“Keepim Fasin Bilong Iufala Gud Midolwan Long Olketa Nation”
“Keepim Fasin Bilong Iufala Gud Midolwan Long Olketa Nation”
“Honorim evri difren kaen man, garem love for full sekson bilong olketa brata.”—1 PETER 2:17.
1, 2. (a) Wanem nao wanfala niuspepa man sei abaotem Olketa Jehovah’s Witness? (b) Why nao Olketa Jehovah’s Witness trae hard for keepim olketa hae standard saed long fasin?
SAMFALA year bifor, wanfala niuspepa man long Amarillo, Texas, U.S.A., visitim olketa difren church long datfala area and then raetem wanfala report. Long tingting bilong hem, wanfala grup nao barava difren. Hem sei: “For thrifala year mi attendim olketa convention bilong Olketa Jehovah’s Witness long Amarillo Civic Center. Taem mi stap midol long olketa, mi no lukim eniwan smoke, drinkim beer, or tok swear. Datfala crowd hem klin, garem gudfala fasin, werem kaleko wea showimaot respect and hapi winim eni nara pipol wea mi meetim.” Planti taem pipol pablisim kaen koment olsem abaotem Olketa Jehovah’s Witness. Why nao difren pipol praisem olketa Witness planti taem?
2 Planti taem, pipol bilong God kasem praise for gudfala fasin bilong olketa. Nomata olketa standard long world gogo daon, Olketa Jehovah’s Witness tingim olketa hae standard saed long fasin olsem samting wea olketa mas duim, hem part long worship bilong olketa. Olketa savve hao samting wea olketa duim savve affectim tingting bilong pipol abaotem Jehovah and olketa Christian brata bilong olketa and hao gudfala fasin hem showimaot hao truth wea olketa preachim hem gudfala samting. (John 15:8; Titus 2:7, 8) So, hem gud for iumi lukluk long hao iumi savve keepim gudfala fasin and long wei olsem saportim gudfala nem bilong Jehovah and olketa Witness bilong hem, and tu, gudfala samting wea iumiseleva bae kasem from datwan.
Christian Famili
3. Olketa Christian famili needim protection from wanem?
3 Tingim fasin bilong iumi insaed long famili. Wanfala buk abaotem freedom bilong religion (Die Neuen Inquisitoren: Religionsfreiheit und Glaubensneid), wea Gerhard Besier and Erwin K. Scheuch raetem, hem sei: “[Olketa Jehovah’s Witness] ting long famili olsem samting for barava protectim.” Datfala toktok hem tru, and distaem famili needim protection from planti danger samting. Samfala pikinini “no obeyim dadi and mami” and samfala man and woman “no garem love” or “no savve kontrolem seleva.” (2 Timothy 3:2, 3) Raf fasin hem kamap insaed olketa famili, olketa dadi and mami spoelem or fail for lukaftarem olketa pikinini, and olketa pikinini bighed, iusim olketa drug, duim dirty fasin, or ranawe. Evri samting hia kamaot from nogud wei wea ‘spirit bilong disfala world’ affectim pipol. (Ephesians 2:1, 2) Iumi mas protectim famili bilong iumi from datfala spirit. Hao? Long wei for followim kaonsel and direction bilong Jehovah for olketa famili member.
4. Wanem nao olketa responsibility wea olketa Christian famili member garem long each other?
4 Olketa Christian hasband and waef luksavve hao olketa garem responsibility long each other saed long feeling, physical need and long spiritual wei. (1 Corinthians 7:3-5; Ephesians 5:21-23; 1 Peter 3:7) Christian parents garem samfala important responsibility saed long olketa pikinini. (Proverbs 22:6; 2 Corinthians 12:14; Ephesians 6:4) And taem olketa pikinini insaed Christian famili kamap moa big, olketa lane hao olketa tu garem samfala responsibility. (Proverbs 1:8, 9; 23:22; Ephesians 6:1; 1 Timothy 5:3, 4, 8) For fulfillim olketa responsibility insaed famili, olketa famili member mas disaed strong, waka hard, and garem spirit for sakrifaesim seleva and love. Bat, taem olketa famili member fulfillim responsibility wea God markem for olketa, olketa givim gud samting long each other and long kongregeson. Samting wea important winim datwan, olketa honorim Man wea Startim famili, Jehovah God.—Genesis 1:27, 28; Ephesians 3:15.
