giant Goliath: “Mi kam long iu witim nem bilong Jehovah bilong olketa army.”—1 Samuel 17:45.

● Toktok bilong Job bihaen hem lusim evriting bilong hem and evri pikinini bilong hem dae: “Nem bilong Jehovah go ahed for kasem praise.” —Job 1:21.

● Aposol Peter hem talem toktok from Hebrew Scripture taem hem sei: “Evriwan wea singaot long nem bilong Jehovah bae sev.”—Acts 2:21.

● Profet Isaiah hem sei: “Givim thankiu long Jehovah, iufala pipol! Singaot long nem bilong hem. . . . Talem hao nem bilong hem nao stap long hae.”—Isaiah 12:4.

● Jesus Christ teachim olketa disaepol bilong hem for prea: “Iufala mas prea olsem: ‘Dadi bilong mifala wea stap long heven, mekem nem bilong iu hem kamap holy.’ ”—Matthew 6:9, 10.

● Jesus Christ prea long God: “Mi showimaot nem bilong iu.”—John 17:6.

● God story long pipol bilong hem: “Mi nao Jehovah. Hem nao nem bilong mi; and mi no savve givim glory bilong mi long eniwan moa.”—Isaiah 42:8.