Kingdom Bilong God—Niu Rul Bilong Earth
Kingdom Bilong God—Niu Rul Bilong Earth
“Datfala kingdom . . . bae smasem and finisim evri kingdom hia, and hemseleva nao bae stap olowe.”—DANIEL 2:44.
1. Wanem trust nao iumi savve garem long Bible?
BIBLE hem kliafala story bilong God long olketa man. Aposol Paul raet olsem: “Taem iufala kasem word bilong God, wea iufala herem from mifala, iufala acceptim, no olsem word bilong man, bat, olsem trufala word bilong God.” (1 Thessalonians 2:13) Bible garem wanem iumi needim for savve abaotem God: information abaotem fasin, purpose, and olketa samting wea hem laekem iumi for duim. Hem garem best kaonsel long famili laef and fasin bilong evriday. Hem storyim olketa profesi wea fulfill bifor, wea go ahed for fulfill distaem, and wea bae fulfill long future. Tru nao, “evri Scripture kam from God and gud for teach, for givim kaonsel, for stretem evri samting, for givim discipline long raeteous fasin, mekem man bilong God hem fit evribit, barava redy for duim evri gudfala waka.”—2 Timothy 3:16, 17.
2. Hao nao Jesus mekhae long theme bilong Bible?
2 Samting wea barava important tumas insaed Bible nao theme bilong hem: wei for vindicatem olmaeti rul bilong God (wei wea hem fit for rul) thru long Kingdom bilong hem long heven. Jesus mekem datwan main point long ministry bilong hem. “Start long datfala taem Jesus hem go ahed for preach and sei: ‘Repent, iufala pipol, from kingdom bilong heven hem klosap kam nao.’ ” (Matthew 4:17) Hem showimaot wea long laef bilong iumi nao diswan shud stap, taem hem talem disfala encouragement: “So, go ahed for lukaotem firstaem kingdom and raeteous fasin bilong hem.” (Matthew 6:33) Hem showimaot tu wei wea hem important tumas taem hem lanem olketa follower bilong hem for prea long God: “Letem kingdom bilong iu kam. Letem will bilong iu kamap long earth, olsem long heven.”—Matthew 6:10.
Niu Rul Bilong Earth
3. Why nao Kingdom bilong God hem important tumas long iumi distaem?
3 Why nao Kingdom bilong God important tumas for olketa man? Bikos klosap nao hem bae duim samting wea bae changem for olowe wei for rul long disfala earth. Profesi long Daniel 2:44 hem sei: “Long taem bilong olketa king hia [wea rul distaem long earth] God bilong heven bae startim wanfala kingdom [wanfala gavman long heven] wea bae nating savve finis. And datfala kingdom bae no go long eni narafala pipol. Hem bae smasem and finisim evri kingdom hia [olketa gavman long earth], and hemseleva nao bae stap olowe.” Taem Kingdom bilong God long heven hem rul evribit, no enitaem moa olketa man bae kontrolem earth. Rul bilong man wea divaed and no mekem man satisfae bae hem samting bilong bifor.
4, 5. (a) Why nao Jesus hem best wan wea fit for King bilong Kingdom? (b) Wanem assignment nao Jesus bae garem klosap long future?
4 Main wan for rul insaed Kingdom long heven, anda long lead bilong Jehovah, hem nao datwan wea barava fit—Christ Jesus. Bifor hem kam long earth, hem stap long heven olsem “nambawan wakman” bilong God, from hem nao first long evri creation bilong God. (Proverbs 8:22-31) “Hem image bilong God wea iumi no savve lukim, hem firstborn bilong evri creation; bikos thru long hem evri narafala samting kamap long heven and long earth.” (Colossians 1:15, 16) And taem God sendem Jesus long earth, hem duim will bilong God long evritaem. Hem go ahed strong taem hem kasem olketa barava hardfala test and hem dae faithful long Dadi bilong hem.—John 4:34; 15:10.
5 From hem loyal long God go kasem dae, Jesus kasem reward. God resurrectim hem go long heven and givim hem raet for kamap King long Kingdom bilong heven. (Acts 2:32-36) Olsem King bilong datfala Kingdom, Christ Jesus bae garem bigfala assignment from God for leadim staka strongfala spirit angel for aotem rul bilong man from earth and aotem wicked fasin from world bilong iumi. (Proverbs 2:21, 22; 2 Thessalonians 1:6-9; Revelation 19:11-21; 20:1-3) Then Kingdom bilong God long heven anda long Christ bae hem niu paoa wea rul, only gavman ovarem full earth.—Revelation 11:15.
