Hao Iu Savve Kam Klosap Long God

“Kam klosap long God, and hem bae kam klosap long iufala,” James 4:8 hem sei. For showimaot hao hem barava wantem olketa man for fren witim hem long klos wei, Jehovah God givim kam Son bilong hem for dae for iumi.

FOR showimaot hem tinghae long datfala loving wei, aposol John hem raet olsem: “Iumi [lovem God], bikos hem lovem iumi firstaem.” (1 John 4:19) Bat for iumi wanwan kam klosap long God, iumi mas duim samfala samting. Hem semsem witim fofala wei for kam klosap long olketa man, olsem olketa talem long firstfala article. Letem iumi lukluk gud long diswan.

Lukluk Gud Long Olketa Nambawan Fasin Bilong God

God garem staka nambawan fasin, samfala main wan nao hem love, wisdom, justice, and paoa. Wisdom and paoa bilong hem barava showaot klia long universe and long world raonem iumi, from olketa maeti galaxy go kasem olketa barava smol samting. Man wea raetem Psalm hem raet olsem: “Heven talemaot glory bilong God; and full skae talemaot waka bilong hand bilong hem.”—Psalm 19:1; Romans 1:20.

Creation tu hem showimaot love bilong God. Olsem example, wei wea hem wakem iumi showimaot hao God wantem iumi for enjoyim living. Hem mekem iumi long wei wea iumi fit for lukim olketa color, for teist and smelem samting, for hapi long music, for laf, for enjoyim olketa samting wea luk naes tumas, and givim iumi planti nara samting moa wea no barava important for laef. Tru nao, God hem barava willing for give, hem kaen, and loving—olketa fasin wea mekem hem kamap “disfala hapi God.”—1 Timothy 1:11; Acts 20:35.

Jehovah hem hapi from wei wea hem showimaot olmaeti rul bilong hem wea olketa creation bilong hem wea garem savve olketa saportim garem faondeson long love. (1 John 4:8) Tru, Jehovah hem Ruler Bilong Universe, bat hem deal witim olketa man, especially olketa loyal servant bilong hem, olsem wanfala loving dadi hem deal witim olketa pikinini bilong hem. (Matthew 5:45) Hem no hol bak for givim eni samting wea gud for olketa. (Romans 8:38, 39) Olsem iumi talem finis, hem givim laef bilong only-born Son bilong hem for iumi. Yes, from love bilong God nao iumi stap distaem and garem chance for kasem laef olowe.—John 3:16.

Jesus helpem iumi for kasem savve abaotem olketa fasin bilong God bikos hem followim Dadi bilong hem long perfect wei. (John 14:9-11) Hem nating selfish, hem kaen, and tingim nara pipol. Wantaem, pipol tekem kam long Jesus wanfala man wea earpas and no savve toktok. Hem isi for tingim hao datfala man maet feel shame fogud taem hem stap midolwan crowd hia. Interesting samting, Jesus tekem disfala man long wanfala ples seleva and healim hem long there. (Mark 7:32-35) Waswe, iu hapi long pipol wea minim olketa feeling bilong iu and wea respectim iu? Sapos olsem, iu bae kam klosap long Jehovah and Jesus taem iu lane moa abaotem tufala.

Ting Abaotem Olketa Fasin Bilong God

Samwan savve garem olketa nambawan fasin olsem, bat iumi need for ting abaotem man hia mekem iumi kam klosap long hem. Sem samting tu fitim Jehovah. Wei for ting raonem olketa fasin bilong God hem mek-tu important step for kam klosap long hem. King David, wanfala man wea barava lovem Jehovah and “wea heart [bilong Jehovah] laekem,” hem sei: “Mi ting bak long olketa day bilong bifor; mi ting raonem evri waka bilong iu; mi willing for tingting evritaem abaotem olketa waka bilong hand bilong iu.”—Acts 13:22; Psalm 143:5.

 Taem iu lukluk gud long olketa nambawan samting bilong creation or readim Word bilong God, Bible, waswe, iu, olsem David, ting raonem wanem iu lukim and readim? Tingim wanfala son wea just kasem wanfala leta from dadi bilong hem wea hem lovem tumas. Hao nao bae hem ting long datfala leta? Hem bae no luk thru long hem kwiktaem nomoa and putim insaed long drawer. Nomoa, bat hem bae studyim, for kasem gud samting from evri gudfala toktok long disfala leta. Olsem tu, Word bilong God shud kamap olsem spesol samting long iumi, olsem long man wea raetem Psalm wea sing olsem: “Mi barava lovem law bilong iu! Long full day mi tingting long hem.”—Psalm 119:97.

Keepim Gud Wei for Story Tugeta

Gudfala wei for story tugeta hem laefblood bilong eni wei for fren. Insaed diswan hem wei for toktok and lisin—and no witim mind nomoa bat witim heart tu. Iumi story long Creator thru long prea, wea hem wei for tok long God long worship. Jehovah hem hapi long prea bilong olketa wea lovem and servem hem and wea luksavve long Jesus Christ olsem main wan wea stand for Hem.—Psalm 65:2; John 14:6, 14.

