Olketa Plant Garem Enikaen Medicine Insaed

Olketa savveman talem hao samting olsem 25 percent long olketa medicine wea olketa doctor givim distaem—maet full medicine or part long hem—start witim samting olketa tekem from olketa plant. Hem nao tru samting olketa wea mekhae long olketa difren kaen hom medicine laek talem evritaem.

Klosap evri research wea olketa duim long olketa plant hem for faendem olketa samting insaed wea savve healim sik. Wanfala main example long diswan hem aspirin, wea kam from salicin, wanfala samting wea stap insaed skin bilong white willow tree.

Bihaen olketa separatem from plant olketa part wea fitim for olsem medicine, olketa savve mekem medicine wea garem strong wea fitim. Wanfala buk hem sei: “For kasem inaf skin bilong willow tree for mekem medicine wea strong olsem aspirin, or for garem inaf foxglove for mekem medicine wea savve sevem laef bilong man, hem hard. Dastawe hem moa isi for iusim olketa pill winim for kaikaim olketa natural samting.”

Long narasaed, wei for aotem medicine from plant olsem hem garem nogud saed tu. Man no savve kasem from datfala plant olketa nara gud samting wea stap insaed wea savve helpem body. And tu, samfala long olketa samting wea kosim sik getius long olketa medicine distaem and medicine hia no savve aotem olketa sik olsem.

Quinine, wanfala medicine wea olketa kasem from skin bilong cinchona tree, hem wanfala example wea showimaot nogud saed bilong wei for aotem samting from plant wea savve healim sik and no iusim full plant. Nomata datfala quinine hem killim dae staka parasite wea kosim malaria, olketa parasite wea hem no killim dae kamap staka go moa. Wanfala buk hem sei: “Kaen wei olsem for samting wea kosim sik kamap moa strong winim medicine hem main problem for olketa long medical distaem.”

[Olketa piksa long page 27]

Olketa kasem aspirin from disfala white willow tree

[Credit Line]

USDA-NRCS PLANTS Database/Herman, D.E. et al. 1996. North Dakota tree handbook

[Olketa piksa long page 27]

Cinchona tree, wea olketa kasem quinine from hem

[Credit Line]

Courtesy of Satoru Yoshimoto