6. Wanem kaen rul nao iumi savve expectim from King bilong Kingdom?
6 Word bilong God sei olsem abaotem niu Ruler bilong earth: “Hem kasem paoa for rul and honor and kingdom, mekem evri pipol, nation and languis mas servem hem.” (Daniel 7:14) Bikos Jesus bae followim love bilong God, peace and hapi anda long rul bilong hem bae barava big. (Matthew 5:5; John 3:16; 1 John 4:7-10) “Kamap planti bilong gavman bilong hem and peace bae no savve finis, . . . for strongim datwan witim justice and witim raeteous fasin.” (Isaiah 9:7, Revised Standard Version) Hem bae nambawan blessing for garem Ruler wea rul witim love, justice, and raeteous fasin! Dastawe 2 Peter 3:13 sei olsem: “Iumi weitim niu heven [Kingdom bilong God long heven] and niu earth [niu community long earth] olsem hem promisim, wea raeteous fasin bae stap.”
7. Hao nao Matthew 24:14 hem go ahed for fulfill distaem?
7 Tru nao, Kingdom bilong God nao hem best nius for evriwan wea lovem stret samting. Dastawe, olsem part bilong saen wea iumi distaem stap insaed “olketa last day” bilong disfala wicked system, Jesus talem profesi olsem: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” (2 Timothy 3:1-5; Matthew 24:14) Datfala profesi hem go ahed fulfill distaem, taem samting olsem six million Witness bilong Jehovah long 234 kantri iusim winim wan billion hour evri year for talem nara pipol abaotem Kingdom bilong God. Dastawe nem bilong ples for worship bilong 90,000 kongregeson evriwea long world hem Kingdom Hall. Long there pipol kam for lane abaotem niu gavman wea bae kam.
Olketa wea Rul Witim
8, 9. (a) Sekson wea bae rul witim Christ kam from wea? (b) Wanem trust nao iumi savve garem long rul bilong datfala King and sekson wea bae rul witim hem?
8 Samfala bae rul witim Christ Jesus insaed Kingdom bilong God long heven. Revelation 14:1-4 talem profesi hao 144,000 man bae “hem baem from earth” and resurrect for laef long heven. Insaed sekson hia hem olketa man and woman wea nara pipol no servem olketa, bat olketa nao servem God and nara pipol long hambol wei. “Olketa bae kamap priest bilong God and bilong Christ, and bae rul olsem king witim hem for datfala thousand year.” (Revelation 20:6) Namba bilong olketa hem moa smol winim datfala “big crowd, wea no eni man savve kaontem, wea kamaot from evri nation and tribe and pipol and languis” wea bae winim end bilong disfala system. Olketa hia tu givim long God “holy service . . . day and naet,” bat olketa no garem hope for go long heven. (Revelation 7:9, 15) Olketa kamap faondeson bilong niu earth olsem pipol wea stap anda long Kingdom bilong God long heven.—Psalm 37:29; John 10:16.
9 Taem hem chusim olketa wea bae rul witim Christ long heven, Jehovah chusim olketa faithful man wea experiencem enikaen problem long living. Olketa king-priest hia experiencem klosap evri samting wea kasem pipol. So laef bilong olketa long earth bae barava helpem wei wea olketa rul ovarem olketa man. Jesus seleva tu “lanem fasin for obey from olketa samting wea mekem hem safa.” (Hebrews 5:8) Aposol Paul sei olsem abaotem hem: “Iumi garem olsem hae priest, no man wea no feel sorre long olketa wik point bilong iumi, bat man wea kasem test long evri wei olsem iumi, bat hem no garem sin.” (Hebrews 4:15) Iumi barava kasem comfort for savve hao insaed raeteous niu world bilong God, pipol bae stap anda long rul bilong olketa loving king and priest wea minim olketa!
Waswe, Kingdom Hem Insaed Purpose Bilong God?
10. Why nao Kingdom bilong heven no part long firstfala purpose bilong God?
10 Waswe, Kingdom long heven hem part long firstfala purpose bilong God taem hem creatim Adam and Eve? Long story bilong Genesis abaotem creation, no eni samting stap abaotem wanfala Kingdom wea bae rulim olketa man. Jehovah seleva nao Ruler bilong olketa, and sapos olketa obeyim hem, no eni need stap for narafala rul. Genesis chapter 1 showimaot hao Jehovah, maet thru long firstborn Son bilong hem long heven, hem deal witim Adam and Eve. Datfala story iusim olketa toktok olsem “God hem sei long tufala” and “God hem sei moa” long tufala.—Genesis 1:28, 29; John 1:1.