Bigfala Christian Famili
5. Wanem nao olketa blessing wea iumi savve kasem from iumi kaban witim olketa Christian brata?
5 Iumi olketa Christian garem olketa responsibility tu long olketa Christian brata insaed kongregeson and long evriwan insaed “full sekson bilong olketa brata. . . long world.” (1 Peter 5:9) Wei wea iumi part bilong kongregeson hem barava important for spiritual health bilong iumi. Taem iumi kaban witim olketa Christian brata, iumi kasem encouragement and gudfala spiritual kaikai from “faithful and wise slave.” (Matthew 24:45-47) Sapos iumi garem olketa problem, iumi savve go long olketa brata for kasem gudfala advaes wea garem faondeson long olketa Bible principle. (Proverbs 17:17; Ecclesiastes 4:9; James 5:13-18) Taem iumi garem need, olketa brata bilong iumi no lusim iumi. Hem wanfala blessing for stap insaed organization bilong God!
6. Hao nao Paul showimaot iumi garem olketa responsibility long olketa nara Christian?
6 Nomata olsem, iumi no stap insaed kongregeson for kasem samting nomoa; iumi garem responsibility for givim samting tu. Jesus hem sei: “Moa hapi kamaot from wei for give winim wei for kasem.” (Acts 20:35) Aposol Paul hem mekhae long fasin for willing for give taem hem raet: “Iumi mas go ahed for hol strong long wei for talemaot long pablik hope bilong iumi and no garem daot, from man wea promisim diswan hem faithful. And iumi mas tingim and muvim each other for showimaot love and gudfala waka, no lusim wei for hipap tugeta, olsem fasin bilong samfala, bat encouragem each other, and duim long bigfala wei moa taem iufala lukim datfala day hem kam klosap.”—Hebrews 10:23-25.
7, 8. Hao nao iumi showimaot fasin for give insaed kongregeson bilong iumi and long olketa Christian long olketa nara kantri?
7 Iumi ‘talemaot hope bilong iumi’ insaed long kongregeson taem iumi givim koment long meeting or tekpart long program. Taem iumi duim olsem hem barava encouragem olketa brata bilong iumi. Iumi encouragem olketa tu taem iumi story tugeta bifor and bihaen long meeting. Long dat taem nao iumi savve strongim olketa wea wik, tok kaen long olketa wea feel sorre, and comfortim olketa wea sik. (1 Thessalonians 5:14) Olketa tru Christian no hol bak for give long wei olsem, dastawe long firstaem wea olketa niu wan kam long meeting olketa barava sapraes long love wea olketa lukim midolwan long iumi.—Psalm 37:21; John 15:12; 1 Corinthians 14:25.
8 Nomata olsem, iumi no showimaot love insaed long kongregeson bilong iumi nomoa. Iumi lovem olketa brata bilong iumi raonem full world. Olsem example, planti Kingdom Hall garem contribution box for Kingdom Hall Fund. Maet iumi garem naesfala Kingdom Hall, bat iumi savve hao planti thousand brata bilong iumi long olketa nara kantri no garem gudfala ples for hipap. Taem iumi givim contribution for Kingdom Hall Fund, iumi showimaot iumi lovem olketa nomata maet iumi no savve long olketa wanwan.
9. Wanem nao main reason why Olketa Jehovah’s Witness lovem each ?
9 Why nao Olketa Jehovah’s Witness lovem each other? Jesus komandim olketa for duim olsem. (John 15:17) And wei wea olketa lovem each other hem pruvim spirit bilong God hem stap long olketa wanwan and olsem wanfala grup. Love hem part bilong “olketa frut bilong spirit.” (Galatians 5:22, 23) Taem Olketa Jehovah’s Witness studyim Bible, attendim olketa Christian meeting, and evritaem prea long God, hem kamap wei bilong olketa for showimaot love nomata insaed disfala world wea ‘love bilong planti pipol hem kamap cold.’—Matthew 24:12.