Long bifor, God tok long olketa man long planti difren kaen wei, insaed olketa vision, olketa dream, and thru long olketa angel. Bat distaem, hem duim olsem thru long Word bilong hem wea olketa raetem finis, Holy Bible. (2 Timothy 3:16) Disfala Word garem staka gudfala saed. Enitaem nomoa man savve readim. Olsem wanfala leta, man savve enjoyim moa and moa. Hem no olsem wei for storyim nomoa wea savve change evritaem. So ting long Bible olsem olketa leta from loving Father bilong iu long heven, and hem tok long iu evriday thru long olketa leta hia.—Matthew 4:4.

Olsem example, Bible talem iumi tingting bilong Jehovah long samting wea stret and rong. Hem explainim purpose bilong hem for olketa man and for disfala earth. And hem showimaot wei wea hem deal witim pipol and olketa nation, from olketa loyal worshiper go kasem olketa enemy bilong hem. Taem Jehovah recordim wei wea hem fren witim olketa man, hem showimaot klia olketa fasin bilong hem. Hem showimaot love bilong hem, hapi, sorre, wei wea hem feel nogud, kros, mercy, kea—tru nao, olketa tingting and feeling bilong hem, and olketa reason for evri samting hia—evri samting long wei wea olketa man savve minim.—Psalm 78:3-7.

Bihaen iu readim wanfala part long Word bilong God, hao nao bae iu kasem gud samting from reading bilong iu? And, hao nao iu savve kam klosap long God? Firstaem, ting abaotem wanem nao iu readim finis and lanem abaotem God olsem wanfala person, and letem olketa point hia for kasem heart bilong iu. Then long prea talem long Jehovah olketa tingting and insaed feeling bilong iu abaotem information wea iu ting raonem and hao iu bae kasem gud samting from datwan. Hem nao wei for story tugeta. Bat, sapos iu garem narafala samting moa long mind bilong iu, talem diswan tu long Jehovah.

Duim Olketa Samting Tugeta Witim God

Bible sei abaotem samfala faithful man bifor hao olketa wakabaot witim, or front long, trufala God. (Genesis 6:9; 1 Kings 8:25) Wanem nao diswan minim? Hem minim living bilong olketa evriday hem olsem God hem long there witim olketa. Tru, olketa garem sin. Nomata olsem, olketa lovem law and principle bilong God, and olketa live followim purpose bilong God. Jehovah hem klosap long pipol olsem, and hem kea long  olketa, olsem hem showimaot long Psalm 32:8: “Mi bae mekem iu for garem fasin for luksavve and teachim iu long wei wea iu mas followim. Mi bae givim advaes and lukluk long iu.”

Iu tu savve garem Jehovah olsem wanfala klos fren—wanfala wea wakabaot witim iu, kea for iu, and givim iu advaes olsem dadi. Profet Isaiah hem storyim Jehovah olsem “Datwan wea mekem iufala followim road wea iufala mas wakabaot long hem.” (Isaiah 48:17) Taem iu experiencem olketa gud samting hia, iumi feel olsem Jehovah hem stap “long raet hand bilong [iumi],” olsem David tu feelim.—Psalm 16:8.

Nem Bilong God—Mekhae Long Olketa Fasin Bilong Hem

Planti religion and staka Bible transleison fail for iusim and mekhae long nem bilong God. (Psalm 83:18) Bat, long firstfala Hebrew Bible, datfala nem—Jehovah—kamap samting olsem 7,000 taem! (Nomata olketa aotem nem bilong God, samfala man wea transleitim Bible no aotem nem bilong planti giaman god wea stap long firstfala  Bible, olsem Baal, Bel, Merodach, and nomata Satan tu!)

Samfala pipol feel olsem wei for aotem nem bilong God hem no important samting. Bat tingim: Waswe, hem moa hard or moa isi for mekem grow wanfala klos wei for fren witim wanfala man wea no garem nem? Olketa title olsem God and Lord (wea olketa savve iusim tu for olketa giaman god) maet mekem man tingim paoa, hae rul, or position bilong Jehovah, bat nem bilong hem nomoa savve showimaot hemseleva klia. (Exodus 3:15; 1 Corinthians 8:5, 6) Nem bilong datfala tru God showimaot klia olketa wei and fasin bilong hem. Bishop Walter Lowrie talem disfala stretfala toktok: “Man wea no savve long nem bilong God no really savve long hem olsem wanfala really person.”

Tingim example bilong Maria, wanfala strong Catholic wea stap long Australia. Taem Olketa Jehovah’s Witness firstaem meetim hem, Maria letem olketa Witness hia showim nem bilong God long hem insaed Bible. Wanem nao hem talem abaotem diswan? “Taem mi firstaem lukim nem bilong God insaed Bible, mi krae. Taem mi tingim hao mi fit for savve gud and iusim nem bilong God, datwan barava muvim mi.” Maria go ahed for studyim Bible, and for firstaem long laef bilong hem, hem savve long Jehovah olsem wanfala person and hem fit for buildimap wanfala klos wei for fren witim hem.

Yes, iumi savve “kam klosap long God,” nomata iumi no savve lukim hem witim really eye bilong iumi. Iumi savve “lukim” barava nambawan fasin bilong hem long mind and heart bilong iumi and there nao iumi bae grow long love bilong iumi for hem. Love olsem hem “perfect wei for keepim wan mind.”—Colossians 3:14.

[Piksa long page 7]

Wei for ting raonem creation bilong Jehovah hem wanfala wei for kam klosap long hem