11. Wanem perfect start nao olketa man kasem?
11 Bible hem sei: “God lukim evri samting wea hem wakem and, lukim! hem gud tumas.” (Genesis 1:31) Evri samting insaed long garden bilong Eden hem perfect evribit. Adam and Eve stap insaed wanfala paradaes. Tufala garem perfect mind and perfect body. Tufala savve story tugeta witim Man wea mekem tufala and hem witim tufala. And sapos tufala go ahed for faithful, tufala bae bornem perfect pikinini. No eni need stap for wanfala niu gavman long heven.
12, 13. Taem olketa perfect man kamap staka, why nao bae God still fit for story witim olketa?
12 Taem famili bilong man kamap moa big, hao nao bae God story witim evriwan long olketa? Tingim olketa star bilong heven. Olketa stap insaed olketa island universe grup wea garem nem galaxies. Samfala galaxies garem wan billion star. Samfala narawan garem wan thousand billion star. And olketa scientist sei samting olsem 100 billion galaxies nao stap long universe wea olketa savve lukim! Nomata olsem, Creator hem sei: “Luk go ap and lukim. Hu nao creatim evri samting hia? Hem nao Datwan wea tekem kam army bilong olketa and nambarem tu, and kolem evriwan long nem bilong olketa. From hem garem staka akson paoa, and hem iusim tumas paoa tu, no eniwan long olketa hia hem lus.”—Isaiah 40:26.
13 From God savve rememberim evri samting long heven, hem bae no problem for hem rememberim olketa man wea no staka tumas olsem. Nomata distaem, planti million servant bilong hem prea long hem evriday. Olketa prea hia go kasem God semtaem. So for story witim evri man wea perfect bae no hard for hem. Hem no needim wanfala Kingdom long heven for rememberim olketa. Hem nambawan arrangement—for garem Jehovah olsem Ruler, for story stret witim hem, and for garem hope for nating dae, laef olowe long wanfala paradaes earth!
“Hem No Bilong Man”
14. Why nao olketa man bae olowe needim rul bilong Jehovah?
14 Nomata olsem, olketa man—nomata olketa perfect—bae needim rul bilong Jehovah for olowe. Why nao olsem? Bikos Jehovah no creatim olketa witim savve for rul seleva long gud wei. Datwan hem wanfala law bilong olketa man, olsem profet Jeremiah talem: “Mi savve, O Jehovah, wei bilong man hem no bilong hem. Hem no bilong man wea wakabaot for disaedem gogo bilong hem. Stretem mi, O Jehovah.” (Jeremiah 10:23, 24) Hem bae krangge samting for olketa man ting olketa savve rulim pipol long gud wei and Jehovah no rulim olketa. Bae hem againstim wei wea hem creatim olketa. Wei for independent from rul bilong Jehovah bae, iumi no daotem, lead go for selfish fasin, heit, raf fasin, war, and dae. ‘Man bae bossim man and spoelem hem.’—Ecclesiastes 8:9.
15. Wanem nao olketa samting wea kamaot from nogud wei for chus wea first dadi and mami bilong iumi duim?
15 Sorre tumas, first dadi and mami bilong iumi disaed tufala no needim God olsem Ruler bilong tufala, and tufala chus for stap independent from hem. Samting wea kamaot from diswan nao God no saportim tufala moa long perfect laef. Tufala kamap olsem wanfala electric machine wea olketa katem paoa long hem. So gogo, tufala bae slow daon and stop—long dae. Tufala kamap olsem wanfala pattern wea nogud, and tufala pasim nogud samting go long evri pikinini bilong tufala. (Romans 5:12) “Datfala Rok [Jehovah], waka bilong hem perfect, from evri wei bilong hem followim justice. . . . Olketa seleva nao duim nogud samting; olketa no pikinini bilong hem, nogud samting hem bilong olketa seleva.” (Deuteronomy 32:4, 5) Hem tru, datfala bighed spirit angel wea kamap Satan nao hem bihaenem Adam and Eve, bat tufala garem perfect mind and fit for rejectim olketa rong idea bilong hem.—Genesis 3:1-19; James 4:7.
16. Hao nao history showimaot samting wea kamaot from wei for independent from God?
16 History barava showimaot klia samting wea kamaot from wei for independent from God. For planti thousand year, pipol traem enikaen gavman bilong man, evri system saed long selen and living. Nomata olsem, wicked fasin go ahed for “kamap worse.” (2 Timothy 3:13) Mek-20 century pruvim datwan. Hem fulap witim nogud fasin for heit, barava raf fasin, war, hangre, poor living, and safa winim eni narataem long history. And nomata olketa muv ahed long medical saed, gogo evriwan dae nomoa. (Ecclesiastes 9:5, 10) Taem olketa trae for leadim gogo bilong olketa seleva, man openem wei for Satan and olketa demon bilong hem for isi for attakim olketa, long barava bigfala wei dastawe Bible kolem Satan “god bilong disfala system.”—2 Corinthians 4:4.
