Tingting Bilong Bible

Hao Nao Iu Savve Rejectim Rong Samting Body Laekem?

“Taem mi laek duim samting wea stret, samting wea nogud hem stap insaed mi.”—ROMANS 7:21.

MAET winim eni nara aposol, Paul waka hard for strongim long nara pipol olketa hae principle bilong Christian Wei. (1 Corinthians 15:9, 10) Nomata olsem, hem talem stret datfala toktok antap. Hemseleva feelim wei wea mind bilong hem evritaem faetem rong samting wea body bilong hem laekem. Waswe, iu enitaem feel olsem aposol Paul? Tru nao, no eniwan long iumi free from diskaen feeling from iumi evriwan no perfect!

For staka pipol, disfala faet againstim rong samting body laekem hem barava strong. Samfala stragol witim wei for satisfaem body saed long sex. Olketa narawan kamap slave long wei for gamble, tobacco, nogud drug, or alcohol. Taem iumi kasem feeling for duim dirty fasin or samting wea bae spoelem iumi, hao nao iumi savve rejectim? Wanem help nao iumi garem? Waswe, wei for faet againstim rong samting body laekem bae enitaem finis?

Love—Key for Rejectim Rong Samting Body Laekem

Jesus mekhae long tufala main komandment bilong Law Bilong Moses. First wan hem: “Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.” (Matthew 22:37) Sapos iumi lovem God long wei wea Jesus talem iumi for duim, main samting iumi shud laek for duim hem for mekem God hapi. Disfala wei for laek mekem hem hapi, wea hem raeteous  samting, savve helpem iumi for rejectim samting body laekem nomata disfala feeling hem strong tumas! Diswan hem no just gudfala idea. Staka million Christian win for rejectim rong samting body laekem evriday. Hao nao iu savve mekem grow strongfala love for God olsem? Thru long wei for ting raonem olketa gudfala fasin bilong hem wea showaot long creation, Bible, and wei wea hem deal witim iumi wanwan.—Psalm 116:12, 14; 119:7, 9; Romans 1:20.

Mek-tu main komandment Jesus talem hem: “Iu mas lovem neiba bilong iu olsem iuseleva.” (Matthew 22:39) Aposol Paul sei love “no duim fasin wea no fitim” and “no luk aotem samting for hemseleva nomoa.” Kaen love olsem wea no selfish bae helpem iumi for stap klia from fasin wea bae spoelem nara pipol. (1 Corinthians 13:4-8) Hao nao iumi savve mekem grow? Thru long wei for tingim feeling bilong pipol and really kea long feeling and hapi bilong olketa.—Philippians 2:4.

Wanem Help Nao Stap for Iumi?

From God minim wei wea hem hard for iumi duim stret samting, hem provaedem olketa difren kaen help. Thru long Word bilong hem wea olketa raetem, Bible, hem teachim iumi for heitim nogud samting and for mekem grow gudfala wei for respectim hem. (Psalm 86:11; 97:10) Bible garem olketa trufala laef story wea showimaot nogud samting wea kamaot from wei for duim rong samting body laekem. And tu, Jesus sei sapos iumi askem hem, God bae givim iumi holy spirit bilong Hem, datfala paoa long universe wea winim evri narawan. (Luke 11:13) Hem savve strongim iumi for disaed strong for duim wanem hem stret. Hem provaedem tu sapot and encouragement from olketa nara Christian wea olketa tu go ahed for rejectim rong samting body laekem. (Hebrews 10:24, 25) Taem olketa gud samting hia aotem olketa nogud samting, hem helpem wei wea iumi stragol for duim stret samting. (Philippians 4:8) Waswe, diswan hem really win?

Tingim Fidel, wea pipol long ples bilong hem savve long hem olsem man for drunk. Taem hem drunk hem savve smokem tobacco, gamble, and faetem narawan. From hem studyim Bible and kaban witim Olketa Jehovah’s Witness diswan helpem hem for lusim olketa wei hia. Distaem hem enjoyim hapi laef witim waef and tufala pikinini bilong hem.

Samwan maet ask, ‘Bat waswe sapos mi bakslaed?’ Aposol John raet abaotem diswan. Hem sei: “Olketa smolfala pikinini bilong mi, mi raetem evri samting hia long iufala mekem iufala no duim eni sin. Bat, sapos eniwan duim wanfala sin, iumi garem wanfala helper witim Dadi, Jesus Christ, datwan wea raeteous. And hem wanfala sakrifaes wea kavarem sin bilong iumi, no for iumi nomoa bat for full world tu.” (1 John 2:1, 2) Tru nao, sakrifaes bilong Jesus kavarem rong bilong pipol wea repent and wea really want for change for mekem God hapi. Taem iumi tingim disfala samting wea hem provaedem, mi no garem eni reason for givap long datfala faet for duim wanem hem stret?

Rong Samting Body Laekem Bae Finis

Sapos iumi mekem grow love bilong iumi for God and neiba and iusim gud help God provaedem, nomata distaem iumi savve win for rejectim rong samting body laekem. And tu, Word bilong God strongim long iumi hao disfala stragol bae no for olowe. Klosap nao pipol wea iusim gud evri spiritual help God provaedem bae kasem healing evribit, long physical and spiritual wei. (Revelation 21:3-5; 22:1, 2) Olketa bae kamap free from sin and samting wea kamaot from hem, dae. (Romans 6:23) Long narasaed, pipol wea min for go ahed for satisfaem samting body laekem, wea hem no klin and spoelem man, bae no kasem olketa blessing hia.—Revelation 22:15.

Hem bigfala comfort for savve hao wei for stragol witim rong samting body laekem hem no for olowe. Olketa bae finis evribit and for olowe. Datwan barava strongim iumi!