Kwestin From Reader

Waswe, hem rong for gambol sapos hem for winim lelebet selen nomoa?

Word bilong God no talem staka samting abaotem wei for gambol, bat hem talem inaf samting for man savve hao wei for gambol hem no fitim olketa Bible principle. * Olsem example, pipol evriwea savve wei for gambol hem encouragem man for greedy. Diswan seleva hem samting olketa Christian mas tinghevi long hem, bikos Bible sei “greedy pipol” bae no go insaed Kingdom bilong God and fasin for kavet hem olsem wei for worshipim idol.—1 Corinthians 6:9, 10; Colossians 3:5.

Wei for gambol hem encouragem tu bighed fasin and strongfala feeling for win wea savve spoelem man. Aposol Paul givim warning againstim olketa samting olsem taem hem raet: “Iumi mas no tinghae tumas long seleva, mekem feeling for winim narawan kamap, jealous long narawan.” (Galatians 5:26) And tu, wei for gambol hem encouragem wei for biliv long gud luck. Olketa wea gambol bilivim eni kaen difren kastom biliv from olketa hope for lucky. Olketa mekem iumi tingim olketa Israelite wea no faithful wea “redyim tebol for god bilong Gud Luck and wea fulimap wine wea olketa mixim for god bilong Gud Luck.”—Isaiah 65:11.

Samfala maet sei no eniting rong long wei for plei kura for lelebet selen witim olketa relative and fren. Hem tru, man wea plei for lelebet selen maet no tingim hemseleva olsem hem greedy, bighed, laek winim narawan, or hem duim spiritism. Nomata olsem, hao nao bae diswan affectim wan wea hem plei witim? Staka wea gambol evritaem olketa start for duim diswan long wei for plei ‘for enjoy nomoa.’ (Luke 16:10) Samting wea firstaem olketa tingim olsem gud samting nomoa hem gogo barava spoelem olketa.

Diswan hem moa tru saed long olketa pikinini. Staka pikinini hapi tumas taem olketa winim lelebet selen and hem mekem olketa for laek plei for selen wea moa big. (1 Timothy 6:10) Wanfala research showimaot klia hao wei for gambol hem samting wea man lanem taem hem young, “for winim or lusim lelebet selen nomoa from result bilong wanfala sports plei or kura witim olketa fren or relative.” Nara report hem sei “olketa pikinini start for gambol long haos, planti taem taem olketa plei card witim olketa famili and fren.” Disfala report sei moa hao “thirti percent long olketa pikinini wea gambol start for duim bifor olketa eleven year.” Datfala buk Why Do People Gamble Too Much—Pathological and Problem Gambling, talem hao staka teenager olketa gambol witim selen wea olketa kasem thru long criminal fasin or dirty fasin. Barava sorre samting wea kamaot from samting wea firstaem luk gud nomoa!

From iumi stap insaed wanfala world wea garem tumas trap and temptation, bae iumi no laek addim narawan! (Proverbs 27:12) Wei for gambol—witim or no witim olketa pikinini, for lelebet or big selen—putim spiritual living bilong iumi long danger and hem samting iumi shud stap klia long hem. Hem moabeta for olketa Christian wea enjoy for plei card or nara game olsem for raetem score or for plei for enjoy nomoa. Olketa wise Christian wea kea abaotem spiritual living bilong olketa seleva and bilong olketa fren and famili bilong olketa bae stap klia from wei for gambol—nomata for lelebet selen nomoa.

[Footnote]