Present Bilong Free Will
17. Hao nao man shud iusim present bilong free will?
17 Why nao Jehovah bae letem olketa man gogo followim olketa seleva? Bikos hem creatim olketa witim nambawan present bilong free will, freedom for chus. Aposol Paul hem sei: “Ples wea spirit bilong Jehovah hem stap, freedom hem stap.” (2 Corinthians 3:17) No eniwan laek for olsem machine, wea narawan nao disaedem evri samting wea hem bae talem and duim long evriday. Bat Jehovah laekem olketa man for iusim present bilong free will long gudfala wei, for lukim wei wea hem wise for duim will bilong hem and stap anda long hem. (Galatians 5:13) So hem no wei for free evribit, bikos datwan bae mekem evri samting olabaot. Olketa mas iusim diswan insaed long olketa spialaen bilong olketa gudfala law bilong God.
18. Wanem nao God showimaot taem hem letem man iusim freedom for chus?
18 Wei wea God letem famili bilong man followim gogo bilong hemseleva showimaot evribit hao iumi needim rul bilong hem. Wei bilong hem for rul, olmaeti rul bilong hem, hem nomoa stretfala wei. Hem mekem man barava hapi, satisfae, and garem gud living. Diswan hem bikos Jehovah planim mind and body bilong iumi for waka best taem hem followim olketa law bilong hem. “Mi, Jehovah, mi nao God bilong iufala, Datwan wea teachim iufala for helpem iufala seleva, Datwan wea mekem iufala followim road wea iufala mas wakabaot long hem.” (Isaiah 48:17) Freedom for chus insaed long olketa spialaen bilong olketa law bilong God bae hem no hevi bat bae gogo man garem difren kaen kaikai, haos, art, and music. Sapos man iusim long stret wei, free will bae mekem hem garem barava naesfala living long paradaes earth.
19. Wanem samting nao God iusim for mekem olketa man fren bak moa witim hem?
19 Bat bikos olketa chus rong, olketa man mekem olketa seleva go farawe from Jehovah, and from diswan olketa kamap no perfect, gogo daon, and dae. So olketa bae needim samwan for baem bak olketa from datfala nogud samting and kamap fren moa witim God olsem olketa son and dota bilong hem. Samting wea God chusim for duim diswan nao hem datfala Kingdom, and Man for baem bak olketa nao hem Jesus Christ. (John 3:16) Thru long disfala arrangement, olketa wea barava repent—olsem datfala olabaot son long tokpiksa bilong Jesus—bae fren bak moa witim God wea bae acceptim olketa olsem pikinini bilong hem.—Luke 15:11-24; Romans 8:21; 2 Corinthians 6:18.
20. Hao nao Kingdom bae fulfillim purpose bilong God?
20 No eni daot stap hao will bilong Jehovah bae fulfill long earth. (Isaiah 14:24, 27; 55:11) Thru long Kingdom bilong hem anda long Christ, God bae vindicatem evribit (givim reason or pruvim) wei wea hem nao fit for Sovereign bilong iumi. Datfala Kingdom bae finisim rul bilong man and demon ovarem disfala earth, and hem nomoa bae rul from heven for wan thousand year. (Romans 16:20; Revelation 20:1-6) Bat long datfala taem, hao nao pipol bae lukim wei wea rul bilong Jehovah nao hem moa hae? And bihaen datfala thousand year, wanem waka nao Kingdom bae duim? Nextfala article bae storyim olketa kwestin hia.
Olketa Point for Review
• Wanem nao theme bilong Bible?
• Hu nao insaed long niu rul bilong earth?
• Why nao rul bilong man wea independent from God hem nating savve win?
• Hao nao man mas iusim free will?
[Olketa Kwestin]
[Piksa long page 10]
Teaching bilong Jesus strongim rul bilong God thru long datfala Kingdom
[Piksa long page 12]
Long evri land Olketa Jehovah’s Witness mekem Kingdom kamap main teaching bilong olketa
[Piksa long page 14]
History showimaot olketa nogud samting wea kamaot from wei for independent from God
[Credit Line]
WWI soldia: U.S. National Archives photo; concentration camp: Oświęcim Museum; pikinini: UN PHOTO 186156/J. Isaac