Fitim Iu for Lukluk Gud Long Olketa Nara Religion?

“MI ATTENDIM olketa Christian meeting for klosap wan year finis, and mi enjoyim wei for talem nara pipol abaotem Kingdom bilong God,” Miguel hem talem, wea distaem hem wanfala Jehovah’s Witness long South America. “Then mi start for lisin long olketa program bilong religion long radio and lukluk long olketa man for preach bilong religion long television. Mi tingse olketa program olsem savve helpem mi for minim gud pipol bilong olketa nara religion. Mi luksavve teaching bilong olketa hem no fitim Bible, bat mi just interest nomoa.”

Long datfala sem kantri, Jorge hem barava strong for teachim narafala pipol abaotem trufala worship. Nomata olsem, gogo, hem tu start for lisin long olketa program bilong religion long radio and television. “Iu need for savve long wanem nao nara pipol tingim,” hem savve sei olsem. Taem olketa askem hem abaotem olketa danger bilong olketa giaman teaching olsem, hem savve ansa olsem: “No eni samting savve spoelem faith bilong man wea savve long Bible truth.” Olketa experience hia mekem wanfala important kwestin kamap, Waswe, hem wise for lisin long samting wea nara pipol bilivim?

Luksavve Long Trufala Christian Wei

Bihaen olketa aposol dae, planti difren kaen giaman Christian wei kamap big and spoelem trufala worship. From hem savve olketa samting hia bae kamap, Jesus talemaot wanfala wei for luksavve long olketa giaman Christian from trufala Christian wei. Firstaem, hem givim disfala warning: “Lukaot long olketa giaman profet wea werem skin bilong sheep, bat long insaed olketa olsem wolf wea hangre fogud.” Then hem sei moa: “From frut bilong olketa iufala bae luksavve long olketa.” (Matthew 7:15-23) Olketa tru follower bilong Jesus go ahed for duim wanem hem teachim, and hem isi for luksavve long gudfala  frut bilong olketa. Olsem Jesus hem duim, olketa visitim pipol for explainim Kingdom bilong God long olketa from Bible. Olketa followim example bilong Jesus for stap difren from olketa politik and olketa raoa bilong world. Olketa acceptim Bible olsem Word bilong God and respectim olsem truth. Olketa mekem pipol for savve long nem bilong God. And from olketa trae hard for showimaot love wea God teachim, olketa no share long olketa faet. Bat, olketa treatim narawan olsem olketa brata.—Luke 4:43; 10:1-9; John 13:34, 35; 17:16, 17, 26.

Olsem Bible talem, hem isi for “lukim moa wei wea raeteous man hem difren from wicked man, wei wea man wea servem God hem difren from man wea no servem hem.” (Malachi 3:18) Olketa tru worshiper distaem garem wan mind long tingting and akson, olsem olketa Christian long first century. (Ephesians 4:4-6) Taem iu luksavve finis long wanfala sekson bilong olketa tru Christian, why nao iu laek for savve moa or interest moa long biliv bilong narawan?

Lukaot Long Olketa Giaman Teacher

Bible talem stret hao nomata iu lanem finis Bible truth, spiritual danger bilong olketa giaman teaching stap. Aposol Paul givim warning olsem: “Lukaot: maet samwan hem kasholem iufala for spoelem iufala thru long olketa idea and giaman trik wea followim kastom bilong man, wea fitim olketa samting bilong world and wea no followim Christ.” (Colossians 2:8) Disfala scripture showimaot barava kliafala toktok! Olsem olketa wild animal wea want for kasholem and kaikaim iu, olketa giaman teacher savve mekem wanfala really danger kamap.

Tru, Paul savve long wanem nao nara pipol bilivim. Wantaem hem givim wanfala tok taem hem sei: “Olketa man bilong Athens, mi lukim hao long evri samting, iufala nao fraet long olketa god winim nara pipol. Olsem example, taem mi wakabaot raon and lukluk gud long olketa samting wea iufala respectim, mi lukim wanfala altar wea garem toktok ‘Long God wea Man No Savve.’ ” (Acts 17:22, 23) Bat, Paul hem no feedim mind bilong hem witim olketa Greek idea evritaem.

Wei for savve abaotem start and olketa biliv bilong olketa giaman religion hem gud bat hem difren from wei for feedim iuseleva witim olketa samting hia. * Jehovah hem markem “faithful and wise slave” for provaedem teaching wea kam from Word bilong hem. (Matthew 4:4; 24:45) Paul seleva hem raet olsem: “Iufala kanduit kaikai long ‘tebol bilong Jehovah’ and tebol bilong olketa demon. Or waswe ‘iu mekem Jehovah for jealous’?”—1 Corinthians 10:20-22.

Samfala long olketa giaman teacher hia olketa tru Christian bifor, bat olketa tanawe from truth and followim giaman wei. (Jude 4, 11) Diswan shud no mekem iumi sapraes. Bihaen hem story abaotem “faithful and wise slave” wea stand for datfala grup bilong olketa anointed Christian, Jesus storyim datfala “nogud slave,” wanfala sekson wea komplen for sei, “masta bilong mi hem delay,” and start for whipim olketa slave bilong hem. (Matthew 24:48, 49) Evritaem, olketa man hia and olketa follower bilong olketa no garem eni kliafala teaching; olketa interest nomoa for spoelem faith bilong nara pipol. Aposol John raet olsem abaotem olketa: “Sapos eniwan kam long iufala and no kam witim disfala teaching, no invaetem hem insaed long haos bilong iufala or talem greeting long hem.”—2 John 10; 2 Corinthians 11:3, 4, 13-15.

Hem gud for pipol wea want for lukaotem truth for tingting gud long wanem olketa herem from olketa difren religion. Gogo, God bae blessim olketa man wea garem honest heart wea lukaotem truth. Bible sei olsem abaotem wisdom bilong God: “Sapos iu go ahed for lukaotem olsem silver, and olsem riches wea haed iu go ahed for lukaotem, then . . . iu bae faendem barava savve bilong God.” (Proverbs 2:4, 5) From olketa faendem disfala savve bilong God thru long Bible and Christian kongregeson and from olketa lukim finis hao Jehovah blessim olketa wea datfala savve gaedem, olketa tru Christian no go ahed for lisin long olketa teaching bilong giaman religion.—2 Timothy 3:14.

[Footnote]