Waswe, Iu Savve Kam Klosap Long Wanfala God wea Iu No Savve Lukim?

‘Hao nao mi savve mekem grow klos wei for fren witim samwan wea mi no savve lukim?’ iu maet ask. Maet luk olsem diswan hem stretfala kwestin for askem. Bat tingim:

WEI for lukim samting hem hao important winim wei for mekem grow wanfala loving and klos wei for fren olowe? Waswe, olketa samting wea man no savve lukim hem no important tu? Tru nao! From disfala reason samfala pipol mekem grow klos wei for fren witim narawan thru long olketa leta—long honest wei olketa talem insaed leta samting wea olketa laekem, samting wea olketa no laekem, olketa goal, principle, gudfala tingting, and olketa nara fasin or interest bilong olketa.

Blind pipol tu showimaot hao wei for lukluk hem no important samting for mekem grow wanfala klos wei for fren witim narawan. Tingim example bilong Edward and Gwen, wanfala hasband and waef wea blind. * Edward meetim Gwen, wanfala full-grown student, long wanfala skul for blind pipol. Hem tinghae tumas long fasin bilong Gwen, especially wei wea hem honest long toktok and fasin, and tingting bilong hem long waka. And, Gwen laekem tumas Edward bikos, olsem hem talem, “hem showimaot evri fasin wea from taem mi smol mi bilivim olketa important.” Tufala startim wei for fren, and thrifala year bihaen tufala marit.

“Taem iu stap tugeta,” Edward hem sei, “wei wea iu blind no mekem eni difren wei for buildimap wei for fren witim nara person. Maet iu no savve lukim narawan, bat feeling for minim samting hem no blind.” Distaem, 57 year bihaen, tufala still garem deep love for narawan. Tufala explainim hao secret for garem nambawan wei for fren stap insaed fofala samting: (1) luksavve long gud fasin bilong nara man, (2) ting abaotem and showimaot interest long olketa fasin hia, (3) keepim gud wei for story tugeta, and (4) duim samting tugeta.

Fofala point hia barava important long eni wei for fren gud tugeta, nomata midolwan olketa fren, olketa wea marit or, moa important, midolwan olketa man and God. Long article bihaen, bae iumi lukim hao wei for followim olketa point hia savve helpem iumi for mekem grow klos wei for fren witim God, nomata iumi no savve lukim hem. *

[Olketa Footnote]