Wei wea Iumi Deal Witim Disfala World
10. Iumi garem wanem responsibility long disfala world?
10 Taem Paul hem storyim ‘wei wea iumi talemaot long pablik hope bilong iumi,’ hem remindim iumi abaotem nara responsibility bilong iumi. Insaed wei for talemaot hope bilong iumi long pablik hem disfala waka for preachim gud nius long pipol wea no kamap olketa brata bilong iumi yet. (Matthew 24:14; 28:19, 20; Romans 10:9, 10, 13-15) Preaching waka hia hem nara wei wea iumi savve give long pipol. For share insaed disfala waka needim taem, strong, wei for prepare, training, and material samting bilong iumi. Bat, Paul hem raet tu: “Long olketa Greek and long olketa Heathen, long olketa wise man and long olketa man wea no tingting gud mi garem kaon: so mi barava interest for talemaot gud nius long iufala tu wea stap long Rome.” (Romans 1:14, 15) Olsem Paul, iumi mas no hol bak taem iumi peim disfala “kaon.”
11. Wanem nao tufala Bible principle wea affectim wei wea iumi deal witim disfala world, bat nomata olsem, iumi luksavve long wanem?
11 Waswe, iumi garem samfala nara responsibility long pipol wea no olketa Christian brata bilong iumi? Barava nao. Iumi luksavve hao “full world hem stap long paoa bilong wicked wan.” (1 John 5:19) Iumi savve Jesus sei olsem abaotem olketa disaepol bilong hem: “Olketa no part bilong world, olsem mi tu no part bilong world.” Nomata olsem, iumi stap long disfala world, kasem selen for living bilong iumi, and samfala nara samting wea world provaedem. (John 17:11, 15, 16) So iumi garem samfala responsibility long disfala world. Long wanem wei? Aposol Peter ansarem datfala kwestin. No longtaem bifor Jerusalem hem distroe, hem raetem wanfala leta long olketa Christian long Asia Minor, and wanfala part long datfala leta helpem iumi for balance long wei wea iumi deal witim disfala world.
12. Long wanem wei nao olketa Christian olsem “stranger and pipol wea stap for lelebet taem,” and olketa mas stap klia from wanem?
12 First samting, Peter hem sei: “Olketa wea mi lovem, mi encouragem iufala wea olsem stranger and pipol wea stap for lelebet taem for go ahed for stap klia from olketa samting wea body wantem, wea olketa nao go ahed for faet againstim soul.” (1 Peter 2:11) Long spiritual wei olketa tru Christian olsem olketa “stranger and pipol wea stap for lelebet taem” bikos main important samting long laef bilong olketa hem datfala hope bilong laef olowe—long heven for olketa wea spirit anointim and long wanfala paradaes earth long future for olketa “nara sheep.” (John 10:16; Philippians 3:20, 21; Hebrews 11:13; Revelation 7:9, 14-17) Bat, wanem nao olketa samting wea body wantem? Olketa nao kaen samting olsem wei for laek kamap rich, garem bignem, feeling for laekem dirty fasin, and olketa nara feeling wea Bible kolem “fasin for jealous” and “fasin for kavet.”—Colossians 3:5; 1 Timothy 6:4, 9; 1 John 2:15, 16.
13. Hao nao samting wea body wantem hem “go ahed for faet againstim soul” bilong iumi?
13 Kaen samting olsem wea body wantem barava “go ahed for faet againstim soul” bilong iumi. Samting olsem savve spoelem wei wea iumi fren witim God and long wei olsem putim Christian hope bilong iumi (“soul,” or laef bilong iumi) long danger. Olsem example, sapos iumi mekem grow wei for interest long dirty fasin, hao nao iumi savve givim iumiseleva “olsem sakrifaes wea laef, holy, wea God acceptim”? Sapos iumi foldaon long trap for lovem tumas material samting, waswe, iumi “lukaotem firstaem kingdom”? (Romans 12:1, 2; Matthew 6:33; 1 Timothy 6:17-19) Beta wei, hem for followim example bilong Moses wea rejectim samting bilong disfala world wea savve switim man, and putim service bilong iumi long Jehovah firstaem long laef bilong iumi. (Matthew 6:19, 20; Hebrews 11:24-26) Datwan hem important samting for helpem iumi deal witim world long balance wei.
