Kwestin From Reader

For fitim olketa Bible komand long hao for iusim blood, wanem nao tingting bilong Olketa Jehovah’s Witness abaotem olketa difren wei wea medical savve iusim blood bilong man seleva?

Winim wei for disaedem diswan long saed bilong wanem man seleva laekem or tingting bilong medical, evri Christian mas tingting gud long wanem Bible talem. Hem samting midolwan long hem and Jehovah.

Jehovah, wea givim iumi laef, mekem law wea sei man no fit for kaikaim blood. (Genesis 9:3, 4) Long Law for Israel bifor, God stopem olketa for iusim blood olabaot bikos hem piksarem laef. Hem talem: “Soul [or laef] bilong flesh hem insaed long blood, and miseleva nao putim antap long altar for iufala for kavarem sin bilong soul bilong iufala.” Waswe sapos wanfala man killim wanfala animal for kaikai? God hem sei: “Hem mas pourimaot blood bilong hem [animal] and kavarem witim dust.” * (Leviticus 17:11, 13) Jehovah repeatim disfala komand planti taem. (Deuteronomy 12:16, 24; 15:23) Jewish Soncino Chumash talem: “Mas no keepim eni blood bat mas mekem kamap nogud for iusim long wei for pourimaot long graon.” No eni man long Israel savve kasem, keepim, and iusim blood bilong nara laef, from laef bilong datwan hem bilong God.

Responsibility for keepim Law Bilong Moses hem finis taem Messiah hem dae. Bat, tingting bilong God hao blood hem holy tumas hem stap yet. Holy spirit bilong God muvim olketa aposol for talem olketa Christian ‘for stap klia from blood.’ Hem no fitim for ting smol long datfala komand. Long saed long fasin hem important olsem wei for stap klia from dirty fasin or idol worship. (Acts 15:28, 29; 21:25) Taem wei for givim and kasem blood transfusion hem kamap big tumas long mek-20 century, Olketa Jehovah’s Witness minim hao diskaen wei hem againstim Word bilong God. *

Samfala taem, wanfala doctor maet askem wanfala sikman for givim samfala blood bilong hemseleva tu-thri week bifor hem kasem operation (preoperative autologous blood donation, or PAD) mekem sapos need hem kamap, hem savve givim blood transfusion long sikman witim blood wea hem givim finis. Bat, wei for hipimap, keepim, and givim blood transfusion hem againstim toktok wea stap long Leviticus and Deuteronomy. Hem no fitim for keepim blood; hem shud pourimaot—olsem hem go bak long God. Hem tru, Law Bilong Moses no go ahed long disfala taem. Nomata olsem, Olketa Jehovah’s Witness respectim olketa principle wea  stap insaed, and olketa disaed strong for ‘stap klia from blood.’ Dastawe, iumi no givim blood, and iumi no keepim blood for transfusion from hem shud ‘pourimaot.’ Kaen wei olsem hem againstim law bilong God.

Samfala nara wei or test wea iusim blood bilong man seleva hem no barava againstim olketa principle wea God talemaot finis. Olsem example, planti Christian letem olketa for aotem samfala blood bilong olketa for olketa testim or lukluk gud long hem, wea bihaen olketa torowem blood hia. Maet wanfala doctor talem samfala nara wei wea hem moa hard wea iusim blood bilong man seleva.

Olsem example, midolwan long samfala operation, olketa maet mekem blood go aotsaed long body for kasem treatment wea olketa kolem hemodilution. Olketa mekem blood wea stap yet long body kamap thin lelebet. Then bihaen, blood wea olketa mekem go aotsaed long body kam insaed long body moa, diswan mekem blood kaont bilong hem kamap gud lelebet. Long semkaen wei, olketa savve kasem and wakem blood wea kamaot from wanfala kill for kasem olketa red blood cell wea savve go bak long sikman; olketa kolem diswan cell salvage. Long wanfala difren wei, olketa maet mekem blood go long wanfala machine wea for lelebet taem hem duim waka wea olketa body organ savve duim evritaem (olsem example, heart, lung, or kidney). Then blood long machine hia go bak long sikman. Long samfala difren wei, olketa mekem blood go long machine wea separatem blood (centrifuge) mekem olketa savve aotem olketa part long blood wea nogud or garekil. Or maet olketa garem plan for tekaotem wanfala smol part wea insaed long blood for putim long nara part long body. Samfala test stap tu wea olketa aotem samfala blood and markem or mixim witim medicine, and then olketa putim go bak insaed long sikman.

Hao olketa duim maet difren, and samfala niu wei, treatment, and test mas kamap. Hem no responsibility bilong mifala for lukluk long evri difren samting and mekem disison. Wanfala Christian mas disaed seleva hao nao olketa bae iusim blood bilong hem long taem bilong wanfala operation, medical test, or treatment. Bifor hem letem eni samting olsem, hem shud kasem from doctor or technician olketa tru story abaotem wanem olketa bae duim witim blood bilong hem long taem olsem. Then hem mas disaed seleva wanem for duim fitim wanem conscience bilong hem letem. (Lukim box.)

Olketa Christian mas tingim tu dedication long God and responsibility for ‘lovem hem witim full heart bilong olketa, full soul, full strong, and full mind.’ (Luke 10:27) Long wei wea difren from staka long world, Olketa Jehovah’s Witness tinghae tumas long wei for fren gud witim God. Man Wea Givim Laef encouragem iumi for trust long blood bilong Jesus wea hem kapsaetem. Iumi read: “Thru long hem [Jesus Christ], iumi kamap free from ransom thru long blood bilong datwan, yes, wei for forgivim olketa sin bilong iumi.”—Ephesians 1:7.

[Olketa Footnote]

[Box/Piksa long page 31]

KWESTIN FOR ASKEM IUSELEVA

Sapos olketa bae mekem samfala blood bilong mi go aotsaed long body bilong mi and maet gogo bilong blood hia stop for lelebet taem, waswe, conscience bilong mi bae letem mi for tingim blood olsem part long mi yet, and diswan minim mi no need for ‘pourimaot long graon’?

Bae conscience bilong mi wea kasem training from Bible wari sapos olketa tekaotem samfala blood bilong mi midolwan long wanfala medical treatment, and then wakem, and putim go bak insaed (or antap) long body bilong mi?