Iumi Evriwan Needim Praise

HEM wanfala naes day for datfala smol girl. Nomata long olketa nara day hem need for kasem discipline, long disfala day hem barava gud. Bat, long evening, bihaen mami putim smol girl hia long bed, hem herem hem krae. Taem mami askem hem why nao hem krae, hem sei: “Waswe, mi no gud girl tuday?”

Kwestin hia barava sutim feeling bilong mami. Hem wei bilong disfala mami for kwiktaem stretem dota bilong hem. Bat long disfala day, mami no givim eni praise long hem, nomata hem lukim smol girl hia barava trae hard for obeyim hem.

Hem no olketa smol girl nomoa wea needim praise and encouragement. Iumi evriwan needim—olsem iumi needim tu kaonsel and samting for stretem iumi.

Hao nao iumi feel taem iumi kasem praise? Diswan tasim heart bilong iumi and mekem iumi feel hapi. Bae iumi feel olsem samwan kea for iumi and tinghae long samting wea iumi duim. Hem showimaot hao samting iumi duim hem gud, and hem muvim iumi for duim best bilong iumi moa long future. Hem no hard for minim why iumi tinghae long man wea kam long iumi for talem naes samting for encouragem and praisem iumi.—Proverbs 15:23.

Jesus Christ luksavve long disfala need for givim praise. Long datfala parabol abaotem olketa talent, master (wea piksarem Jesus seleva) givim naesfala praise long each wan long tufala faithful slave, taem hem sei: “Gud tumas, gudfala and faithful slave!” Datwan barava encouragem man! Nomata tufala no garem sem savve and no fit for duim sem samting, tufala kasem sem praise.—Matthew 25:19-23.

So iumi shud no forgetim mami bilong datfala smol girl. Iumi no need for weit for narawan krae bifor iumi givim praise long hem. Bat, iumi savve lukaotem eni chance for givim praise. Tru nao, iumi garem gudfala reason for givim praise long evri chance wea iumi garem.