‘Keepim Gudfala Fasin’
14. Why nao iumi olketa Christian trae hard for keepim gudfala fasin?
14 Nextfala toktok bilong Peter talem narafala important instruction for helpem iumi: “Keepim fasin bilong iufala gud midolwan long olketa nation, mekem, long samting wea olketa tok againstim iufala olsem nogud pipol, olketa savve lukim gudfala waka bilong iufala and givim glory long God long day for hem judgem pipol.” (1 Peter 2:12) Iumi olketa Christian trae hard for kamap gudfala example. Iumi trae hard long skul. Iumi waka hard and honest long wakples bilong iumi—nomata sapos iumi garem hard boss. Taem olketa famili member garem difren religion, Witness hasband or waef hem barava trae hard for followim olketa Christian principle. Hem no isi evritaem, bat iumi savve hao Jehovah hem hapi long gudfala fasin bilong iumi and planti taem datwan savve affectim long gudfala wei olketa wea no olketa Witness.—1 Peter 2:18-20; 3:1.
15. Hao nao iumi savve pipol evriwea luksavve long hae standard bilong Olketa Jehovah’s Witness saed long fasin?
15 Olketa koment long niuspepa long olketa year wea go pas showimaot planti Jehovah’s Witness win for keepim olketa gudfala standard. Olsem example, Il Tempo, niuspepa from Italy hem sei: “Pipol wea waka witim Olketa Jehovah’s Witness talem hao olketa honest, barava strong long faith bilong olketa, wea maet luk olsem olketa ova tumas long hem; nomata olsem, olketa fit for kasem respect for faithful fasin bilong olketa.” Herald niuspepa from Buenos Aires, Argentina, hem sei: “Long olketa year wea go pas hem showaot klia hao Olketa Jehovah’s Witness olketa citizen wea waka hard, tingting gud, iusim selen long gudfala wei, and fraet long God.” Savveman from Russia, Sergei Ivanenko hem sei: “Long full world pipol savve long Olketa Jehovah’s Witness olsem pipol wea barava obeyim law and especially for wei wea olketa faithful for peim tax.” Manager bilong wanfala stadium long Zimbabwe wea Olketa Jehovah’s Witness iusim for convention bilong olketa hem sei: “Mi lukim samfala Witness pikimap pepa and klinim olketa toilet. Stadium hem moa klin bihaen olketa iusim finis. Olketa teenager bilong iufala garem gudfala fasin. Mi laekem tumas for full world hem fulap witim Olketa Jehovah’s Witness.”
Christian Wei for Stap Anda
16. Long wanem wei nao iumi stap anda long olketa long world wea garem paoa, and why nao olsem?
16 Peter storyim tu wei wea iumi stap anda long olketa long world wea garem paoa. Hem sei: “For saed bilong Lord stap anda long evri man: nomata long wanfala king olsem man wea garem hae paoa or long olketa governor olsem man wea hem sendem kam for panisim olketa wea duim badfala samting bat for praisem olketa wea duim gudfala samting. Will bilong God hem for iufala duim gudfala samting mekem iufala stopem rabis toktok bilong olketa krangge man.” (1 Peter 2:13-15) Iumi thankiu for olketa gudfala samting wea iumi kasem from gavman, and followim instruction bilong Peter for obeyim olketa law and peim tax. Nomata iumi luksavve God givim raet long olketa gavman for panisim olketa wea brekem law, main reason for iumi stap anda long olketa wea garem paoa hem “for saed bilong Lord.” Hem will bilong God. And tu, iumi no laekem pipol tokdaonem nem bilong Jehovah from iumi brekem law and kasem panis.—Romans 13:1, 4-7; Titus 3:1; 1 Peter 3:17.
17. Taem olketa “krangge man” againstim iumi, iumi savve sure long wanem samting?
17 Sorre tumas, samfala “krangge man” wea garem paoa persecutim or againstim iumi long samfala nara wei—olsem wei for talem olketa laea story for spoelem gudfala nem bilong iumi. Nomata olsem, long taem wea Jehovah markem, hem showaot klia hao olketa laea nomoa, and diswan stopem “rabis toktok” bilong olketa. Record bilong gudfala Christian fasin bilong iumi mekem diswan klia. Dastawe, planti taem olketa bigman long gavman wea honest praisem wei wea iumi duim gudfala samting.—Romans 13:3; Titus 2:7, 8.
