Soap—Wanfala “Medicine wea Protectim Iu From Sik”

“MEK-TU sik wea killim dae olketa pikinini long full world hem no malaria, no tuberculosis, no AIDS. Hem . . . diarrhoea,” hem nao samting wea datfala magasin The Economist hem talem. Bat, staka long olketa pikinini hia fit for stap laef nomoa sapos olketa and famili bilong olketa wasim hand evritaem witim soap.

Olketa wea duim research long London School of Hygiene and Tropical Medicine faendem hao “wei for wasim hand long taem wea fitim hem daonem olketa sik wea kosim diarrhoea long samting olsem 43 percent,” hem nao samting datfala magasin The Economist talem. “Hem savve daonem tu olketa sik wea affectim lung, wea hem nao main samting wea killim dae olketa pikinini. Wanfala bigfala research wea olketa duim for army bilong America showimaot hao flu and kof hem katdaon 45 percent taem olketa soldia wasim hand faevfala taem evriday.” Nomata long olketa poor kantri staka famili fit for peim soap. Dastawe iumi fit for kolem soap wanfala “medicine wea protectim iu from sik.” And hem no olsem nila wea pain!

Bible tu hem encouragem man for garem fasin for klin. Long 2 Corinthians 7:1 hem sei: “Iumi mas klinim iumiseleva from evri samting wea mekem body and spirit dirty.” Nomata main samting God laekem hem wei for iumi klin long spiritual saed, hem important tu for klin long body. (Leviticus, chapter 12-​15) Tru nao, hem no expectim iumi for ova tumas long diswan. Bat, iumi shud mekem hem kamap fasin bilong iumi for wasim hand bihaen iumi go long toilet, bihaen iumi swimim baby or changem nappy bilong hem, bifor iumi redyim kaikai or bifor iumi sidaon for kaikai, and long eni narataem wea iumi ting iumi maet isi for pasim go olketa nogud germ or virus long narawan. Taem iumi wasim hand evritaem, iumi showimaot Christian love for famili bilong iumiseleva and evriwan wea iumi meetim.—Mark 12:31.