Olketa Slave Bilong God
18. Hao nao iumi olketa Christian savve stap klia long wei for iusim freedom bilong iumi long rong wei?
18 Next, Peter givim disfala warning: “Stap olsem free pipol, bat iusim freedom bilong iufala, no olsem excuse for duim nogud fasin, bat olsem olketa slave bilong God.” (1 Peter 2:16; Galatians 5:13) Distaem wei wea iumi savve long Bible truth hem mekem iumi free from olketa false teaching bilong religion. (John 8:32) And tu, iumi garem free will, and iumi savve chus. Nomata olsem, iumi no iusim freedom bilong iumi long rong wei. Taem iumi chusim samting saed long hu for kaban witim, kaleko, lukluk bilong iumi, hapitaem—and tu, kaikai and drink—iumi no forgetim hao olketa tru Christian olketa slave bilong God, no mekem olketa seleva nomoa hapi. Iumi chus for servem Jehovah and no kamap slave bilong samting wea body wantem or slave for followim stael samting bilong disfala world.—Galatians 5:24; 2 Timothy 2:22; Titus 2:11, 12.
19-21. (a) Hao nao iumi ting long olketa wea garem position bilong paoa long world? (b) Hao nao samfala showimaot “love for full sekson bilong olketa brata”? (c) Wanem nao responsibility bilong iumi wea moa important winim eni narawan?
19 Peter go ahed for sei: “Honorim evri difren kaen man, garem love for full sekson bilong olketa brata, fraet long God, garem honor for king.” (1 Peter 2:17) From Jehovah God letem olketa man for garem samfala position bilong paoa, iumi honorim olketa long wei wea fitim. Iumi savve prea abaotem olketa tu, mekem iumi savve free for go ahed duim ministry bilong iumi witim peace and love for God. (1 Timothy 2:1-4) Bat, long semtaem, iumi “garem love for full sekson bilong olketa brata.” Iumi duim evri samting for helpem, no spoelem, olketa Christian brata bilong iumi.
20 Olsem example, taem ethnic war barava spoelem wanfala kantri long Africa, Christian fasin bilong Olketa Jehovah’s Witness hem showaot klia. Datfala niuspepa Reformierte Presse from Switzerland hem sei: “Long 1995, African Rights . . . pruvim hao evri church tekpart [long datfala war], only Olketa Jehovah’s Witness nomoa no join insaed.” Taem nius abaotem datfala war kasem olketa nara kantri raonem world, Olketa Jehovah’s Witness long Europe kwiktaem sendem kaikai and medical help long olketa brata bilong olketa and nara pipol long datfala kantri. (Galatians 6:10) Olketa followim toktok bilong Proverbs 3:27: “No holem bak gudfala samting from olketa wea fit for kasem, sapos iu savve duim diswan.”
21 Bat, iumi garem wanfala responsibility wea moa important winim honor wea iumi mas givim for olketa wea garem paoa, and wea winim tu responsibility bilong iumi for lovem olketa brata. Wanem nao datwan? Peter hem sei: “Fraet long God.” Responsibility bilong iumi long Jehovah hem barava moa big winim responsibility bilong iumi long eni man. Hao nao datwan hem tru? And hao nao iumi savve balancem olketa responsibility bilong iumi long God witim responsibility bilong iumi long olketa wea garem paoa long world? Nextfala article bae ansarem olketa kwestin hia.
Waswe, Iu Remember?
• Wanem nao olketa responsibility bilong olketa Christian insaed famili?
• Hao nao iumi savve showimaot fasin for give insaed kongregeson?
• Iumi garem olketa wanem responsibility long disfala world?
• Wanem nao samfala gudfala samting iumi kasem from iumi garem olketa hae standard saed long fasin?
[Olketa Kwestin]
[Piksa long page 9]
Hao nao Christian famili savve kasem bigfala hapi?
[Olketa Piksa long page 10]
Why nao Olketa Jehovah’s Witness lovem each other?
[Olketa Piksa long page 10]
Waswe, iumi savve showimaot love for olketa brata nomata iumi no savve long olketa wanwan?